රාමසඛඃ ක්වාපි දිනේ කාමද භගවන් ගතෝ භවාන් විපිනම් ।
සූනුභිරපි ගෝපානාං ධේනුභිරභිසංවෘතෝ ලසද්වේෂඃ ॥1॥
සංදර්ශයන් බලාය ස්වෛරං වෘංදාවනශ්රියං විමලාම් ।
කාංඩීරෛඃ සහ බාලෛර්භාංඩීරකමාගමෝ වටං ක්රීඩන් ॥2॥
තාවත්තාවකනිධනස්පෘහයාලුර්ගෝපමූර්තිරදයාලුඃ ।
දෛත්යඃ ප්රලංබනාමා ප්රලංබබාහුං භවංතමාපේදේ ॥3॥
ජානන්නප්යවිජානන්නිව තේන සමං නිබද්ධසෞහාර්දඃ ।
වටනිකටේ පටුපශුපව්යාබද්ධං ද්වංද්වයුද්ධමාරබ්ධාඃ ॥4॥
ගෝපාන් විභජ්ය තන්වන් සංඝං බලභද්රකං භවත්කමපි ।
ත්වද්බලභීරුං දෛත්යං ත්වද්බලගතමන්වමන්යථා භගවන් ॥5॥
කල්පිතවිජේතෘවහනේ සමරේ පරයූථගං ස්වදයිතතරම් ।
ශ්රීදාමානමධත්ථාඃ පරාජිතෝ භක්තදාසතාං ප්රථයන් ॥6॥
ඒවං බහුෂු විභූමන් බාලේෂු වහත්සු වාහ්යමානේෂු ।
රාමවිජිතඃ ප්රලංබෝ ජහාර තං දූරතෝ භවද්භීත්යා ॥7॥
ත්වද්දූරං ගමයංතං තං දෘෂ්ට්වා හලිනි විහිතගරිමභරේ ।
දෛත්යඃ ස්වරූපමාගාද්යද්රූපාත් ස හි බලෝऽපි චකිතෝऽභූත් ॥8॥
උච්චතයා දෛත්යතනෝස්ත්වන්මුඛමාලෝක්ය දූරතෝ රාමඃ ।
විගතභයෝ දෘඪමුෂ්ට්යා භෘශදුෂ්ටං සපදි පිෂ්ටවානේනම් ॥9॥
හත්වා දානවවීරං ප්රාප්තං බලමාලිලිංගිථ ප්රේම්ණා ।
තාවන්මිලතෝර්යුවයෝඃ ශිරසි කෘතා පුෂ්පවෘෂ්ටිරමරගණෛඃ ॥10॥
ආලංබෝ භුවනානාං ප්රාලංබං නිධනමේවමාරචයන් ।
කාලං විහාය සද්යෝ ලෝලංබරුචේ හරේ හරේඃ ක්ලේශාන් ॥11॥