ত্বদ্বপুর্নবকলাযকোমলং প্রেমদোহনমশেষমোহনম্ ।
ব্রহ্ম তত্ত্বপরচিন্মুদাত্মকং বীক্ষ্য সম্মুমুহুরন্বহং স্ত্রিযঃ ॥1॥
মন্মথোন্মথিতমানসাঃ ক্রমাত্ত্বদ্বিলোকনরতাস্ততস্ততঃ ।
গোপিকাস্তব ন সেহিরে হরে কাননোপগতিমপ্যহর্মুখে ॥2॥
নির্গতে ভবতি দত্তদৃষ্টযস্ত্বদ্গতেন মনসা মৃগেক্ষণাঃ ।
বেণুনাদমুপকর্ণ্য দূরতস্ত্বদ্বিলাসকথযাঽভিরেমিরে ॥3॥
কাননাংতমিতবান্ ভবানপি স্নিগ্ধপাদপতলে মনোরমে ।
ব্যত্যযাকলিতপাদমাস্থিতঃ প্রত্যপূরযত বেণুনালিকাম্ ॥4॥
মারবাণধুতখেচরীকুলং নির্বিকারপশুপক্ষিমংডলম্ ।
দ্রাবণং চ দৃষদামপি প্রভো তাবকং ব্যজনি বেণুকূজিতম্ ॥5॥
বেণুরংধ্রতরলাংগুলীদলং তালসংচলিতপাদপল্লবম্ ।
তত্ স্থিতং তব পরোক্ষমপ্যহো সংবিচিংত্য মুমুহুর্ব্রজাংগনাঃ ॥6॥
নির্বিশংকভবদংগদর্শিনীঃ খেচরীঃ খগমৃগান্ পশূনপি ।
ত্বত্পদপ্রণযি কাননং চ তাঃ ধন্যধন্যমিতি নন্বমানযন্ ॥7॥
আপিবেযমধরামৃতং কদা বেণুভুক্তরসশেষমেকদা ।
দূরতো বত কৃতং দুরাশযেত্যাকুলা মুহুরিমাঃ সমামুহন্ ॥8॥
প্রত্যহং চ পুনরিত্থমংগনাশ্চিত্তযোনিজনিতাদনুগ্রহাত্ ।
বদ্ধরাগবিবশাস্ত্বযি প্রভো নিত্যমাপুরিহ কৃত্যমূঢতাম্ ॥9॥
রাগস্তাবজ্জাযতে হি স্বভাবা-
ন্মোক্ষোপাযো যত্নতঃ স্যান্ন বা স্যাত্ ।
তাসাং ত্বেকং তদ্দ্বযং লব্ধমাসীত্
ভাগ্যং ভাগ্যং পাহি মাং মারুতেশ ॥10॥