tataścha vṛndāvanatō’tidūratō
vanaṃ gatastvaṃ khalu gōpagōkulaiḥ ।
hṛdantarē bhaktataradvijāṅganā-
kadambakānugrahaṇāgrahaṃ vahan ॥1॥
tatō nirīkṣyāśaraṇē vanāntarē
kiśōralōkaṃ kṣudhitaṃ tṛṣākulam ।
adūratō yajñaparān dvijān prati
vyasarjayō dīdiviyāchanāya tān ॥2॥
gatēṣvathō tēṣvabhidhāya tē’bhidhāṃ
kumārakēṣvōdanayāchiṣu prabhō ।
śrutisthirā apyabhininyuraśrutiṃ
na kiñchidūchuścha mahīsurōttamāḥ ॥3॥
anādarāt khinnadhiyō hi bālakāḥ ।
samāyayuryuktamidaṃ hi yajvasu ।
chirādabhaktāḥ khalu tē mahīsurāḥ
kathaṃ hi bhaktaṃ tvayi taiḥ samarpyatē ॥4॥
nivēdayadhvaṃ gṛhiṇījanāya māṃ
diśēyurannaṃ karuṇākulā imāḥ ।
iti smitārdraṃ bhavatēritā gatā-
stē dārakā dārajanaṃ yayāchirē ॥5॥
gṛhītanāmni tvayi sambhramākulā-
śchaturvidhaṃ bhōjyarasaṃ pragṛhya tāḥ ।
chirandhṛtatvatpravilōkanāgrahāḥ
svakairniruddhā api tūrṇamāyayuḥ ॥6॥
vilōlapiñChaṃ chikurē kapōlayōḥ
samullasatkuṇḍalamārdramīkṣitē ।
nidhāya bāhuṃ suhṛdaṃsasīmani
sthitaṃ bhavantaṃ samalōkayanta tāḥ ॥7॥
tadā cha kāchittvadupāgamōdyatā
gṛhītahastā dayitēna yajvanā ।
tadaiva sañchintya bhavantamañjasā
vivēśa kaivalyamahō kṛtinyasau ॥8॥
ādāya bhōjyānyanugṛhya tāḥ puna-
stvadaṅgasaṅgaspṛhayōjjhatīrgṛham ।
vilōkya yajñāya visarjayannimā-
śchakartha bhartṛnapi tāsvagarhaṇān ॥9॥
nirūpya dōṣaṃ nijamaṅganājanē
vilōkya bhaktiṃ cha punarvichāribhiḥ
prabuddhatattvaistvamabhiṣṭutō dvijai-
rmarutpurādhīśa nirundhi mē gadān ॥10॥