দদৃশিরে কিল তত্ক্ষণমক্ষত-
স্তনিতজৃংভিতকংপিতদিক্তটাঃ ।
সুষমযা ভবদংগতুলাং গতা
ব্রজপদোপরি বারিধরাস্ত্বযা ॥1॥
বিপুলকরকমিশ্রৈস্তোযধারানিপাতৈ-
র্দিশিদিশি পশুপানাং মংডলে দংড্যমানে ।
কুপিতহরিকৃতান্নঃ পাহি পাহীতি তেষাং
বচনমজিত শ্রৃণ্বন্ মা বিভীতেত্যভাণীঃ ॥2॥
কুল ইহ খলু গোত্রো দৈবতং গোত্রশত্রো-
র্বিহতিমিহ স রুংধ্যাত্ কো নু বঃ সংশযোঽস্মিন্ ।
ইতি সহসিতবাদী দেব গোবর্দ্ধনাদ্রিং
ত্বরিতমুদমুমূলো মূলতো বালদোর্ভ্যাম্ ॥3॥
তদনু গিরিবরস্য প্রোদ্ধৃতস্যাস্য তাবত্
সিকতিলমৃদুদেশে দূরতো বারিতাপে ।
পরিকরপরিমিশ্রান্ ধেনুগোপানধস্তা-
দুপনিদধদধত্থা হস্তপদ্মেন শৈলম্ ॥4॥
ভবতি বিধৃতশৈলে বালিকাভির্বযস্যৈ-
রপি বিহিতবিলাসং কেলিলাপাদিলোলে ।
সবিধমিলিতধেনূরেকহস্তেন কংডূ-
যতি সতি পশুপালাস্তোষমৈষংত সর্বে ॥5॥
অতিমহান্ গিরিরেষ তু বামকে
করসরোরুহি তং ধরতে চিরম্ ।
কিমিদমদ্ভুতমদ্রিবলং ন্বিতি
ত্বদবলোকিভিরাকথি গোপকৈঃ ॥6॥
অহহ ধার্ষ্ট্যমমুষ্য বটোর্গিরিং
ব্যথিতবাহুরসাববরোপযেত্ ।
ইতি হরিস্ত্বযি বদ্ধবিগর্হণো
দিবসসপ্তকমুগ্রমবর্ষযত্ ॥7॥
অচলতি ত্বযি দেব পদাত্ পদং
গলিতসর্বজলে চ ঘনোত্করে ।
অপহৃতে মরুতা মরুতাং পতি-
স্ত্বদভিশংকিতধীঃ সমুপাদ্রবত্ ॥8॥
শমমুপেযুষি বর্ষভরে তদা
পশুপধেনুকুলে চ বিনির্গতে ।
ভুবি বিভো সমুপাহিতভূধরঃ
প্রমুদিতৈঃ পশুপৈঃ পরিরেভিষে ॥9॥
ধরণিমেব পুরা ধৃতবানসি
ক্ষিতিধরোদ্ধরণে তব কঃ শ্রমঃ ।
ইতি নুতস্ত্রিদশৈঃ কমলাপতে
গুরুপুরালয পালয মাং গদাত্ ॥10॥