ଆଲୋକ୍ୟ ଶୈଲୋଦ୍ଧରଣାଦିରୂପଂ ପ୍ରଭାଵମୁଚ୍ଚୈସ୍ତଵ ଗୋପଲୋକାଃ ।
ଵିଶ୍ଵେଶ୍ଵରଂ ତ୍ଵାମଭିମତ୍ୟ ଵିଶ୍ଵେ ନଂଦଂ ଭଵଜ୍ଜାତକମନ୍ଵପୃଚ୍ଛନ୍ ॥1॥
ଗର୍ଗୋଦିତୋ ନିର୍ଗଦିତୋ ନିଜାୟ ଵର୍ଗାୟ ତାତେନ ତଵ ପ୍ରଭାଵଃ ।
ପୂର୍ଵାଧିକସ୍ତ୍ଵୟ୍ୟନୁରାଗ ଏଷାମୈଧିଷ୍ଟ ତାଵତ୍ ବହୁମାନଭାରଃ ॥2॥
ତତୋଽଵମାନୋଦିତତତ୍ତ୍ଵବୋଧଃ ସୁରାଧିରାଜଃ ସହ ଦିଵ୍ୟଗଵ୍ୟା।
ଉପେତ୍ୟ ତୁଷ୍ଟାଵ ସ ନଷ୍ଟଗର୍ଵଃ ସ୍ପୃଷ୍ଟ୍ଵା ପଦାବ୍ଜଂ ମଣିମୌଲିନା ତେ ॥3॥
ସ୍ନେହସ୍ନୁତୈସ୍ତ୍ଵାଂ ସୁରଭିଃ ପୟୋଭିର୍ଗୋଵିଂଦନାମାଂକିତମଭ୍ୟଷିଂଚତ୍ ।
ଐରାଵତୋପାହୃତଦିଵ୍ୟଗଂଗାପାଥୋଭିରିଂଦ୍ରୋଽପି ଚ ଜାତହର୍ଷଃ ॥4॥
ଜଗତ୍ତ୍ରୟେଶେ ତ୍ଵୟି ଗୋକୁଲେଶେ ତଥାଽଭିଷିକ୍ତେ ସତି ଗୋପଵାଟଃ ।
ନାକେଽପି ଵୈକୁଂଠପଦେଽପ୍ୟଲଭ୍ୟାଂ ଶ୍ରିୟଂ ପ୍ରପେଦେ ଭଵତଃ ପ୍ରଭାଵାତ୍ ॥5॥
କଦାଚିଦଂତର୍ୟମୁନଂ ପ୍ରଭାତେ ସ୍ନାୟନ୍ ପିତା ଵାରୁଣପୂରୁଷେଣ ।
ନୀତସ୍ତମାନେତୁମଗାଃ ପୁରୀଂ ତ୍ଵଂ ତାଂ ଵାରୁଣୀଂ କାରଣମର୍ତ୍ୟରୂପଃ ॥6॥
ସସଂଭ୍ରମଂ ତେନ ଜଲାଧିପେନ ପ୍ରପୂଜିତସ୍ତ୍ଵଂ ପ୍ରତିଗୃହ୍ୟ ତାତମ୍ ।
ଉପାଗତସ୍ତତ୍କ୍ଷଣମାତ୍ମଗେହଂ ପିତାଽଵଦତ୍ତଚ୍ଚରିତଂ ନିଜେଭ୍ୟଃ ॥7॥
ହରିଂ ଵିନିଶ୍ଚିତ୍ୟ ଭଵଂତମେତାନ୍ ଭଵତ୍ପଦାଲୋକନବଦ୍ଧତୃଷ୍ଣାନ୍ ॥
ନିରୀକ୍ଷ୍ୟ ଵିଷ୍ଣୋ ପରମଂ ପଦଂ ତଦ୍ଦୁରାପମନ୍ୟୈସ୍ତ୍ଵମଦୀଦୃଶସ୍ତାନ୍ ॥8॥
ସ୍ଫୁରତ୍ପରାନଂଦରସପ୍ରଵାହପ୍ରପୂର୍ଣକୈଵଲ୍ୟମହାପୟୋଧୌ ।
ଚିରଂ ନିମଗ୍ନାଃ ଖଲୁ ଗୋପସଂଘାସ୍ତ୍ଵୟୈଵ ଭୂମନ୍ ପୁନରୁଦ୍ଧୃତାସ୍ତେ ॥9॥
କରବଦରଵଦେଵଂ ଦେଵ କୁତ୍ରାଵତାରେ
ନିଜପଦମନଵାପ୍ୟଂ ଦର୍ଶିତଂ ଭକ୍ତିଭାଜାମ୍ ।
ତଦିହ ପଶୁପରୂପୀ ତ୍ଵଂ ହି ସାକ୍ଷାତ୍ ପରାତ୍ମା
ପଵନପୁରନିଵାସିନ୍ ପାହି ମାମାମୟେଭ୍ୟଃ ॥10॥