gōpījanāya kathitaṃ niyamāvasānē
mārōtsavaṃ tvamatha sādhayituṃ pravṛttaḥ ।
sāndrēṇa chāndramahasā śiśirīkṛtāśē
prāpūrayō muralikāṃ yamunāvanāntē ॥1॥
sammūrChanābhiruditasvaramaṇḍalābhiḥ
sammūrChayantamakhilaṃ bhuvanāntarālam ।
tvadvēṇunādamupakarṇya vibhō taruṇya-
stattādṛśaṃ kamapi chittavimōhamāpuḥ ॥2॥
tā gēhakṛtyaniratāstanayaprasaktāḥ
kāntōpasēvanaparāścha sarōruhākṣyaḥ ।
sarvaṃ visṛjya muralīravamōhitāstē
kāntāradēśamayi kāntatanō samētāḥ ॥3॥
kāśchinnijāṅgaparibhūṣaṇamādadhānā
vēṇupraṇādamupakarṇya kṛtārdhabhūṣāḥ ।
tvāmāgatā nanu tathaiva vibhūṣitābhya-
stā ēva saṃruruchirē tava lōchanāya ॥4॥
hāraṃ nitambabhuvi kāchana dhārayantī
kāñchīṃ cha kaṇṭhabhuvi dēva samāgatā tvām ।
hāritvamātmajaghanasya mukunda tubhyaṃ
vyaktaṃ babhāṣa iva mugdhamukhī viśēṣāt ॥5॥
kāchit kuchē punarasajjitakañchulīkā
vyāmōhataḥ paravadhūbhiralakṣyamāṇā ।
tvāmāyayau nirupamapraṇayātibhāra-
rājyābhiṣēkavidhayē kalaśīdharēva ॥6॥
kāśchit gṛhāt kila nirētumapārayantya-
stvāmēva dēva hṛdayē sudṛḍhaṃ vibhāvya ।
dēhaṃ vidhūya parachitsukharūpamēkaṃ
tvāmāviśan paramimā nanu dhanyadhanyāḥ ॥7॥
jārātmanā na paramātmatayā smarantyō
nāryō gatāḥ paramahaṃsagatiṃ kṣaṇēna ।
taṃ tvāṃ prakāśaparamātmatanuṃ kathañchi-
chchittē vahannamṛtamaśramamaśnuvīya ॥8॥
abhyāgatābhirabhitō vrajasundarībhi-
rmugdhasmitārdravadanaḥ karuṇāvalōkī ।
nissīmakāntijaladhistvamavēkṣyamāṇō
viśvaikahṛdya hara mē pavanēśa rōgān ॥9॥