ଉପୟାତାନାଂ ସୁଦୃଶାଂ କୁସୁମାୟୁଧବାଣପାତଵିଵଶାନାମ୍ ।
ଅଭିଵାଂଛିତଂ ଵିଧାତୁଂ କୃତମତିରପି ତା ଜଗାଥ ଵାମମିଵ ॥1॥
ଗଗନଗତଂ ମୁନିନିଵହଂ ଶ୍ରାଵୟିତୁଂ ଜଗିଥ କୁଲଵଧୂଧର୍ମମ୍ ।
ଧର୍ମ୍ୟଂ ଖଲୁ ତେ ଵଚନଂ କର୍ମ ତୁ ନୋ ନିର୍ମଲସ୍ୟ ଵିଶ୍ଵାସ୍ୟମ୍ ॥2॥
ଆକର୍ଣ୍ୟ ତେ ପ୍ରତୀପାଂ ଵାଣୀମେଣୀଦୃଶଃ ପରଂ ଦୀନାଃ ।
ମା ମା କରୁଣାସିଂଧୋ ପରିତ୍ୟଜେତ୍ୟତିଚିରଂ ଵିଲେପୁସ୍ତାଃ ॥3॥
ତାସାଂ ରୁଦିତୈର୍ଲପିତୈଃ କରୁଣାକୁଲମାନସୋ ମୁରାରେ ତ୍ଵମ୍ ।
ତାଭିସ୍ସମଂ ପ୍ରଵୃତ୍ତୋ ୟମୁନାପୁଲିନେଷୁ କାମମଭିରଂତୁମ୍ ॥4॥
ଚଂଦ୍ରକରସ୍ୟଂଦଲସତ୍ସୁଂଦରୟମୁନାତଟାଂତଵୀଥୀଷୁ ।
ଗୋପୀଜନୋତ୍ତରୀୟୈରାପାଦିତସଂସ୍ତରୋ ନ୍ୟଷୀଦସ୍ତ୍ଵମ୍ ॥5॥
ସୁମଧୁରନର୍ମାଲପନୈଃ କରସଂଗ୍ରହଣୈଶ୍ଚ ଚୁଂବନୋଲ୍ଲାସୈଃ ।
ଗାଢାଲିଂଗନସଂଗୈସ୍ତ୍ଵମଂଗନାଲୋକମାକୁଲୀଚକୃଷେ ॥6॥
ଵାସୋହରଣଦିନେ ୟଦ୍ଵାସୋହରଣଂ ପ୍ରତିଶ୍ରୁତଂ ତାସାମ୍ ।
ତଦପି ଵିଭୋ ରସଵିଵଶସ୍ଵାଂତାନାଂ କାଂତ ସୁଭ୍ରୁଵାମଦଧାଃ ॥7॥
କଂଦଲିତଘର୍ମଲେଶଂ କୁଂଦମୃଦୁସ୍ମେରଵକ୍ତ୍ରପାଥୋଜମ୍ ।
ନଂଦସୁତ ତ୍ଵାଂ ତ୍ରିଜଗତ୍ସୁଂଦରମୁପଗୂହ୍ୟ ନଂଦିତା ବାଲାଃ ॥8॥
ଵିରହେଷ୍ଵଂଗାରମୟଃ ଶୃଂଗାରମୟଶ୍ଚ ସଂଗମେ ହି ତ୍ଵମ୍ ନିତରାମଂଗାରମୟସ୍ତତ୍ର ପୁନସ୍ସଂଗମେଽପି ଚିତ୍ରମିଦମ୍ ॥9॥
ରାଧାତୁଂଗପୟୋଧରସାଧୁପରୀରଂଭଲୋଲୁପାତ୍ମାନମ୍ ।
ଆରାଧୟେ ଭଵଂତଂ ପଵନପୁରାଧୀଶ ଶମୟ ସକଲଗଦାନ୍ ॥10॥