ස්ඵුරත්පරානංදරසාත්මකේන ත්වයා සමාසාදිතභෝගලීලාඃ ।
අසීමමානංදභරං ප්රපන්නා මහාංතමාපුර්මදමංබුජාක්ෂ්යඃ ॥1॥
නිලීයතේऽසෞ මයි මය්යමායං රමාපතිර්විශ්වමනෝභිරාමඃ ।
ඉති ස්ම සර්වාඃ කලිතාභිමානා නිරීක්ෂ්ය ගෝවිංද් තිරෝහිතෝऽභූඃ ॥2॥
රාධාභිධාං තාවදජාතගර්වාමතිප්රියාං ගෝපවධූං මුරාරේ ।
භවානුපාදාය ගතෝ විදූරං තයා සහ ස්වෛරවිහාරකාරී ॥3॥
තිරෝහිතේऽථ ත්වයි ජාතතාපාඃ සමං සමේතාඃ කමලායතාක්ෂ්යඃ ।
වනේ වනේ ත්වාං පරිමාර්ගයංත්යෝ විෂාදමාපුර්භගවන්නපාරම් ॥4॥
හා චූත හා චංපක කර්ණිකාර හා මල්ලිකේ මාලති බාලවල්යඃ ।
කිං වීක්ෂිතෝ නෝ හෘදයෛකචෝරඃ ඉත්යාදි තාස්ත්වත්ප්රවණා විලේපුඃ ॥5॥
නිරීක්ෂිතෝऽයං සඛි පංකජාක්ෂඃ පුරෝ මමේත්යාකුලමාලපංතී ।
ත්වාං භාවනාචක්ෂුෂි වීක්ෂ්ය කාචිත්තාපං සඛීනාං ද්විගුණීචකාර ॥6॥
ත්වදාත්මිකාස්තා යමුනාතටාංතේ තවානුචක්රුඃ කිල චේෂ්ටිතානි ।
විචිත්ය භූයෝऽපි තථෛව මානාත්ත්වයා විමුක්තාං දදෘශුශ්ච රාධාම් ॥7॥
තතඃ සමං තා විපිනේ සමංතාත්තමෝවතාරාවධි මාර්ගයංත්යඃ ।
පුනර්විමිශ්රා යමුනාතටාංතේ භෘශං විලේපුශ්ච ජගුර්ගුණාංස්තේ ॥8॥
තථා ව්යථාසංකුලමානසානාං ව්රජාංගනානාං කරුණෛකසිංධෝ ।
ජගත්ත්රයීමෝහනමෝහනාත්මා ත්වං ප්රාදුරාසීරයි මංදහාසී ॥9॥
සංදිග්ධසංදර්ශනමාත්මකාංතං ත්වාං වීක්ෂ්ය තන්ව්යඃ සහසා තදානීම් ।
කිං කිං න චක්රුඃ ප්රමදාතිභාරාත් ස ත්වං ගදාත් පාලය මාරුතේශ ॥10॥