tava vilōkanādgōpikājanāḥ pramadasaṅkulāḥ paṅkajēkṣaṇa ।
amṛtadhārayā samplutā iva stimitatāṃ dadhustvatpurōgatāḥ ॥1॥
tadanu kāchana tvatkarāmbujaṃ sapadi gṛhṇatī nirviśaṅkitam ।
ghanapayōdharē sannidhāya sā pulakasaṃvṛtā tasthuṣī chiram ॥2॥
tava vibhō’parā kōmalaṃ bhujaṃ nijagalāntarē paryavēṣṭayat ।
galasamudgataṃ prāṇamārutaṃ pratinirundhatīvātiharṣulā ॥3॥
apagatatrapā kāpi kāminī tava mukhāmbujāt pūgacharvitam ।
pratigṛhayya tadvaktrapaṅkajē nidadhatī gatā pūrṇakāmatām ॥4॥
vikaruṇō vanē saṃvihāya māmapagatō’si kā tvāmiha spṛśēt ।
iti sarōṣayā tāvadēkayā sajalalōchanaṃ vīkṣitō bhavān ॥5॥
iti mudā”kulairvallavījanaiḥ samamupāgatō yāmunē taṭē ।
mṛdukuchāmbaraiḥ kalpitāsanē ghusṛṇabhāsurē paryaśōbhathāḥ ॥6॥
katividhā kṛpā kē’pi sarvatō dhṛtadayōdayāḥ kēchidāśritē ।
katichidīdṛśā mādṛśēṣvapītyabhihitō bhavān vallavījanaiḥ ॥7॥
ayi kumārikā naiva śaṅkyatāṃ kaṭhinatā mayi prēmakātarē ।
mayi tu chētasō vō’nuvṛttayē kṛtamidaṃ mayētyūchivān bhavān ॥8॥
ayi niśamyatāṃ jīvavallabhāḥ priyatamō janō nēdṛśō mama ।
tadiha ramyatāṃ ramyayāminīṣvanuparōdhamityālapō vibhō ॥9॥
iti girādhikaṃ mōdamēdurairvrajavadhūjanaiḥ sākamāraman ।
kalitakautukō rāsakhēlanē gurupurīpatē pāhi māṃ gadāt ॥10॥