ତଵ ଵିଲୋକନାଦ୍ଗୋପିକାଜନାଃ ପ୍ରମଦସଂକୁଲାଃ ପଂକଜେକ୍ଷଣ ।
ଅମୃତଧାରୟା ସଂପ୍ଲୁତା ଇଵ ସ୍ତିମିତତାଂ ଦଧୁସ୍ତ୍ଵତ୍ପୁରୋଗତାଃ ॥1॥
ତଦନୁ କାଚନ ତ୍ଵତ୍କରାଂବୁଜଂ ସପଦି ଗୃହ୍ଣତୀ ନିର୍ଵିଶଂକିତମ୍ ।
ଘନପୟୋଧରେ ସନ୍ନିଧାୟ ସା ପୁଲକସଂଵୃତା ତସ୍ଥୁଷୀ ଚିରମ୍ ॥2॥
ତଵ ଵିଭୋଽପରା କୋମଲଂ ଭୁଜଂ ନିଜଗଲାଂତରେ ପର୍ୟଵେଷ୍ଟୟତ୍ ।
ଗଲସମୁଦ୍ଗତଂ ପ୍ରାଣମାରୁତଂ ପ୍ରତିନିରୁଂଧତୀଵାତିହର୍ଷୁଲା ॥3॥
ଅପଗତତ୍ରପା କାପି କାମିନୀ ତଵ ମୁଖାଂବୁଜାତ୍ ପୂଗଚର୍ଵିତମ୍ ।
ପ୍ରତିଗୃହୟ୍ୟ ତଦ୍ଵକ୍ତ୍ରପଂକଜେ ନିଦଧତୀ ଗତା ପୂର୍ଣକାମତାମ୍ ॥4॥
ଵିକରୁଣୋ ଵନେ ସଂଵିହାୟ ମାମପଗତୋଽସି କା ତ୍ଵାମିହ ସ୍ପୃଶେତ୍ ।
ଇତି ସରୋଷୟା ତାଵଦେକୟା ସଜଲଲୋଚନଂ ଵୀକ୍ଷିତୋ ଭଵାନ୍ ॥5॥
ଇତି ମୁଦାଽଽକୁଲୈର୍ଵଲ୍ଲଵୀଜନୈଃ ସମମୁପାଗତୋ ୟାମୁନେ ତଟେ ।
ମୃଦୁକୁଚାଂବରୈଃ କଲ୍ପିତାସନେ ଘୁସୃଣଭାସୁରେ ପର୍ୟଶୋଭଥାଃ ॥6॥
କତିଵିଧା କୃପା କେଽପି ସର୍ଵତୋ ଧୃତଦୟୋଦୟାଃ କେଚିଦାଶ୍ରିତେ ।
କତିଚିଦୀଦୃଶା ମାଦୃଶେଷ୍ଵପୀତ୍ୟଭିହିତୋ ଭଵାନ୍ ଵଲ୍ଲଵୀଜନୈଃ ॥7॥
ଅୟି କୁମାରିକା ନୈଵ ଶଂକ୍ୟତାଂ କଠିନତା ମୟି ପ୍ରେମକାତରେ ।
ମୟି ତୁ ଚେତସୋ ଵୋଽନୁଵୃତ୍ତୟେ କୃତମିଦଂ ମୟେତ୍ୟୂଚିଵାନ୍ ଭଵାନ୍ ॥8॥
ଅୟି ନିଶମ୍ୟତାଂ ଜୀଵଵଲ୍ଲଭାଃ ପ୍ରିୟତମୋ ଜନୋ ନେଦୃଶୋ ମମ ।
ତଦିହ ରମ୍ୟତାଂ ରମ୍ୟୟାମିନୀଷ୍ଵନୁପରୋଧମିତ୍ୟାଲପୋ ଵିଭୋ ॥9॥
ଇତି ଗିରାଧିକଂ ମୋଦମେଦୁରୈର୍ଵ୍ରଜଵଧୂଜନୈଃ ସାକମାରମନ୍ ।
କଲିତକୌତୁକୋ ରାସଖେଲନେ ଗୁରୁପୁରୀପତେ ପାହି ମାଂ ଗଦାତ୍ ॥10॥