kēśapāśadhṛtapiñChikāvitatisañchalanmakarakuṇḍalaṃ
hārajālavanamālikālalitamaṅgarāgaghanasaurabham ।
pītachēladhṛtakāñchikāñchitamudañchadaṃśumaṇinūpuraṃ
rāsakēliparibhūṣitaṃ tava hi rūpamīśa kalayāmahē ॥1॥
tāvadēva kṛtamaṇḍanē kalitakañchulīkakuchamaṇḍalē
gaṇḍalōlamaṇikuṇḍalē yuvatimaṇḍalē’tha parimaṇḍalē ।
antarā sakalasundarīyugalamindirāramaṇa sañcharan
mañjulāṃ tadanu rāsakēlimayi kañjanābha samupādadhāḥ ॥2॥
vāsudēva tava bhāsamānamiha rāsakēlirasasaurabhaṃ
dūratō’pi khalu nāradāgaditamākalayya kutukākulā ।
vēṣabhūṣaṇavilāsapēśalavilāsinīśatasamāvṛtā
nākatō yugapadāgatā viyati vēgatō’tha suramaṇḍalī ॥3॥
vēṇunādakṛtatānadānakalagānarāgagatiyōjanā-
lōbhanīyamṛdupādapātakṛtatālamēlanamanōharam ।
pāṇisaṅkvaṇitakaṅkaṇaṃ cha muhuraṃsalambitakarāmbujaṃ
śrōṇibimbachaladambaraṃ bhajata rāsakēlirasaḍambaram ॥4॥
spardhayā virachitānugānakṛtatāratāramadhurasvarē
nartanē’tha lalitāṅgahāralulitāṅgahāramaṇibhūṣaṇē ।
sammadēna kṛtapuṣpavarṣamalamunmiṣaddiviṣadāṃ kulaṃ
chinmayē tvayi nilīyamānamiva sammumōha savadhūkulam ॥5॥
svinnasannatanuvallarī tadanu kāpi nāma paśupāṅganā
kāntamaṃsamavalambatē sma tava tāntibhāramukulēkṣaṇā ॥
kāchidāchalitakuntalā navapaṭīrasāraghanasaurabhaṃ
vañchanēna tava sañchuchumba bhujamañchitōrupulakāṅkurā ॥6॥
kāpi gaṇḍabhuvi sannidhāya nijagaṇḍamākulitakuṇḍalaṃ
puṇyapūranidhiranvavāpa tava pūgacharvitarasāmṛtam ।
indirāvihṛtimandiraṃ bhuvanasundaraṃ hi naṭanāntarē
tvāmavāpya dadhuraṅganāḥ kimu na sammadōnmadadaśāntaram ॥7॥
gānamīśa virataṃ kramēṇa kila vādyamēlanamupārataṃ
brahmasammadarasākulāḥ sadasi kēvalaṃ nanṛturaṅganāḥ ।
nāvidannapi cha nīvikāṃ kimapi kuntalīmapi cha kañchulīṃ
jyōtiṣāmapi kadambakaṃ divi vilambitaṃ kimaparaṃ bruvē ॥8॥
mōdasīmni bhuvanaṃ vilāpya vihṛtiṃ samāpya cha tatō vibhō
kēlisammṛditanirmalāṅganavagharmalēśasubhagātmanām ।
manmathāsahanachētasāṃ paśupayōṣitāṃ sukṛtachōdita-
stāvadākalitamūrtirādadhitha māravīraparamōtsavān ॥9॥
kēlibhēdaparilōlitābhiratilālitābhirabalālibhiḥ
svairamīśa nanu sūrajāpayasi chārunāma vihṛtiṃ vyadhāḥ ।
kānanē’pi cha visāriśītalakiśōramārutamanōharē
sūnasaurabhamayē vilēsitha vilāsinīśatavimōhanam ॥10॥
kāminīriti hi yāminīṣu khalu kāmanīyakanidhē bhavān
pūrṇasammadarasārṇavaṃ kamapi yōgigamyamanubhāvayan ।
brahmaśaṅkaramukhānapīha paśupāṅganāsu bahumānayan
bhaktalōkagamanīyarūpa kamanīya kṛṣṇa paripāhi mām ॥11॥