કેશપાશધૃતપિંછિકાવિતતિસંચલન્મકરકુંડલં
હારજાલવનમાલિકાલલિતમંગરાગઘનસૌરભમ્ ।
પીતચેલધૃતકાંચિકાંચિતમુદંચદંશુમણિનૂપુરં
રાસકેલિપરિભૂષિતં તવ હિ રૂપમીશ કલયામહે ॥1॥
તાવદેવ કૃતમંડને કલિતકંચુલીકકુચમંડલે
ગંડલોલમણિકુંડલે યુવતિમંડલેઽથ પરિમંડલે ।
અંતરા સકલસુંદરીયુગલમિંદિરારમણ સંચરન્
મંજુલાં તદનુ રાસકેલિમયિ કંજનાભ સમુપાદધાઃ ॥2॥
વાસુદેવ તવ ભાસમાનમિહ રાસકેલિરસસૌરભં
દૂરતોઽપિ ખલુ નારદાગદિતમાકલય્ય કુતુકાકુલા ।
વેષભૂષણવિલાસપેશલવિલાસિનીશતસમાવૃતા
નાકતો યુગપદાગતા વિયતિ વેગતોઽથ સુરમંડલી ॥3॥
વેણુનાદકૃતતાનદાનકલગાનરાગગતિયોજના-
લોભનીયમૃદુપાદપાતકૃતતાલમેલનમનોહરમ્ ।
પાણિસંક્વણિતકંકણં ચ મુહુરંસલંબિતકરાંબુજં
શ્રોણિબિંબચલદંબરં ભજત રાસકેલિરસડંબરમ્ ॥4॥
સ્પર્ધયા વિરચિતાનુગાનકૃતતારતારમધુરસ્વરે
નર્તનેઽથ લલિતાંગહારલુલિતાંગહારમણિભૂષણે ।
સમ્મદેન કૃતપુષ્પવર્ષમલમુન્મિષદ્દિવિષદાં કુલં
ચિન્મયે ત્વયિ નિલીયમાનમિવ સમ્મુમોહ સવધૂકુલમ્ ॥5॥
સ્વિન્નસન્નતનુવલ્લરી તદનુ કાપિ નામ પશુપાંગના
કાંતમંસમવલંબતે સ્મ તવ તાંતિભારમુકુલેક્ષણા ॥
કાચિદાચલિતકુંતલા નવપટીરસારઘનસૌરભં
વંચનેન તવ સંચુચુંબ ભુજમંચિતોરુપુલકાંકુરા ॥6॥
કાપિ ગંડભુવિ સન્નિધાય નિજગંડમાકુલિતકુંડલં
પુણ્યપૂરનિધિરન્વવાપ તવ પૂગચર્વિતરસામૃતમ્ ।
ઇંદિરાવિહૃતિમંદિરં ભુવનસુંદરં હિ નટનાંતરે
ત્વામવાપ્ય દધુરંગનાઃ કિમુ ન સમ્મદોન્મદદશાંતરમ્ ॥7॥
ગાનમીશ વિરતં ક્રમેણ કિલ વાદ્યમેલનમુપારતં
બ્રહ્મસમ્મદરસાકુલાઃ સદસિ કેવલં નનૃતુરંગનાઃ ।
નાવિદન્નપિ ચ નીવિકાં કિમપિ કુંતલીમપિ ચ કંચુલીં
જ્યોતિષામપિ કદંબકં દિવિ વિલંબિતં કિમપરં બ્રુવે ॥8॥
મોદસીમ્નિ ભુવનં વિલાપ્ય વિહૃતિં સમાપ્ય ચ તતો વિભો
કેલિસમ્મૃદિતનિર્મલાંગનવઘર્મલેશસુભગાત્મનામ્ ।
મન્મથાસહનચેતસાં પશુપયોષિતાં સુકૃતચોદિત-
સ્તાવદાકલિતમૂર્તિરાદધિથ મારવીરપરમોત્સવાન્ ॥9॥
કેલિભેદપરિલોલિતાભિરતિલાલિતાભિરબલાલિભિઃ
સ્વૈરમીશ નનુ સૂરજાપયસિ ચારુનામ વિહૃતિં વ્યધાઃ ।
કાનનેઽપિ ચ વિસારિશીતલકિશોરમારુતમનોહરે
સૂનસૌરભમયે વિલેસિથ વિલાસિનીશતવિમોહનમ્ ॥10॥
કામિનીરિતિ હિ યામિનીષુ ખલુ કામનીયકનિધે ભવાન્
પૂર્ણસમ્મદરસાર્ણવં કમપિ યોગિગમ્યમનુભાવયન્ ।
બ્રહ્મશંકરમુખાનપીહ પશુપાંગનાસુ બહુમાનયન્
ભક્તલોકગમનીયરૂપ કમનીય કૃષ્ણ પરિપાહિ મામ્ ॥11॥