କେଶପାଶଧୃତପିଂଛିକାଵିତତିସଂଚଲନ୍ମକରକୁଂଡଲଂ
ହାରଜାଲଵନମାଲିକାଲଲିତମଂଗରାଗଘନସୌରଭମ୍ ।
ପୀତଚେଲଧୃତକାଂଚିକାଂଚିତମୁଦଂଚଦଂଶୁମଣିନୂପୁରଂ
ରାସକେଲିପରିଭୂଷିତଂ ତଵ ହି ରୂପମୀଶ କଲୟାମହେ ॥1॥
ତାଵଦେଵ କୃତମଂଡନେ କଲିତକଂଚୁଲୀକକୁଚମଂଡଲେ
ଗଂଡଲୋଲମଣିକୁଂଡଲେ ୟୁଵତିମଂଡଲେଽଥ ପରିମଂଡଲେ ।
ଅଂତରା ସକଲସୁଂଦରୀୟୁଗଲମିଂଦିରାରମଣ ସଂଚରନ୍
ମଂଜୁଲାଂ ତଦନୁ ରାସକେଲିମୟି କଂଜନାଭ ସମୁପାଦଧାଃ ॥2॥
ଵାସୁଦେଵ ତଵ ଭାସମାନମିହ ରାସକେଲିରସସୌରଭଂ
ଦୂରତୋଽପି ଖଲୁ ନାରଦାଗଦିତମାକଲୟ୍ୟ କୁତୁକାକୁଲା ।
ଵେଷଭୂଷଣଵିଲାସପେଶଲଵିଲାସିନୀଶତସମାଵୃତା
ନାକତୋ ୟୁଗପଦାଗତା ଵିୟତି ଵେଗତୋଽଥ ସୁରମଂଡଲୀ ॥3॥
ଵେଣୁନାଦକୃତତାନଦାନକଲଗାନରାଗଗତିୟୋଜନା-
ଲୋଭନୀୟମୃଦୁପାଦପାତକୃତତାଲମେଲନମନୋହରମ୍ ।
ପାଣିସଂକ୍ଵଣିତକଂକଣଂ ଚ ମୁହୁରଂସଲଂବିତକରାଂବୁଜଂ
ଶ୍ରୋଣିବିଂବଚଲଦଂବରଂ ଭଜତ ରାସକେଲିରସଡଂବରମ୍ ॥4॥
ସ୍ପର୍ଧୟା ଵିରଚିତାନୁଗାନକୃତତାରତାରମଧୁରସ୍ଵରେ
ନର୍ତନେଽଥ ଲଲିତାଂଗହାରଲୁଲିତାଂଗହାରମଣିଭୂଷଣେ ।
ସମ୍ମଦେନ କୃତପୁଷ୍ପଵର୍ଷମଲମୁନ୍ମିଷଦ୍ଦିଵିଷଦାଂ କୁଲଂ
ଚିନ୍ମୟେ ତ୍ଵୟି ନିଲୀୟମାନମିଵ ସମ୍ମୁମୋହ ସଵଧୂକୁଲମ୍ ॥5॥
ସ୍ଵିନ୍ନସନ୍ନତନୁଵଲ୍ଲରୀ ତଦନୁ କାପି ନାମ ପଶୁପାଂଗନା
କାଂତମଂସମଵଲଂବତେ ସ୍ମ ତଵ ତାଂତିଭାରମୁକୁଲେକ୍ଷଣା ॥
କାଚିଦାଚଲିତକୁଂତଲା ନଵପଟୀରସାରଘନସୌରଭଂ
ଵଂଚନେନ ତଵ ସଂଚୁଚୁଂବ ଭୁଜମଂଚିତୋରୁପୁଲକାଂକୁରା ॥6॥
କାପି ଗଂଡଭୁଵି ସନ୍ନିଧାୟ ନିଜଗଂଡମାକୁଲିତକୁଂଡଲଂ
ପୁଣ୍ୟପୂରନିଧିରନ୍ଵଵାପ ତଵ ପୂଗଚର୍ଵିତରସାମୃତମ୍ ।
ଇଂଦିରାଵିହୃତିମଂଦିରଂ ଭୁଵନସୁଂଦରଂ ହି ନଟନାଂତରେ
ତ୍ଵାମଵାପ୍ୟ ଦଧୁରଂଗନାଃ କିମୁ ନ ସମ୍ମଦୋନ୍ମଦଦଶାଂତରମ୍ ॥7॥
ଗାନମୀଶ ଵିରତଂ କ୍ରମେଣ କିଲ ଵାଦ୍ୟମେଲନମୁପାରତଂ
ବ୍ରହ୍ମସମ୍ମଦରସାକୁଲାଃ ସଦସି କେଵଲଂ ନନୃତୁରଂଗନାଃ ।
ନାଵିଦନ୍ନପି ଚ ନୀଵିକାଂ କିମପି କୁଂତଲୀମପି ଚ କଂଚୁଲୀଂ
ଜ୍ୟୋତିଷାମପି କଦଂବକଂ ଦିଵି ଵିଲଂବିତଂ କିମପରଂ ବ୍ରୁଵେ ॥8॥
ମୋଦସୀମ୍ନି ଭୁଵନଂ ଵିଲାପ୍ୟ ଵିହୃତିଂ ସମାପ୍ୟ ଚ ତତୋ ଵିଭୋ
କେଲିସମ୍ମୃଦିତନିର୍ମଲାଂଗନଵଘର୍ମଲେଶସୁଭଗାତ୍ମନାମ୍ ।
ମନ୍ମଥାସହନଚେତସାଂ ପଶୁପୟୋଷିତାଂ ସୁକୃତଚୋଦିତ-
ସ୍ତାଵଦାକଲିତମୂର୍ତିରାଦଧିଥ ମାରଵୀରପରମୋତ୍ସଵାନ୍ ॥9॥
କେଲିଭେଦପରିଲୋଲିତାଭିରତିଲାଲିତାଭିରବଲାଲିଭିଃ
ସ୍ଵୈରମୀଶ ନନୁ ସୂରଜାପୟସି ଚାରୁନାମ ଵିହୃତିଂ ଵ୍ୟଧାଃ ।
କାନନେଽପି ଚ ଵିସାରିଶୀତଲକିଶୋରମାରୁତମନୋହରେ
ସୂନସୌରଭମୟେ ଵିଲେସିଥ ଵିଲାସିନୀଶତଵିମୋହନମ୍ ॥10॥
କାମିନୀରିତି ହି ୟାମିନୀଷୁ ଖଲୁ କାମନୀୟକନିଧେ ଭଵାନ୍
ପୂର୍ଣସମ୍ମଦରସାର୍ଣଵଂ କମପି ୟୋଗିଗମ୍ୟମନୁଭାଵୟନ୍ ।
ବ୍ରହ୍ମଶଂକରମୁଖାନପୀହ ପଶୁପାଂଗନାସୁ ବହୁମାନୟନ୍
ଭକ୍ତଲୋକଗମନୀୟରୂପ କମନୀୟ କୃଷ୍ଣ ପରିପାହି ମାମ୍ ॥11॥