ઇતિ ત્વયિ રસાકુલં રમિતવલ્લભે વલ્લવાઃ
કદાપિ પુરમંબિકામિતુરંબિકાકાનને ।
સમેત્ય ભવતા સમં નિશિ નિષેવ્ય દિવ્યોત્સવં
સુખં સુષુપુરગ્રસીદ્વ્રજપમુગ્રનાગસ્તદા ॥1॥
સમુન્મુખમથોલ્મુકૈરભિહતેઽપિ તસ્મિન્ બલા-
દમુંચતિ ભવત્પદે ન્યપતિ પાહિ પાહીતિ તૈઃ ।
તદા ખલુ પદા ભવાન્ સમુપગમ્ય પસ્પર્શ તં
બભૌ સ ચ નિજાં તનું સમુપસાદ્ય વૈદ્યધરીમ્ ॥2॥
સુદર્શનધર પ્રભો નનુ સુદર્શનાખ્યોઽસ્મ્યહં
મુનીન્ ક્વચિદપાહસં ત ઇહ માં વ્યધુર્વાહસમ્ ।
ભવત્પદસમર્પણાદમલતાં ગતોઽસ્મીત્યસૌ
સ્તુવન્ નિજપદં યયૌ વ્રજપદં ચ ગોપા મુદા ॥3॥
કદાપિ ખલુ સીરિણા વિહરતિ ત્વયિ સ્ત્રીજનૈ-
ર્જહાર ધનદાનુગઃ સ કિલ શંખચૂડોઽબલાઃ ।
અતિદ્રુતમનુદ્રુતસ્તમથ મુક્તનારીજનં
રુરોજિથ શિરોમણિં હલભૃતે ચ તસ્યાદદાઃ ॥4॥
દિનેષુ ચ સુહૃજ્જનૈસ્સહ વનેષુ લીલાપરં
મનોભવમનોહરં રસિતવેણુનાદામૃતમ્ ।
ભવંતમમરીદૃશામમૃતપારણાદાયિનં
વિચિંત્ય કિમુ નાલપન્ વિરહતાપિતા ગોપિકાઃ ॥5॥
ભોજરાજભૃતકસ્ત્વથ કશ્ચિત્ કષ્ટદુષ્ટપથદૃષ્ટિરરિષ્ટઃ ।
નિષ્ઠુરાકૃતિરપષ્ઠુનિનાદસ્તિષ્ઠતે સ્મ ભવતે વૃષરૂપી ॥6॥
શાક્વરોઽથ જગતીધૃતિહારી મૂર્તિમેષ બૃહતીં પ્રદધાનઃ ।
પંક્તિમાશુ પરિઘૂર્ણ્ય પશૂનાં છંદસાં નિધિમવાપ ભવંતમ્ ॥7॥
તુંગશૃંગમુખમાશ્વભિયંતં સંગૃહય્ય રભસાદભિયં તમ્ ।
ભદ્રરૂપમપિ દૈત્યમભદ્રં મર્દયન્નમદયઃ સુરલોકમ્ ॥8॥
ચિત્રમદ્ય ભગવન્ વૃષઘાતાત્ સુસ્થિરાઽજનિ વૃષસ્થિતિરુર્વ્યામ્ ।
વર્ધતે ચ વૃષચેતસિ ભૂયાન્ મોદ ઇત્યભિનુતોઽસિ સુરૈસ્ત્વમ્ ॥9॥
ઔક્ષકાણિ પરિધાવત દૂરં વીક્ષ્યતામયમિહોક્ષવિભેદી ।
ઇત્થમાત્તહસિતૈઃ સહ ગોપૈર્ગેહગસ્ત્વમવ વાતપુરેશ ॥10॥