ඉති ත්වයි රසාකුලං රමිතවල්ලභේ වල්ලවාඃ
කදාපි පුරමංබිකාමිතුරංබිකාකානනේ ।
සමේත්ය භවතා සමං නිශි නිෂේව්ය දිව්යෝත්සවං
සුඛං සුෂුපුරග්රසීද්ව්රජපමුග්රනාගස්තදා ॥1॥
සමුන්මුඛමථෝල්මුකෛරභිහතේऽපි තස්මින් බලා-
දමුංචති භවත්පදේ න්යපති පාහි පාහීති තෛඃ ।
තදා ඛලු පදා භවාන් සමුපගම්ය පස්පර්ශ තං
බභෞ ස ච නිජාං තනුං සමුපසාද්ය වෛද්යධරීම් ॥2॥
සුදර්ශනධර ප්රභෝ නනු සුදර්ශනාඛ්යෝऽස්ම්යහං
මුනීන් ක්වචිදපාහසං ත ඉහ මාං ව්යධුර්වාහසම් ।
භවත්පදසමර්පණාදමලතාං ගතෝऽස්මීත්යසෞ
ස්තුවන් නිජපදං යයෞ ව්රජපදං ච ගෝපා මුදා ॥3॥
කදාපි ඛලු සීරිණා විහරති ත්වයි ස්ත්රීජනෛ-
ර්ජහාර ධනදානුගඃ ස කිල ශංඛචූඩෝऽබලාඃ ।
අතිද්රුතමනුද්රුතස්තමථ මුක්තනාරීජනං
රුරෝජිථ ශිරෝමණිං හලභෘතේ ච තස්යාදදාඃ ॥4॥
දිනේෂු ච සුහෘජ්ජනෛස්සහ වනේෂු ලීලාපරං
මනෝභවමනෝහරං රසිතවේණුනාදාමෘතම් ।
භවංතමමරීදෘශාමමෘතපාරණාදායිනං
විචිංත්ය කිමු නාලපන් විරහතාපිතා ගෝපිකාඃ ॥5॥
භෝජරාජභෘතකස්ත්වථ කශ්චිත් කෂ්ටදුෂ්ටපථදෘෂ්ටිරරිෂ්ටඃ ।
නිෂ්ඨුරාකෘතිරපෂ්ඨුනිනාදස්තිෂ්ඨතේ ස්ම භවතේ වෘෂරූපී ॥6॥
ශාක්වරෝऽථ ජගතීධෘතිහාරී මූර්තිමේෂ බෘහතීං ප්රදධානඃ ।
පංක්තිමාශු පරිඝූර්ණ්ය පශූනාං ඡංදසාං නිධිමවාප භවංතම් ॥7॥
තුංගශෘංගමුඛමාශ්වභියංතං සංගෘහය්ය රභසාදභියං තම් ।
භද්රරූපමපි දෛත්යමභද්රං මර්දයන්නමදයඃ සුරලෝකම් ॥8॥
චිත්රමද්ය භගවන් වෘෂඝාතාත් සුස්ථිරාऽජනි වෘෂස්ථිතිරුර්ව්යාම් ।
වර්ධතේ ච වෘෂචේතසි භූයාන් මෝද ඉත්යභිනුතෝऽසි සුරෛස්ත්වම් ॥9॥
ඖක්ෂකාණි පරිධාවත දූරං වීක්ෂ්යතාමයමිහෝක්ෂවිභේදී ।
ඉත්ථමාත්තහසිතෛඃ සහ ගෝපෛර්ගේහගස්ත්වමව වාතපුරේශ ॥10॥