ಯತ್ನೇಷು ಸರ್ವೇಷ್ವಪಿ ನಾವಕೇಶೀ ಕೇಶೀ ಸ ಭೋಜೇಶಿತುರಿಷ್ಟಬಂಧುಃ ।
ತ್ವಾಂ ಸಿಂಧುಜಾವಾಪ್ಯ ಇತೀವ ಮತ್ವಾ ಸಂಪ್ರಾಪ್ತವಾನ್ ಸಿಂಧುಜವಾಜಿರೂಪಃ ॥1॥
ಗಂಧರ್ವತಾಮೇಷ ಗತೋಽಪಿ ರೂಕ್ಷೈರ್ನಾದೈಃ ಸಮುದ್ವೇಜಿತಸರ್ವಲೋಕಃ ।
ಭವದ್ವಿಲೋಕಾವಧಿ ಗೋಪವಾಟೀಂ ಪ್ರಮರ್ದ್ಯ ಪಾಪಃ ಪುನರಾಪತತ್ತ್ವಾಮ್ ॥2॥
ತಾರ್ಕ್ಷ್ಯಾರ್ಪಿತಾಂಘ್ರೇಸ್ತವ ತಾರ್ಕ್ಷ್ಯ ಏಷ ಚಿಕ್ಷೇಪ ವಕ್ಷೋಭುವಿ ನಾಮ ಪಾದಮ್ ।
ಭೃಗೋಃ ಪದಾಘಾತಕಥಾಂ ನಿಶಮ್ಯ ಸ್ವೇನಾಪಿ ಶಕ್ಯಂ ತದಿತೀವ ಮೋಹಾತ್ ॥3॥
ಪ್ರವಂಚಯನ್ನಸ್ಯ ಖುರಾಂಚಲಂ ದ್ರಾಗಮುಂಚ ಚಿಕ್ಷೇಪಿಥ ದೂರದೂರಂ
ಸಮ್ಮೂರ್ಚ್ಛಿತೋಽಪಿ ಹ್ಯತಿಮೂರ್ಚ್ಛಿತೇನ ಕ್ರೋಧೋಷ್ಮಣಾ ಖಾದಿತುಮಾದ್ರುತಸ್ತ್ವಾಮ್ ॥4॥
ತ್ವಂ ವಾಹದಂಡೇ ಕೃತಧೀಶ್ಚ ವಾಹಾದಂಡಂ ನ್ಯಧಾಸ್ತಸ್ಯ ಮುಖೇ ತದಾನೀಮ್ ।
ತದ್ ವೃದ್ಧಿರುದ್ಧಶ್ವಸನೋ ಗತಾಸುಃ ಸಪ್ತೀಭವನ್ನಪ್ಯಯಮೈಕ್ಯಮಾಗಾತ್ ॥5॥
ಆಲಂಭಮಾತ್ರೇಣ ಪಶೋಃ ಸುರಾಣಾಂ ಪ್ರಸಾದಕೇ ನೂತ್ನ ಇವಾಶ್ವಮೇಧೇ ।
ಕೃತೇ ತ್ವಯಾ ಹರ್ಷವಶಾತ್ ಸುರೇಂದ್ರಾಸ್ತ್ವಾಂ ತುಷ್ಟುವುಃ ಕೇಶವನಾಮಧೇಯಮ್ ॥6॥
ಕಂಸಾಯ ತೇ ಶೌರಿಸುತತ್ವಮುಕ್ತ್ವಾ ತಂ ತದ್ವಧೋತ್ಕಂ ಪ್ರತಿರುಧ್ಯ ವಾಚಾ।
ಪ್ರಾಪ್ತೇನ ಕೇಶಿಕ್ಷಪಣಾವಸಾನೇ ಶ್ರೀನಾರದೇನ ತ್ವಮಭಿಷ್ಟುತೋಽಭೂಃ ॥7॥
ಕದಾಪಿ ಗೋಪೈಃ ಸಹ ಕಾನನಾಂತೇ ನಿಲಾಯನಕ್ರೀಡನಲೋಲುಪಂ ತ್ವಾಮ್ ।
ಮಯಾತ್ಮಜಃ ಪ್ರಾಪ ದುರಂತಮಾಯೋ ವ್ಯೋಮಾಭಿಧೋ ವ್ಯೋಮಚರೋಪರೋಧೀ ॥8॥
ಸ ಚೋರಪಾಲಾಯಿತವಲ್ಲವೇಷು ಚೋರಾಯಿತೋ ಗೋಪಶಿಶೂನ್ ಪಶೂಂಶ್ಚ
ಗುಹಾಸು ಕೃತ್ವಾ ಪಿದಧೇ ಶಿಲಾಭಿಸ್ತ್ವಯಾ ಚ ಬುದ್ಧ್ವಾ ಪರಿಮರ್ದಿತೋಽಭೂತ್ ॥9॥
ಏವಂ ವಿಧೈಶ್ಚಾದ್ಭುತಕೇಲಿಭೇದೈರಾನಂದಮೂರ್ಚ್ಛಾಮತುಲಾಂ ವ್ರಜಸ್ಯ ।
ಪದೇ ಪದೇ ನೂತನಯನ್ನಸೀಮಾಂ ಪರಾತ್ಮರೂಪಿನ್ ಪವನೇಶ ಪಾಯಾಃ ॥10॥