যত্নেষু সর্বেষ্বপি নাবকেশী কেশী স ভোজেশিতুরিষ্টবংধুঃ ।
ত্বাং সিংধুজাবাপ্য ইতীব মত্বা সংপ্রাপ্তবান্ সিংধুজবাজিরূপঃ ॥1॥
গংধর্বতামেষ গতোঽপি রূক্ষৈর্নাদৈঃ সমুদ্বেজিতসর্বলোকঃ ।
ভবদ্বিলোকাবধি গোপবাটীং প্রমর্দ্য পাপঃ পুনরাপতত্ত্বাম্ ॥2॥
তার্ক্ষ্যার্পিতাংঘ্রেস্তব তার্ক্ষ্য এষ চিক্ষেপ বক্ষোভুবি নাম পাদম্ ।
ভৃগোঃ পদাঘাতকথাং নিশম্য স্বেনাপি শক্যং তদিতীব মোহাত্ ॥3॥
প্রবংচযন্নস্য খুরাংচলং দ্রাগমুংচ চিক্ষেপিথ দূরদূরম্
সম্মূর্চ্ছিতোঽপি হ্যতিমূর্চ্ছিতেন ক্রোধোষ্মণা খাদিতুমাদ্রুতস্ত্বাম্ ॥4॥
ত্বং বাহদংডে কৃতধীশ্চ বাহাদংডং ন্যধাস্তস্য মুখে তদানীম্ ।
তদ্ বৃদ্ধিরুদ্ধশ্বসনো গতাসুঃ সপ্তীভবন্নপ্যযমৈক্যমাগাত্ ॥5॥
আলংভমাত্রেণ পশোঃ সুরাণাং প্রসাদকে নূত্ন ইবাশ্বমেধে ।
কৃতে ত্বযা হর্ষবশাত্ সুরেংদ্রাস্ত্বাং তুষ্টুবুঃ কেশবনামধেযম্ ॥6॥
কংসায তে শৌরিসুতত্বমুক্ত্বা তং তদ্বধোত্কং প্রতিরুধ্য বাচা।
প্রাপ্তেন কেশিক্ষপণাবসানে শ্রীনারদেন ত্বমভিষ্টুতোঽভূঃ ॥7॥
কদাপি গোপৈঃ সহ কাননাংতে নিলাযনক্রীডনলোলুপং ত্বাম্ ।
মযাত্মজঃ প্রাপ দুরংতমাযো ব্যোমাভিধো ব্যোমচরোপরোধী ॥8॥
স চোরপালাযিতবল্লবেষু চোরাযিতো গোপশিশূন্ পশূংশ্চ
গুহাসু কৃত্বা পিদধে শিলাভিস্ত্বযা চ বুদ্ধ্বা পরিমর্দিতোঽভূত্ ॥9॥
এবং বিধৈশ্চাদ্ভুতকেলিভেদৈরানংদমূর্চ্ছামতুলাং ব্রজস্য ।
পদে পদে নূতনযন্নসীমাং পরাত্মরূপিন্ পবনেশ পাযাঃ ॥10॥