નિશમય્ય તવાથ યાનવાર્તાં ભૃશમાર્તાઃ પશુપાલબાલિકાસ્તાઃ ।
કિમિદં કિમિદં કથં ન્વિતીમાઃ સમવેતાઃ પરિદેવિતાન્યકુર્વન્ ॥1॥
કરુણાનિધિરેષ નંદસૂનુઃ કથમસ્માન્ વિસૃજેદનન્યનાથાઃ ।
બત નઃ કિમુ દૈવમેવમાસીદિતિ તાસ્ત્વદ્ગતમાનસા વિલેપુઃ ॥2॥
ચરમપ્રહરે પ્રતિષ્ઠમાનઃ સહ પિત્રા નિજમિત્રમંડલૈશ્ચ ।
પરિતાપભરં નિતંબિનીનાં શમયિષ્યન્ વ્યમુચઃ સખાયમેકમ્ ॥3॥
અચિરાદુપયામિ સન્નિધિં વો ભવિતા સાધુ મયૈવ સંગમશ્રીઃ ।
અમૃતાંબુનિધૌ નિમજ્જયિષ્યે દ્રુતમિત્યાશ્વસિતા વધૂરકાર્ષીઃ ॥4॥
સવિષાદભરં સયાચ્ઞમુચ્ચૈઃ અતિદૂરં વનિતાભિરીક્ષ્યમાણઃ ।
મૃદુ તદ્દિશિ પાતયન્નપાંગાન્ સબલોઽક્રૂરરથેન નિર્ગતોઽભૂઃ ॥5॥
અનસા બહુલેન વલ્લવાનાં મનસા ચાનુગતોઽથ વલ્લભાનામ્ ।
વનમાર્તમૃગં વિષણ્ણવૃક્ષં સમતીતો યમુનાતટીમયાસીઃ ॥6॥
નિયમાય નિમજ્ય વારિણિ ત્વામભિવીક્ષ્યાથ રથેઽપિ ગાંદિનેયઃ ।
વિવશોઽજનિ કિં ન્વિદં વિભોસ્તે નનુ ચિત્રં ત્વવલોકનં સમંતાત્ ॥7॥
પુનરેષ નિમજ્ય પુણ્યશાલી પુરુષં ત્વાં પરમં ભુજંગભોગે ।
અરિકંબુગદાંબુજૈઃ સ્ફુરંતં સુરસિદ્ધૌઘપરીતમાલુલોકે ॥8॥
સ તદા પરમાત્મસૌખ્યસિંધૌ વિનિમગ્નઃ પ્રણુવન્ પ્રકારભેદૈઃ ।
અવિલોક્ય પુનશ્ચ હર્ષસિંધોરનુવૃત્ત્યા પુલકાવૃતો યયૌ ત્વામ્ ॥9॥
કિમુ શીતલિમા મહાન્ જલે યત્ પુલકોઽસાવિતિ ચોદિતેન તેન ।
અતિહર્ષનિરુત્તરેણ સાર્ધં રથવાસી પવનેશ પાહિ માં ત્વમ્ ॥10॥