ନିଶମୟ୍ୟ ତଵାଥ ୟାନଵାର୍ତାଂ ଭୃଶମାର୍ତାଃ ପଶୁପାଲବାଲିକାସ୍ତାଃ ।
କିମିଦଂ କିମିଦଂ କଥଂ ନ୍ଵିତୀମାଃ ସମଵେତାଃ ପରିଦେଵିତାନ୍ୟକୁର୍ଵନ୍ ॥1॥
କରୁଣାନିଧିରେଷ ନଂଦସୂନୁଃ କଥମସ୍ମାନ୍ ଵିସୃଜେଦନନ୍ୟନାଥାଃ ।
ବତ ନଃ କିମୁ ଦୈଵମେଵମାସୀଦିତି ତାସ୍ତ୍ଵଦ୍ଗତମାନସା ଵିଲେପୁଃ ॥2॥
ଚରମପ୍ରହରେ ପ୍ରତିଷ୍ଠମାନଃ ସହ ପିତ୍ରା ନିଜମିତ୍ରମଂଡଲୈଶ୍ଚ ।
ପରିତାପଭରଂ ନିତଂବିନୀନାଂ ଶମୟିଷ୍ୟନ୍ ଵ୍ୟମୁଚଃ ସଖାୟମେକମ୍ ॥3॥
ଅଚିରାଦୁପୟାମି ସନ୍ନିଧିଂ ଵୋ ଭଵିତା ସାଧୁ ମୟୈଵ ସଂଗମଶ୍ରୀଃ ।
ଅମୃତାଂବୁନିଧୌ ନିମଜ୍ଜୟିଷ୍ୟେ ଦ୍ରୁତମିତ୍ୟାଶ୍ଵସିତା ଵଧୂରକାର୍ଷୀଃ ॥4॥
ସଵିଷାଦଭରଂ ସୟାଚ୍ଞମୁଚ୍ଚୈଃ ଅତିଦୂରଂ ଵନିତାଭିରୀକ୍ଷ୍ୟମାଣଃ ।
ମୃଦୁ ତଦ୍ଦିଶି ପାତୟନ୍ନପାଂଗାନ୍ ସବଲୋଽକ୍ରୂରରଥେନ ନିର୍ଗତୋଽଭୂଃ ॥5॥
ଅନସା ବହୁଲେନ ଵଲ୍ଲଵାନାଂ ମନସା ଚାନୁଗତୋଽଥ ଵଲ୍ଲଭାନାମ୍ ।
ଵନମାର୍ତମୃଗଂ ଵିଷଣ୍ଣଵୃକ୍ଷଂ ସମତୀତୋ ୟମୁନାତଟୀମୟାସୀଃ ॥6॥
ନିୟମାୟ ନିମଜ୍ୟ ଵାରିଣି ତ୍ଵାମଭିଵୀକ୍ଷ୍ୟାଥ ରଥେଽପି ଗାଂଦିନେୟଃ ।
ଵିଵଶୋଽଜନି କିଂ ନ୍ଵିଦଂ ଵିଭୋସ୍ତେ ନନୁ ଚିତ୍ରଂ ତ୍ଵଵଲୋକନଂ ସମଂତାତ୍ ॥7॥
ପୁନରେଷ ନିମଜ୍ୟ ପୁଣ୍ୟଶାଲୀ ପୁରୁଷଂ ତ୍ଵାଂ ପରମଂ ଭୁଜଂଗଭୋଗେ ।
ଅରିକଂବୁଗଦାଂବୁଜୈଃ ସ୍ଫୁରଂତଂ ସୁରସିଦ୍ଧୌଘପରୀତମାଲୁଲୋକେ ॥8॥
ସ ତଦା ପରମାତ୍ମସୌଖ୍ୟସିଂଧୌ ଵିନିମଗ୍ନଃ ପ୍ରଣୁଵନ୍ ପ୍ରକାରଭେଦୈଃ ।
ଅଵିଲୋକ୍ୟ ପୁନଶ୍ଚ ହର୍ଷସିଂଧୋରନୁଵୃତ୍ତ୍ୟା ପୁଲକାଵୃତୋ ୟୟୌ ତ୍ଵାମ୍ ॥9॥
କିମୁ ଶୀତଲିମା ମହାନ୍ ଜଲେ ୟତ୍ ପୁଲକୋଽସାଵିତି ଚୋଦିତେନ ତେନ ।
ଅତିହର୍ଷନିରୁତ୍ତରେଣ ସାର୍ଧଂ ରଥଵାସୀ ପଵନେଶ ପାହି ମାଂ ତ୍ଵମ୍ ॥10॥