samprāptō mathurāṃ dinārdhavigamē tatrāntarasmin vasa-
nnārāmē vihitāśanaḥ sakhijanairyātaḥ purīmīkṣitum ।
prāpō rājapathaṃ chiraśrutidhṛtavyālōkakautūhala-
strīpuṃsōdyadagaṇyapuṇyanigalairākṛṣyamāṇō nu kim ॥1॥
tvatpādadyutivat sarāgasubhagāḥ tvanmūrtivadyōṣitaḥ
samprāptā vilasatpayōdhararuchō lōlā bhavat dṛṣṭivat ।
hāriṇyastvaduraḥsthalīvadayi tē mandasmitaprauḍhiva-
nnairmalyōllasitāḥ kachaugharuchivadrājatkalāpāśritāḥ ॥2॥
tāsāmākalayannapāṅgavalanairmōdaṃ praharṣādbhuta-
vyālōlēṣu janēṣu tatra rajakaṃ kañchit paṭīṃ prārthayan ।
kastē dāsyati rājakīyavasanaṃ yāhīti tēnōditaḥ
sadyastasya karēṇa śīrṣamahṛthāḥ sō’pyāpa puṇyāṃ gatim ॥3॥
bhūyō vāyakamēkamāyatamatiṃ tōṣēṇa vēṣōchitaṃ
dāśvāṃsaṃ svapadaṃ ninētha sukṛtaṃ kō vēda jīvātmanām ।
mālābhiḥ stabakaiḥ stavairapi punarmālākṛtā mānitō
bhaktiṃ tēna vṛtāṃ didēśitha parāṃ lakṣmīṃ cha lakṣmīpatē ॥4॥
kubjāmabjavilōchanāṃ pathipunardṛṣṭvā’ṅgarāgē tayā
dattē sādhu kilāṅgarāgamadadāstasyā mahāntaṃ hṛdi ।
chittasthāmṛjutāmatha prathayituṃ gātrē’pi tasyāḥ sphuṭaṃ
gṛhṇan mañju karēṇa tāmudanayastāvajjagatsundarīm ॥5॥
tāvanniśchitavaibhavāstava vibhō nātyantapāpā janā
yatkiñchiddadatē sma śaktyanuguṇaṃ tāmbūlamālyādikam ।
gṛhṇānaḥ kusumādi kiñchana tadā mārgē nibaddhāñjali-
rnātiṣṭhaṃ bata hā yatō’dya vipulāmārtiṃ vrajāmi prabhō ॥6॥
ēṣyāmīti vimuktayā’pi bhagavannālēpadātryā tayā
dūrāt kātarayā nirīkṣitagatistvaṃ prāviśō gōpuram ।
āghōṣānumitatvadāgamamahāharṣōllaladdēvakī-
vakṣōjapragalatpayōrasamiṣāttvatkīrtirantargatā ॥7॥
āviṣṭō nagarīṃ mahōtsavavatīṃ kōdaṇḍaśālāṃ vrajan
mādhuryēṇa nu tējasā nu puruṣairdūrēṇa dattāntaraḥ ।
sragbhirbhūṣitamarchitaṃ varadhanurmā mēti vādāt puraḥ
prāgṛhṇāḥ samarōpayaḥ kila samākrākṣīrabhāṅkṣīrapi ॥8॥
śvaḥ kaṃsakṣapaṇōtsavasya purataḥ prārambhatūryōpama-
śchāpadhvaṃsamahādhvanistava vibhō dēvānarōmāñchayat ।
kaṃsasyāpi cha vēpathustaduditaḥ kōdaṇḍakhaṇḍadvayī-
chaṇḍābhyāhatarakṣipūruṣaravairutkūlitō’bhūt tvayā ॥9॥
śiṣṭairduṣṭajanaiścha dṛṣṭamahimā prītyā cha bhītyā tataḥ
sampaśyan purasampadaṃ pravicharan sāyaṃ gatō vāṭikām ।
śrīdāmnā saha rādhikāvirahajaṃ khēdaṃ vadan prasvapa-
nnānandannavatārakāryaghaṭanādvātēśa saṃrakṣa mām ॥10॥