prātaḥ santrastabhōjakṣitipativachasā prastutē mallatūryē
saṅghē rājñāṃ cha mañchānabhiyayuṣi gatē nandagōpē’pi harmyam ।
kaṃsē saudhādhirūḍhē tvamapi sahabalaḥ sānugaśchāruvēṣō
raṅgadvāraṃ gatō’bhūḥ kupitakuvalayāpīḍanāgāvalīḍham ॥1॥
pāpiṣṭhāpēhi mārgāddrutamiti vachasā niṣṭhurakruddhabuddhē-
rambaṣṭhasya praṇōdādadhikajavajuṣā hastinā gṛhyamāṇaḥ ।
kēlīmuktō’tha gōpīkuchakalaśachiraspardhinaṃ kumbhamasya
vyāhatyālīyathāstvaṃ charaṇabhuvi punarnirgatō valguhāsī ॥2॥
hastaprāpyō’pyagamyō jhaṭiti munijanasyēva dhāvan gajēndraṃ
krīḍannāpātya bhūmau punarabhipatatastasya dantaṃ sajīvam ।
mūlādunmūlya tanmūlagamahitamahāmauktikānyātmamitrē
prādāstvaṃ hāramēbhirlalitavirachitaṃ rādhikāyai diśēti ॥3॥
gṛhṇānaṃ dantamaṃsē yutamatha halinā raṅgamaṅgāviśantaṃ
tvāṃ maṅgalyāṅgabhaṅgīrabhasahṛtamanōlōchanā vīkṣya lōkāḥ ।
haṃhō dhanyō hi nandō nahi nahi paśupālāṅganā nō yaśōdā
nō nō dhanyēkṣaṇāḥ smastrijagati vayamēvēti sarvē śaśaṃsuḥ ॥4॥
pūrṇaṃ brahmaiva sākṣānniravadhi paramānandasāndraprakāśaṃ
gōpēśu tvaṃ vyalāsīrna khalu bahujanaistāvadāvēditō’bhūḥ ।
dṛṣṭvā’tha tvāṃ tadēdamprathamamupagatē puṇyakālē janaughāḥ
pūrṇānandā vipāpāḥ sarasamabhijagustvatkṛtāni smṛtāni ॥5॥
chāṇūrō mallavīrastadanu nṛpagirā muṣṭikō muṣṭiśālī
tvāṃ rāmaṃ chābhipēdē jhaṭajhaṭiti mithō muṣṭipātātirūkṣam ।
utpātāpātanākarṣaṇavividharaṇānyāsatāṃ tatra chitraṃ
mṛtyōḥ prāgēva mallaprabhuragamadayaṃ bhūriśō bandhamōkṣān ॥6॥
hā dhik kaṣṭaṃ kumārau sulalitavapuṣau mallavīrau kaṭhōrau
na drakṣyāmō vrajāmastvaritamiti janē bhāṣamāṇē tadānīm ।
chāṇūraṃ taṃ karōdbhrāmaṇavigaladasuṃ pōthayāmāsithōrvyāṃ
piṣṭō’bhūnmuṣṭikō’pi drutamatha halinā naṣṭaśiṣṭairdadhāvē ॥7॥
kaṃsa saṃvārya tūryaṃ khalamatiravidan kāryamāryān pitṛṃstā-
nāhantuṃ vyāptamūrtēstava cha samaśiṣaddūramutsāraṇāya ।
ruṣṭō duṣṭōktibhistvaṃ garuḍa iva giriṃ mañchamañchannudañchat-
khaḍgavyāvalgadussaṅgrahamapi cha haṭhāt prāgrahīraugrasēnim ॥8॥
sadyō niṣpiṣṭasandhiṃ bhuvi narapatimāpātya tasyōpariṣṭā-
ttvayyāpātyē tadaiva tvadupari patitā nākināṃ puṣpavṛṣṭiḥ ।
kiṃ kiṃ brūmastadānīṃ satatamapi bhiyā tvadgatātmā sa bhējē
sāyujyaṃ tvadvadhōtthā parama paramiyaṃ vāsanā kālanēmēḥ ॥9॥
tadbhrātṛnaṣṭa piṣṭvā drutamatha pitarau sannamannugrasēnaṃ
kṛtvā rājānamuchchairyadukulamakhilaṃ mōdayan kāmadānaiḥ ।
bhaktānāmuttamaṃ chōddhavamamaragurōrāptanītiṃ sakhāyaṃ
labdhvā tuṣṭō nagaryāṃ pavanapurapatē rundhi mē sarvarōgān ॥10॥