સૈરંધ્ર્યાસ્તદનુ ચિરં સ્મરાતુરાયા
યાતોઽભૂઃ સુલલિતમુદ્ધવેન સાર્ધમ્ ।
આવાસં ત્વદુપગમોત્સવં સદૈવ
ધ્યાયંત્યાઃ પ્રતિદિનવાસસજ્જિકાયાઃ ॥1॥
ઉપગતે ત્વયિ પૂર્ણમનોરથાં પ્રમદસંભ્રમકંપ્રપયોધરામ્ ।
વિવિધમાનનમાદધતીં મુદા રહસિ તાં રમયાંચકૃષે સુખમ્ ॥2॥
પૃષ્ટા વરં પુનરસાવવૃણોદ્વરાકી
ભૂયસ્ત્વયા સુરતમેવ નિશાંતરેષુ ।
સાયુજ્યમસ્ત્વિતિ વદેત્ બુધ એવ કામં
સામીપ્યમસ્ત્વનિશમિત્યપિ નાબ્રવીત્ કિમ્ ॥3॥
તતો ભવાન્ દેવ નિશાસુ કાસુચિન્મૃગીદૃશં તાં નિભૃતં વિનોદયન્ ।
અદાદુપશ્લોક ઇતિ શ્રુતં સુતં સ નારદાત્ સાત્ત્વતતંત્રવિદ્બબભૌ ॥4॥
અક્રૂરમંદિરમિતોઽથ બલોદ્ધવાભ્યા-
મભ્યર્ચિતો બહુ નુતો મુદિતેન તેન ।
એનં વિસૃજ્ય વિપિનાગતપાંડવેય-
વૃત્તં વિવેદિથ તથા ધૃતરાષ્ટ્ર્ચેષ્ટામ્ ॥5॥
વિઘાતાજ્જામાતુઃ પરમસુહૃદો ભોજનૃપતે-
ર્જરાસંધે રુંધત્યનવધિરુષાંધેઽથ મથુરામ્ ।
રથાદ્યૈર્દ્યોર્લબ્ધૈઃ કતિપયબલસ્ત્વં બલયુત-
સ્ત્રયોવિંશત્યક્ષૌહિણિ તદુપનીતં સમહૃથાઃ ॥6॥
બદ્ધં બલાદથ બલેન બલોત્તરં ત્વં
ભૂયો બલોદ્યમરસેન મુમોચિથૈનમ્ ।
નિશ્શેષદિગ્જયસમાહૃતવિશ્વસૈન્યાત્
કોઽન્યસ્તતો હિ બલપૌરુષવાંસ્તદાનીમ્ ॥7॥
ભગ્નઃ સ લગ્નહૃદયોઽપિ નૃપૈઃ પ્રણુન્નો
યુદ્ધં ત્વયા વ્યધિત ષોડશકૃત્વ એવમ્ ।
અક્ષૌહિણીઃ શિવ શિવાસ્ય જઘંથ વિષ્ણો
સંભૂય સૈકનવતિત્રિશતં તદાનીમ્ ॥8॥
અષ્ટાદશેઽસ્ય સમરે સમુપેયુષિ ત્વં
દૃષ્ટ્વા પુરોઽથ યવનં યવનત્રિકોટ્યા ।
ત્વષ્ટ્રા વિધાપ્ય પુરમાશુ પયોધિમધ્યે
તત્રાઽથ યોગબલતઃ સ્વજનાનનૈષીઃ ॥9॥
પદભ્યાં ત્વાં પદ્મમાલી ચકિત ઇવ પુરાન્નિર્ગતો ધાવમાનો
મ્લેચ્છેશેનાનુયાતો વધસુકૃતવિહીનેન શૈલે ન્યલૈષીઃ ।
સુપ્તેનાંઘ્ર્યાહતેન દ્રુતમથ મુચુકુંદેન ભસ્મીકૃતેઽસ્મિન્
ભૂપાયાસ્મૈ ગુહાંતે સુલલિતવપુષા તસ્થિષે ભક્તિભાજે ॥10॥
ઐક્ષ્વાકોઽહં વિરક્તોઽસ્મ્યખિલનૃપસુખે ત્વત્પ્રસાદૈકકાંક્ષી
હા દેવેતિ સ્તુવંતં વરવિતતિષુ તં નિસ્પૃહં વીક્ષ્ય હૃષ્યન્ ।
મુક્તેસ્તુલ્યાં ચ ભક્તિં ધુતસકલમલાં મોક્ષમપ્યાશુ દત્વા
કાર્યં હિંસાવિશુદ્ધ્યૈ તપ ઇતિ ચ તદા પ્રાત્થ લોકપ્રતીત્યૈ ॥11॥
તદનુ મથુરાં ગત્વા હત્વા ચમૂં યવનાહૃતાં
મગધપતિના માર્ગે સૈન્યૈઃ પુરેવ નિવારિતઃ ।
ચરમવિજયં દર્પાયાસ્મૈ પ્રદાય પલાયિતો
જલધિનગરીં યાતો વાતાલયેશ્વર પાહિ મામ્ ॥12॥