সৈরংধ্র্যাস্তদনু চিরং স্মরাতুরাযা
যাতোঽভূঃ সুললিতমুদ্ধবেন সার্ধম্ ।
আবাসং ত্বদুপগমোত্সবং সদৈব
ধ্যাযংত্যাঃ প্রতিদিনবাসসজ্জিকাযাঃ ॥1॥
উপগতে ত্বযি পূর্ণমনোরথাং প্রমদসংভ্রমকংপ্রপযোধরাম্ ।
বিবিধমাননমাদধতীং মুদা রহসি তাং রমযাংচকৃষে সুখম্ ॥2॥
পৃষ্টা বরং পুনরসাববৃণোদ্বরাকী
ভূযস্ত্বযা সুরতমেব নিশাংতরেষু ।
সাযুজ্যমস্ত্বিতি বদেত্ বুধ এব কামং
সামীপ্যমস্ত্বনিশমিত্যপি নাব্রবীত্ কিম্ ॥3॥
ততো ভবান্ দেব নিশাসু কাসুচিন্মৃগীদৃশং তাং নিভৃতং বিনোদযন্ ।
অদাদুপশ্লোক ইতি শ্রুতং সুতং স নারদাত্ সাত্ত্বততংত্রবিদ্ববভৌ ॥4॥
অক্রূরমংদিরমিতোঽথ বলোদ্ধবাভ্যা-
মভ্যর্চিতো বহু নুতো মুদিতেন তেন ।
এনং বিসৃজ্য বিপিনাগতপাংডবেয-
বৃত্তং বিবেদিথ তথা ধৃতরাষ্ট্র্চেষ্টাম্ ॥5॥
বিঘাতাজ্জামাতুঃ পরমসুহৃদো ভোজনৃপতে-
র্জরাসংধে রুংধত্যনবধিরুষাংধেঽথ মথুরাম্ ।
রথাদ্যৈর্দ্যোর্লব্ধৈঃ কতিপযবলস্ত্বং বলযুত-
স্ত্রযোবিংশত্যক্ষৌহিণি তদুপনীতং সমহৃথাঃ ॥6॥
বদ্ধং বলাদথ বলেন বলোত্তরং ত্বং
ভূযো বলোদ্যমরসেন মুমোচিথৈনম্ ।
নিশ্শেষদিগ্জযসমাহৃতবিশ্বসৈন্যাত্
কোঽন্যস্ততো হি বলপৌরুষবাংস্তদানীম্ ॥7॥
ভগ্নঃ স লগ্নহৃদযোঽপি নৃপৈঃ প্রণুন্নো
যুদ্ধং ত্বযা ব্যধিত ষোডশকৃত্ব এবম্ ।
অক্ষৌহিণীঃ শিব শিবাস্য জঘংথ বিষ্ণো
সংভূয সৈকনবতিত্রিশতং তদানীম্ ॥8॥
অষ্টাদশেঽস্য সমরে সমুপেযুষি ত্বং
দৃষ্ট্বা পুরোঽথ যবনং যবনত্রিকোট্যা ।
ত্বষ্ট্রা বিধাপ্য পুরমাশু পযোধিমধ্যে
তত্রাঽথ যোগবলতঃ স্বজনাননৈষীঃ ॥9॥
পদভ্যাং ত্বাং পদ্মমালী চকিত ইব পুরান্নির্গতো ধাবমানো
ম্লেচ্ছেশেনানুযাতো বধসুকৃতবিহীনেন শৈলে ন্যলৈষীঃ ।
সুপ্তেনাংঘ্র্যাহতেন দ্রুতমথ মুচুকুংদেন ভস্মীকৃতেঽস্মিন্
ভূপাযাস্মৈ গুহাংতে সুললিতবপুষা তস্থিষে ভক্তিভাজে ॥10॥
ঐক্ষ্বাকোঽহং বিরক্তোঽস্ম্যখিলনৃপসুখে ত্বত্প্রসাদৈককাংক্ষী
হা দেবেতি স্তুবংতং বরবিততিষু তং নিস্পৃহং বীক্ষ্য হৃষ্যন্ ।
মুক্তেস্তুল্যাং চ ভক্তিং ধুতসকলমলাং মোক্ষমপ্যাশু দত্বা
কার্যং হিংসাবিশুদ্ধ্যৈ তপ ইতি চ তদা প্রাত্থ লোকপ্রতীত্যৈ ॥11॥
তদনু মথুরাং গত্বা হত্বা চমূং যবনাহৃতাং
মগধপতিনা মার্গে সৈন্যৈঃ পুরেব নিবারিতঃ ।
চরমবিজযং দর্পাযাস্মৈ প্রদায পলাযিতো
জলধিনগরীং যাতো বাতালযেশ্বর পাহি মাম্ ॥12॥