balasamētabalānugatō bhavān puramagāhata bhīṣmakamānitaḥ ।
dvijasutaṃ tvadupāgamavādinaṃ dhṛtarasā tarasā praṇanāma sā ॥1॥
bhuvanakāntamavēkṣya bhavadvapurnṛpasutasya niśamya cha chēṣṭitam ।
vipulakhēdajuṣāṃ puravāsināṃ saruditairuditairagamanniśā ॥2॥
tadanu vanditumindumukhī śivāṃ vihitamaṅgalabhūṣaṇabhāsurā ।
niragamat bhavadarpitajīvitā svapurataḥ purataḥ subhaṭāvṛtā ॥3॥
kulavadhūbhirupētya kumārikā girisutāṃ paripūjya cha sādaram ।
muhurayāchata tatpadapaṅkajē nipatitā patitāṃ tava kēvalam ॥4॥
samavalōkakutūhalasaṅkulē nṛpakulē nibhṛtaṃ tvayi cha sthitē ।
nṛpasutā niragādgirijālayāt suruchiraṃ ruchirañjitadiṅmukhā ॥5॥
bhuvanamōhanarūparuchā tadā vivaśitākhilarājakadambayā ।
tvamapi dēva kaṭākṣavimōkṣaṇaiḥ pramadayā madayāñchakṛṣē manāk ॥6॥
kvanu gamiṣyasi chandramukhīti tāṃ sarasamētya karēṇa haran kṣaṇāt ।
samadhirōpya rathaṃ tvamapāhṛthā bhuvi tatō vitatō ninadō dviṣām ॥7॥
kva nu gataḥ paśupāla iti krudhā kṛtaraṇā yadubhiścha jitā nṛpāḥ ।
na tu bhavānudachālyata tairahō piśunakaiḥ śunakairiva kēsarī ॥8॥
tadanu rukmiṇamāgatamāhavē vadhamupēkṣya nibadhya virūpayan ।
hṛtamadaṃ parimuchya balōktibhiḥ puramayā ramayā saha kāntayā ॥9॥
navasamāgamalajjitamānasāṃ praṇayakautukajṛmbhitamanmathām ।
aramayaḥ khalu nātha yathāsukhaṃ rahasi tāṃ hasitāṃśulasanmukhīm ॥10॥
vividhanarmabhirēvamaharniśaṃ pramadamākalayan punarēkadā ।
ṛjumatēḥ kila vakragirā bhavān varatanōratanōdatilōlatām ॥11॥
tadadhikairatha lālanakauśalaiḥ praṇayinīmadhikaṃ sukhayannimām ।
ayi mukunda bhavachcharitāni naḥ pragadatāṃ gadatāntimapākuru ॥12॥