rāmē’tha gōkulagatē pramadāprasaktē
hūtānupētayamunādamanē madāndhē ।
svairaṃ samāramati sēvakavādamūḍhō
dūtaṃ nyayuṅkta tava pauṇḍrakavāsudēvaḥ ॥1॥
nārāyaṇō’hamavatīrṇa ihāsmi bhūmau
dhatsē kila tvamapi māmakalakṣaṇāni ।
utsṛjya tāni śaraṇaṃ vraja māmiti tvāṃ
dūtō jagāda sakalairhasitaḥ sabhāyām ॥2॥
dūtē’tha yātavati yādavasainikaistvaṃ
yātō dadarśitha vapuḥ kila pauṇḍrakīyam ।
tāpēna vakṣasi kṛtāṅkamanalpamūlya-
śrīkaustubhaṃ makarakuṇḍalapītachēlam ॥3॥
kālāyasaṃ nijasudarśanamasyatō’sya
kālānalōtkarakirēṇa sudarśanēna ।
śīrṣaṃ chakartitha mamarditha chāsya sēnāṃ
tanmitrakāśipaśirō’pi chakartha kāśyām ॥4॥
jālyēna bālakagirā’pi kilāhamēva
śrīvāsudēva iti rūḍhamatiśchiraṃ saḥ ।
sāyujyamēva bhavadaikyadhiyā gatō’bhūt
kō nāma kasya sukṛtaṃ kathamityavēyāt ॥5॥
kāśīśvarasya tanayō’tha sudakṣiṇākhyaḥ
śarvaṃ prapūjya bhavatē vihitābhichāraḥ ।
kṛtyānalaṃ kamapi bāṇraraṇātibhītai-
rbhūtaiḥ kathañchana vṛtaiḥ samamabhyamuñchat ॥6॥
tālapramāṇacharaṇāmakhilaṃ dahantīṃ
kṛtyāṃ vilōkya chakitaiḥ kathitō’pi pauraiḥ ।
dyūtōtsavē kimapi nō chalitō vibhō tvaṃ
pārśvasthamāśu visasarjitha kālachakram ॥7॥
abhyāpatatyamitadhāmni bhavanmahāstrē
hā hēti vidrutavatī khalu ghōrakṛtyā।
rōṣāt sudakṣiṇamadakṣiṇachēṣṭitaṃ taṃ
puplōṣa chakramapi kāśipurīmadhākṣīt ॥8॥
sa khalu vividō rakṣōghātē kṛtōpakṛtiḥ purā
tava tu kalayā mṛtyuṃ prāptuṃ tadā khalatāṃ gataḥ ।
narakasachivō dēśaklēśaṃ sṛjan nagarāntikē
jhaṭiti halinā yudhyannaddhā papāta talāhataḥ ॥9॥
sāmbaṃ kauravyaputrīharaṇaniyamitaṃ sāntvanārthī kurūṇāṃ
yātastadvākyarōṣōddhṛtakarinagarō mōchayāmāsa rāmaḥ ।
tē ghātyāḥ pāṇḍavēyairiti yadupṛtanāṃ nāmuchastvaṃ tadānīṃ
taṃ tvāṃ durbōdhalīlaṃ pavanapurapatē tāpaśāntyai niṣēvē ॥10॥