tatō magadhabhūbhṛtā chiranirōdhasaṅklēśitaṃ
śatāṣṭakayutāyutadvitayamīśa bhūmībhṛtām ।
anāthaśaraṇāya tē kamapi pūruṣaṃ prāhiṇō-
dayāchata sa māgadhakṣapaṇamēva kiṃ bhūyasā ॥1॥
yiyāsurabhimāgadhaṃ tadanu nāradōdīritā-
dyudhiṣṭhiramakhōdyamādubhayakāryaparyākulaḥ ।
viruddhajayinō’dhvarādubhayasiddhirityuddhavē
śaśaṃsuṣi nijaiḥ samaṃ puramiyētha yaudhiṣṭhirīm ॥2॥
aśēṣadayitāyutē tvayi samāgatē dharmajō
vijitya sahajairmahīṃ bhavadapāṅgasaṃvardhitaiḥ ।
śriyaṃ nirupamāṃ vahannahaha bhaktadāsāyitaṃ
bhavantamayi māgadhē prahitavān sabhīmārjunam ॥3॥
girivrajapuraṃ gatāstadanu dēva yūyaṃ trayō
yayācha samarōtsavaṃ dvijamiṣēṇa taṃ māgadham ।
apūrṇasukṛtaṃ tvamuṃ pavanajēna saṅgrāmayan
nirīkṣya saha jiṣṇunā tvamapi rājayuddhvā sthitaḥ ॥4॥
aśāntasamarōddhataṃ biṭapapāṭanāsañjñayā
nipātya jararassutaṃ pavanajēna niṣpāṭitam ।
vimuchya nṛpatīn mudā samanugṛhya bhaktiṃ parāṃ
didēśitha gataspṛhānapi cha dharmaguptyai bhuvaḥ ॥5॥
prachakruṣi yudhiṣṭhirē tadanu rājasūyādhvaraṃ
prasannabhṛtakībhavatsakalarājakavyākulam ।
tvamapyayi jagatpatē dvijapadāvanējādikaṃ
chakartha kimu kathyatē nṛpavarasya bhāgyōnnatiḥ ॥6॥
tataḥ savanakarmaṇi pravaramagryapūjāvidhiṃ
vichārya sahadēvavāganugataḥ sa dharmātmajaḥ ।
vyadhatta bhavatē mudā sadasi viśvabhūtātmanē
tadā sasuramānuṣaṃ bhuvanamēva tṛptiṃ dadhau ॥7॥
tataḥ sapadi chēdipō muninṛpēṣu tiṣṭhatsvahō
sabhājayati kō jaḍaḥ paśupadurdurūṭaṃ vaṭum ।
iti tvayi sa durvachōvitatimudvamannāsanā-
dudāpatadudāyudhaḥ samapatannamuṃ pāṇḍavāḥ ॥8॥
nivārya nijapakṣagānabhimukhasyavidvēṣiṇa-
stvamēva jahṛṣē śirō danujadāriṇā svāriṇā ।
janustritayalabdhayā satatachintayā śuddhadhī-
stvayā sa paramēkatāmadhṛta yōgināṃ durlabhām ॥9॥
tataḥ sumahitē tvayā kratuvarē nirūḍhē janō
yayau jayati dharmajō jayati kṛṣṇa ityālapan।
khalaḥ sa tu suyōdhanō dhutamanāssapatnaśriyā
mayārpitasabhāmukhē sthalajalabhramādabhramīt ॥10॥
tadā hasitamutthitaṃ drupadanandanābhīmayō-
rapāṅgakalayā vibhō kimapi tāvadujjṛmbhayan ।
dharābharanirākṛtau sapadi nāma bījaṃ vapan
janārdana marutpurīnilaya pāhi māmāmayāt ॥11॥