තතෝ මගධභූභෘතා චිරනිරෝධසංක්ලේශිතං
ශතාෂ්ටකයුතායුතද්විතයමීශ භූමීභෘතාම් ।
අනාථශරණාය තේ කමපි පූරුෂං ප්රාහිණෝ-
දයාචත ස මාගධක්ෂපණමේව කිං භූයසා ॥1॥
යියාසුරභිමාගධං තදනු නාරදෝදීරිතා-
ද්යුධිෂ්ඨිරමඛෝද්යමාදුභයකාර්යපර්යාකුලඃ ।
විරුද්ධජයිනෝऽධ්වරාදුභයසිද්ධිරිත්යුද්ධවේ
ශශංසුෂි නිජෛඃ සමං පුරමියේථ යෞධිෂ්ඨිරීම් ॥2॥
අශේෂදයිතායුතේ ත්වයි සමාගතේ ධර්මජෝ
විජිත්ය සහජෛර්මහීං භවදපාංගසංවර්ධිතෛඃ ।
ශ්රියං නිරුපමාං වහන්නහහ භක්තදාසායිතං
භවංතමයි මාගධේ ප්රහිතවාන් සභීමාර්ජුනම් ॥3॥
ගිරිව්රජපුරං ගතාස්තදනු දේව යූයං ත්රයෝ
යයාච සමරෝත්සවං ද්විජමිෂේණ තං මාගධම් ।
අපූර්ණසුකෘතං ත්වමුං පවනජේන සංග්රාමයන්
නිරීක්ෂ්ය සහ ජිෂ්ණුනා ත්වමපි රාජයුද්ධ්වා ස්ථිතඃ ॥4॥
අශාංතසමරෝද්ධතං බිටපපාටනාසංජ්ඤයා
නිපාත්ය ජරරස්සුතං පවනජේන නිෂ්පාටිතම් ।
විමුච්ය නෘපතීන් මුදා සමනුගෘහ්ය භක්තිං පරාං
දිදේශිථ ගතස්පෘහානපි ච ධර්මගුප්ත්යෛ භුවඃ ॥5॥
ප්රචක්රුෂි යුධිෂ්ඨිරේ තදනු රාජසූයාධ්වරං
ප්රසන්නභෘතකීභවත්සකලරාජකව්යාකුලම් ।
ත්වමප්යයි ජගත්පතේ ද්විජපදාවනේජාදිකං
චකර්ථ කිමු කථ්යතේ නෘපවරස්ය භාග්යෝන්නතිඃ ॥6॥
තතඃ සවනකර්මණි ප්රවරමග්ර්යපූජාවිධිං
විචාර්ය සහදේවවාගනුගතඃ ස ධර්මාත්මජඃ ।
ව්යධත්ත භවතේ මුදා සදසි විශ්වභූතාත්මනේ
තදා සසුරමානුෂං භුවනමේව තෘප්තිං දධෞ ॥7॥
තතඃ සපදි චේදිපෝ මුනිනෘපේෂු තිෂ්ඨත්ස්වහෝ
සභාජයති කෝ ජඩඃ පශුපදුර්දුරූටං වටුම් ।
ඉති ත්වයි ස දුර්වචෝවිතතිමුද්වමන්නාසනා-
දුදාපතදුදායුධඃ සමපතන්නමුං පාංඩවාඃ ॥8॥
නිවාර්ය නිජපක්ෂගානභිමුඛස්යවිද්වේෂිණ-
ස්ත්වමේව ජහෘෂේ ශිරෝ දනුජදාරිණා ස්වාරිණා ।
ජනුස්ත්රිතයලබ්ධයා සතතචිංතයා ශුද්ධධී-
ස්ත්වයා ස පරමේකතාමධෘත යෝගිනාං දුර්ලභාම් ॥9॥
තතඃ සුමහිතේ ත්වයා ක්රතුවරේ නිරූඪේ ජනෝ
යයෞ ජයති ධර්මජෝ ජයති කෘෂ්ණ ඉත්යාලපන්।
ඛලඃ ස තු සුයෝධනෝ ධුතමනාස්සපත්නශ්රියා
මයාර්පිතසභාමුඛේ ස්ථලජලභ්රමාදභ්රමීත් ॥10॥
තදා හසිතමුත්ථිතං ද්රුපදනංදනාභීමයෝ-
රපාංගකලයා විභෝ කිමපි තාවදුජ්ජෘංභයන් ।
ධරාභරනිරාකෘතෞ සපදි නාම බීජං වපන්
ජනාර්දන මරුත්පුරීනිලය පාහි මාමාමයාත් ॥11॥