কুচেলনামা ভবতঃ সতীর্থ্যতাং গতঃ স সাংদীপনিমংদিরে দ্বিজঃ ।
ত্বদেকরাগেণ ধনাদিনিস্স্পৃহো দিনানি নিন্যে প্রশমী গৃহাশ্রমী ॥1॥
সমানশীলাঽপি তদীযবল্লভা তথৈব নো চিত্তজযং সমেযুষী ।
কদাচিদূচে বত বৃত্তিলব্ধযে রমাপতিঃ কিং ন সখা নিষেব্যতে ॥2॥
ইতীরিতোঽযং প্রিযযা ক্ষুধার্তযা জুগুপ্সমানোঽপি ধনে মদাবহে ।
তদা ত্বদালোকনকৌতুকাদ্যযৌ বহন্ পটাংতে পৃথুকানুপাযনম্ ॥3॥
গতোঽযমাশ্চর্যমযীং ভবত্পুরীং গৃহেষু শৈব্যাভবনং সমেযিবান্ ।
প্রবিশ্য বৈকুংঠমিবাপ নির্বৃতিং তবাতিসংভাবনযা তু কিং পুনঃ ॥4॥
প্রপূজিতং তং প্রিযযা চ বীজিতং করে গৃহীত্বাঽকথযঃ পুরাকৃতম্ ।
যদিংধনার্থং গুরুদারচোদিতৈরপর্তুবর্ষ তদমর্ষি কাননে ॥5॥
ত্রপাজুষোঽস্মাত্ পৃথুকং বলাদথ প্রগৃহ্য মুষ্টৌ সকৃদাশিতে ত্বযা ।
কৃতং কৃতং নন্বিযতেতি সংভ্রমাদ্রমা কিলোপেত্য করং রুরোধ তে ॥6॥
ভক্তেষু ভক্তেন স মানিতস্ত্বযা পুরীং বসন্নেকনিশাং মহাসুখম্ ।
বতাপরেদ্যুর্দ্রবিণং বিনা যযৌ বিচিত্ররূপস্তব খল্বনুগ্রহঃ ॥7॥
যদি হ্যযাচিষ্যমদাস্যদচ্যুতো বদামি ভার্যাং কিমিতি ব্রজন্নসৌ ।
ত্বদুক্তিলীলাস্মিতমগ্নধীঃ পুনঃ ক্রমাদপশ্যন্মণিদীপ্রমালযম্ ॥8॥
কিং মার্গবিভ্রংশ ইতি ভ্রংমন্ ক্ষণং গৃহং প্রবিষ্টঃ স দদর্শ বল্লভাম্ ।
সখীপরীতাং মণিহেমভূষিতাং বুবোধ চ ত্বত্করুণাং মহাদ্ভুতাম্ ॥9॥
স রত্নশালাসু বসন্নপি স্বযং সমুন্নমদ্ভক্তিভরোঽমৃতং যযৌ ।
ত্বমেবমাপূরিতভক্তবাংছিতো মরুত্পুরাধীশ হরস্ব মে গদান্ ॥10॥