වෘකභෘගුමුනිමෝහින්යංබරීෂාදිවෘත්තේ-
ෂ්වයි තව හි මහත්ත්වං සර්වශර්වාදිජෛත්රම් ।
ස්ථිතමිහ පරමාත්මන් නිෂ්කලාර්වාගභින්නං
කිමපි යදවභාතං තද්ධි රූපං තවෛව ॥1॥
මූර්තිත්රයේශ්වරසදාශිවපංචකං යත්
ප්රාහුඃ පරාත්මවපුරේව සදාශිවෝऽස්මින් ।
තත්රේශ්වරස්තු ස විකුංඨපදස්ත්වමේව
ත්රිත්වං පුනර්භජසි සත්යපදේ ත්රිභාගේ ॥2॥
තත්රාපි සාත්ත්විකතනුං තව විෂ්ණුමාහු-
ර්ධාතා තු සත්ත්වවිරලෝ රජසෛව පූර්ණඃ ।
සත්ත්වෝත්කටත්වමපි චාස්ති තමෝවිකාර-
චේෂ්ටාදිකංච තව ශංකරනාම්නි මූර්තෞ ॥3॥
තං ච ත්රිමූර්ත්යතිගතං පරපූරුෂං ත්වාං
ශර්වාත්මනාපි ඛලු සර්වමයත්වහේතෝඃ ।
ශංසංත්යුපාසනවිධෞ තදපි ස්වතස්තු
ත්වද්රූපමිත්යතිදෘඪං බහු නඃ ප්රමාණම් ॥4॥
ශ්රීශංකරෝऽපි භගවාන් සකලේෂු තාව-
ත්ත්වාමේව මානයති යෝ න හි පක්ෂපාතී ।
ත්වන්නිෂ්ඨමේව ස හි නාමසහස්රකාදි
ව්යාඛ්යාත් භවත්ස්තුතිපරශ්ච ගතිං ගතෝऽංතේ ॥5॥
මූර්තිත්රයාතිගමුවාච ච මංත්රශාස්ත්ර-
ස්යාදෞ කලායසුෂමං සකලේශ්වරං ත්වාම් ।
ධ්යානං ච නිෂ්කලමසෞ ප්රණවේ ඛලූක්ත්වා
ත්වාමේව තත්ර සකලං නිජගාද නාන්යම් ॥6॥
සමස්තසාරේ ච පුරාණසංග්රහේ
විසංශයං ත්වන්මහිමෛව වර්ණ්යතේ ।
ත්රිමූර්තියුක්සත්යපදත්රිභාගතඃ
පරං පදං තේ කථිතං න ශූලිනඃ ॥7॥
යත් බ්රාහ්මකල්ප ඉහ භාගවතද්විතීය-
ස්කංධෝදිතං වපුරනාවෘතමීශ ධාත්රේ ।
තස්යෛව නාම හරිශර්වමුඛං ජගාද
ශ්රීමාධවඃ ශිවපරෝऽපි පුරාණසාරේ ॥8॥
යේ ස්වප්රකෘත්යනුගුණා ගිරිශං භජංතේ
තේෂාං ඵලං හි දෘඪයෛව තදීයභක්ත්යා।
ව්යාසෝ හි තේන කෘතවානධිකාරිහේතෝඃ
ස්කංදාදිකේෂු තව හානිවචෝऽර්ථවාදෛඃ ॥9॥
භූතාර්ථකීර්තිරනුවාදවිරුද්ධවාදෞ
ත්රේධාර්ථවාදගතයඃ ඛලු රෝචනාර්ථාඃ ।
ස්කාංදාදිකේෂු බහවෝऽත්ර විරුද්ධවාදා-
ස්ත්වත්තාමසත්වපරිභූත්යුපශික්ෂණාද්යාඃ ॥10॥
යත් කිංචිදප්යවිදුෂාऽපි විභෝ මයෝක්තං
තන්මංත්රශාස්ත්රවචනාද්යභිදෘෂ්ටමේව ।
ව්යාසෝක්තිසාරමයභාගවතෝපගීත
ක්ලේශාන් විධූය කුරු භක්තිභරං පරාත්මන් ॥11॥