śrīkṛṣṇa tvatpadōpāsanamabhayatamaṃ baddhamithyārthadṛṣṭē-
rmartyasyārtasya manyē vyapasarati bhayaṃ yēna sarvātmanaiva ।
yattāvat tvatpraṇītāniha bhajanavidhīnāsthitō mōhamārgē
dhāvannapyāvṛtākṣaḥ skhalati na kuhachiddēvadēvākhilātman ॥1॥
bhūman kāyēna vāchā muhurapi manasā tvadbalaprēritātmā
yadyat kurvē samastaṃ tadiha paratarē tvayyasāvarpayāmi ।
jātyāpīha śvapākastvayi nihitamanaḥkarmavāgindriyārtha-
prāṇō viśvaṃ punītē na tu vimukhamanāstvatpadādvipravaryaḥ ॥2॥
bhītirnāma dvitīyādbhavati nanu manaḥkalpitaṃ cha dvitīyaṃ
tēnaikyābhyāsaśīlō hṛdayamiha yathāśakti buddhyā nirundhyām ।
māyāviddhē tu tasmin punarapi na tathā bhāti māyādhināthaṃ
taṃ tvāṃ bhaktyā mahatyā satatamanubhajanīśa bhītiṃ vijahyām ॥3॥
bhaktērutpattivṛddhī tava charaṇajuṣāṃ saṅgamēnaiva puṃsā-
māsādyē puṇyabhājāṃ śriya iva jagati śrīmatāṃ saṅgamēna ।
tatsaṅgō dēva bhūyānmama khalu satataṃ tanmukhādunmiṣadbhi-
stvanmāhātmyaprakārairbhavati cha sudṛḍhā bhaktiruddhūtapāpā ॥4॥
śrēyōmārgēṣu bhaktāvadhikabahumatirjanmakarmāṇi bhūyō
gāyan kṣēmāṇi nāmānyapi tadubhayataḥ pradrutaṃ pradrutātmā ।
udyaddhāsaḥ kadāchit kuhachidapi rudan kvāpi garjan pragāya-
nnunmādīva pranṛtyannayi kuru karuṇāṃ lōkabāhyaścharēyam ॥5॥
bhūtānyētāni bhūtātmakamapi sakalaṃ pakṣimatsyān mṛgādīn
martyān mitrāṇi śatrūnapi yamitamatistvanmayānyānamāni ।
tvatsēvāyāṃ hi siddhyēnmama tava kṛpayā bhaktidārḍhyaṃ virāga-
stvattattvasyāvabōdhō’pi cha bhuvanapatē yatnabhēdaṃ vinaiva ॥6॥
nō muhyan kṣuttṛḍādyairbhavasaraṇibhavaistvannilīnāśayatvā-
chchintāsātatyaśālī nimiṣalavamapi tvatpadādaprakampaḥ ।
iṣṭāniṣṭēṣu tuṣṭivyasanavirahitō māyikatvāvabōdhā-
jjyōtsnābhistvannakhēndōradhikaśiśiritēnātmanā sañcharēyam ॥7॥
bhūtēṣvēṣu tvadaikyasmṛtisamadhigatau nādhikārō’dhunā chē-
ttvatprēma tvatkamaitrī jaḍamatiṣu kṛpā dviṭsu bhūyādupēkṣā ।
archāyāṃ vā samarchākutukamurutaraśraddhayā vardhatāṃ mē
tvatsaṃsēvī tathāpi drutamupalabhatē bhaktalōkōttamatvam ॥8॥
āvṛtya tvatsvarūpaṃ kṣitijalamarudādyātmanā vikṣipantī
jīvān bhūyiṣṭhakarmāvalivivaśagatīn duḥkhajālē kṣipantī ।
tvanmāyā mābhibhūnmāmayi bhuvanapatē kalpatē tatpraśāntyai
tvatpādē bhaktirēvētyavadadayi vibhō siddhayōgī prabuddhaḥ ॥9॥
duḥkhānyālōkya jantuṣvalamuditavivēkō’hamāchāryavaryā-
llabdhvā tvadrūpatattvaṃ guṇacharitakathādyudbhavadbhaktibhūmā ।
māyāmēnāṃ taritvā paramasukhamayē tvatpadē mōditāhē
tasyāyaṃ pūrvaraṅgaḥ pavanapurapatē nāśayāśēṣarōgān ॥10॥