શ્રીકૃષ્ણ ત્વત્પદોપાસનમભયતમં બદ્ધમિથ્યાર્થદૃષ્ટે-
ર્મર્ત્યસ્યાર્તસ્ય મન્યે વ્યપસરતિ ભયં યેન સર્વાત્મનૈવ ।
યત્તાવત્ ત્વત્પ્રણીતાનિહ ભજનવિધીનાસ્થિતો મોહમાર્ગે
ધાવન્નપ્યાવૃતાક્ષઃ સ્ખલતિ ન કુહચિદ્દેવદેવાખિલાત્મન્ ॥1॥
ભૂમન્ કાયેન વાચા મુહુરપિ મનસા ત્વદ્બલપ્રેરિતાત્મા
યદ્યત્ કુર્વે સમસ્તં તદિહ પરતરે ત્વય્યસાવર્પયામિ ।
જાત્યાપીહ શ્વપાકસ્ત્વયિ નિહિતમનઃકર્મવાગિંદ્રિયાર્થ-
પ્રાણો વિશ્વં પુનીતે ન તુ વિમુખમનાસ્ત્વત્પદાદ્વિપ્રવર્યઃ ॥2॥
ભીતિર્નામ દ્વિતીયાદ્ભવતિ નનુ મનઃકલ્પિતં ચ દ્વિતીયં
તેનૈક્યાભ્યાસશીલો હૃદયમિહ યથાશક્તિ બુદ્ધ્યા નિરુંધ્યામ્ ।
માયાવિદ્ધે તુ તસ્મિન્ પુનરપિ ન તથા ભાતિ માયાધિનાથં
તં ત્વાં ભક્ત્યા મહત્યા સતતમનુભજનીશ ભીતિં વિજહ્યામ્ ॥3॥
ભક્તેરુત્પત્તિવૃદ્ધી તવ ચરણજુષાં સંગમેનૈવ પુંસા-
માસાદ્યે પુણ્યભાજાં શ્રિય ઇવ જગતિ શ્રીમતાં સંગમેન ।
તત્સંગો દેવ ભૂયાન્મમ ખલુ સતતં તન્મુખાદુન્મિષદ્ભિ-
સ્ત્વન્માહાત્મ્યપ્રકારૈર્ભવતિ ચ સુદૃઢા ભક્તિરુદ્ધૂતપાપા ॥4॥
શ્રેયોમાર્ગેષુ ભક્તાવધિકબહુમતિર્જન્મકર્માણિ ભૂયો
ગાયન્ ક્ષેમાણિ નામાન્યપિ તદુભયતઃ પ્રદ્રુતં પ્રદ્રુતાત્મા ।
ઉદ્યદ્ધાસઃ કદાચિત્ કુહચિદપિ રુદન્ ક્વાપિ ગર્જન્ પ્રગાય-
ન્નુન્માદીવ પ્રનૃત્યન્નયિ કુરુ કરુણાં લોકબાહ્યશ્ચરેયમ્ ॥5॥
ભૂતાન્યેતાનિ ભૂતાત્મકમપિ સકલં પક્ષિમત્સ્યાન્ મૃગાદીન્
મર્ત્યાન્ મિત્રાણિ શત્રૂનપિ યમિતમતિસ્ત્વન્મયાન્યાનમાનિ ।
ત્વત્સેવાયાં હિ સિદ્ધ્યેન્મમ તવ કૃપયા ભક્તિદાર્ઢ્યં વિરાગ-
સ્ત્વત્તત્ત્વસ્યાવબોધોઽપિ ચ ભુવનપતે યત્નભેદં વિનૈવ ॥6॥
નો મુહ્યન્ ક્ષુત્તૃડાદ્યૈર્ભવસરણિભવૈસ્ત્વન્નિલીનાશયત્વા-
ચ્ચિંતાસાતત્યશાલી નિમિષલવમપિ ત્વત્પદાદપ્રકંપઃ ।
ઇષ્ટાનિષ્ટેષુ તુષ્ટિવ્યસનવિરહિતો માયિકત્વાવબોધા-
જ્જ્યોત્સ્નાભિસ્ત્વન્નખેંદોરધિકશિશિરિતેનાત્મના સંચરેયમ્ ॥7॥
ભૂતેષ્વેષુ ત્વદૈક્યસ્મૃતિસમધિગતૌ નાધિકારોઽધુના ચે-
ત્ત્વત્પ્રેમ ત્વત્કમૈત્રી જડમતિષુ કૃપા દ્વિટ્સુ ભૂયાદુપેક્ષા ।
અર્ચાયાં વા સમર્ચાકુતુકમુરુતરશ્રદ્ધયા વર્ધતાં મે
ત્વત્સંસેવી તથાપિ દ્રુતમુપલભતે ભક્તલોકોત્તમત્વમ્ ॥8॥
આવૃત્ય ત્વત્સ્વરૂપં ક્ષિતિજલમરુદાદ્યાત્મના વિક્ષિપંતી
જીવાન્ ભૂયિષ્ઠકર્માવલિવિવશગતીન્ દુઃખજાલે ક્ષિપંતી ।
ત્વન્માયા માભિભૂન્મામયિ ભુવનપતે કલ્પતે તત્પ્રશાંત્યૈ
ત્વત્પાદે ભક્તિરેવેત્યવદદયિ વિભો સિદ્ધયોગી પ્રબુદ્ધઃ ॥9॥
દુઃખાન્યાલોક્ય જંતુષ્વલમુદિતવિવેકોઽહમાચાર્યવર્યા-
લ્લબ્ધ્વા ત્વદ્રૂપતત્ત્વં ગુણચરિતકથાદ્યુદ્ભવદ્ભક્તિભૂમા ।
માયામેનાં તરિત્વા પરમસુખમયે ત્વત્પદે મોદિતાહે
તસ્યાયં પૂર્વરંગઃ પવનપુરપતે નાશયાશેષરોગાન્ ॥10॥