ವೇದೈಸ್ಸರ್ವಾಣಿ ಕರ್ಮಾಣ್ಯಫಲಪರತಯಾ ವರ್ಣಿತಾನೀತಿ ಬುಧ್ವಾ
ತಾನಿ ತ್ವಯ್ಯರ್ಪಿತಾನ್ಯೇವ ಹಿ ಸಮನುಚರನ್ ಯಾನಿ ನೈಷ್ಕರ್ಮ್ಯಮೀಶ ।
ಮಾ ಭೂದ್ವೇದೈರ್ನಿಷಿದ್ಧೇ ಕುಹಚಿದಪಿ ಮನಃಕರ್ಮವಾಚಾಂ ಪ್ರವೃತ್ತಿ-
ರ್ದುರ್ವರ್ಜಂ ಚೇದವಾಪ್ತಂ ತದಪಿ ಖಲು ಭವತ್ಯರ್ಪಯೇ ಚಿತ್ಪ್ರಕಾಶೇ ॥1॥
ಯಸ್ತ್ವನ್ಯಃ ಕರ್ಮಯೋಗಸ್ತವ ಭಜನಮಯಸ್ತತ್ರ ಚಾಭೀಷ್ಟಮೂರ್ತಿಂ
ಹೃದ್ಯಾಂ ಸತ್ತ್ವೈಕರೂಪಾಂ ದೃಷದಿ ಹೃದಿ ಮೃದಿ ಕ್ವಾಪಿ ವಾ ಭಾವಯಿತ್ವಾ ।
ಪುಷ್ಪೈರ್ಗಂಧೈರ್ನಿವೇದ್ಯೈರಪಿ ಚ ವಿರಚಿತೈಃ ಶಕ್ತಿತೋ ಭಕ್ತಿಪೂತೈ-
ರ್ನಿತ್ಯಂ ವರ್ಯಾಂ ಸಪರ್ಯಾಂ ವಿದಧದಯಿ ವಿಭೋ ತ್ವತ್ಪ್ರಸಾದಂ ಭಜೇಯಮ್ ॥2॥
ಸ್ತ್ರೀಶೂದ್ರಾಸ್ತ್ವತ್ಕಥಾದಿಶ್ರವಣವಿರಹಿತಾ ಆಸತಾಂ ತೇ ದಯಾರ್ಹಾ-
ಸ್ತ್ವತ್ಪಾದಾಸನ್ನಯಾತಾನ್ ದ್ವಿಜಕುಲಜನುಷೋ ಹಂತ ಶೋಚಾಮ್ಯಶಾಂತಾನ್ ।
ವೃತ್ತ್ಯರ್ಥಂ ತೇ ಯಜಂತೋ ಬಹುಕಥಿತಮಪಿ ತ್ವಾಮನಾಕರ್ಣಯಂತೋ
ದೃಪ್ತಾ ವಿದ್ಯಾಭಿಜಾತ್ಯೈಃ ಕಿಮು ನ ವಿದಧತೇ ತಾದೃಶಂ ಮಾ ಕೃಥಾ ಮಾಮ್ ॥3॥
ಪಾಪೋಽಯಂ ಕೃಷ್ಣರಾಮೇತ್ಯಭಿಲಪತಿ ನಿಜಂ ಗೂಹಿತುಂ ದುಶ್ಚರಿತ್ರಂ
ನಿರ್ಲಜ್ಜಸ್ಯಾಸ್ಯ ವಾಚಾ ಬಹುತರಕಥನೀಯಾನಿ ಮೇ ವಿಘ್ನಿತಾನಿ ।
ಭ್ರಾತಾ ಮೇ ವಂಧ್ಯಶೀಲೋ ಭಜತಿ ಕಿಲ ಸದಾ ವಿಷ್ಣುಮಿತ್ಥಂ ಬುಧಾಂಸ್ತೇ
ನಿಂದಂತ್ಯುಚ್ಚೈರ್ಹಸಂತಿ ತ್ವಯಿ ನಿಹಿತಮತೀಂಸ್ತಾದೃಶಂ ಮಾ ಕೃಥಾ ಮಾಮ್ ॥4॥
ಶ್ವೇತಚ್ಛಾಯಂ ಕೃತೇ ತ್ವಾಂ ಮುನಿವರವಪುಷಂ ಪ್ರೀಣಯಂತೇ ತಪೋಭಿ-
ಸ್ತ್ರೇತಾಯಾಂ ಸ್ರುಕ್ಸ್ರುವಾದ್ಯಂಕಿತಮರುಣತನುಂ ಯಜ್ಞರೂಪಂ ಯಜಂತೇ ।
ಸೇವಂತೇ ತಂತ್ರಮಾರ್ಗೈರ್ವಿಲಸದರಿಗದಂ ದ್ವಾಪರೇ ಶ್ಯಾಮಲಾಂಗಂ
ನೀಲಂ ಸಂಕೀರ್ತನಾದ್ಯೈರಿಹ ಕಲಿಸಮಯೇ ಮಾನುಷಾಸ್ತ್ವಾಂ ಭಜಂತೇ ॥5॥
ಸೋಽಯಂ ಕಾಲೇಯಕಾಲೋ ಜಯತಿ ಮುರರಿಪೋ ಯತ್ರ ಸಂಕೀರ್ತನಾದ್ಯೈ-
ರ್ನಿರ್ಯತ್ನೈರೇವ ಮಾರ್ಗೈರಖಿಲದ ನ ಚಿರಾತ್ತ್ವತ್ಪ್ರಸಾದಂ ಭಜಂತೇ ।
ಜಾತಾಸ್ತ್ರೇತಾಕೃತಾದಾವಪಿ ಹಿ ಕಿಲ ಕಲೌ ಸಂಭವಂ ಕಾಮಯಂತೇ
ದೈವಾತ್ತತ್ರೈವ ಜಾತಾನ್ ವಿಷಯವಿಷರಸೈರ್ಮಾ ವಿಭೋ ವಂಚಯಾಸ್ಮಾನ್ ॥6॥
ಭಕ್ತಾಸ್ತಾವತ್ಕಲೌ ಸ್ಯುರ್ದ್ರಮಿಲಭುವಿ ತತೋ ಭೂರಿಶಸ್ತತ್ರ ಚೋಚ್ಚೈ:
ಕಾವೇರೀಂ ತಾಮ್ರಪರ್ಣೀಮನು ಕಿಲ ಕೃತಮಾಲಾಂ ಚ ಪುಣ್ಯಾಂ ಪ್ರತೀಚೀಮ್ ।
ಹಾ ಮಾಮಪ್ಯೇತದಂತರ್ಭವಮಪಿ ಚ ವಿಭೋ ಕಿಂಚಿದಂಚದ್ರಸಂ ತ್ವ-
ಯ್ಯಾಶಾಪಾಶೈರ್ನಿಬಧ್ಯ ಭ್ರಮಯ ನ ಭಗವನ್ ಪೂರಯ ತ್ವನ್ನಿಷೇವಾಮ್ ॥7॥
ದೃಷ್ಟ್ವಾ ಧರ್ಮದ್ರುಹಂ ತಂ ಕಲಿಮಪಕರುಣಂ ಪ್ರಾಙ್ಮಹೀಕ್ಷಿತ್ ಪರೀಕ್ಷಿತ್
ಹಂತುಂ ವ್ಯಾಕೃಷ್ಟಖಡ್ಗೋಽಪಿ ನ ವಿನಿಹತವಾನ್ ಸಾರವೇದೀ ಗುಣಾಂಶಾತ್ ।
ತ್ವತ್ಸೇವಾದ್ಯಾಶು ಸಿದ್ಧ್ಯೇದಸದಿಹ ನ ತಥಾ ತ್ವತ್ಪರೇ ಚೈಷ ಭೀರು-
ರ್ಯತ್ತು ಪ್ರಾಗೇವ ರೋಗಾದಿಭಿರಪಹರತೇ ತತ್ರ ಹಾ ಶಿಕ್ಷಯೈನಮ್ ॥8॥
ಗಂಗಾ ಗೀತಾ ಚ ಗಾಯತ್ರ್ಯಪಿ ಚ ತುಲಸಿಕಾ ಗೋಪಿಕಾಚಂದನಂ ತತ್
ಸಾಲಗ್ರಾಮಾಭಿಪೂಜಾ ಪರಪುರುಷ ತಥೈಕಾದಶೀ ನಾಮವರ್ಣಾಃ ।
ಏತಾನ್ಯಷ್ಟಾಪ್ಯಯತ್ನಾನ್ಯಪಿ ಕಲಿಸಮಯೇ ತ್ವತ್ಪ್ರಸಾದಪ್ರವೃದ್ಧ್ಯಾ
ಕ್ಷಿಪ್ರಂ ಮುಕ್ತಿಪ್ರದಾನೀತ್ಯಭಿದಧುಃ ಋಷಯಸ್ತೇಷು ಮಾಂ ಸಜ್ಜಯೇಥಾಃ ॥9॥
ದೇವರ್ಷೀಣಾಂ ಪಿತೃಣಾಮಪಿ ನ ಪುನಃ ಋಣೀ ಕಿಂಕರೋ ವಾ ಸ ಭೂಮನ್ ।
ಯೋಽಸೌ ಸರ್ವಾತ್ಮನಾ ತ್ವಾಂ ಶರಣಮುಪಗತಸ್ಸರ್ವಕೃತ್ಯಾನಿ ಹಿತ್ವಾ ।
ತಸ್ಯೋತ್ಪನ್ನಂ ವಿಕರ್ಮಾಪ್ಯಖಿಲಮಪನುದಸ್ಯೇವ ಚಿತ್ತಸ್ಥಿತಸ್ತ್ವಂ
ತನ್ಮೇ ಪಾಪೋತ್ಥತಾಪಾನ್ ಪವನಪುರಪತೇ ರುಂಧಿ ಭಕ್ತಿಂ ಪ್ರಣೀಯಾಃ ॥10॥