વેદૈસ્સર્વાણિ કર્માણ્યફલપરતયા વર્ણિતાનીતિ બુધ્વા
તાનિ ત્વય્યર્પિતાન્યેવ હિ સમનુચરન્ યાનિ નૈષ્કર્મ્યમીશ ।
મા ભૂદ્વેદૈર્નિષિદ્ધે કુહચિદપિ મનઃકર્મવાચાં પ્રવૃત્તિ-
ર્દુર્વર્જં ચેદવાપ્તં તદપિ ખલુ ભવત્યર્પયે ચિત્પ્રકાશે ॥1॥
યસ્ત્વન્યઃ કર્મયોગસ્તવ ભજનમયસ્તત્ર ચાભીષ્ટમૂર્તિં
હૃદ્યાં સત્ત્વૈકરૂપાં દૃષદિ હૃદિ મૃદિ ક્વાપિ વા ભાવયિત્વા ।
પુષ્પૈર્ગંધૈર્નિવેદ્યૈરપિ ચ વિરચિતૈઃ શક્તિતો ભક્તિપૂતૈ-
ર્નિત્યં વર્યાં સપર્યાં વિદધદયિ વિભો ત્વત્પ્રસાદં ભજેયમ્ ॥2॥
સ્ત્રીશૂદ્રાસ્ત્વત્કથાદિશ્રવણવિરહિતા આસતાં તે દયાર્હા-
સ્ત્વત્પાદાસન્નયાતાન્ દ્વિજકુલજનુષો હંત શોચામ્યશાંતાન્ ।
વૃત્ત્યર્થં તે યજંતો બહુકથિતમપિ ત્વામનાકર્ણયંતો
દૃપ્તા વિદ્યાભિજાત્યૈઃ કિમુ ન વિદધતે તાદૃશં મા કૃથા મામ્ ॥3॥
પાપોઽયં કૃષ્ણરામેત્યભિલપતિ નિજં ગૂહિતું દુશ્ચરિત્રં
નિર્લજ્જસ્યાસ્ય વાચા બહુતરકથનીયાનિ મે વિઘ્નિતાનિ ।
ભ્રાતા મે વંધ્યશીલો ભજતિ કિલ સદા વિષ્ણુમિત્થં બુધાંસ્તે
નિંદંત્યુચ્ચૈર્હસંતિ ત્વયિ નિહિતમતીંસ્તાદૃશં મા કૃથા મામ્ ॥4॥
શ્વેતચ્છાયં કૃતે ત્વાં મુનિવરવપુષં પ્રીણયંતે તપોભિ-
સ્ત્રેતાયાં સ્રુક્સ્રુવાદ્યંકિતમરુણતનું યજ્ઞરૂપં યજંતે ।
સેવંતે તંત્રમાર્ગૈર્વિલસદરિગદં દ્વાપરે શ્યામલાંગં
નીલં સંકીર્તનાદ્યૈરિહ કલિસમયે માનુષાસ્ત્વાં ભજંતે ॥5॥
સોઽયં કાલેયકાલો જયતિ મુરરિપો યત્ર સંકીર્તનાદ્યૈ-
ર્નિર્યત્નૈરેવ માર્ગૈરખિલદ ન ચિરાત્ત્વત્પ્રસાદં ભજંતે ।
જાતાસ્ત્રેતાકૃતાદાવપિ હિ કિલ કલૌ સંભવં કામયંતે
દૈવાત્તત્રૈવ જાતાન્ વિષયવિષરસૈર્મા વિભો વંચયાસ્માન્ ॥6॥
ભક્તાસ્તાવત્કલૌ સ્યુર્દ્રમિલભુવિ તતો ભૂરિશસ્તત્ર ચોચ્ચૈ:
કાવેરીં તામ્રપર્ણીમનુ કિલ કૃતમાલાં ચ પુણ્યાં પ્રતીચીમ્ ।
હા મામપ્યેતદંતર્ભવમપિ ચ વિભો કિંચિદંચદ્રસં ત્વ-
ય્યાશાપાશૈર્નિબધ્ય ભ્રમય ન ભગવન્ પૂરય ત્વન્નિષેવામ્ ॥7॥
દૃષ્ટ્વા ધર્મદ્રુહં તં કલિમપકરુણં પ્રાઙ્મહીક્ષિત્ પરીક્ષિત્
હંતું વ્યાકૃષ્ટખડ્ગોઽપિ ન વિનિહતવાન્ સારવેદી ગુણાંશાત્ ।
ત્વત્સેવાદ્યાશુ સિદ્ધ્યેદસદિહ ન તથા ત્વત્પરે ચૈષ ભીરુ-
ર્યત્તુ પ્રાગેવ રોગાદિભિરપહરતે તત્ર હા શિક્ષયૈનમ્ ॥8॥
ગંગા ગીતા ચ ગાયત્ર્યપિ ચ તુલસિકા ગોપિકાચંદનં તત્
સાલગ્રામાભિપૂજા પરપુરુષ તથૈકાદશી નામવર્ણાઃ ।
એતાન્યષ્ટાપ્યયત્નાન્યપિ કલિસમયે ત્વત્પ્રસાદપ્રવૃદ્ધ્યા
ક્ષિપ્રં મુક્તિપ્રદાનીત્યભિદધુઃ ઋષયસ્તેષુ માં સજ્જયેથાઃ ॥9॥
દેવર્ષીણાં પિતૃણામપિ ન પુનઃ ઋણી કિંકરો વા સ ભૂમન્ ।
યોઽસૌ સર્વાત્મના ત્વાં શરણમુપગતસ્સર્વકૃત્યાનિ હિત્વા ।
તસ્યોત્પન્નં વિકર્માપ્યખિલમપનુદસ્યેવ ચિત્તસ્થિતસ્ત્વં
તન્મે પાપોત્થતાપાન્ પવનપુરપતે રુંધિ ભક્તિં પ્રણીયાઃ ॥10॥