යස්මින්නේතද්විභාතං යත ඉදමභවද්යේන චේදං ය ඒත-
ද්යෝऽස්මාදුත්තීර්ණරූපඃ ඛලු සකලමිදං භාසිතං යස්ය භාසා ।
යෝ වාචාං දූරදූරේ පුනරපි මනසාං යස්ය දේවා මුනීංද්රාඃ
නෝ විද්යුස්තත්ත්වරූපං කිමු පුනරපරේ කෘෂ්ණ තස්මෛ නමස්තේ ॥1॥
ජන්මාථෝ කර්ම නාම ස්ඵුටමිහ ගුණදෝෂාදිකං වා න යස්මින්
ලෝකානාමූතයේ යඃ ස්වයමනුභජතේ තානි මායානුසාරී ।
විභ්රච්ඡක්තීරරූපෝऽපි ච බහුතරරූපෝऽවභාත්යද්භුතාත්මා
තස්මෛ කෛවල්යධාම්නේ පරරසපරිපූර්ණාය විෂ්ණෝ නමස්තේ ॥2॥
නෝ තිර්යංචන්න මර්ත්යං න ච සුරමසුරං න ස්ත්රියං නෝ පුංමාංසං
න ද්රව්යං කර්ම ජාතිං ගුණමපි සදසද්වාපි තේ රූපමාහුඃ ।
ශිෂ්ටං යත් ස්යාන්නිෂේධේ සති නිගමශතෛර්ලක්ෂණාවෘත්තිතස්තත්
කෘච්ඡ්රේණාවේද්යමානං පරමසුඛමයං භාති තස්මෛ නමස්තේ ॥3॥
මායායාං බිංබිතස්ත්වං සෘජසි මහදහංකාරතන්මාත්රභේදෛ-
ර්භූතග්රාමේංද්රියාද්යෛරපි සකලජගත්ස්වප්නසංකල්පකල්පම් ।
භූයඃ සංහෘත්ය සර්වං කමඨ ඉව පදාන්යාත්මනා කාලශක්ත්යා
ගංභීරේ ජායමානේ තමසි විතිමිරෝ භාසි තස්මෛ නමස්තේ ॥4॥
ශබ්දබ්රහ්මේති කර්මේත්යණුරිති භගවන් කාල ඉත්යාලපංති
ත්වාමේකං විශ්වහේතුං සකලමයතයා සර්වථා කල්ප්යමානම් ।
වේදාංතෛර්යත්තු ගීතං පුරුෂපරචිදාත්මාභිධං තත්තු තත්ත්වං
ප්රේක්ෂාමාත්රේණ මූලප්රකෘතිවිකෘතිකෘත් කෘෂ්ණ තස්මෛ නමස්තේ ॥5॥
සත්ත්වේනාසත්තයා වා න ච ඛලු සදසත්ත්වේන නිර්වාච්යරූපා
ධත්තේ යාසාවවිද්යා ගුණඵණිමතිවද්විශ්වදෘශ්යාවභාසම් ।
විද්යාත්වං සෛව යාතා ශ්රුතිවචනලවෛර්යත්කෘපාස්යංදලාභේ
සංසාරාරණ්යසද්යස්ත්රුටනපරශුතාමේති තස්මෛ නමස්තේ ॥6॥
භූෂාසු ස්වර්ණවද්වා ජගති ඝටශරාවාදිකේ මෘත්තිකාව-
ත්තත්ත්වේ සංචිංත්යමානේ ස්ඵුරති තදධුනාප්යද්විතීයං වපුස්තේ ।
ස්වප්නද්රෂ්ටුඃ ප්රබෝධේ තිමිරලයවිධෞ ජීර්ණරජ්ජෝශ්ච යද්ව-
ද්විද්යාලාභේ තථෛව ස්ඵුටමපි විකසේත් කෘෂ්ණ තස්මෛ නමස්තේ ॥7॥
යද්භීත්යෝදේති සූර්යෝ දහති ච දහනෝ වාති වායුස්තථාන්යේ
යද්භීතාඃ පද්මජාද්යාඃ පුනරුචිතබලීනාහරංතේऽනුකාලම් ।
යේනෛවාරෝපිතාඃ ප්රාඞ්නිජපදමපි තේ ච්යාවිතාරශ්ච පශ්චාත්
තස්මෛ විශ්වං නියංත්රේ වයමපි භවතේ කෘෂ්ණ කුර්මඃ ප්රණාමම් ॥8॥
ත්රෛලෝක්යං භාවයංතං ත්රිගුණමයමිදං ත්ර්යක්ෂරස්යෛකවාච්යං
ත්රීශානාමෛක්යරූපං ත්රිභිරපි නිගමෛර්ගීයමානස්වරූපම් ।
තිස්රෝවස්ථා විදංතං ත්රියුගජනිජුෂං ත්රික්රමාක්රාංතවිශ්වං
ත්රෛකාල්යේ භේදහීනං ත්රිභිරහමනිශං යෝගභේදෛර්භජේ ත්වාම් ॥9॥
සත්යං ශුද්ධං විබුද්ධං ජයති තව වපුර්නිත්යමුක්තං නිරීහං
නිර්ද්වංද්වං නිර්විකාරං නිඛිලගුණගණව්යංජනාධාරභූතම් ।
නිර්මූලං නිර්මලං තන්නිරවධිමහිමෝල්ලාසි නිර්ලීනමංත-
ර්නිස්සංගානාං මුනීනාං නිරුපමපරමානංදසාංද්රප්රකාශම් ॥10॥
දුර්වාරං ද්වාදශාරං ත්රිශතපරිමිලත්ෂෂ්ටිපර්වාභිවීතං
සංභ්රාම්යත් ක්රූරවේගං ක්ෂණමනු ජගදාච්ඡිද්ය සංධාවමානම් ।
චක්රං තේ කාලරූපං ව්යථයතු න තු මාං ත්වත්පදෛකාවලංබං
විෂ්ණෝ කාරුණ්යසිංධෝ පවනපුරපතේ පාහි සර්වාමයෞඝාත් ॥11॥