(tai. saṃ. 1.4.6)
ya i̠mā viśvā̠ bhuva̍nāni̠ juhva̠dṛṣi̠rhōtā̍ niṣa̠sādā̍ pi̠tā na̍ḥ ।
sa ā̠śiṣā̠ dravi̍ṇami̠chChamā̍naḥ parama̠chChadō̠ vara̠ ā vi̍vēśa ॥ 1
vi̠śvaka̍rmā̠ mana̍sā̠ yadvihā̍yā dhā̠tā vi̍dhā̠tā pa̍ra̠mōta sa̠ndṛk ।
tēṣā̍mi̠ṣṭāni̠ sami̠ṣā ma̍danti̠ yatra̍ sapta̠rṣīnpa̠ra ēka̍mā̠huḥ ॥ 2
yō na̍ḥ pi̠tā ja̍ni̠tā yō vi̍dhā̠tā yō na̍-ssa̠tō a̠bhyā sajja̠jāna̍ ।
yō dē̠vānā̍-nnāma̠dhā ēka̍ ē̠va tagṃ sa̍mpra̠śnambhuva̍nā yantya̠nyā ॥ 3
ta āya̍janta̠ dravi̍ṇa̠gṃ sama̍smā̠ ṛṣa̍ya̠ḥ pūrvē̍ jari̠tārō̠ na bhū̠nā ।
a̠sūrtā̠ sūrtā̠ raja̍sō vi̠mānē̠ yē bhū̠tāni̍ sa̠makṛ̍ṇvanni̠māni̍ ॥ 4
na taṃ vi̍dātha̠ ya i̠da-ñja̠jānā̠nyadyu̠ṣmāka̠manta̍rambhavāti ।
nī̠hā̠rēṇa̠ prāvṛ̍tā jalpyā̍ chāsu̠tṛpa̍ uktha̠śāsa̍ścharanti ॥ 5
pa̠rō di̠vā pa̠ra ē̠nā pṛ̍thi̠vyā pa̠rō dē̠vēbhi̠rasu̍rai̠rguhā̠ yat ।
kagṃ svi̠dgarbha̍-mpratha̠ma-nda̍dhra̠ āpō̠ yatra̍ dē̠vā-ssa̠maga̍chChanta̠ viśvē ॥ 6
tamidgarbha̍mpratha̠ma-nda̍dhra̠ āpō̠ yatra̍ dē̠vā-ssa̠maga̍chChanta̠ viśvē̍ ।
a̠jasya̠ nābhā̠vadhyēka̠marpi̍ta̠ṃ yasmi̍nni̠daṃ viśva̠mbhuvana̠madhi̍ śri̠tam ॥ 7
vi̠śvaka̍rmā̠ hyaja̍niṣṭa dē̠va ādidga̍ndha̠rvō a̍bhavaddvi̠tīya̍ḥ ।
tṛ̠tīya̍ḥ pi̠tā ja̍ni̠tauṣa̍dhīnāma̠pā-ṅgarbha̠ṃ vya̍dadhātpuru̠trā ॥ 8
chakṣu̍ṣaḥ pi̠tā mana̍sā̠ hi dhīrō̍ ghṛ̠tamē̍nē ajana̠nnanna̍mānē ।
ya̠dēdantā̠ ada̍dṛgṃhanta̠ pūrva̠ ādiddyāvā̍pṛthi̠vī a̍prathētām ॥ 9
vi̠śvata̍śchakṣuru̠ta vi̠śvatō̍mukhō vi̠śvatō̍hasta u̠ta vi̠śvata̍spāt ।
sambā̠hubhyā̠-nnama̍ti̠ sampata̍trai̠rdyāvā̍pṛthi̠vī ja̠naya̍ndē̠va ēka̍ḥ ॥ 10
kigṃ svi̍dāsīdadhi̠ṣṭhāna̍mā̠rambha̍ṇa-ṅkata̠matsvi̠tkimā̍sīt ।
yadī̠ bhūmi̍-ñja̠naya̍nvi̠śvaka̍rmā̠ vi dyāmaurṇō̍nmahi̠nā vi̠śvacha̍kṣāḥ ॥ 11
kigṃ svi̠dvana̠-ṅka u̠ sa vṛ̠kṣa ā̍sī̠dyatō̠ dyāvā̍pṛthi̠vī ni̍ṣṭata̠kṣuḥ ।
manī̍ṣiṇō̠ mana̍sā pṛ̠chChatēdu̠ tadyada̠dhyati̍ṣṭha̠dbhuva̍nāni dhā̠rayan̍ ॥ 12
yā tē̠ dhāmā̍ni para̠māṇi̠ yāva̠mā yā ma̍dhya̠mā vi̍śvakarmannu̠tēmā ।
śikṣā̠ sakhi̍bhyō ha̠viṣi̍ svadhāva-ssva̠yaṃ ya̍jasva ta̠nuva̍-ñjuṣā̠ṇaḥ ॥ 13
vā̠chaspati̍ṃ vi̠śvaka̍rmāṇamū̠tayē̍ manō̠yuja̠ṃ vājē̍ a̠dyā hu̍vēma ।
sa nō̠ nēdi̍ṣṭhā̠ hava̍nāni jōṣatē vi̠śvaśa̍mbhū̠rava̍sē sā̠dhuka̍rmā ॥ 14
viśva̍karmanha̠viṣā̍ vāvṛdhā̠na-ssva̠yaṃ ya̍jasva ta̠nuva̍-ñjuṣā̠ṇaḥ ।
muhya̍ntva̠nyē a̠bhita̍-ssa̠patnā̍ i̠hāsmāka̍mma̠ghavā̍ sū̠rira̍stu ॥ 15
viśva̍karmanha̠viṣā vardha̍nēna trā̠tāra̠mindra̍makṛṇōrava̠dhyam ।
tasmai̠ viśa̠-ssama̍namanta pū̠rvīra̠yamu̠grō vi̍ha̠vyō̍ yathāsa̍t ॥ 16
sa̠mu̠drāya̍ va̠yunā̍ya̠ sindhū̍nā̠mpata̍yē̠ nama̍ḥ ।
na̠dīnā̠gṃ sarvā̍sāmpi̠trē ju̍hu̠tā
vi̠śvaka̍rmaṇē̠ viśvāhāma̍rtyagṃ ha̠viḥ ।