ଉଦ୍ୟଦ୍ଭାନୁସହସ୍ରକୋଟିସଦୃଶାଂ କେୟୂରହାରୋଜ୍ଜ୍ଵଲାଂ
ବିଂବୋଷ୍ଠୀଂ ସ୍ମିତଦଂତପଂକ୍ତିରୁଚିରାଂ ପୀତାଂବରାଲଂକୃତାମ୍ ।
ଵିଷ୍ଣୁବ୍ରହ୍ମସୁରେଂଦ୍ରସେଵିତପଦାଂ ତତ୍ତ୍ଵସ୍ଵରୂପାଂ ଶିଵାଂ
ମୀନାକ୍ଷୀଂ ପ୍ରଣତୋଽସ୍ମି ସଂତତମହଂ କାରୁଣ୍ୟଵାରାଂନିଧିମ୍ ॥ 1 ॥
ମୁକ୍ତାହାରଲସତ୍କିରୀଟରୁଚିରାଂ ପୂର୍ଣେଂଦୁଵକ୍ତ୍ରପ୍ରଭାଂ
ଶିଂଜନ୍ନୂପୁରକିଂକିଣୀମଣିଧରାଂ ପଦ୍ମପ୍ରଭାଭାସୁରାମ୍ ।
ସର୍ଵାଭୀଷ୍ଟଫଲପ୍ରଦାଂ ଗିରିସୁତାଂ ଵାଣୀରମାସେଵିତାଂ
ମୀନାକ୍ଷୀଂ ପ୍ରଣତୋଽସ୍ମି ସଂତତମହଂ କାରୁଣ୍ୟଵାରାଂନିଧିମ୍ ॥ 2 ॥
ଶ୍ରୀଵିଦ୍ୟାଂ ଶିଵଵାମଭାଗନିଲୟାଂ ହ୍ରୀଂକାରମଂତ୍ରୋଜ୍ଜ୍ଵଲାଂ
ଶ୍ରୀଚକ୍ରାଂକିତବିଂଦୁମଧ୍ୟଵସତିଂ ଶ୍ରୀମତ୍ସଭାନାୟକୀମ୍ ।
ଶ୍ରୀମତ୍ଷଣ୍ମୁଖଵିଘ୍ନରାଜଜନନୀଂ ଶ୍ରୀମଜ୍ଜଗନ୍ମୋହିନୀଂ
ମୀନାକ୍ଷୀଂ ପ୍ରଣତୋଽସ୍ମି ସଂତତମହଂ କାରୁଣ୍ୟଵାରାଂନିଧିମ୍ ॥ 3 ॥
ଶ୍ରୀମତ୍ସୁଂଦରନାୟିକାଂ ଭୟହରାଂ ଜ୍ଞାନପ୍ରଦାଂ ନିର୍ମଲାଂ
ଶ୍ୟାମାଭାଂ କମଲାସନାର୍ଚିତପଦାଂ ନାରାୟଣସ୍ୟାନୁଜାମ୍ ।
ଵୀଣାଵେଣୁମୃଦଂଗଵାଦ୍ୟରସିକାଂ ନାନାଵିଧାମଂବିକାଂ
ମୀନାକ୍ଷୀଂ ପ୍ରଣତୋଽସ୍ମି ସଂତତମହଂ କାରୁଣ୍ୟଵାରାଂନିଧିମ୍ ॥ 4 ॥
ନାନାୟୋଗିମୁନୀଂଦ୍ରହୃତ୍ସୁଵସତୀଂ ନାନାର୍ଥସିଦ୍ଧିପ୍ରଦାଂ
ନାନାପୁଷ୍ପଵିରାଜିତାଂଘ୍ରିୟୁଗଳାଂ ନାରାୟଣେନାର୍ଚିତାମ୍ ।
ନାଦବ୍ରହ୍ମମୟୀଂ ପରାତ୍ପରତରାଂ ନାନାର୍ଥତତ୍ଵାତ୍ମିକାଂ
ମୀନାକ୍ଷୀଂ ପ୍ରଣତୋଽସ୍ମି ସଂତତମହଂ କାରୁଣ୍ୟଵାରାଂନିଧିମ୍ ॥ 5 ॥