രക്തബീജവധോ നാമ അഷ്ടമോധ്യായ ॥
ധ്യാനം
അരുണാം കരുണാ തരംഗിതാക്ഷീം ധൃതപാശാംകുശ പുഷ്പബാണചാപാമ് ।
അണിമാധിഭിരാവൃതാം മയൂഖൈ രഹമിത്യേവ വിഭാവയേ ഭവാനീമ് ॥
ഋഷിരുവാച ॥1॥
ചംഡേ ച നിഹതേ ദൈത്യേ മുംഡേ ച വിനിപാതിതേ ।
ബഹുളേഷു ച സൈന്യേഷു ക്ഷയിതേഷ്വസുരേശ്വരഃ ॥ 2 ॥
തതഃ കോപപരാധീനചേതാഃ ശുംഭഃ പ്രതാപവാന് ।
ഉദ്യോഗം സര്വ സൈന്യാനാം ദൈത്യാനാമാദിദേശ ഹ ॥3॥
അദ്യ സര്വ ബലൈര്ദൈത്യാഃ ഷഡശീതിരുദായുധാഃ ।
കംബൂനാം ചതുരശീതിര്നിര്യാംതു സ്വബലൈര്വൃതാഃ ॥4॥
കോടിവീര്യാണി പംചാശദസുരാണാം കുലാനി വൈ ।
ശതം കുലാനി ധൌമ്രാണാം നിര്ഗച്ഛംതു മമാജ്ഞയാ ॥5॥
കാലകാ ദൌര്ഹൃദാ മൌര്വാഃ കാളികേയാസ്തഥാസുരാഃ ।
യുദ്ധായ സജ്ജാ നിര്യാംതു ആജ്ഞയാ ത്വരിതാ മമ ॥6॥
ഇത്യാജ്ഞാപ്യാസുരാപതിഃ ശുംഭോ ഭൈരവശാസനഃ ।
നിര്ജഗാമ മഹാസൈന്യസഹസ്ത്രൈര്ഭഹുഭിര്വൃതഃ ॥7॥
ആയാംതം ചംഡികാ ദൃഷ്ട്വാ തത്സൈന്യമതിഭീഷണമ് ।
ജ്യാസ്വനൈഃ പൂരയാമാസ ധരണീഗഗനാംതരമ് ॥8॥
തതഃസിംഹൊ മഹാനാദമതീവ കൃതവാന്നൃപ ।
ഘംടാസ്വനേന താന്നാദാനംബികാ ചോപബൃംഹയത് ॥9॥
ധനുര്ജ്യാസിംഹഘംടാനാം നാദാപൂരിതദിങ്മുഖാ ।
നിനാദൈര്ഭീഷണൈഃ കാളീ ജിഗ്യേ വിസ്താരിതാനനാ ॥10॥
തം നിനാദമുപശ്രുത്യ ദൈത്യ സൈന്യൈശ്ചതുര്ദിശമ് ।
ദേവീ സിംഹസ്തഥാ കാളീ സരോഷൈഃ പരിവാരിതാഃ॥11॥
ഏതസ്മിന്നംതരേ ഭൂപ വിനാശായ സുരദ്വിഷാമ് ।
ഭവായാമരസിംഹനാമതിവീര്യബലാന്വിതാഃ ॥12॥
ബ്രഹ്മേശഗുഹവിഷ്ണൂനാം തഥേംദ്രസ്യ ച ശക്തയഃ ।
ശരീരേഭ്യോവിനിഷ്ക്രമ്യ തദ്രൂപൈശ്ചംഡികാം യയുഃ ॥13॥
യസ്യ ദേവസ്യ യദ്രൂപം യഥാ ഭൂഷണവാഹനമ് ।
തദ്വദേവ ഹി തച്ചക്തിരസുരാന്യോദ്ധുമായമൌ ॥14॥
ഹംസയുക്തവിമാനാഗ്രേ സാക്ഷസൂത്രക മംഡലുഃ ।
ആയാതാ ബ്രഹ്മണഃ ശക്തിബ്രഹ്മാണീ ത്യഭിധീയതേ ॥15॥
മഹേശ്വരീ വൃഷാരൂഢാ ത്രിശൂലവരധാരിണീ ।
മഹാഹിവലയാ പ്രാപ്താചംദ്രരേഖാവിഭൂഷണാ ॥16॥
കൌമാരീ ശക്തിഹസ്താ ച മയൂരവരവാഹനാ ।
യോദ്ധുമഭ്യായയൌ ദൈത്യാനംബികാ ഗുഹരൂപിണീ ॥17॥
തഥൈവ വൈഷ്ണവീ ശക്തിര്ഗരുഡോപരി സംസ്ഥിതാ ।
ശംഖചക്രഗധാശാംഖര് ഖഡ്ഗഹസ്താഭ്യുപായയൌ ॥18॥
യജ്ഞവാരാഹമതുലം രൂപം യാ ഭിഭ്രതോ ഹരേഃ ।
ശക്തിഃ സാപ്യായയൌ തത്ര വാരാഹീം ബിഭ്രതീ തനുമ് ॥19॥
നാരസിംഹീ നൃസിംഹസ്യ ബിഭ്രതീ സദൃശം വപുഃ ।
പ്രാപ്താ തത്ര സടാക്ഷേപക്ഷിപ്തനക്ഷത്ര സംഹതിഃ ॥20॥
വജ്ര ഹസ്താ തഥൈവൈംദ്രീ ഗജരാജോ പരിസ്ഥിതാ ।
പ്രാപ്താ സഹസ്ര നയനാ യഥാ ശക്രസ്തഥൈവ സാ ॥21॥
തതഃ പരിവൃത്തസ്താഭിരീശാനോ ദേവ ശക്തിഭിഃ ।
ഹന്യംതാമസുരാഃ ശീഘ്രം മമ പ്രീത്യാഹ ചംഡികാം ॥22॥
തതോ ദേവീ ശരീരാത്തു വിനിഷ്ക്രാംതാതിഭീഷണാ ।
ചംഡികാ ശക്തിരത്യുഗ്രാ ശിവാശതനിനാദിനീ ॥23॥
സാ ചാഹ ധൂമ്രജടിലം ഈശാനമപരാജിതാ ।
ദൂതത്വം ഗച്ഛ ഭഗവന് പാര്ശ്വം ശുംഭനിശുംഭയോഃ ॥24॥
ബ്രൂഹി ശുംഭം നിശുംഭം ച ദാനവാവതിഗര്വിതൌ ।
യേ ചാന്യേ ദാനവാസ്തത്ര യുദ്ധായ സമുപസ്ഥിതാഃ ॥25॥
ത്രൈലോക്യമിംദ്രോ ലഭതാം ദേവാഃ സംതു ഹവിര്ഭുജഃ ।
യൂയം പ്രയാത പാതാളം യദി ജീവിതുമിച്ഛഥ ॥26॥
ബലാവലേപാദഥ ചേദ്ഭവംതോ യുദ്ധകാംക്ഷിണഃ ।
തദാ ഗച്ഛത തൃപ്യംതു മച്ഛിവാഃ പിശിതേന വഃ ॥27॥
യതോ നിയുക്തോ ദൌത്യേന തയാ ദേവ്യാ ശിവഃ സ്വയമ് ।
ശിവദൂതീതി ലോകേഽസ്മിംസ്തതഃ സാ ഖ്യാതി മാഗതാ ॥28॥
തേഽപി ശ്രുത്വാ വചോ ദേവ്യാഃ ശര്വാഖ്യാതം മഹാസുരാഃ ।
അമര്ഷാപൂരിതാ ജഗ്മുര്യത്ര കാത്യായനീ സ്ഥിതാ ॥29॥
തതഃ പ്രഥമമേവാഗ്രേ ശരശക്ത്യൃഷ്ടിവൃഷ്ടിഭിഃ ।
വവര്ഷുരുദ്ധതാമര്ഷാഃ സ്താം ദേവീമമരാരയഃ ॥30॥
സാ ച താന് പ്രഹിതാന് ബാണാന് ംഛൂലശക്തിപരശ്വധാന് ।
ചിച്ഛേദ ലീലയാധ്മാതധനുര്മുക്തൈര്മഹേഷുഭിഃ ॥31॥
തസ്യാഗ്രതസ്തഥാ കാളീ ശൂലപാതവിദാരിതാന് ।
ഖട്വാംഗപോഥിതാംശ്ചാരീന്കുര്വംതീ വ്യചരത്തദാ ॥32॥
കമംഡലുജലാക്ഷേപഹതവീര്യാന് ഹതൌജസഃ ।
ബ്രഹ്മാണീ ചാകരോച്ഛത്രൂന്യേന യേന സ്മ ധാവതി ॥33॥
മാഹേശ്വരീ ത്രിശൂലേന തഥാ ചക്രേണ വൈഷ്ണവീ ।
ദൈത്യാങ്ജഘാന കൌമാരീ തഥാ ശത്യാതി കോപനാ ॥34॥
ഐംദ്രീ കുലിശപാതേന ശതശോ ദൈത്യദാനവാഃ ।
പേതുര്വിദാരിതാഃ പൃഥ്വ്യാം രുധിരൌഘപ്രവര്ഷിണഃ ॥35॥
തുംഡപ്രഹാരവിധ്വസ്താ ദംഷ്ട്രാ ഗ്രക്ഷത വക്ഷസഃ ।
വാരാഹമൂര്ത്യാ ന്യപതംശ്ചക്രേണ ച വിദാരിതാഃ ॥36॥
നഖൈര്വിദാരിതാംശ്ചാന്യാന് ഭക്ഷയംതീ മഹാസുരാന് ।
നാരസിംഹീ ചചാരാജൌ നാദാ പൂര്ണദിഗംബരാ ॥37॥
ചംഡാട്ടഹാസൈരസുരാഃ ശിവദൂത്യഭിദൂഷിതാഃ ।
പേതുഃ പൃഥിവ്യാം പതിതാംസ്താംശ്ചഖാദാഥ സാ തദാ ॥38॥
ഇതി മാതൃ ഗണം ക്രുദ്ധം മര്ദ യംതം മഹാസുരാന് ।
ദൃഷ്ട്വാഭ്യുപായൈര്വിവിധൈര്നേശുര്ദേവാരിസൈനികാഃ ॥39॥
പലായനപരാംദൃഷ്ട്വാ ദൈത്യാന്മാതൃഗണാര്ദിതാന് ।
യോദ്ധുമഭ്യായയൌ ക്രുദ്ധോ രക്തബീജോ മഹാസുരഃ ॥40॥
രക്തബിംദുര്യദാ ഭൂമൌ പതത്യസ്യ ശരീരതഃ ।
സമുത്പതതി മേദിന്യാം തത്പ്രമാണോ മഹാസുരഃ ॥41॥
യുയുധേ സ ഗദാപാണിരിംദ്രശക്ത്യാ മഹാസുരഃ ।
തതശ്ചൈംദ്രീ സ്വവജ്രേണ രക്തബീജമതാഡയത് ॥42॥
കുലിശേനാഹതസ്യാശു ബഹു സുസ്രാവ ശോണിതമ് ।
സമുത്തസ്ഥുസ്തതോ യോധാസ്തദ്രപാസ്തത്പരാക്രമാഃ ॥43॥
യാവംതഃ പതിതാസ്തസ്യ ശരീരാദ്രക്തബിംദവഃ ।
താവംതഃ പുരുഷാ ജാതാഃ സ്തദ്വീര്യബലവിക്രമാഃ ॥44॥
തേ ചാപി യുയുധുസ്തത്ര പുരുഷാ രക്ത സംഭവാഃ ।
സമം മാതൃഭിരത്യുഗ്രശസ്ത്രപാതാതിഭീഷണം ॥45॥
പുനശ്ച വജ്ര പാതേന ക്ഷത മശ്യ ശിരോ യദാ ।
വവാഹ രക്തം പുരുഷാസ്തതോ ജാതാഃ സഹസ്രശഃ ॥46॥
വൈഷ്ണവീ സമരേ ചൈനം ചക്രേണാഭിജഘാന ഹ ।
ഗദയാ താഡയാമാസ ഐംദ്രീ തമസുരേശ്വരമ്॥47॥
വൈഷ്ണവീ ചക്രഭിന്നസ്യ രുധിരസ്രാവ സംഭവൈഃ ।
സഹസ്രശോ ജഗദ്വ്യാപ്തം തത്പ്രമാണൈര്മഹാസുരൈഃ ॥48॥
ശക്ത്യാ ജഘാന കൌമാരീ വാരാഹീ ച തഥാസിനാ ।
മാഹേശ്വരീ ത്രിശൂലേന രക്തബീജം മഹാസുരമ് ॥49॥
സ ചാപി ഗദയാ ദൈത്യഃ സര്വാ ഏവാഹനത് പൃഥക് ।
മാതൄഃ കോപസമാവിഷ്ടോ രക്തബീജോ മഹാസുരഃ ॥50॥
തസ്യാഹതസ്യ ബഹുധാ ശക്തിശൂലാദി ഭിര്ഭുവിഃ ।
പപാത യോ വൈ രക്തൌഘസ്തേനാസംചതശോഽസുരാഃ ॥51॥
തൈശ്ചാസുരാസൃക്സംഭൂതൈരസുരൈഃ സകലം ജഗത് ।
വ്യാപ്തമാസീത്തതോ ദേവാ ഭയമാജഗ്മുരുത്തമമ് ॥52॥
താന് വിഷണ്ണാ ന് സുരാന് ദൃഷ്ട്വാ ചംഡികാ പ്രാഹസത്വരമ് ।
ഉവാച കാളീം ചാമുംഡേ വിസ്തീര്ണം വദനം കുരു ॥53॥
മച്ഛസ്ത്രപാതസംഭൂതാന് രക്തബിംദൂന് മഹാസുരാന് ।
രക്തബിംദോഃ പ്രതീച്ഛ ത്വം വക്ത്രേണാനേന വേഗിനാ ॥54॥
ഭക്ഷയംതീ ചര രണോ തദുത്പന്നാന്മഹാസുരാന് ।
ഏവമേഷ ക്ഷയം ദൈത്യഃ ക്ഷേണ രക്തോ ഗമിഷ്യതി ॥55॥
ഭക്ഷ്യ മാണാ സ്ത്വയാ ചോഗ്രാ ന ചോത്പത്സ്യംതി ചാപരേ ।
ഇത്യുക്ത്വാ താം തതോ ദേവീ ശൂലേനാഭിജഘാന തമ് ॥56॥
മുഖേന കാളീ ജഗൃഹേ രക്തബീജസ്യ ശോണിതമ് ।
തതോഽസാവാജഘാനാഥ ഗദയാ തത്ര ചംഡികാം ॥57॥
ന ചാസ്യാ വേദനാം ചക്രേ ഗദാപാതോഽല്പികാമപി ।
തസ്യാഹതസ്യ ദേഹാത്തു ബഹു സുസ്രാവ ശോണിതമ് ॥58॥
യതസ്തതസ്തദ്വക്ത്രേണ ചാമുംഡാ സംപ്രതീച്ഛതി ।
മുഖേ സമുദ്ഗതാ യേഽസ്യാ രക്തപാതാന്മഹാസുരാഃ ॥59॥
താംശ്ചഖാദാഥ ചാമുംഡാ പപൌ തസ്യ ച ശോണിതമ് ॥60॥
ദേവീ ശൂലേന വജ്രേണ ബാണൈരസിഭിര് ഋഷ്ടിഭിഃ ।
ജഘാന രക്തബീജം തം ചാമുംഡാ പീത ശോണിതമ് ॥61॥
സ പപാത മഹീപൃഷ്ഠേ ശസ്ത്രസംഘസമാഹതഃ ।
നീരക്തശ്ച മഹീപാല രക്തബീജോ മഹാസുരഃ ॥62॥
തതസ്തേ ഹര്ഷ മതുലം അവാപുസ്ത്രിദശാ നൃപ ।
തേഷാം മാതൃഗണോ ജാതോ നനര്താസൃംംഗമദോദ്ധതഃ ॥63॥
॥ സ്വസ്തി ശ്രീ മാര്കംഡേയ പുരാണേ സാവര്നികേ മന്വംതരേ ദേവി മഹത്മ്യേ രക്തബീജവധോനാമ അഷ്ടമോധ്യായ സമാപ്തമ് ॥
ആഹുതി
ഓം ജയംതീ സാംഗായൈ സശക്തികായൈ സപരിവാരായൈ സവാഹനായൈ രക്താക്ഷ്യൈ അഷ്ടമാതൃ സഹിതായൈ മഹാഹുതിം സമര്പയാമി നമഃ സ്വാഹാ ॥