ತೈತ್ತಿರೀಯ ಅರಣ್ಯಕ – ಚತುರ್ಥಃ ಪ್ರಶ್ನಃ
ಓಂ ಸ॒ಹ ನಾ॑ ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯಂ॑ ಕರವಾವಹೈ । ತೇ॒ಜ॒ಸ್ವಿನಾ॒ ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ ॥
ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ॥
ಅಂಭಸ್ಯಪಾರೇ (4.1)
ಅಂಭ॑ಸ್ಯ ಪಾ॒ರೇ ಭುವ॑ನಸ್ಯ॒ ಮದ್ಧ್ಯೇ॒ ನಾಕ॑ಸ್ಯ ಪೃ॒ಷ್ಠೇ ಮ॑ಹ॒ತೋ ಮಹೀ॑ಯಾನ್ । ಶು॒ಕ್ರೇಣ॒ ಜ್ಯೋತೀಗ್ಂ॑ಷಿ ಸಮನು॒ಪ್ರವಿ॑ಷ್ಟಃ ಪ್ರ॒ಜಾಪ॑ತಿಶ್ಚರತಿ॒ ಗರ್ಭೇ॑ ಅಂ॒ತಃ । ಯಸ್ಮಿ॑ನ್ನಿ॒ದಗ್ಂ ಸಂಚ॒ ವಿಚೈತಿ॒ ಸರ್ವಂ॒-ಯಁಸ್ಮಿ॑ನ್ ದೇ॒ವಾ ಅಧಿ॒ ವಿಶ್ವೇ॑ ನಿಷೇ॒ದುಃ । ತದೇ॒ವ ಭೂ॒ತಂ ತದು॒ ಭವ್ಯ॑ಮಾ ಇ॒ದಂ ತದ॒ಕ್ಷರೇ॑ ಪರ॒ಮೇ ವ್ಯೋ॑ಮನ್ನ್ । ಯೇನಾ॑ ವೃ॒ತಂ ಖಂಚ॒ ದಿವಂ॑ ಮ॒ಹೀಂಚ॒ ಯೇನಾ॑ದಿ॒ತ್ಯ-ಸ್ತಪ॑ತಿ॒ ತೇಜ॑ಸಾ॒ ಭ್ರಾಜ॑ಸಾ ಚ । ಯಮಂ॒ತಃ ಸ॑ಮು॒ದ್ರೇ ಕ॒ವಯೋ॒ ವಯಂ॑ತಿ॒ ಯದ॒ಕ್ಷರೇ॑ ಪರ॒ಮೇ ಪ್ರ॒ಜಾಃ । ಯತಃ॑ ಪ್ರಸೂ॒ತಾ ಜ॒ಗತಃ॑ ಪ್ರಸೂತೀ॒ ತೋಯೇ॑ನ ಜೀ॒ವಾನ್ ವ್ಯಚ॑ಸರ್ಜ॒ (ವ್ಯಸ॑ಸರ್ಜ॒) ಭೂಮ್ಯಾ᳚ಮ್ । ಯದೋಷ॑ಧೀಭಿಃ ಪು॒ರುಷಾ᳚ನ್ ಪ॒ಶೂಗ್ಗ್ಶ್ಚ॒ ವಿವೇ॑ಶ ಭೂ॒ತಾನಿ॑ ಚರಾಚ॒ರಾಣಿ॑ । ಅತಃ॑ ಪರಂ॒ ನಾನ್ಯ॒-ದಣೀ॑ಯಸಹಿ॒ ಪರಾ᳚ತ್ ಪರಂ॒-ಯಁನ್ ಮಹ॑ತೋ ಮ॒ಹಾಂತ᳚ಮ್ । ಯದೇ॑ಕ-ಮ॒ವ್ಯಕ್ತ॒-ಮನಂ॑ತರೂಪಂ॒-ವಿಁಶ್ವಂ॑ ಪುರಾ॒ಣಂ ತಮ॑ಸಃ॒ ಪರ॑ಸ್ತಾತ್ ॥ 1.5 (ತೈ. ಅರ. 6.1.1)
ತದೇ॒ವರ್ತಂ ತದು॑ ಸ॒ತ್ಯಮಾ॑ಹು॒-ಸ್ತದೇ॒ವ ಬ್ರಹ್ಮ॑ ಪರ॒ಮಂ ಕ॑ವೀ॒ನಾಮ್ । ಇ॒ಷ್ಟಾ॒ಪೂ॒ರ್ತಂ ಬ॑ಹು॒ಧಾ ಜಾ॒ತಂ ಜಾಯ॑ಮಾನಂ-ವಿಁ॒ಶ್ವಂ ಬಿ॑ಭರ್ತಿ॒ ಭುವ॑ನಸ್ಯ॒ ನಾಭಿಃ॑ । ತದೇ॒ವಾಗ್ನಿ-ಸ್ತದ್ವಾ॒ಯು-ಸ್ತಥ್ಸೂರ್ಯ॒ಸ್ತದು॑ ಚಂ॒ದ್ರಮಾಃ᳚ । ತದೇ॒ವ ಶು॒ಕ್ರಮ॒ಮೃತಂ॒ ತದ್ಬ್ರಹ್ಮ॒ ತದಾಪಃ॒ ಸ ಪ್ರ॒ಜಾಪ॑ತಿಃ । ಸರ್ವೇ॑ ನಿಮೇ॒ಷಾ ಜ॒ಜ್ಞಿರೇ॑ ವಿ॒ದ್ಯುತಃ॒ ಪುರು॑ಷಾ॒ದಧಿ॑ । ಕ॒ಲಾ ಮು॑ಹೂ॒ರ್ತಾಃ ಕಾಷ್ಠಾ᳚ಶ್ಚಾಹೋ-ರಾ॒ತ್ರಾಶ್ಚ॑ ಸರ್ವ॒ಶಃ । ಅ॒ರ್ಧ॒ಮಾ॒ಸಾ ಮಾಸಾ॑ ಋ॒ತವಃ॑ ಸಂವಁಥ್ಸ॒ರಶ್ಚ॑ ಕಲ್ಪಂತಾಮ್ । ಸ ಆಪಃ॑ ಪ್ರದು॒ಘೇ ಉ॒ಭೇ ಇ॒ಮೇ ಅಂ॒ತರಿ॑ಕ್ಷ॒-ಮಥೋ॒ ಸುವಃ॑ । ನೈನ॑-ಮೂ॒ರ್ಧ್ವಂ ನ ತಿ॒ರ್ಯಂ ಚ॒ ನ ಮದ್ಧ್ಯೇ॒ ಪರಿ॑ಜಗ್ರಭತ್ । ನ ತಸ್ಯೇ॑ಶೇ॒ ಕಶ್ಚ॒ನ ತಸ್ಯ॑ ನಾಮ ಮ॒ಹದ್ಯಶಃ॑ ॥ 1.10 (ತೈ. ಅರ. 6.1.2)
ನ ಸ॒ದೃಂಶೇ॑ ತಿಷ್ಠತಿ॒ ರೂಪ॑ಮಸ್ಯ॒ ನ ಚಕ್ಷು॑ಷಾ ಪಶ್ಯತಿ॒ ಕಶ್ಚ॒ನೈನ᳚ಮ್ । ಹೃ॒ದಾ ಮ॑ನೀ॒ಷಾ ಮನ॑ಸಾ॒ಽಭಿ ಕ್ಲೃ॑ಪ್ತೋ॒ ಯ ಏ॑ನಂ-ವಿಁ॒ದು-ರಮೃ॑ತಾ॒ಸ್ತೇ ಭ॑ವಂತಿ । ಅ॒ದ್ಭ್ಯಃ ಸಂಭೂ॑ತೋ ಹಿರಣ್ಯಗ॒ರ್ಭ ಇತ್ಯ॒ಷ್ಟೌ । ಏ॒ಷ ಹಿ ದೇ॒ವಃ ಪ್ರ॒ದಿಶೋಽನು॒ ಸರ್ವಾಃ॒ ಪೂರ್ವೋ॑ ಹಿ ಜಾ॒ತಃ ಸ ಉ॒ ಗರ್ಭೇ॑ ಅಂ॒ತಃ । ಸ ವಿ॒ಜಾಯ॑ಮಾನಃ ಸಜನಿ॒ಷ್ಯಮಾ॑ಣಃ ಪ್ರ॒ತ್ಯಂ-ಮುಖಾ᳚ ಸ್ತಿಷ್ಠತಿ ವಿ॒ಶ್ವತೋ॑ಮುಖಃ । ವಿ॒ಶ್ವತ॑ಶ್ಚ-ಕ್ಷುರು॒ತ ವಿ॒ಶ್ವತೋ॑ ಮುಖೋ ವಿ॒ಶ್ವತೋ॑ ಹಸ್ತ ಉ॒ತ ವಿ॒ಶ್ವತ॑ಸ್ಪಾತ್ । ಸಂ ಬಾ॒ಹುಭ್ಯಾಂ॒ ನಮ॑ತಿ॒ ಸಂ ಪತ॑ತ್ರೈ॒-ರ್ದ್ಯಾವಾ॑ ಪೃಥಿ॒ವೀ ಜ॒ನಯ॑ನ್ ದೇ॒ವ ಏಕಃ॑ । ವೇ॒ನಸ್ತತ್ ಪಶ್ಯ॒ನ್. ವಿಶ್ವಾ॒ ಭುವ॑ನಾನಿ ವಿ॒ದ್ವಾನ್. ಯತ್ರ॒ ವಿಶ್ವಂ॒ ಭವ॒ತ್ಯೇಕ॑-ನೀಳಮ್ । ಯಸ್ಮಿ॑ನ್ನಿ॒ದಗ್ಂ ಸಂಚ॒ ವಿಚೈಕ॒ಗ್ಂ॒ ಸ ಓತಃ॒ ಪ್ರೋತ॑ಶ್ಚ ವಿ॒ಭುಃ ಪ್ರ॒ಜಾಸು॑ । ಪ್ರತದ್ವೋ॑ಚೇ ಅ॒ಮೃತ॒ನ್ನು ವಿ॒ದ್ವಾನ್ ಗಂ॑ಧ॒ರ್ವೋ ನಾಮ॒ ನಿಹಿ॑ತಂ॒ ಗುಹಾ॑ಸು ॥ 1.15 (ತೈ. ಅರ. 6.1.3)
ತ್ರೀಣಿ॑ ಪ॒ದಾ ನಿಹಿ॑ತಾ॒ ಗುಹಾ॑ಸು॒ ಯಸ್ತದ್ವೇದ॑ ಸವಿ॒ತುಃ ಪಿ॒ತಾಽಸ॑ತ್ । ಸ ನೋ॒ ಬಂಧು॑-ರ್ಜನಿ॒ತಾ ಸ ವಿ॑ಧಾ॒ತಾ ಧಾಮಾ॑ನಿ॒ ವೇದ॒ ಭುವ॑ನಾನಿ॒ ವಿಶ್ವಾ᳚ । ಯತ್ರ॑ ದೇ॒ವಾ ಅ॒ಮೃತ॑ಮಾನ-ಶಾ॒ನಾಸ್ತೃ॒ತೀಯೇ॒ ಧಾಮಾ᳚ನ್ಯ॒-ಭ್ಯೈರ॑ಯಂತ । ಪರಿ॒ ದ್ಯಾವಾ॑ಪೃಥಿ॒ವೀ ಯಂ॑ತಿ ಸ॒ದ್ಯಃ ಪರಿ॑ ಲೋ॒ಕಾನ್ ಪರಿ॒ ದಿಶಃ॒ ಪರಿ॒ ಸುವಃ॑ । ಋ॒ತಸ್ಯ॒ ತಂತುಂ॑-ವಿಁತತಂ-ವಿಁ॒ಚೃತ್ಯ॒ ತದ॑ಪಶ್ಯ॒ತ್ ತದ॑ಭವತ್ ಪ್ರ॒ಜಾಸು॑ । ಪ॒ರೀತ್ಯ॑ ಲೋ॒ಕಾನ್ ಪ॒ರೀತ್ಯ॑ ಭೂ॒ತಾನಿ॑ ಪ॒ರೀತ್ಯ॒ ಸರ್ವಾಃ᳚ ಪ್ರ॒ದಿಶೋ॒ ದಿಶ॑ಶ್ಚ । ಪ್ರ॒ಜಾಪ॑ತಿಃ ಪ್ರಥಮ॒ಜಾ ಋ॒ತಸ್ಯಾ॒ತ್ಮನಾ॒-ಽಽತ್ಮಾನ॑-ಮ॒ಭಿ-ಸಂಬ॑ಭೂವ । ಸದ॑ಸ॒ಸ್ಪತಿ॒-ಮದ್ಭು॑ತಂ ಪ್ರಿ॒ಯಮಿಂದ್ರ॑ಸ್ಯ॒ ಕಾಮ್ಯ᳚ಮ್ । ಸನಿಂ॑ ಮೇ॒ಧಾ ಮ॑ಯಾಸಿಷಮ್ । ಉದ್ದೀ᳚ಪ್ಯಸ್ವ ಜಾತವೇದೋ ಽಪ॒ಘ್ನನ್ನಿರ್ಋ॑ತಿಂ॒ ಮಮ॑ ॥ 1.19 (ತೈ. ಅರ. 6.1.4)
ಪ॒ಶೂಗ್ಗ್ಶ್ಚ॒ ಮಹ್ಯ॒ಮಾವ॑ಹ॒ ಜೀವ॑ನಂಚ॒ ದಿಶೋ॑ ದಿಶ । ಮಾನೋ॑ ಹಿಗ್ಂಸೀ ಜ್ಜಾತವೇದೋ॒ ಗಾಮಶ್ವಂ॒ ಪುರು॑ಷಂ॒ ಜಗ॑ತ್ । ಅಬಿ॑ಭ್ರ॒ದಗ್ನ॒ ಆಗ॑ಹಿ ಶ್ರಿ॒ಯಾ ಮಾ॒ ಪರಿ॑ಪಾತಯ ॥ 1.21 (ತೈ. ಅರ. 6.1.5)
ಗಾಯತ್ರೀ ಮಂತ್ರಾಃ (4.2)
ಪುರು॑ಷಸ್ಯ ವಿದ್ಮ ಸಹಸ್ರಾ॒ಕ್ಷಸ್ಯ॑ ಮಹಾದೇ॒ವಸ್ಯ॑ ಧೀಮಹಿ । ತನ್ನೋ॑ ರುದ್ರಃ ಪ್ರಚೋ॒ದಯಾ᳚ತ್ ॥
ತತ್ಪುರು॑ಷಾಯ ವಿ॒ದ್ಮಹೇ॑ ಮಹಾದೇ॒ವಾಯ॑ ಧೀಮಹಿ । ತನ್ನೋ॑ ರುದ್ರಃ ಪ್ರಚೋ॒ದಯಾ᳚ತ್ ॥।
ತತ್ಪುರು॑ಷಾಯ ವಿ॒ದ್ಮಹೇ॑ ವಕ್ರತುಂ॒ಡಾಯ॑ ಧೀಮಹಿ । ತನ್ನೋ॑ ದಂತಿಃ ಪ್ರಚೋ॒ದಯಾ᳚ತ್ ॥
ತತ್ಪುರು॑ಷಾಯ ವಿ॒ದ್ಮಹೇ॑ ಚಕ್ರತುಂ॒ಡಾಯ॑ ಧೀಮಹಿ । ತನ್ನೋ॑ ನಂದಿಃ ಪ್ರಚೋ॒ದಯಾ᳚ತ್ ॥
ತತ್ಪುರು॑ಷಾಯ ವಿ॒ದ್ಮಹೇ॑ ಮಹಾಸೇ॒ನಾಯ॑ ಧೀಮಹಿ । ತನ್ನಃ॑ ಷಣ್ಮುಖಃ ಪ್ರಚೋ॒ದಯಾ᳚ತ್ ॥
ತತ್ಪುರು॑ಷಾಯ ವಿ॒ದ್ಮಹೇ॑ ಸುವರ್ಣಪ॒ಕ್ಷಾಯ॑ ಧೀಮಹಿ । ತನ್ನೋ॑ ಗರುಡಃ ಪ್ರಚೋ॒ದಯಾ᳚ತ್ ॥
ವೇ॒ದಾ॒ತ್ಮ॒ನಾಯ॑ ವಿ॒ದ್ಮಹೇ॑ ಹಿರಣ್ಯಗ॒ರ್ಭಾಯ॑ ಧೀಮಹಿ । ತನ್ನೋ᳚ ಬ್ರಹ್ಮ ಪ್ರಚೋ॒ದಯಾ᳚ತ್ ॥
ನಾ॒ರಾ॒ಯ॒ಣಾಯ॑ ವಿ॒ದ್ಮಹೇ॑ ವಾಸುದೇ॒ವಾಯ॑ ಧೀಮಹಿ । ತನ್ನೋ॑ ವಿಷ್ಣುಃ ಪ್ರಚೋ॒ದಯಾ᳚ತ್ ॥
ವ॒ಜ್ರ॒ನ॒ಖಾಯ॑ ವಿ॒ದ್ಮಹೇ॑ ತೀಕ್ಷ್ಣ-ದ॒ಗ್ಗ್॒ಷ್ಟ್ರಾಯ॑ ಧೀಮಹಿ । ತನ್ನೋ॑ ನಾರಸಿಗ್ಂಹಃ ಪ್ರಚೋ॒ದಯಾ᳚ತ್ ॥
ಭಾ॒ಸ್ಕ॒ರಾಯ॑ ವಿ॒ದ್ಮಹೇ॑ ಮಹದ್ದ್ಯುತಿಕ॒ರಾಯ॑ ಧೀಮಹಿ । ತನ್ನೋ॑ ಆದಿತ್ಯಃ ಪ್ರಚೋ॒ದಯಾ᳚ತ್ ॥
ವೈ॒ಶ್ವಾ॒ನ॒ರಾಯ॑ ವಿ॒ದ್ಮಹೇ॑ ಲಾಲೀ॒ಲಾಯ॑ ಧೀಮಹಿ । ತನ್ನೋ॑ ಅಗ್ನಿಃ ಪ್ರಚೋ॒ದಯಾ᳚ತ್ ॥
ಕಾ॒ತ್ಯಾ॒ಯ॒ನಾಯ॑ ವಿ॒ದ್ಮಹೇ॑ ಕನ್ಯಕು॒ಮಾರಿ॑ ಧೀಮಹಿ । ತನ್ನೋ॑ ದುರ್ಗಿಃ ಪ್ರಚೋ॒ದಯಾ᳚ತ್ ॥ 1.33 (ತೈ. ಅರ. 6.1.5-7)
ದೂರ್ವಾ ಸೂಕ್ತಂ (4.3)
ಸ॒ಹ॒ಸ್ರ॒ಪರ॑ಮಾ ದೇ॒ವೀ॒ ಶ॒ತಮೂ॑ಲಾ ಶ॒ತಾಂಕು॑ರಾ । ಸರ್ವಗ್ಂ॑ ಹರತು॑ ಮೇ ಪಾ॒ಪಂ॒ ದೂ॒ರ್ವಾ ದುಃ॑ಸ್ವಪ್ನ॒ ನಾಶ॑ನೀ । ಕಾಂಡಾ᳚ತ್ ಕಾಂಡಾತ್ ಪ್ರ॒ರೋಹಂ॑ತೀ॒ ಪರು॑ಷಃ ಪರುಷಃ॒ ಪರಿ॑ ।
ಏ॒ವಾ ನೋ॑ ದೂರ್ವೇ॒ ಪ್ರತ॑ನು ಸ॒ಹಸ್ರೇ॑ಣ ಶ॒ತೇನ॑ ಚ । ಯಾ ಶ॒ತೇನ॑ ಪ್ರತ॒ನೋಷಿ॑ ಸ॒ಹಸ್ರೇ॑ಣ ವಿ॒ರೋಹ॑ಸಿ । ತಸ್ಯಾ᳚ಸ್ತೇ ದೇವೀಷ್ಟಕೇ ವಿ॒ಧೇಮ॑ ಹ॒ವಿಷಾ॑ ವ॒ಯಮ್ । ಅಶ್ವ॑ಕ್ರಾಂ॒ತೇ ರ॑ಥಕ್ರಾಂ॒ತೇ॒ ವಿ॒ಷ್ಣುಕ್ರಾಂ᳚ತೇ ವ॒ಸುಂಧ॑ರಾ । ಶಿರಸಾ॑ ಧಾರ॑ಯಿಷ್ಯಾ॒ಮಿ॒ ರ॒ಕ್ಷ॒ಸ್ವ ಮಾಂ᳚ ಪದೇ॒ ಪದೇ ॥ 1.37 (ತೈ. ಅರ. 6.1.8)
ಮೃತ್ತಿಕಾ ಸೂಕ್ತಂ (4.4)
ಭೂಮಿ-ರ್ಧೇನು-ರ್ಧರಣೀ ಲೋ॑ಕಧಾ॒ರಿಣೀ । ಉ॒ಧೃತಾ॑ಽಸಿ ವ॑ರಾಹೇ॒ಣ॒ ಕೃ॒ಷ್ಣೇ॒ನ ಶ॑ತ ಬಾ॒ಹುನಾ । ಮೃ॒ತ್ತಿಕೇ॑ ಹನ॑ ಮೇ ಪಾ॒ಪಂ॒-ಯಁ॒ನ್ಮ॒ಯಾ ದು॑ಷ್ಕೃತಂ॒ ಕೃತಮ್ । ಮೃ॒ತ್ತಿಕೇ᳚ ಬ್ರಹ್ಮ॑ದತ್ತಾ॒ಽಸಿ॒ ಕಾ॒ಶ್ಯಪೇ॑ನಾಭಿ॒ಮಂತ್ರಿ॑ತಾ । ಮೃ॒ತ್ತಿಕೇ॑ ದೇಹಿ॑ ಮೇ ಪು॒ಷ್ಟಿಂ॒ ತ್ವ॒ಯಿ ಸ॑ರ್ವಂ ಪ್ರ॒ತಿಷ್ಠಿ॑ತಮ್ ॥ 1.39
ಮೃ॒ತ್ತಿಕೇ᳚ ಪ್ರತಿಷ್ಠಿ॑ತೇ ಸ॒ರ್ವಂ॒ ತ॒ನ್ಮೇ ನಿ॑ರ್ಣುದ॒ ಮೃತ್ತಿ॑ಕೇ । ತಯಾ॑ ಹ॒ತೇನ॑ ಪಾಪೇ॒ನ॒ ಗ॒ಚ್ಛಾ॒ಮಿ ಪ॑ರಮಾಂ॒ ಗತಿಮ್ ॥ 1.40 (ತೈ. ಅರ. 6.1.9)
ಶತ್ರುಜಯ ಮಂತ್ರಾಃ (4.5)
ಯತ॑ ಇಂದ್ರ॒ ಭಯಾ॑ಮಹೇ॒ ತತೋ॑ ನೋ॒ ಅಭ॑ಯಂ ಕೃಧಿ । ಮಘ॑ವನ್ ಛ॒ಗ್ಧಿ ತವ॒ ತನ್ನ॑ ಊ॒ತಯೇ॒ ವಿದ್ವಿಷೋ॒ ವಿಮೃಧೋ॑ ಜಹಿ । ಸ್ವ॒ಸ್ತಿ॒ದಾ ವಿ॒ಶಸ್ಪತಿ॑-ರ್ವೃತ್ರ॒ಹಾ ವಿಮೃಧೋ॑ ವ॒ಶೀ । ವೃಷೇಂದ್ರಃ॑ ಪು॒ರ ಏ॑ತು ನಃ ಸ್ವಸ್ತಿ॒ದಾ ಅ॑ಭಯಂಕ॒ರಃ । ಸ್ವ॒ಸ್ತಿ ನ॒ ಇಂದ್ರೋ॑ ವೃ॒ದ್ಧಶ್ರ॑ವಾಃ ಸ್ವ॒ಸ್ತಿ ನಃ॑ ಪೂ॒ಷಾ ವಿ॒ಶ್ವವೇ॑ದಾಃ । ಸ್ವ॒ಸ್ತಿ ನ॒ಸ್ತಾರ್ಕ್ಷ್ಯೋ॒ ಅರಿ॑ಷ್ಟನೇಮಿಃ ಸ್ವ॒ಸ್ತಿ ನೋ॒ ಬೃಹ॒ಸ್ಪತಿ॑-ರ್ದಧಾತು । ಆಪಾಂ᳚ತ-ಮನ್ಯುಸ್ತೃ॒ಪಲ॑ಪ್ರಭರ್ಮಾ॒ ಧುನಿಃ॒ ಶಿಮೀ॑ವಾಂ॒-ಛರು॑ಮಾಗ್ಂ ಋಜೀ॒ಷೀ । ಸೋಮೋ॒ ವಿಶ್ವಾ᳚ನ್ಯತ॒ಸಾ ವನಾ॑ನಿ॒ ನಾರ್ವಾಗಿಂದ್ರಂ॑ ಪ್ರತಿ॒ಮಾನಾ॑ನಿ ದೇಭುಃ ॥ 1.44
ಬ್ರಹ್ಮ॑ ಜಜ್ಞಾ॒ನಂ ಪ್ರ॑ಥ॒ಮಂ ಪು॒ರಸ್ತಾ॒ದ್-ವಿಸೀ॑ಮ॒ತಃ ಸು॒ರುಚೋ॑ ವೇ॒ನ ಆ॑ವಃ । ಸ ಬು॒ಧ್ನಿಯಾ॑ ಉಪ॒ಮಾ ಅ॑ಸ್ಯ ವಿ॒ಷ್ಠಾಃ ಸ॒ತಶ್ಚ॒ ಯೋನಿ॒-ಮಸ॑ತಶ್ಚ॒ ವಿವಃ॑ । ಸ್ಯೋ॒ನಾ ಪೃ॑ಥಿವಿ॒ ಭವಾ॑ ನೃಕ್ಷ॒ರಾ ನಿ॒ವೇಶ॑ನೀ । ಯಚ್ಛಾ॑ ನಃ॒ ಶರ್ಮ॑ ಸ॒ಪ್ರಥಾಃ᳚ । ಗಂ॒ಧ॒ದ್ವಾ॒ರಾಂ ದು॑ರಾಧ॒ರ್ಷಾಂ॒ ನಿ॒ತ್ಯಪು॑ಷ್ಟಾಂ ಕರೀ॒ಷಿಣೀ᳚ಮ್ । ಈ॒ಶ್ವರೀಗ್ಂ॑ ಸರ್ವ॑ಭೂತಾ॒ನಾಂ॒ ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್ । ಶ್ರೀ᳚ರ್ಮೇ ಭ॒ಜತು । ಅಲಕ್ಷ್ಮೀ᳚ರ್ಮೇ ನ॒ಶ್ಯತು । ವಿಷ್ಣು॑ಮುಖಾ॒ ವೈ ದೇ॒ವಾಃ ಛಂದೋ॑-ಭಿರಿ॒ಮಾಂಲ್ಲೋಁ॒ಕಾ-ನ॑ನಪಜ॒ಯ್ಯ-ಮ॒ಭ್ಯ॑ಜಯನ್ನ್ । ಮ॒ಹಾಗ್ಂ ಇಂದ್ರೋ॒ ವಜ್ರ॑ಬಾಹುಃ ಷೋಡ॒ಶೀ ಶರ್ಮ॑ ಯಚ್ಛತು ॥ 1.48 (ತೈ. ಅರ. 6.1.10)
ಸ್ವ॒ಸ್ತಿ ನೋ॑ ಮ॒ಘವಾ॑ ಕರೋತು॒ ಹಂತು॑ ಪಾ॒ಪ್ಮಾನಂ॒-ಯೋಁ᳚ಽಸ್ಮಾನ್ ದ್ವೇಷ್ಟಿ॑ । ಸೋ॒ಮಾನ॒ಗ್ಗ್॒ ಸ್ವರ॑ಣಂ ಕೃಣು॒ಹಿ ಬ್ರ॑ಹ್ಮಣಸ್ಪತೇ । ಕ॒ಕ್ಷೀವಂ॑ತಂ॒-ಯಁ ಔ॑ಶಿ॒ಜಮ್ । ಶರೀ॑ರಂ-ಯಁಜ್ಞಶಮ॒ಲಂ ಕುಸೀ॑ದಂ॒ ತಸ್ಮಿ᳚ನ್ ಥ್ಸೀದತು॒ ಯೋ᳚ಽಸ್ಮಾನ್ ದ್ವೇಷ್ಟಿ॑ । ಚರ॑ಣಂ ಪ॒ವಿತ್ರಂ॒-ವಿಁತ॑ತಂ ಪುರಾ॒ಣಂ-ಯೇಁನ॑ ಪೂ॒ತ-ಸ್ತರ॑ತಿ ದುಷ್ಕೃ॒ತಾನಿ॑ । ತೇನ॑ ಪ॒ವಿತ್ರೇ॑ಣ ಶು॒ದ್ಧೇನ॑ ಪೂ॒ತಾ ಅತಿ॑ ಪಾ॒ಪ್ಮಾನ॒-ಮರಾ॑ತಿಂ ತರೇಮ । ಸ॒ಜೋಷಾ॑ ಇಂದ್ರ॒ ಸಗ॑ಣೋ ಮ॒ರುದ್ಭಿಃ॒ ಸೋಮಂ॑ ಪಿಬ ವೃತ್ರಹಂಛೂರ ವಿ॒ದ್ವಾನ್ । ಜ॒ಹಿ ಶತ್ರೂ॒ಗ್ಂ॒ ರಪ॒ ಮೃಧೋ॑ ನುದ॒ಸ್ವಾಥಾಭ॑ಯಂ ಕೃಣುಹಿ ವಿ॒ಶ್ವತೋ॑ ನಃ । ಸು॒ಮಿ॒ತ್ರಾ ನ॒ ಆಪ॒ ಓಷ॑ಧಯಃ ಸಂತು ದುರ್ಮಿ॒ತ್ರಾಸ್ತಸ್ಮೈ॑ ಭೂಯಾಸು॒-ರ್ಯಾ᳚ಽಸ್ಮಾನ್ ದ್ವೇಷ್ಟಿ॒ ಯಂಚ॑ ವ॒ಯಂ ದ್ವಿ॒ಷ್ಮಃ । ಆಪೋ॒ ಹಿಷ್ಠಾ ಮ॑ಯೋ॒ ಭುವ॒ಸ್ತಾ ನ॑ ಊ॒ರ್ಜೇ ದ॑ಧಾತನ । 1.53 (ತೈ. ಅರ. 6.1.11)
ಮ॒ಹೇರಣಾ॑ಯ॒ ಚಕ್ಷ॑ಸೇ । ಯೋ ವಃ॑ ಶಿ॒ವತ॑ಮೋ॒ ರಸ॒-ಸ್ತಸ್ಯ॑ ಭಾಜಯತೇ॒ ಹ ನಃ॑ । ಉ॒ಶ॒ತೀ-ರಿ॑ವ ಮಾ॒ತರಃ॑ । ತಸ್ಮಾ॒ ಅರಂ॑ಗಮಾಮವೋ॒ ಯಸ್ಯ॒ ಕ್ಷಯಾ॑ಯ॒ ಜಿನ್ವ॑ಥ । ಆಪೋ॑ ಜ॒ನಯ॑ಥಾ ಚ ನಃ ॥ 1.54 (ತೈ. ಅರ. 6.1.12)
ಅಘಮರ್ಷಣ ಸೂಕ್ತಂ (4.6)
ಹಿರ॑ಣ್ಯಶೃಂಗಂ॒-ವಁರು॑ಣಂ॒ ಪ್ರಪ॑ದ್ಯೇ ತೀ॒ರ್ಥಂ ಮೇ॑ ದೇಹಿ॒ ಯಾಚಿ॑ತಃ । ಯ॒ನ್ಮಯಾ॑ ಭು॒ಕ್ತ-ಮ॒ಸಾಧೂ॑ನಾಂ ಪಾ॒ಪೇಭ್ಯ॑ಶ್ಚ ಪ್ರ॒ತಿಗ್ರ॑ಹಃ । ಯನ್ಮೇ॒ ಮನ॑ಸಾ ವಾ॒ಚಾ॒ ಕ॒ರ್ಮ॒ಣಾ ವಾ ದು॑ಷ್ಕೃತಂ॒ ಕೃತಮ್ । ತನ್ನ॒ ಇಂದ್ರೋ॒ ವರು॑ಣೋ॒ ಬೃಹ॒ಸ್ಪತಿಃ॑ ಸವಿ॒ತಾ ಚ॑ ಪುನಂತು॒ ಪುನಃ॑ ಪುನಃ । ನಮೋ॒ಽಗ್ನಯೇ᳚-ಽಫ್ಸು॒ಮತೇ॒ ನಮ॒ ಇಂದ್ರಾ॑ಯ॒ ನಮೋ॒ ವರು॑ಣಾಯ॒ ನಮೋ ವಾರುಣ್ಯೈ॑ ನಮೋ॒ಽದ್ಭ್ಯಃ ॥ 1.57
ಯದ॒ಪಾಂ ಕ್ರೂ॒ರಂ-ಯಁದ॑ಮೇ॒ದ್ಧ್ಯಂ-ಯಁದ॑ಶಾಂ॒ತಂ ತದಪ॑ಗಚ್ಛತಾತ್ । ಅ॒ತ್ಯಾ॒ಶ॒ನಾ-ದ॑ತೀಪಾ॒ನಾ॒-ದ್ಯ॒ಚ್ಚ ಉ॒ಗ್ರಾತ್ ಪ್ರ॑ತಿ॒ಗ್ರಹಾ᳚ತ್ । ತನ್ನೋ॒ ವರು॑ಣೋ ರಾ॒ಜಾ॒ ಪಾ॒ಣಿನಾ᳚ ಹ್ಯವ॒ಮರ್ಶ॑ತು । ಸೋ॑ಽಹಮ॑ಪಾ॒ಪೋ ವಿ॒ರಜೋ॒ ನಿರ್ಮು॒ಕ್ತೋ ಮು॑ಕ್ತಕಿ॒ಲ್ಬಿಷಃ । ನಾಕ॑ಸ್ಯ ಪೃ॒ಷ್ಠಮಾರು॑ಹ್ಯ॒ ಗಚ್ಛೇ॒-ದ್ಬ್ರಹ್ಮ॑ಸಲೋ॒ಕತಾಮ್ । ಯಶ್ಚಾ॒॑ಫ್ಸು ವರು॑ಣಃ॒ ಸ ಪು॒ನಾತ್ವ॑ಘಮರ್ಷ॒ಣಃ । ಇ॒ಮಂ ಮೇ॑ ಗಂಗೇ ಯಮುನೇ ಸರಸ್ವತಿ॒ ಶುತು॑ದ್ರಿ॒ ಸ್ತೋಮಗ್ಂ॑ ಸಚತಾ॒ ಪರು॒ಷ್ಣಿಯಾ । ಅ॒ಸಿ॒ಕ್ನಿ॒ಯಾ ಮ॑ರುದ್ವೃಧೇ ವಿ॒ತಸ್ತ॒ಯಾ-ಽಽರ್ಜೀ॑ಕೀಯೇ ಶೃಣು॒ಹ್ಯಾ ಸು॒ಷೋಮ॑ಯಾ । ಋ॒ತಂಚ॑ ಸ॒ತ್ಯಂಚಾ॒-ಭೀ᳚ದ್ಧಾ॒ ತ್ತಪ॒ಸೋಽದ್ಧ್ಯ॑ಜಾಯತ । ತತೋ॒ ರಾತ್ರಿ॑-ರಜಾಯತ॒ ತತಃ॑ ಸಮು॒ದ್ರೋ ಅ॑ರ್ಣ॒ವಃ ॥ 1.63 (ತೈ. ಅರ. 6.1.13)
ಸ॒ಮು॒ದ್ರಾ-ದ॑ರ್ಣ॒ವಾ-ದಧಿ॑ ಸಂವಁಥ್ಸ॒ರೋ ಅ॑ಜಾಯತ । ಅ॒ಹೋ॒ರಾ॒ತ್ರಾಣಿ॑ ವಿ॒ದಧ॒-ದ್(ಮಿ॒ದಧ॒ದ್) ವಿಶ್ವ॑ಸ್ಯ ಮಿಷ॒ತೋ ವ॒ಶೀ । ಸೂ॒ರ್ಯಾ॒ಚಂ॒ದ್ರ॒ಮಸೌ॑ ಧಾ॒ತಾ ಯ॑ಥಾ ಪೂ॒ರ್ವ ಮ॑ಕಲ್ಪಯತ್ । ದಿವಂ॑ಚ ಪೃಥಿ॒ವೀಂ ಚಾಂ॒ತರಿ॑ಕ್ಷ॒ ಮಥೋ॒ ಸುವಃ॑ । ಯತ್ ಪೃ॑ಥಿ॒ವ್ಯಾಗ್ಂ ರಜ॑ಸ್ಸ್ವ॒ ಮಾಂತರಿ॑ಕ್ಷೇ ವಿ॒ರೋದ॑ಸೀ । ಇ॒ಮಾಗ್ಗ್ ಸ್ತದಾ॒ಪೋ ವ॑ರುಣಃ ಪು॒ನಾತ್ವ॑ಘಮರ್ಷ॒ಣಃ । ಪು॒ನಂತು॒ ವಸ॑ವಃ ಪು॒ನಾತು॒ ವರು॑ಣಃ ಪು॒ನಾತ್ವ॑ಘಮರ್ಷ॒ಣಃ । ಏ॒ಷ ಭೂ॒ತಸ್ಯ॑ ಮ॒ದ್ಧ್ಯೇ ಭುವ॑ನಸ್ಯ ಗೋ॒ಪ್ತಾ । ಏ॒ಷ ಪು॒ಣ್ಯಕೃ॑ತಾಂ-ಲೋಁ॒ಕಾ॒ನೇ॒ಷ ಮೃ॒ತ್ಯೋ-ರ್ಹಿ॑ರ॒ಣ್ಮಯ᳚ಮ್ । ದ್ಯಾವಾ॑ಪೃಥಿ॒ವ್ಯೋ-ರ್ಹಿ॑ರ॒ಣ್ಮಯ॒ಗ್ಂ॒ ಸಗ್ಗ್ಶ್ರಿ॑ತ॒ಗ್ಂ॒ ಸುವಃ॑ । 1.66 (ತೈ. ಅರ. 6.1.14)
ಸ ನಃ॒ ಸುವಃ॒ ಸಗ್ಂ ಶಿ॑ಶಾಧಿ । ಆರ್ದ್ರಂ॒ ಜ್ವಲ॑ತಿ॒ ಜ್ಯೋತಿ॑-ರ॒ಹಮ॑ಸ್ಮಿ । ಜ್ಯೋತಿ॒-ರ್ಜ್ವಲ॑ತಿ॒ ಬ್ರಹ್ಮಾ॒ಹಮ॑ಸ್ಮಿ । ಯೋ॑ಽಹಮ॑ಸ್ಮಿ॒ ಬ್ರಹ್ಮಾ॒ಹಮ॑ಸ್ಮಿ । ಅ॒ಹಮ॑ಸ್ಮಿ॒ ಬ್ರಹ್ಮಾ॒ಹಮ॑ಸ್ಮಿ । ಅ॒ಹಮೇ॒ವಾಹಂ ಮಾಂ ಜು॑ಹೋಮಿ॒ ಸ್ವಾಹಾ᳚ । ಅ॒ಕಾ॒ರ್ಯ॒-ಕಾ॒ರ್ಯ॑ವ ಕೀ॒ರ್ಣೀ ಸ್ತೇ॒ನೋ ಭ್ರೂ॑ಣ॒ಹಾ ಗು॑ರುತ॒ಲ್ಪಗಃ । ವರು॑ಣೋ॒-ಽಪಾಮ॑ಘಮರ್ಷ॒ಣ-ಸ್ತಸ್ಮಾ᳚ತ್ ಪಾ॒ಪಾತ್ ಪ್ರಮು॑ಚ್ಯತೇ । ರ॒ಜೋಭೂಮಿ॑ಸ್ತ್ವ॒ಮಾಗ್ಂ ರೋದ॑ಯಸ್ವ॒ ಪ್ರವ॑ದಂತಿ॒ ಧೀರಾಃ᳚ । ಆಕ್ರಾಂ᳚ಥ್-ಸಮು॒ದ್ರಃ ಪ್ರ॑ಥ॒ಮೇ ವಿಧ॑ರ್ಮ-ಂಜ॒ನಯ॑ನ್ ಪ್ರ॒ಜಾ ಭುವ॑ನಸ್ಯ॒ ರಾಜಾ᳚ । ವೃಷಾ॑ ಪ॒ವಿತ್ರೇ॒ ಅಧಿ॒ಸಾನೋ॒ ಅವ್ಯೇ॑ ಬೃ॒ಹಥ್ ಸೋಮೋ॑ ವಾವೃಧೇ ಸುವಾ॒ನ ಇಂದುಃ॑ ॥ 1.70
(ಪುರ॑ಸ್ತಾ॒-ದ್- ಯಶೋ॒ – ಗುಹಾ॑ಸು॒ – ಮಮ॑ – ಚಕ್ರತುಂ॒ಡಾಯ॑ ಧೀಮಹಿ – ತೀಕ್ಷದ॒ಗ್ಗ್॒ಷ್ಠ್ರಾಯ॑ ಧೀಮಹಿ॒ – ಪರಿ॑ – ಪ್ರ॒ತಿಷ್ಠಿ॑ತಂ – ದೇಭು–ರ್ ಯಚ್ಛತು – ದಧಾತನಾ॒- ದ್ಭ್ಯೋ᳚ – ಽರ್ಣ॒ವಃ – ಸುವೋ॒ – ರಾಜೈಕಂ॑ ಚ) (ಆ1)
ದುರ್ಗಾ ಸೂಕ್ತಂ (4.7)
ಜಾ॒ತವೇ॑ದಸೇ ಸುನವಾಮ॒ ಸೋಮ॑-ಮರಾತೀಯ॒ತೋ ನಿದ॑ಹಾತಿ॒ ವೇದಃ॑ । ಸ ನಃ॑ ಪರ್ಷ॒ದತಿ॑ ದು॒ರ್ಗಾಣಿ॒ ವಿಶ್ವಾ॑ ನಾ॒ವೇವ॒ ಸಿಂಧುಂ॑ ದುರಿ॒ತಾಽತ್ಯ॒ಗ್ನಿಃ ।ತಾಮ॒ಗ್ನಿವ॑ರ್ಣಾಂ॒ ತಪ॑ಸಾ ಜ್ವಲಂ॒ತೀಂ-ವೈಁ॑ರೋಚ॒ನೀಂ ಕ॑ರ್ಮಫ॒ಲೇಷು॒ ಜುಷ್ಟಾ᳚ಮ್ । ದು॒ರ್ಗಾಂ ದೇ॒ವೀಗ್ಂ ಶರ॑ಣಮ॒ಹಂ ಪ್ರಪ॑ದ್ಯೇ ಸು॒ತರ॑ಸಿ ತರಸೇ॒ ನಮಃ॑ ।ಅಗ್ನೇ॒ ತ್ವಂ ಪಾ॑ರಯಾ॒ ನವ್ಯೋ॑ ಅ॒ಸ್ಮಾಂಥ್ ಸ್ವ॒ಸ್ತಿ-ಭಿ॒ರತಿ॑ ದು॒ರ್ಗಾಣಿ॒ ವಿಶ್ವಾ᳚ । ಪೂಶ್ಚ॑ ಪೃ॒ಥ್ವೀ ಬ॑ಹು॒ಲಾ ನ॑ ಉ॒ರ್ವೀ ಭವಾ॑ ತೋ॒ಕಾಯ॒ ತನ॑ಯಾಯ॒ ಶಂಯೋಁಃ । ವಿಶ್ವಾ॑ನಿ ನೋ ದು॒ರ್ಗಹಾ॑ ಜಾತವೇದಃ॒ ಸಿಂಧುಂ॒ ನ ನಾ॒ವಾ ದು॑ರಿ॒ತಾಽತಿ॑ಪರ್ಷಿ । ಅಗ್ನೇ॑ ಅತ್ರಿ॒ವನ್ ಮನ॑ಸಾ ಗೃಣಾ॒ನೋ᳚ಽಸ್ಮಾಕಂ॑ ಬೋದ್ಧ್ಯವಿ॒ತಾ ತ॒ನೂನಾ᳚ಮ್ । ಪೃ॒ತ॒ನಾ॒ಜಿತ॒ಗ್ಂ॒ ಸಹ॑ಮಾನ-ಮು॒ಗ್ರಮ॒ಗ್ನಿಗ್ಂ ಹು॑ವೇಮ ಪರ॒ಮಾಥ್ ಸ॒ಧಸ್ಥಾ᳚ತ್ । ಸ ನಃ॑ ಪರ್ಷ॒ದತಿ॑ ದು॒ರ್ಗಾಣಿ॒ ವಿಶ್ವಾ॒ ಕ್ಷಾಮ॑ದ್ದೇ॒ವೋ ಅತಿ॑ ದುರಿ॒ತಾಽತ್ಯ॒ಗ್ನಿಃ । ಪ್ರ॒ತ್ನೋಷಿ॑-ಕ॒ಮೀಡ್ಯೋ॑ ಅದ್ಧ್ವ॒ರೇಷು॑ ಸ॒ನಾಚ್ಚ॒ ಹೋತಾ॒ ನವ್ಯ॑ಶ್ಚ॒ ಸಥ್ಸಿ॑ । ಸ್ವಾಂಚಾ᳚ಗ್ನೇ ತ॒ನುವಂ॑ ಪಿ॒ಪ್ರಯ॑ಸ್ವಾ॒ಸ್ಮಭ್ಯಂ॑ಚ॒ ಸೌಭ॑ಗ॒ಮಾಯ॑ಜಸ್ವ । ಗೋಭಿ॒-ರ್ಜುಷ್ಟ॑ಮ॒ಯುಜೋ॒ ನಿಷಿ॑ಕ್ತಂ॒ ತವೇಂ᳚ದ್ರ ವಿಷ್ಣೋ॒-ರನು॒ಸಂಚ॑ರೇಮ । ನಾಕ॑ಸ್ಯ ಪೃ॒ಷ್ಠಮ॒ಭಿ ಸಂ॒ವಁಸಾ॑ನೋ॒ ವೈಷ್ಣ॑ವೀಂ-ಲೋಁ॒ಕ ಇ॒ಹ ಮಾ॑ದಯಂತಾಮ್ ॥ 2.7 (ದು॒ರಿ॒ತಾಽತ್ಯ॒ಗ್ನಿಶ್ಚ॒ತ್ವಾರಿ॑ ಚ) (ತೈ. ಅರ. 6.2.1)
[ ಓಂ ಕಾ॒ತ್ಯಾ॒ಯ॒ನಾಯ॑ ವಿ॒ದ್ಮಹೇ॑ ಕನ್ಯಕು॒ಮಾರಿ॑ ಧೀಮಹಿ । ತನ್ನೋ॑ ದುರ್ಗಿಃ ಪ್ರಚೋ॒ದಯಾ᳚ತ್ ॥ ]
ವ್ಯಾಹೃತಿ ಹೋಮ ಮಂತ್ರಾಃ (4.8)
ಭೂ-ರನ್ನ॑-ಮ॒ಗ್ನಯೇ॑ ಪೃಥಿ॒ವ್ಯೈ ಸ್ವಾಹಾ॒, ಭುವೋಽನ್ನಂ॑-ವಾಁ॒ಯವೇ॒ಽಂತರಿ॑ಕ್ಷಾಯ॒ ಸ್ವಾಹಾ॒, ಸುವ॒ರನ್ನ॑-ಮಾದಿ॒ತ್ಯಾಯ॑ ದಿ॒ವೇ ಸ್ವಾಹಾ॒, ಭೂರ್ಭುವ॒ಸ್ಸುವ॒-ರನ್ನಂ॑ ಚಂ॒ದ್ರಮ॑ಸೇ ದಿ॒ಗ್ಭ್ಯಃ ಸ್ವಾಹಾ॒, ನಮೋ॑ ದೇ॒ವೇಭ್ಯಃ॑ ಸ್ವ॒ಧಾ ಪಿ॒ತೃಭ್ಯೋ॒ ಭೂರ್ಭುವ॒ಸ್ಸುವ॒-ರನ್ನ॒ಮೋಮ್ ॥ 3.1 (ತೈ. ಅರ. 6.3.1)
ಭೂ-ರ॒ಗ್ನಯೇ॑ ಪೃಥಿ॒ವ್ಯೈ ಸ್ವಾಹಾ॒, ಭುವೋ॑ ವಾ॒ಯವೇ॒ಽಂತರಿ॑ಕ್ಷಾಯ॒ ಸ್ವಾಹಾ॒ ,
ಸುವ॑ರಾದಿ॒ತ್ಯಾಯ॑ ದಿ॒ವೇ ಸ್ವಾಹಾ॒, ಭೂ-ರ್ಭುವ॒ಸ್ಸುವ॑-ಶ್ಚಂ॒ದ್ರಮ॑ಸೇ ದಿ॒ಗ್ಭ್ಯಃ ಸ್ವಾಹಾ॒, ನಮೋ॑ ದೇ॒ವೇಭ್ಯಃ॑ ಸ್ವ॒ಧಾ ಪಿ॒ತೃಭ್ಯೋ॒ ಭೂರ್ಭುವ॒ಸ್ಸುವ॒-ರಗ್ನ॒ ಓಮ್ ॥ 4.1
ಭೂ-ರ॒ಗ್ನಯೇ॑ ಚ ಪೃಥಿ॒ವ್ಯೈ ಚ॑ ಮಹ॒ತೇ ಚ॒ ಸ್ವಾಹಾ॒, ಭುವೋ॑ ವಾ॒ಯವೇ॑ ಚಾಂ॒ತರಿ॑ಕ್ಷಾಯ ಚ ಮಹ॒ತೇ ಚ॒ ಸ್ವಾಹಾ॒, ಸುವ॑ರಾದಿ॒ತ್ಯಾಯ॑ ಚ ದಿ॒ವೇ ಚ॑ ಮಹ॒ತೇ ಚ॒ ಸ್ವಾಹಾ॒, ಭೂ-ರ್ಭುವ॒ಸ್ಸುವ॑-ಶ್ಚಂ॒ದ್ರಮ॑ಸೇ ಚ॒ ನಕ್ಷ॑ತ್ರೇಭ್ಯಶ್ಚ ದಿ॒ಗ್ಭ್ಯಶ್ಚ॑ ಮಹ॒ತೇ ಚ॒ ಸ್ವಾಹಾ॒, ನಮೋ॑ ದೇ॒ವೇಭ್ಯಃ॑ ಸ್ವ॒ಧಾ ಪಿ॒ತೃಭ್ಯೋ॒ ಭೂರ್ಭುವ॒ಸ್ಸುವ॒-ರ್ಮಹ॒ರೋಮ್ ॥ 5.1 (ತೈ. ಅರ. 6.4.1)
ಜ್ಞಾನಪ್ರಾಪ್ತ್ಯರ್ಥಾ ಹೋಮಮಂತ್ರಾಃ (4.9)
ಪಾಹಿ ನೋ ಅಗ್ನ ಏನ॑ಸೇ ಸ್ವಾ॒ಹಾ । ಪಾಹಿ ನೋ ವಿಶ್ವವೇದ॑ಸೇ ಸ್ವಾ॒ಹಾ । ಯಜ್ಞಂ ಪಾಹಿ ವಿಭಾವ॑ಸೋ ಸ್ವಾ॒ಹಾ । ಸರ್ವಂ ಪಾಹಿ ಶತಕ್ರ॑ತೋ ಸ್ವಾ॒ಹಾ ॥ 6.1 (ತೈ. ಅರ. 6.7.1)
ಪಾ॒ಹಿ ನೋ॑ ಅಗ್ನ॒ ಏಕ॑ಯಾ । ಪಾ॒ಹ್ಯು॑ತ ದ್ವಿ॒ತೀಯ॑ಯಾ । ಪಾ॒ಹ್ಯೂರ್ಜಂ॑ ತೃ॒ತೀಯ॑ಯಾ । ಪಾ॒ಹಿ ಗೀ॒ರ್ಭಿ-ಶ್ಚ॑ತ॒ಸೃಭಿ॑-ರ್ವಸೋ॒ ಸ್ವಾಹಾ᳚ ॥ 7.1 (ತೈ. ಅರ. 6.6.1)
ವೇದಾವಿಸ್ಮರಣಾಯ ಜಪಮಂತ್ರಾಃ (4.10)
ಯಃ ಛಂದ॑ಸಾ-ಮೃಷ॒ಭೋ ವಿ॒ಶ್ವರೂ॑ಪಃ॒ ಛಂದೋ᳚ಭ್ಯಃ॒ ಛಂದಾಗ್ಗ್॑ಸ್ಯಾ ವಿ॒ವೇಶ॑ । ಸಚಾಗ್ಂ ಶಿಕ್ಯಃ ಪುರೋ ವಾಚೋ॑ಪನಿ॒ಷ-ದಿಂದ್ರೋ᳚ ಜ್ಯೇ॒ಷ್ಠ ಇಂ॑ದ್ರಿ॒ಯಾಯ॒ ಋಷಿ॑ಭ್ಯೋ॒ ನಮೋ॑ ದೇ॒ವೇಭ್ಯಃ॑ ಸ್ವ॒ಧಾ ಪಿ॒ತೃಭ್ಯೋ॒ ಭೂರ್ಭುವ॒ಸ್ಸುವಃ॒ ಛಂದ॒ ಓಮ್ ॥ 8.1 (ತೈ. ಅರ. 6.8.1)
ನಮೋ॒ ಬ್ರಹ್ಮ॑ಣೇ ಧಾ॒ರಣಂ॑ ಮೇ ಅ॒ಸ್ತ್ವ-ನಿ॑ರಾಕರಣಂ-ಧಾ॒ರಯಿ॑ತಾ ಭೂಯಾಸಂ॒ ಕರ್ಣ॑ಯೋಃ ಶ್ರು॒ತಂ ಮಾಚ್ಯೋ᳚ಢ್ವಂ॒ ಮಮಾ॒ಮುಷ್ಯ॒ ಓಮ್ ॥ 9.1 (ತೈ. ಅರ. 6.9.1)
ತಪಃ ಪ್ರಶಂಸಾ (4.11)
ಋ॒ತಂ ತಪಃ॑ ಸ॒ತ್ಯಂ ತಪಃ॑ ಶ್ರು॒ತಂ ತಪಃ॑ ಶಾಂ॒ತಂ ತಪೋ॒ ದಮ॒ ಸ್ತಪಃ॒ ಶಮ॒ಸ್ತಪೋ॒ ದಾನಂ॒ ತಪೋ॒ ಯಜ್ಞಂ॒ ತಪೋ॒ ಭೂರ್ಭುವ॒ಸ್ಸುವ॒-ರ್ಬ್ರಹ್ಮೈ॒-ತದುಪಾ᳚ಸ್ಯೈ॒-ತತ್ತಪಃ॑ ॥ 10.1 (ತೈ. ಅರ. 6.10.1)
ವಿಹಿತಾಚರಣ ಪ್ರಶಂಸಾ ನಿಷಿದ್ಧಾಚರಣ ನಿಂದಾ ಚ (4.12)
ಯಥಾ॑ ವೃ॒ಕ್ಷಸ್ಯ॑ ಸ॒ಪುಂಷ್ಪಿ॑ತಸ್ಯ ದೂ॒ರಾ-ದ್ಗಂ॒ಧೋ ವಾ᳚ತ್ಯೇ॒ವಂ ಪುಣ್ಯ॑ಸ್ಯ ಕ॒ರ್ಮಣೋ॑ ದೂ॒ರಾ-ದ್ಗಂ॒ಧೋ ವಾ॑ತಿ॒ ಯಥಾ॑ಽಸಿಧಾ॒ರಾಂ ಕ॒ರ್ತೇಽವ॑ಹಿತಾ-ಮವ॒ಕ್ರಾಮೇ॒ ಯದ್ಯುವೇ॒ ಯುವೇ॒ ಹವಾ॑ ವಿ॒ಹ್ವಯಿ॑ಷ್ಯಾಮಿ ಕ॒ರ್ತಂ ಪ॑ತಿಷ್ಯಾ॒ಮೀತ್ಯೇ॒ವ-ಮ॒ಮೃತಾ॑-ದಾ॒ತ್ಮಾನಂ॑ ಜು॒ಗುಫ್ಸೇ᳚ತ್ ॥ 11.1 (ತೈ. ಅರ. 6.11.1)
ದಹರ ವಿದ್ಯಾ (4.13)
ಅ॒ಣೋ-ರಣೀ॑ಯಾನ್ ಮಹ॒ತೋ ಮಹೀ॑ಯಾ-ನಾ॒ತ್ಮಾ ಗುಹಾ॑ಯಾಂ॒ ನಿಹಿ॑ತೋಽಸ್ಯ ಜಂ॒ತೋಃ । ತಮ॑ಕ್ರತುಂ ಪಶ್ಯತಿ ವೀತಶೋ॒ಕೋ ಧಾ॒ತುಃ ಪ್ರ॒ಸಾದಾ᳚ನ್-ಮಹಿ॒ಮಾನ॑ಮೀಶಮ್ । ಸ॒ಪ್ತ ಪ್ರಾ॒ಣಾಃ ಪ್ರ॒ಭವಂ॑ತಿ॒ ತಸ್ಮಾ᳚ಥ್ ಸ॒ಪ್ತಾರ್ಚಿಷಃ॑ ಸ॒ಮಿಧಃ॑ ಸ॒ಪ್ತ ಜಿ॒ಹ್ವಾಃ । ಸ॒ಪ್ತ ಇ॒ಮೇ ಲೋ॒ಕಾ ಯೇಷು॒ ಚರಂ॑ತಿ ಪ್ರಾ॒ಣಾ ಗು॒ಹಾಶ॑ಯಾ॒-ನ್ನಿಹಿ॑ತಾಃ ಸ॒ಪ್ತ ಸ॑ಪ್ತ । ಅತಃ॑ ಸಮು॒ದ್ರಾ ಗಿ॒ರಯ॑ಶ್ಚ॒ ಸರ್ವೇ॒ಽಸ್ಮಾಥ್ ಸ್ಯಂದಂ॑ತೇ॒ ಸಿಂಧ॑ವಃ॒ ಸರ್ವ॑ರೂಪಾಃ । ಅತ॑ಶ್ಚ॒ ವಿಶ್ವಾ॒ ಓಷ॑ಧಯೋ॒ ರಸಾ᳚ಚ್ಚ॒ ಯೇನೈ॑ಷ ಭೂ॒ತ-ಸ್ತಿ॑ಷ್ಠತ್ಯಂತರಾ॒ತ್ಮಾ । ಬ್ರ॒ಹ್ಮಾ ದೇ॒ವಾನಾಂ᳚ ಪದ॒ವೀಃ ಕ॑ವೀ॒ನಾ-ಮೃಷಿ॒-ರ್ವಿಪ್ರಾ॑ಣಾಂ ಮಹಿ॒ಷೋ ಮೃ॒ಗಾಣಾ᳚ಮ್ । ಶ್ಯೇ॒ನೋ ಗೃಧ್ರಾ॑ಣಾ॒ಗ್ಗ್॒ ಸ್ವಧಿ॑ತಿ॒-ರ್ವನಾ॑ನಾ॒ಗ್ಂ॒ ಸೋಮಃ॑ ಪ॒ವಿತ್ರ॒ ಮತ್ಯೇ॑ತಿ॒ ರೇಭನ್ನ್॑ । ಅ॒ಜಾ ಮೇಕಾಂ॒-ಲೋಁಹಿ॑ತ-ಶುಕ್ಲ-ಕೃ॒ಷ್ಣಾಂ ಬ॒ಹ್ವೀಂ ಪ್ರ॒ಜಾಂ ಜ॒ನಯಂ॑ತೀ॒ಗ್ಂ॒ ಸರೂ॑ಪಾಮ್ । ಅ॒ಜೋ ಹ್ಯೇಕೋ॑ ಜು॒ಷಮಾ॑ಣೋಽನು॒ಶೇತೇ॒ ಜಹಾ᳚ತ್ಯೇನಾಂ ಭು॒ಕ್ತ-ಭೋ॑ಗಾ॒ಮಜೋ᳚ಽನ್ಯಃ ॥ 12.5 (ತೈ. ಅರ. 6.12.1)
ಹ॒ಗ್ಂ॒ಸ-ಶ್ಶು॑ಚಿ॒ಷ-ದ್ವಸು॑-ರಂತರಿಕ್ಷ॒-ಸದ್ಧೋತಾ॑ ವೇದಿ॒ಷ-ದತಿ॑ಥಿ-ರ್ದುರೋಣ॒ಸತ್ । ನೃ॒ಷ-ದ್ವ॑ರ॒ಸ-ದೃ॑ತ॒ಸ-ದ್ವ್ಯೋ॑ಮ॒ಸ-ದ॒ಬ್ಜಾ ಗೋ॒ಜಾ ಋ॑ತ॒ಜಾ ಅ॑ದ್ರಿ॒ಜಾ ಋ॒ತಂ ಬೃ॒ಹತ್ । ಘೃ॒ತಂ ಮಿ॑ಮಿಕ್ಷಿರೇ ಘೃ॒ತಮ॑ಸ್ಯ॒ ಯೋನಿ॑-ರ್ಘೃ॒ತೇ ಶ್ರಿ॒ತೋ ಘೃ॒ತಮು॑ವಸ್ಯ॒ ಧಾಮ॑ । ಅ॒ನು॒ಷ್ವ॒ಧಮಾವ॑ಹ ಮಾ॒ದಯ॑ಸ್ವ॒ ಸ್ವಾಹಾ॑ ಕೃತಂ-ವೃಁಷಭ ವಕ್ಷಿ ಹ॒ವ್ಯಮ್ । ಸ॒ಮು॒ದ್ರಾ ದೂ॒ರ್ಮಿ-ರ್ಮಧು॑ಮಾ॒ಗ್ಂ॒ ಉದಾ॑ರ-ದುಪಾ॒ಗ್ಂ॒ಶುನಾ॒ ಸಮ॑ಮೃತ॒ತ್ವ ಮಾ॑ನಟ್ । ಘೃ॒ತಸ್ಯ॒ ನಾಮ॒ ಗುಹ್ಯಂ॒-ಯಁದಸ್ತಿ॑ ಜಿ॒ಹ್ವಾ ದೇ॒ವಾನಾ॑-ಮ॒ಮೃತ॑ಸ್ಯ॒ ನಾಭಿಃ॑ । ವ॒ಯಂ ನಾಮ॒ ಪ್ರಬ್ರ॑ವಾಮಾ ಘೃ॒ತೇನಾ॒ಸ್ಮಿನ್. ಯ॒ಜ್ಞೇ ಧಾ॑ರಯಾಮಾ॒ ನಮೋ॑ಭಿಃ । ಉಪ॑ ಬ್ರ॒ಹ್ಮಾ ಶೃ॑ಣವಚ್ಛ॒ಸ್ಯಮಾ॑ನಂ॒ ಚತುಃ॑ ಶೃಂಗೋ ಽವಮೀ-ದ್ಗೌ॒ರ ಏ॒ತತ್ । ಚ॒ತ್ವಾರಿ॒ ಶೃಂಗಾ॒ ತ್ರಯೋ॑ ಅಸ್ಯ॒ ಪಾದಾ॒ ದ್ವೇ ಶೀ॒ರ॒.ಷೇ ಸ॒ಪ್ತ ಹಸ್ತಾ॑ಸೋ ಅ॒ಸ್ಯ । ತ್ರಿಧಾ॑ ಬ॒ದ್ಧೋ ವೃ॑ಷ॒ಭೋ ರೋ॑ರವೀತಿ ಮ॒ಹೋ ದೇ॒ವೋ ಮರ್ತ್ಯಾ॒ಗ್ಂ॒ ಆವಿ॑ವೇಶ ॥ 12.10 (ತೈ. ಅರ. 6.12.2)
ತ್ರಿಧಾ॑ ಹಿ॒ತಂ ಪ॒ಣಿಭಿ॑-ರ್ಗು॒ಹ್ಯಮಾ॑ನಂ॒ ಗವಿ॑-ದೇ॒ವಾಸೋ॑ ಘೃ॒ತಮನ್ವ॑ವಿಂದನ್ನ್ । ಇಂದ್ರ॒ ಏಕ॒ಗ್ಂ॒ ಸೂರ್ಯ॒ ಏಕಂ॑ ಜಜಾನ ವೇ॒ನಾ ದೇಕಗ್ಗ್॑ ಸ್ವ॒ಧಯಾ॒ ನಿಷ್ಟ॑ತಕ್ಷುಃ । ಯೋ ದೇ॒ವಾನಾಂ᳚ ಪ್ರಥ॒ಮಂ ಪು॒ರಸ್ತಾ॒-ದ್ವಿಶ್ವಾ॒ಧಿಯೋ॑ ರು॒ದ್ರೋ ಮ॒ಹರ್ಷಿಃ॑ । ಹಿ॒ರ॒ಣ್ಯ॒ಗ॒ರ್ಭಂ ಪ॑ಶ್ಯತ॒ ಜಾಯ॑ಮಾನ॒ಗ್ಂ॒ ಸನೋ॑ ದೇ॒ವಃ ಶು॒ಭಯಾ॒ ಸ್ಮೃತ್ಯಾ॒ ಸಂಯುಁ॑ನಕ್ತು । ಯಸ್ಮಾ॒ತ್ಪರಂ॒ ನಾಪ॑ರ॒ ಮಸ್ತಿ॒ ಕಿಂಚಿ॒ದ್ಯಸ್ಮಾ॒ನ್ ನಾಣೀ॑ಯೋ॒ ನ ಜ್ಯಾಯೋ᳚ಽಸ್ತಿ॒ ಕಶ್ಚಿ॑ತ್ । ವೃ॒ಕ್ಷ ಇ॑ವ ಸ್ತಬ್ಧೋ ದಿ॒ವಿ ತಿ॑ಷ್ಠ॒-ತ್ಯೇಕ॒ಸ್ತೇನೇ॒ದಂ ಪೂ॒ರ್ಣಂ ಪುರು॑ಷೇಣ॒ ಸರ್ವ᳚ಮ್ ॥ 12.13
(ಸನ್ಯಾಸ ಸೂಕ್ತಂ)
ನ ಕರ್ಮ॑ಣಾ ನ ಪ್ರ॒ಜಯಾ॒ ಧನೇ॑ನ॒ ತ್ಯಾಗೇ॑ನೈಕೇ ಅಮೃತ॒ತ್ವ-ಮಾ॑ನ॒ಶುಃ । ಪರೇ॑ಣ॒ ನಾಕಂ॒ ನಿಹಿ॑ತಂ॒ ಗುಹಾ॑ಯಾಂ-ವಿಁ॒ಭ್ರಾಜ॑ದೇ॒ತ-ದ್ಯತ॑ಯೋ ವಿ॒ಶಂತಿ॑ ॥ ವೇ॒ದಾಂ॒ತ॒ ವಿ॒ಜ್ಞಾನ॒-ಸುನಿ॑ಶ್ಚಿತಾ॒ರ್ಥಾಃ ಸನ್ಯಾ॑ಸ ಯೋ॒ಗಾದ್ಯತ॑ಯಃ ಶುದ್ಧ॒ ಸತ್ತ್ವಾಃ᳚ । ತೇ ಬ್ರ॑ಹ್ಮಲೋ॒ಕೇ ತು॒ ಪರಾಂ᳚ತಕಾಲೇ॒ ಪರಾ॑ಮೃತಾ॒ತ್ ಪರಿ॑ಮುಚ್ಯಂತಿ॒ ಸರ್ವೇ᳚ । ದ॒ಹ್ರಂ॒-ವಿಁ॒ಪಾ॒ಪಂ ಪ॒ರಮೇ᳚ಶ್ಮ ಭೂತಂ॒-ಯಁತ್ ಪುಂ॑ಡರೀ॒ಕಂ ಪು॒ರಮ॑ದ್ಧ್ಯ ಸ॒ಗ್ಗ್॒ಸ್ಥಮ್ ।
ತ॒ತ್ರಾ॒ಪಿ॒ ದ॒ಹ್ರಂ ಗ॒ಗನಂ॑-ವಿಁಶೋಕ॒-ಸ್ತಸ್ಮಿ॑ನ್. ಯದಂ॒ತಸ್ತ-ದುಪಾ॑ಸಿತ॒ವ್ಯಮ್ ॥ ಯೋ ವೇದಾದೌ ಸ್ವ॑ರಃ ಪ್ರೋ॒ಕ್ತೋ॒ ವೇ॒ದಾಂತೇ॑ ಚ ಪ್ರ॒ತಿಷ್ಠಿ॑ತಃ । ತಸ್ಯ॑ ಪ್ರ॒ಕೃತಿ॑-ಲೀನ॒ಸ್ಯ॒ ಯಃ॒ ಪರಃ॑ ಸ॒ ಮ॒ಹೇಶ್ವ॑ರಃ ॥ 12.17 (ತೈ. ಅರ. 6.12.3)
(ಅಜೋ᳚ಽನ್ಯ॒ – ಆವಿ॑ವೇಶ॒ – ಸರ್ವೇ॑ ಚ॒ತ್ವಾರಿ॑ ಚ)
ನಾರಾಯಣ ಸೂಕ್ತಂ (4.14)
ಸ॒ಹ॒ಸ್ರ॒ಶೀರ್ಷಂ॑ ದೇ॒ವಂ॒-ವಿಁ॒ಶ್ವಾಕ್ಷಂ॑-ವಿಁ॒ಶ್ವ ಶಂ॑ ಭುವಮ್ । ವಿಶ್ವಂ॑ ನಾ॒ರಾಯ॑ಣಂ ದೇ॒ವ॒ಮ॒ಕ್ಷರಂ॑ ಪರ॒ಮಂ ಪ॒ದಮ್ । ವಿ॒ಶ್ವತಃ॒ ಪರ॑ಮಾನ್ನಿ॒ತ್ಯಂ॒-ವಿಁ॒ಶ್ವಂ ನಾ॑ರಾಯ॒ಣಗ್ಂ ಹ॑ರಿಮ್ । ವಿಶ್ವ॑ಮೇ॒ವೇದಂ ಪುರು॑ಷ॒-ಸ್ತ-ದ್ವಿಶ್ವ॒ಮುಪ॑ಜೀವತಿ । ಪತಿಂ॒-ವಿಁಶ್ವ॑ಸ್ಯಾ॒ತ್ಮೇಶ್ವ॑ರ॒ಗ್ಂ॒ ಶಾಶ್ವ॑ತಗ್ಂ ಶಿ॒ವಮ॑ಚ್ಯುತಮ್ । ನಾ॒ರಾಯ॒ಣಂ ಮ॑ಹಾಜ್ಞೇ॒ಯಂ॒-ವಿಁ॒ಶ್ವಾತ್ಮಾ॑ನಂ ಪ॒ರಾಯ॑ಣಮ್ । ನಾ॒ರಾಯ॒ಣ ಪ॑ರೋ ಜ್ಯೋ॒ತಿ॒ರಾ॒ತ್ಮಾ ನಾ॑ರಯ॒ಣಃ ಪ॑ರಃ । ನಾ॒ರಾಯ॒ಣ ಪ॑ರಂ ಬ್ರ॒ಹ್ಮ॒ ತ॒ತ್ತ್ವಂ ನಾ॑ರಾಯ॒ಣಃ ಪ॑ರಃ । ನಾ॒ರಾಯ॒ಣ ಪ॑ರೋ ಧ್ಯಾ॒ತಾ॒ ಧ್ಯಾ॒ನಂ ನಾ॑ರಾಯ॒ಣಃ ಪ॑ರಃ । ಯಚ್ಚ॑ ಕಿಂ॒ಚಿಜ್-ಜ॑ಗಥ್ ಸ॒ರ್ವಂ॒ ದೃ॒ಶ್ಯತೇ᳚ ಶ್ರೂಯ॒ತೇಽಪಿ॑ ವಾ । 13.4 (ತೈ. ಅರ. 6.13.1)
ಅಂತ॑-ರ್ಬ॒ಹಿಶ್ಚ॑ ತಥ್ ಸ॒ರ್ವಂ॒-ವ್ಯಾಁ॒ಪ್ಯ ನಾ॑ರಾಯ॒ಣಃ ಸ್ಥಿ॑ತಃ । ಅನಂ॑ತ॒ ಮವ್ಯ॑ಯಂ ಕ॒ವಿಗ್ಂ ಸ॑ಮು॒ದ್ರೇಽಂತಂ॑-ವಿಁ॒ಶ್ವ ಶ॑ಭುಂವಁಮ್ । ಪ॒ದ್ಮ॒ಕೋ॒ಶ-ಪ್ರ॑ತೀಕಾ॒ಶ॒ಗ್ಂ॒ ಹೃ॒ದಯಂ॑ ಚಾಪ್ಯ॒ಧೋಮು॑ಖಮ್ । ಅಧೋ॑ ನಿ॒ಷ್ಟ್ಯಾ ವಿ॑ತಸ್ತ್ಯಾಂ॒ತೇ॒ ನಾ॒ಭ್ಯಾಮು॑ಪರಿ॒ ತಿಷ್ಠ॑ತಿ । ಜ್ವಾ॒ಲ॒ಮಾ॒ಲಾ ಕು॑ಲಂ ಭಾ॒ತೀ॒ ವಿ॒ಶ್ವಸ್ಯಾ॑ಯತ॒ನಂ ಮ॑ಹತ್ । ಸಂತ॑ತಗ್ಂ ಶಿ॒ಲಾಭಿ॑ಸ್ತು॒ ಲಂಬ॑ತ್ಯಾ ಕೋಶ॒ಸನ್ನಿ॑ಭಮ್ । ತಸ್ಯಾಂತೇ॑ ಸುಷಿ॒ರಗ್ಂ ಸೂ॒ಕ್ಷ್ಮಂ ತಸ್ಮಿಂ᳚ಥ್ ಸ॒ರ್ವಂ ಪ್ರತಿ॑ಷ್ಠಿತಮ್ । ತಸ್ಯ॒ ಮದ್ಧ್ಯೇ॑ ಮ॒ಹಾನ॑ಗ್ನಿ-ರ್ವಿ॒ಶ್ವಾರ್ಚಿ॑-ರ್ವಿ॒ಶ್ವತೋ॑ ಮುಖಃ । ಸೋಽಗ್ರ॑ಭು॒ಗ್ ವಿಭ॑ಜನ್ ತಿ॒ಷ್ಠ॒ನ್-ನಾಹಾ॑ರ-ಮಜ॒ರಃ ಕ॒ವಿಃ । ತಿ॒ರ್ಯ॒ಗೂ॒ರ್ಧ್ವ ಮ॑ಧಃ ಶಾ॒ಯೀ॒ ರ॒ಶ್ಮಯ॑ಸ್ತಸ್ಯ॒ ಸಂತ॑ತಾ । ಸಂ॒ತಾ॒ಪಯ॑ತಿ ಸ್ವಂ ದೇ॒ಹಮಾಪಾ॑ದತಲ॒ ಮಸ್ತ॑ಕಃ । ತಸ್ಯ॒ ಮದ್ಧ್ಯೇ॒ ವಹ್ನಿ॑ಶಿಖಾ ಅ॒ಣೀಯೋ᳚ರ್ಧ್ವಾ ವ್ಯ॒ವಸ್ಥಿ॑ತಃ । ನೀ॒ಲತೋ॑ ಯದ॑ ಮದ್ಧ್ಯ॒ಸ್ಥಾ॒-ದ್ವಿ॒ದ್ಯುಲ್ಲೇ॑ಖೇವ॒ ಭಾಸ್ವ॑ರಾ । ನೀ॒ವಾರ॒ ಶೂಕ॑ವತ್ತ॒ನ್ವೀ॒ ಪೀ॒ತಾ ಭಾ᳚ಸ್ವತ್ಯ॒ಣೂಪ॑ಮಾ । ತಸ್ಯಾಃ᳚ ಶಿಖಾ॒ಯಾ ಮ॑ದ್ಧ್ಯೇ ಪ॒ರಮಾ᳚ತ್ಮಾ ವ್ಯ॒ವಸ್ಥಿ॑ತಃ । ಸ ಬ್ರಹ್ಮ॒ ಸ ಶಿವಃ॒ ಸ ಹರಿಃ॒ ಸೇಂದ್ರಃ॒ ಸೋಽಕ್ಷ॑ರಃ ಪರ॒ಮಃ ಸ್ವ॒ರಾಟ್ ॥ 13.12 (ತೈ. ಅರ. 6.13.2)
(ಅಪಿ॑ ವಾ॒ – ಸಂತ॑ತಾ॒ ಷಟ್ ಚ॑)
ಆದಿತ್ಯ ಮಂಡಲೇ ಪರಬ್ರಹ್ಮೋಪಾಸನಂ (4.15)
ಆ॒ದಿ॒ತ್ಯೋ ವಾ ಏ॒ಷ ಏ॒ತನ್ ಮಂ॒ಡಲಂ॒ ತಪ॑ತಿ॒ ತತ್ರ॒ ತಾ ಋಚ॒ಸ್ತದೃ॒ಚಾ ಮಂ॑ಡಲ॒ಗ್ಂ॒ ಸ ಋ॒ಚಾಂ-ಲೋಁ॒ಕೋಽಥ॒ಯ ಏ॒ಷ ಏ॒ತಸ್ಮಿ॑ನ್ ಮಂ॒ಡಲೇ॒ಽರ್ಚಿ-ರ್ದೀ॒ಪ್ಯತೇ॒ ತಾನಿ॒ ಸಾಮಾ॑ನಿ॒ ಸ ಸಾ॒ಮ್ನಾಂ-ಲೋಁ॒ಕೋಽಥ॒ ಯ ಏ॒ಷ ಏ॒ತಸ್ಮಿ॑ನ್ ಮಂ॒ಡಲೇ॒ಽರ್ಚಿಷಿ॒ ಪುರು॑ಷ॒ಸ್ತಾನಿ॒ ಯಜೂಗ್ಂ॑ಷಿ॒ ಸ ಯಜು॑ಷಾ ಮಂಡಲ॒ಗ್ಂ॒ ಸ ಯಜು॑ಷಾಂ-ಲೋಁ॒ಕಃ ಸೈಷಾ ತ್ರ॒ಯ್ಯೇವ॑ ವಿ॒ದ್ಯಾ ತ॑ಪತಿ॒ ಯ ಏ॒ಷೋ᳚ಽಂತ-ರಾ॑ದಿ॒ತ್ಯೇ ಹಿ॑ರ॒ಣ್ಮಯಃ॒ ಪುರು॑ಷಃ ॥ 14.1 (ತೈ. ಅರ. 6.14.1)
ಆದಿತ್ಯಪುರುಷಸ್ಯ ಸರ್ವಾತ್ಮಕತ್ವ ಪ್ರದರ್ಶನಂ (4.16)
ಆ॒ದಿ॒ತ್ಯೋ ವೈ ತೇಜ॒ ಓಜೋ॒ ಬಲಂ॒-ಯಁಶ॒-ಶ್ಚಕ್ಷುಃ॒ ಶ್ರೋತ್ರ॑ಮಾ॒ತ್ಮಾ ಮನೋ॑ ಮ॒ನ್ಯು-ರ್ಮನು॑-ರ್ಮೃ॒ತ್ಯುಃ ಸ॒ತ್ಯೋ ಮಿ॒ತ್ರೋ ವಾ॒ಯುರಾ॑ಕಾ॒ಶಃ ಪ್ರಾ॒ಣೋ ಲೋ॑ಕಪಾ॒ಲಃ ಕಃ ಕಿಂ ಕಂ ತಥ್ ಸ॒ತ್ಯಮನ್ನ॑-ಮ॒ಮೃತಾ॑ ಜೀ॒ವೋ ವಿಶ್ವಃ॑ ಕತ॒ಮಃ ಸ್ವ॑ಯ॒ಭುಂ ಬ್ರಹ್ಮೈ॒ ತದಮೃ॑ತ ಏ॒ಷ ಪುರು॑ಷ ಏ॒ಷ ಭೂ॒ತಾನಾ॒-ಮಧಿ॑ಪತಿ॒-ರ್ಬ್ರಹ್ಮ॑ಣಃ॒ ಸಾಯು॑ಜ್ಯಗ್ಂ ಸಲೋ॒ಕತಾ॑-ಮಾಪ್ನೋ-ತ್ಯೇ॒ತಾಸಾ॑ಮೇ॒ವ ದೇ॒ವತಾ॑ನಾ॒ಗ್ಂ॒ ಸಾಯು॑ಜ್ಯಗ್ಂ ಸಾ॒ರ್ಷ್ಟಿತಾಗ್ಂ॑ ಸಮಾನ ಲೋ॒ಕತಾ॑-ಮಾಪ್ನೋತಿ॒ ಯ ಏ॒ವಂ-ವೇಁದೇ᳚ತ್ಯುಪ॒ನಿಷತ್ ॥ 15.1 (ತೈ. ಅರ. 6.15.1)
ಶಿವೋಪಾಸನ ಮಂತ್ರಾಃ (4.17)
ನಿಧ॑ನಪತಯೇ॒ ನಮಃ । ನಿಧ॑ನಪತಾಂತಿಕಾಯ॒ ನಮಃ ।
ಊರ್ಧ್ವಾಯ॒ ನಮಃ । ಊರ್ಧ್ವಲಿಂಗಾಯ॒ ನಮಃ ।
ಹಿರಣ್ಯಾಯ॒ ನಮಃ । ಹಿರಣ್ಯಲಿಂಗಾಯ॒ ನಮಃ ।
ಸುವರ್ಣಾಯ॒ ನಮಃ । ಸುವರ್ಣಲಿಂಗಾಯ॒ ನಮಃ ।
ದಿವ್ಯಾಯ॒ ನಮಃ । ದಿವ್ಯಲಿಂಗಾಯ॒ ನಮಃ । 16.1 (ತೈ. ಅರ. 6.16.1)
ಭವಾಯ॒ ನಮಃ । ಭವಲಿಂಗಾಯ॒ ನಮಃ ।
ಶರ್ವಾಯ॒ ನಮಃ । ಶರ್ವಲಿಂಗಾಯ॒ ನಮಃ ।
ಶಿವಾಯ॒ ನಮಃ । ಶಿವಲಿಂಗಾಯ॒ ನಮಃ ।
ಜ್ವಲಾಯ॒ ನಮಃ । ಜ್ವಲಲಿಂಗಾಯ॒ ನಮಃ ।
ಆತ್ಮಾಯ॒ ನಮಃ । ಆತ್ಮಲಿಂಗಾಯ॒ ನಮಃ ।
ಪರಮಾಯ॒ ನಮಃ । ಪರಮಲಿಂಗಾಯ॒ ನಮಃ ।
ಏತಥ್ಸೋಮಸ್ಯ॑ ಸೂರ್ಯ॒ಸ್ಯ॒ ಸರ್ವಲಿಂಗಗ್ಗ್॑ ಸ್ಥಾಪ॒ಯ॒ತಿ॒ ಪಾಣಿಮಂತ್ರಂ॑ ಪವಿ॒ತ್ರಮ್ ॥ 16.1 (ತೈ. ಅರ. 6.16.2)
ಪಶ್ಚಿಮವಕ್ತ್ರ ಪ್ರತಿಪಾದಕ ಮಂತ್ರಃ (4.18)
ತೈ. ಅರ. 6.17.1
ಸ॒ದ್ಯೋಜಾ॒ತಂ ಪ್ರ॑ಪದ್ಯಾ॒ಮಿ॒ ಸ॒ದ್ಯೋಜಾ॒ತಾಯ॒ ವೈ ನಮೋ॒ ನಮಃ॑ । ಭ॒ವೇ ಭ॑ವೇ॒ ನಾತಿ॑ಭವೇ ಭವಸ್ವ॒ ಮಾಮ್ । ಭ॒ವೋದ್ಭ॑ವಾಯ॒ ನಮಃ॑ ॥ 17.1
ಉತ್ತರ ವಕ್ತ್ರ ಪ್ರತಿಪಾದಕ ಮಂತ್ರಃ (4.19)
ವಾ॒ಮ॒ದೇ॒ವಾಯ॒ ನಮೋ᳚ ಜ್ಯೇ॒ಷ್ಠಾಯ॒ ನಮಃ॑ ಶ್ರೇ॒ಷ್ಠಾಯ॒ ನಮೋ॑ ರು॒ದ್ರಾಯ॒ ನಮಃ॒ ಕಾಲಾ॑ಯ॒ ನಮಃ॒ ಕಲ॑ವಿಕರಣಾಯ॒ ನಮೋ॒ ಬಲ॑ವಿಕರಣಾಯ॒ ನಮೋ॒ ಬಲಾ॑ಯ॒ ನಮೋ॒ ಬಲ॑ಪ್ರಮಥನಾಯ॒ ನಮಃ॒ ಸರ್ವ॑ಭೂತದಮನಾಯ॒ ನಮೋ॑ ಮ॒ನೋನ್ಮ॑ನಾಯ॒ ನಮಃ॑ ॥ 18.1 (ತೈ. ಅರ. 6.18.1)
ದಕ್ಷಿಣ ವಕ್ತ್ರ ಪ್ರತಿಪಾದಕ ಮಂತ್ರಃ (4.20)
ಅ॒ಘೋರೇ᳚ಭ್ಯೋಽಥ॒ ಘೋರೇ᳚ಭ್ಯೋ॒ ಘೋರ॒ಘೋರ॑ತರೇಭ್ಯಃ ।
ಸರ್ವೇ᳚ಭ್ಯಃ ಸರ್ವ॒ ಶರ್ವೇ᳚ಭ್ಯೋ॒ ನಮ॑ಸ್ತೇ ಅಸ್ತು ರು॒ದ್ರರೂ॑ಪೇಭ್ಯಃ ॥ 19.1 (ತೈ. ಅರ. 6.19.1)
ಪ್ರಾಗ್ವಕ್ತ್ರ ಪ್ರತಿಪಾದಕ ಮಂತ್ರಃ (4.21)
ತತ್ಪುರು॑ಷಾಯ ವಿ॒ದ್ಮಹೇ॑ ಮಹಾದೇ॒ವಾಯ॑ ಧೀಮಹಿ । ತನ್ನೋ॑ ರುದ್ರಃ ಪ್ರಚೋ॒ದಯಾ᳚ತ್ ॥ 20.1 (ತೈ. ಅರ. 6.20.1)
ಊರ್ಧ್ವ ವಕ್ತ್ರ ಪ್ರತಿಪಾದಕ ಮಂತ್ರಃ (4.22)
ಈಶಾನಃ ಸರ್ವ॑ವಿದ್ಯಾ॒ನಾ॒- ಮೀಶ್ವರಃ ಸರ್ವ॑ಭೂತಾ॒ನಾಂ॒ ಬ್ರಹ್ಮಾಧಿ॑ಪತಿ॒-ರ್ಬ್ರಹ್ಮ॒ಣೋಽಧಿ॑ಪತಿ॒-ರ್ಬ್ರಹ್ಮಾ॑ ಶಿ॒ವೋ ಮೇ॑ ಅಸ್ತು ಸದಾಶಿ॒ವೋಮ್ ॥ 21.1 (ತೈ. ಅರ. 6.21.1)
ನಮಸ್ಕಾರಾರ್ಥ ಮಂತ್ರಾಃ (4.23)
ನಮೋ ಹಿರಣ್ಯಬಾಹವೇ ಹಿರಣ್ಯವರ್ಣಾಯ ಹಿರಣ್ಯರೂಪಾಯ ಹಿರಣ್ಯಪತಯೇ ಽಬಿಂಕಾಪತಯ ಉಮಾಪತಯೇ ಪಶುಪತಯೇ॑ ನಮೋ॒ ನಮಃ ॥ 22.1 (ತೈ. ಅರ. 6.22.1)
ಋ॒ತಗ್ಂ ಸ॒ತ್ಯಂ ಪ॑ರಂ ಬ್ರ॒ಹ್ಮ॒ ಪು॒ರುಷಂ॑ ಕೃಷ್ಣ॒ಪಿಂಗ॑ಲಮ್ । ಊ॒ರ್ಧ್ವರೇ॑ತಂ-ವಿಁ॑ರೂಪಾ॒ಕ್ಷಂ॒-ವಿಁ॒ಶ್ವರೂ॑ಪಾಯ॒ ವೈ ನಮೋ॒ ನಮಃ॑ ॥ 23.1 (ತೈ. ಅರ. 6.23.1)
ಸರ್ವೋ॒ ವೈ ರು॒ದ್ರಸ್ತಸ್ಮೈ॑ ರು॒ದ್ರಾಯ॒ ನಮೋ॑ ಅಸ್ತು । ಪುರು॑ಷೋ॒ ವೈ ರು॒ದ್ರಃ ಸನ್ಮ॒ಹೋ ನಮೋ॒ ನಮಃ॑ । ವಿಶ್ವಂ॑ ಭೂ॒ತಂ ಭುವ॑ನಂ ಚಿ॒ತ್ರಂ ಬ॑ಹು॒ಧಾ ಜಾ॒ತಂ ಜಾಯ॑ಮಾನಂ ಚ॒ ಯತ್ । ಸರ್ವೋ॒ ಹ್ಯೇ॑ಷ ರು॒ದ್ರಸ್ತಸ್ಮೈ॑ ರು॒ದ್ರಾಯ॒ ನಮೋ॑ ಅಸ್ತು ॥ 24.1 (ತೈ. ಅರ. 6.24.1)
ಕದ್ರು॒ದ್ರಾಯ॒ ಪ್ರಚೇ॑ತಸೇ ಮೀ॒ಢುಷ್ಟ॑ಮಾಯ॒ ತವ್ಯ॑ಸೇ । ವೋ॒ಚೇಮ॒ ಶಂತ॑ಮಗ್ಂ ಹೃ॒ದೇ ॥ ಸರ್ವೋ॒ಹ್ಯೇ॑ಷ ರು॒ದ್ರಸ್ತಸ್ಮೈ॑ ರು॒ದ್ರಾಯ॒ ನಮೋ॑ ಅಸ್ತು ॥ 25.1 (ತೈ. ಅರ. 6.25.1)
ಅಗ್ನಿಹೋತ್ರ ಹವಣ್ಯಾಃ ಉಪಯುಕ್ತಸ್ಯ ವೃಕ್ಷ ವಿಶೇಷ-ಸ್ಯಾಭಿಧಾನಂ (4.24-25)
ಯಸ್ಯ॒ ವೈ ಕಂ॑ಕತ್ಯಗ್ನಿ-ಹೋತ್ರ॒ಹವ॑ಣೀ ಭವತಿ॒ ಪ್ರತ್ಯೇ॒ವಾ-ಸ್ಯಾಹು॑ತಯ-ಸ್ತಿಷ್ಠಂ॒ತ್ಯಥೋ॒ ಪ್ರತಿ॑ಷ್ಠಿತ್ಯೈ ॥ 26.1 (ತೈ. ಅರ. 6.26.1)
ಭೂದೇವತಾಕ ಮಂತ್ರಃ (4.26)
ಅದಿ॑ತಿ-ರ್ದೇ॒ವಾ ಗಂ॑ಧ॒ರ್ವಾ ಮ॑ನು॒ಷ್ಯಾಃ᳚ ಪಿ॒ತರೋ-ಽಸು॑ರಾ॒-ಸ್ತೇಷಾಗ್ಂ॑ ಸರ್ವ ಭೂ॒ತಾನಾಂ᳚ ಮಾ॒ತಾ ಮೇ॒ದಿನೀ॑ ಮಹ॒ತಾ ಮ॒ಹೀ ಸಾ॑ವಿ॒ತ್ರೀ ಗಾ॑ಯ॒ತ್ರೀ ಜಗ॑ತ್ಯು॒ರ್ವೀ ಪೃ॒ಥ್ವೀ ಬ॑ಹು॒ಲಾ ವಿಶ್ವಾ॑ ಭೂ॒ತಾ ಕ॑ತ॒ಮಾ ಕಾಯಾ ಸಾ ಸ॒ತ್ಯೇ-ತ್ಯ॒ಮೃತೇತಿ॑ ವಸಿ॒ಷ್ಠಃ ॥ 28.1 (ತೈ. ಅರ. 6.28.1)
ಸರ್ವಾ ದೇವತಾ ಆಪಃ (4.27)
ಆಪೋ॒ ವಾ ಇ॒ದಗ್ಂ ಸರ್ವಂ॒-ವಿಁಶ್ವಾ॑ ಭೂ॒ತಾನ್ಯಾಪಃ॑ ಪ್ರಾ॒ಣಾ ವಾ ಆಪಃ॑ ಪ॒ಶವ॒ ಆಪೋಽನ್ನ॒ಮಾಪೋ -ಽಮೃ॑ತ॒ಮಾಪಃ॑ ಸ॒ಮ್ರಾಡಾಪೋ॑ ವಿ॒ರಾಡಾಪಃ॑ ಸ್ವ॒ರಾಡಾಪಃ॒
ಛಂದಾ॒ಗ್ಗ್॒ಸ್ಯಾಪೋ॒ ಜ್ಯೋತೀ॒ಗ್ಗ್॒ಷ್ಯಾಪೋ॒ ಯಜೂ॒ಗ್ಗ್॒ಷ್ಯಾಪಃ॑ ಸ॒ತ್ಯಮಾಪಃ॒ ಸರ್ವಾ॑
ದೇ॒ವತಾ॒ ಆಪೋ॒ ಭೂರ್ಭುವ॒ಸ್ಸುವ॒ರಾಪ॒ ಓಮ್ ॥ 29.1 (ತೈ. ಅರ. 6.29.1)
ಸಂಧ್ಯಾವಂದನ ಮಂತ್ರಾಃ (4.28)
ಆಪಃ॑ ಪುನಂತು ಪೃಥಿ॒ವೀಂ ಪೃ॑ಥಿ॒ವೀ ಪೂ॒ತಾ ಪು॑ನಾತು॒ ಮಾಮ್ । ಪು॒ನಂತು॒ ಬ್ರಹ್ಮ॑ಣ॒ಸ್ಪತಿ॒-ರ್ಬ್ರಹ್ಮ॑ ಪೂ॒ತಾ ಪು॑ನಾತು॒ ಮಾಮ್ । ಯದುಚ್ಛಿ॑ಷ್ಟ॒-ಮಭೋ᳚ಜ್ಯಂ॒-ಯಁದ್ವಾ॑ ದು॒ಶ್ಚರಿ॑ತಂ॒ ಮಮ॑ । ಸರ್ವಂ॑ ಪುನಂತು॒ ಮಾಮಾಪೋ॑-ಽಸ॒ತಾಂಚ॑ ಪ್ರತಿ॒ಗ್ರಹ॒ಗ್ಗ್॒ ಸ್ವಾಹಾ᳚ ॥ 30.2 (ತೈ. ಅರ. 6.30.1)
ಅಗ್ನಿಶ್ಚ ಮಾ ಮನ್ಯುಶ್ಚ ಮನ್ಯುಪತಯಶ್ಚ ಮನ್ಯು॑ಕೃತೇ॒ಭ್ಯಃ । ಪಾಪೇಭ್ಯೋ॑ ರಕ್ಷಂ॒ತಾಮ್ । ಯದಹ್ನಾ ಪಾಪ॑ಮಕಾ॒ರ್॒ಷಮ್ । ಮನಸಾ ವಾಚಾ॑ ಹಸ್ತಾ॒ಭ್ಯಾಮ್ । ಪದ್ಭ್ಯಾ-ಮುದರೇ॑ಣ ಶಿ॒ಶ್ನಾ । ಅಹ॒ಸ್ತದ॑ವಲು॒ಪಂತು । ಯತ್ಕಿಂಚ॑ ದುರಿ॒ತಂ ಮಯಿ॑ । ಇದಮಹ-ಮಾಮಮೃ॑ತ ಯೋ॒ನೌ । ಸತ್ಯೇ ಜ್ಯೋತಿಷಿ ಜುಹೋ॑ಮಿ ಸ್ವಾ॒ಹಾ ॥ 31.1 (ತೈ. ಅರ. 6.31.1)
ಸೂರ್ಯಶ್ಚ ಮಾ ಮನ್ಯುಶ್ಚ ಮನ್ಯುಪತಯಶ್ಚ ಮನ್ಯು॑ಕೃತೇ॒ಭ್ಯಃ । ಪಾಪೇಭ್ಯೋ॑ ರಕ್ಷಂ॒ತಾಮ್ । ಯದ್ರಾತ್ರಿಯಾ ಪಾಪ॑ಮಕಾ॒ರ್॒ಷಮ್ । ಮನಸಾ ವಾಚಾ॑ ಹಸ್ತಾ॒ಭ್ಯಾಮ್ । ಪದ್ಭ್ಯಾ-ಮುದರೇ॑ಣ ಶಿ॒ಶ್ನಾ । ರಾತ್ರಿ॒-ಸ್ತದ॑ವಲು॒ಪಂತು । ಯತ್ಕಿಂಚ॑ ದುರಿ॒ತಂ ಮಯಿ॑ । ಇದಮಹ-ಮಾಮಮೃ॑ತ ಯೋ॒ನೌ । ಸೂರ್ಯೇ ಜ್ಯೋತಿಷಿ ಜುಹೋ॑ಮಿ ಸ್ವಾ॒ಹಾ ॥ 32.1 (ತೈ. ಅರ. 6.32.1)
ಪ್ರಣವಸ್ಯ ಋಷ್ಯಾದಿ ವಿವರಣಂ (4.29)
ಓಮಿತ್ಯೇಕಾಕ್ಷ॑ರಂ ಬ್ರ॒ಹ್ಮ । ಅಗ್ನಿರ್ದೇವತಾ ಬ್ರಹ್ಮ॑ ಇತ್ಯಾ॒ರ್ಷಮ್ । ಗಾಯತ್ರಂ ಛಂದಂ ಪರಮಾತ್ಮಂ॑ ಸರೂ॒ಪಮ್ । ಸಾಯುಜ್ಯಂ-ವಿಁ॑ನಿಯೋ॒ಗಮ್ ॥ 33.1 (ತೈ. ಅರ. 6.33.1)
ಗಾಯತ್ರ್ಯಾವಾಹನ ಮಂತ್ರಾಃ (4.30)
ಆಯಾ॑ತು॒ ವರ॑ದಾ ದೇ॒ವೀ॒ ಅ॒ಕ್ಷರಂ॑ ಬ್ರಹ್ಮ॒ ಸಂಮಿ॑ತಮ್ । ಗಾ॒ಯ॒ತ್ರೀಂ᳚ ಛಂದ॑ಸಾಂ ಮಾ॒ತೇದಂ ಬ್ರ॑ಹ್ಮ ಜು॒ಷಸ್ವ॑ ಮೇ । ಯದಹ್ನಾ᳚ತ್ ಕುರು॑ತೇ ಪಾ॒ಪಂ॒ ತದಹ್ನಾ᳚ತ್ ಪ್ರತಿ॒ಮುಚ್ಯ॑ತೇ । ಯ-ದ್ರಾತ್ರಿಯಾ᳚ತ್ ಕುರು॑ತೇ ಪಾ॒ಪಂ॒ ತ-ದ್ರಾತ್ರಿಯಾ᳚ತ್ ಪ್ರತಿ॒ಮುಚ್ಯ॑ತೇ । ಸರ್ವ॑ ವ॒ರ್ಣೇ ಮ॑ಹಾದೇ॒ವಿ॒ ಸಂ॒ಧ್ಯಾ ವಿ॑ದ್ಯೇ ಸ॒ರಸ್ವ॑ತಿ ॥ 34.2 (ತೈ. ಅರ. 6.34.1)
ಓಜೋ॑ಽಸಿ॒ ಸಹೋ॑ಽಸಿ॒ ಬಲ॑ಮಸಿ॒ ಭ್ರಾಜೋ॑ಽಸಿ ದೇ॒ವಾನಾಂ॒ ಧಾಮ॒ನಾಮಾ॑॑ಽಸಿ॒ ವಿಶ್ವ॑ಮಸಿ ವಿ॒ಶ್ವಾಯುಃ॒ ಸರ್ವ॑ಮಸಿ ಸ॒ರ್ವಾಯು-ರಭಿಭೂರೋಂ-ಗಾಯತ್ರೀ-ಮಾವಾ॑ಹಯಾ॒ಮಿ॒ ಸಾವಿತ್ರೀ-ಮಾವಾ॑ಹಯಾ॒ಮಿ॒ ಸರಸ್ವತೀ-ಮಾವಾ॑ಹಯಾ॒ಮಿ॒ ಛಂದರ್ಷೀ-ನಾವಾ॑ಹಯಾ॒ಮಿ॒ ಶ್ರಿಯ-ಮಾವಾ॑ಹಯಾ॒ಮಿ॒ ಗಾಯತ್ರಿಯಾ ಗಾಯತ್ರೀ ಛಂದೋ ವಿಶ್ವಾಮಿತ್ರ ಋಷಿಃ ಸವಿತಾ ದೇವತಾಽಗ್ನಿರ್ಮುಖಂ ಬ್ರಹ್ಮಾ ಶಿರೋ ವಿಷ್ಣುರ್ಹೃದಯಗ್ಂ ರುದ್ರಃ ಶಿಖಾ ಪೃಥಿವೀಯೋನಿಃ ಪ್ರಾಣಾಪಾನ-ವ್ಯಾನೋದಾನ-ಸಮಾನಾ ಸಪ್ರಾಣಾ ಶ್ವೇತವರ್ಣಾ ಸಾಂಖ್ಯಾಯನ-ಸಗೋತ್ರಾ ಗಾಯತ್ರೀ ಚತುರ್ವಿಗ್ಂಶತ್ಯಕ್ಷರಾ ತ್ರಿಪದಾ॑ ಷಟ್ಕು॒ಕ್ಷಿಃ॒ ಪಂಚ ಶೀರ್ಷೋಪನಯನೇ ವಿ॑ನಿಯೋ॒ಗ॒, ಓಂ ಭೂಃ । ಓಂ ಭುವಃ । ಓಗ್ಂ ಸುವಃ । ಓಂ ಮಹಃ । ಓಂ ಜನಃ । ಓಂ ತಪಃ । ಓಗ್ಂ ಸ॒ತ್ಯಮ್ । ಓಂ ತಥ್ ಸ॑ವಿ॒ತುರ್ವರೇ᳚ಣ್ಯಂ॒ ಭರ್ಗೋ॑ ದೇ॒ವಸ್ಯ॑ ಧೀಮಹಿ । ಧಿಯೋ॒ ಯೋ ನಃ॑ ಪ್ರಚೋ॒ದಯಾ᳚ತ್ । ಓಮಾಪೋ॒ ಜ್ಯೋತೀ॒ ರಸೋ॒ಽಮೃತಂ॒ ಬ್ರಹ್ಮ॒ ಭೂರ್ಭುವ॒ಸ್ಸುವ॒ರೋಮ್ ॥ 35.2 (ತೈ. ಅರ. 6.35.1)
ಗಾಯತ್ರೀ ಉಪಸ್ಥಾನ ಮಂತ್ರಾಃ (4.31)
ಉ॒ತ್ತಮೇ॑ ಶಿಖ॑ರೇ ಜಾ॒ತೇ॒ ಭೂ॒ಮ್ಯಾಂ ಪ॑ರ್ವತ॒ ಮೂರ್ಧ॑ನಿ । ಬ್ರಾ॒ಹ್ಮಣೇ᳚ಭ್ಯೋ-ಽಭ್ಯ॑ನುಜ್ಞಾ॒ತಾ॒ ಗ॒ಚ್ಛ ದೇ॑ವಿ ಯ॒ಥಾಸು॑ಖಮ್ । ಸ್ತುತೋ ಮಯಾ ವರದಾ ವೇ॑ದಮಾ॒ತಾ॒ ಪ್ರಚೋದಯಂತೀ ಪವನೇ᳚ ದ್ವಿಜಾ॒ತಾ । ಆಯುಃ ಪೃಥಿವ್ಯಾಂ-ದ್ರವಿಣಂ ಬ್ರ॑ಹ್ಮವ॒ರ್ಚ॒ಸಂ॒ ಮಹ್ಯಂ ದತ್ವಾ ಪ್ರಜಾತುಂ ಬ್ರ॑ಹ್ಮಲೋ॒ಕಮ್ ॥ 36.2 (ತೈ. ಅರ. 6.36.1)
ಆದಿತ್ಯದೇವತಾ ಮಂತ್ರಃ (4.32)
ಘೃಣಿಃ॒ ಸೂರ್ಯ॑ ಆದಿ॒ತ್ಯೋ ನ ಪ್ರಭಾ॑-ವಾ॒ತ್ಯಕ್ಷ॑ರಮ್ । ಮಧು॑ಕ್ಷರಂತಿ॒ ತ-ದ್ರ॑ಸಮ್ । ಸ॒ತ್ಯಂ-ವೈಁ ತ-ದ್ರಸ॒-ಮಾಪೋ॒ ಜ್ಯೋತೀ॒ರಸೋ॒ಽಮೃತಂ॒ ಬ್ರಹ್ಮ॒ ಭೂರ್ಭುವ॒ಸ್ಸುವ॒ರೋಮ್ ॥ 37.1 (ತೈ. ಅರ. 6.37.1)
ತ್ರಿಸುಪರ್ಣಮಂತ್ರಾಃ (4.33)
ಬ್ರಹ್ಮ॑ ಮೇತು॒ ಮಾಮ್ । ಮಧು॑ ಮೇತು॒ ಮಾಮ್ । ಬ್ರಹ್ಮ॑-ಮೇ॒ವ ಮಧು॑ ಮೇತು॒ ಮಾಮ್ । ಯಾಸ್ತೇ॑ ಸೋಮ ಪ್ರ॒ಜಾವ॒ಥ್ಸೋ-ಽಭಿ॒ಸೋ ಅ॒ಹಮ್ । ದುಃಷ್ವ॑ಪ್ನ॒ಹನ್ ದು॑ರುಷ್ವಹ । ಯಾಸ್ತೇ॑ ಸೋಮ ಪ್ರಾ॒ಣಾಗ್ಗ್ಸ್ತಾಂ ಜು॑ಹೋಮಿ । ತ್ರಿಸು॑ಪರ್ಣ॒ ಮಯಾ॑ಚಿತಂ ಬ್ರಾಹ್ಮ॒ಣಾಯ॑ ದದ್ಯಾತ್ । ಬ್ರ॒ಹ್ಮ॒ಹ॒ತ್ಯಾಂ-ವಾಁ ಏ॒ತೇ ಘ್ನಂ॑ತಿ । ಯೇ ಬ್ರಾ᳚ಹ್ಮ॒ಣಾ-ಸ್ತ್ರಿಸು॑ಪರ್ಣಂ॒ ಪಠಂ॑ತಿ । ತೇ ಸೋಮಂ॒ ಪ್ರಾಪ್ನು॑ವಂತಿ । ಆ॒ಸ॒ಹ॒ಸ್ರಾತ್ ಪ॒ಕ್ತಿಂ ಪುನಂ॑ತಿ । ಓಮ್ ॥ 38.1 (ತೈ. ಅರ. 6.38.1)
ಬ್ರಹ್ಮ॑ ಮೇ॒ಧಯಾ᳚ । ಮಧು॑ ಮೇ॒ಧಯಾ᳚ । ಬ್ರಹ್ಮ॑ಮೇ॒ವ ಮಧು॑ ಮೇ॒ಧಯಾ᳚ । ಅ॒ದ್ಯಾ ನೋ॑ ದೇವ ಸವಿತಃ ಪ್ರ॒ಜಾವ॑ಥ್ಸಾವೀಃ॒ ಸೌಭ॑ಗಮ್ । ಪರಾ॑ ದುಃ॒ಷ್ವಪ್ನಿ॑ಯಗ್ಂ ಸುವ । ವಿಶ್ವಾ॑ನಿ ದೇವ ಸವಿತ-ರ್ದುರಿ॒ತಾನಿ॒ ಪರಾ॑ಸುವ । ಯ-ದ್ಭ॒ದ್ರಂ ತನ್ಮ॒ ಆಸು॑ವ । ಮಧು॒ವಾತಾ॑ ಋತಾಯ॒ತೇ ಮಧು॑ಕ್ಷರಂತಿ॒ ಸಿಂಧ॑ವಃ । ಮಾದ್ಧ್ವೀ᳚ರ್ನಃ ಸಂ॒ತ್ವೋಷ॑ಧೀಃ । ಮಧು॒ನಕ್ತ॑ ಮು॒ತೋಷಸಿ॒ ಮಧು॑ಮ॒ತ್ ಪಾರ್ಥಿ॑ವ॒ಗ್ಂ॒ ರಜಃ॑ । ಮಧು॒ದ್ಯೌರ॑ಸ್ತು ನಃ ಪಿ॒ತಾ । ಮಧು॑ಮಾನ್ನೋ॒ ವನ॒ಸ್ಪತಿ॒-ರ್ಮಧು॑ಮಾಗ್ಂ ಅಸ್ತು॒ ಸೂರ್ಯಃ॑ । ಮಾದ್ಧ್ವೀ॒ ರ್ಗಾವೋ॑ ಭವಂತು ನಃ । ಯ ಇ॒ಮಂ ತ್ರಿಸು॑ಪರ್ಣ॒-ಮಯಾ॑ಚಿತಂ ಬ್ರಾಹ್ಮ॒ಣಾಯ॑ ದದ್ಯಾತ್ । ಭ್ರೂ॒ಣ॒ಹ॒ತ್ಯಾಂ-ವಾಁ ಏ॒ತೇ ಘ್ನಂ॑ತಿ । ಯೇ ಬ್ರಾ᳚ಹ್ಮ॒ಣಾ-ಸ್ತ್ರಿಸು॑ಪರ್ಣಂ॒ ಪಠಂ॑ತಿ । ತೇ ಸೋಮಂ॒ ಪ್ರಾಪ್ನು॑ವಂತಿ । ಆ॒ಸ॒ಹ॒ಸ್ರಾತ್ ಪ॒ಕ್ತಿಂ ಪುನಂ॑ತಿ । ಓಮ್ ॥ 39.7 (ತೈ. ಅರ. 6.39.1)
ಬ್ರಹ್ಮ॑ ಮೇ॒ಧವಾ᳚ । ಮಧು॑ ಮೇ॒ಧವಾ᳚ । ಬ್ರಹ್ಮ॑ಮೇ॒ವ ಮಧು॑ ಮೇ॒ಧವಾ᳚ । ಬ್ರ॒ಹ್ಮಾ ದೇ॒ವಾನಾಂ᳚ ಪದ॒ವೀಃ ಕ॑ವೀ॒ನಾ-ಮೃಷಿ॒-ರ್ವಿಪ್ರಾ॑ಣಾಂ ಮಹಿ॒ಷೋ ಮೃ॒ಗಾಣಾ᳚ಮ್ । ಶ್ಯೇ॒ನೋ ಗೃದ್ಧ್ರಾ॑ಣಾ॒ಗ್ಗ್॒ ಸ್ವಧಿ॑ತಿ॒-ರ್ವನಾ॑ನಾ॒ಗ್ಂ॒ ಸೋಮಃ॑ ಪ॒ವಿತ್ರ॒-ಮತ್ಯೇ॑ತಿ॒ ರೇಭನ್ನ್॑ । ಹ॒ಗ್ಂ॒ಸಃ ಶು॑ಚಿ॒ಷ-ದ್ವಸು॑ರಂತರಿಕ್ಷ॒ ಸದ್ಧೋತಾ॑- ವೇದಿ॒ಷ-ದತಿ॑ಥಿ-ರ್ದುರೋಣ॒ಸತ್ । ನೃ॒ಷದ್ವ॑ರ॒-ಸದೃ॑ತ॒-ಸ-ದ್ವ್ಯೋ॑ಮ॒-ಸದ॒ಬ್ಜಾ- ಗೋ॒ಜಾ ಋ॑ತ॒ಜಾ ಅ॑ದ್ರಿ॒ಜಾ ಋ॒ತಂ ಬೃ॒ಹತ್ । ಋ॒ಚೇತ್ವಾ॑ ರು॒ಚೇತ್ವಾ॒ ಸಮಿಥ್ ಸ್ರ॑ವಂತಿ ಸ॒ರಿತೋ॒ ನ ಧೇನಾಃ᳚ । ಅಂ॒ತ-ರ್ಹೃ॒ದಾ ಮನ॑ಸಾ ಪೂ॒ಯಮಾ॑ನಾಃ । ಘೃ॒ತಸ್ಯ॒ ಧಾರಾ॑ ಅ॒ಭಿಚಾ॑ಕಶೀಮಿ । ಹಿ॒ರ॒ಣ್ಯಯೋ॑ ವೇತ॒ಸೋ ಮದ್ಧ್ಯ॑ ಆಸಾಮ್ । ತಸ್ಮಿಂ᳚ಥ್ ಸುಪ॒ರ್ಣೋ ಮ॑ಧು॒ಕೃತ್ ಕು॑ಲಾ॒ಯೀ ಭಜ॑ನ್ನಾಸ್ತೇ॒ ಮಧು॑ ದೇ॒ವತಾ᳚ಭ್ಯಃ । ತಸ್ಯಾ॑ ಸತೇ॒ ಹರ॑ಯಃ ಸ॒ಪ್ತತೀರೇ᳚ ಸ್ವ॒ಧಾಂ ದುಹಾ॑ನಾ ಅ॒ಮೃತ॑ಸ್ಯ॒ ಧಾರಾ᳚ಮ್ । ಯ ಇ॒ದಂ ತ್ರಿಸು॑ಪರ್ಣ॒-ಮಯಾ॑ಚಿತಂ ಬ್ರಾಹ್ಮ॒ಣಾಯ॑ ದದ್ಯಾತ್ । ವೀ॒ರ॒ಹ॒ತ್ಯಾಂ-ವಾಁ ಏ॒ತೇ ಘ್ನಂ॑ತಿ । ಯೇ ಬ್ರಾ᳚ಹ್ಮ॒ಣಾ-ಸ್ತ್ರಿಸು॑ಪರ್ಣಂ॒ ಪಠಂ॑ತಿ । ತೇ ಸೋಮಂ॒ ಪ್ರಾಪ್ನು॑ವಂತಿ । ಆ॒ಸ॒ಹ॒ಸ್ರಾತ್ ಪಂ॒ಕ್ತಿಂ ಪುನಂ॑ತಿ । ಓಮ್ ॥ 40.6 (ತೈ. ಅರ. 6.40.1)
ಮೇಧಾ ಸೂಕ್ತಂ (4.34)
ಮೇ॒ಧಾದೇ॒ವೀ ಜು॒ಷಮಾ॑ಣಾ ನ॒ ಆಗಾ᳚-ದ್ವಿ॒ಶ್ವಾಚೀ॑ ಭ॒ದ್ರಾ ಸು॑ಮನ॒ಸ್ಯ ಮಾ॑ನಾ । ತ್ವಯಾ॒ ಜುಷ್ಟಾ॑ ನು॒ದಮಾ॑ನಾ ದು॒ರುಕ್ತಾ᳚ನ್ ಬೃ॒ಹದ್ವ॑ದೇಮ ವಿ॒ದಥೇ॑ ಸು॒ವೀರಾಃ᳚ । ತ್ವಯಾ॒ ಜುಷ್ಟ॑ ಋ॒ಷಿ-ರ್ಭ॑ವತಿ ದೇವಿ॒ ತ್ವಯಾ॒ ಬ್ರಹ್ಮಾ॑ಽಽಗ॒ತಶ್ರೀ॑ ರು॒ತ ತ್ವಯಾ᳚ । ತ್ವಯಾ॒ ಜುಷ್ಟ॑ಶ್ಚಿ॒ತ್ರಂ-ವಿಁಂ॑ದತೇ ವಸು॒ ಸಾ ನೋ॑ ಜುಷಸ್ವ॒ ದ್ರವಿ॑ಣೋ ನಮೇಧೇ ॥ 41.1 (ತೈ. ಅರ. 6.41.1)
ಮೇ॒ಧಾಂ ಮ॒ ಇಂದ್ರೋ॑ ದದಾತು ಮೇ॒ಧಾಂ ದೇ॒ವೀ ಸರ॑ಸ್ವತೀ । ಮೇ॒ಧಾಂ ಮೇ॑ ಅ॒ಶ್ವಿನಾ॑-ವು॒ಭಾವಾಧ॑ತ್ತಾಂ॒ ಪುಷ್ಕ॑ರಸ್ರಜಾ ॥ ಅ॒ಫ್ಸ॒ರಾಸು॑ ಚ॒ ಯಾ ಮೇ॒ಧಾ ಗಂ॑ಧ॒ರ್ವೇಷು॑ ಚ॒ ಯನ್ಮನಃ॑ । ದೈವೀಂ᳚ ಮೇ॒ಧಾ ಸರ॑ಸ್ವತೀ॒ ಸಾ ಮಾಂ᳚ ಮೇ॒ಧಾ ಸು॒ರಭಿ॑-ರ್ಜುಷತಾ॒ಗ್ಗ್॒ ಸ್ವಾಹಾ᳚ ॥ 42.1 (ತೈ. ಅರ. 6.42.1)
ಆಮಾಂ᳚ ಮೇ॒ಧಾ ಸು॒ರಭಿ॑-ರ್ವಿ॒ಶ್ವರೂ॑ಪಾ॒ ಹಿರ॑ಣ್ಯವರ್ಣಾ॒ ಜಗ॑ತೀ ಜಗ॒ಮ್ಯಾ । ಊರ್ಜ॑ಸ್ವತೀ॒ ಪಯ॑ಸಾ॒ ಪಿನ್ವ॑ಮಾನಾ॒ ಸಾ ಮಾಂ᳚ ಮೇ॒ಧಾ ಸು॒ಪ್ರತೀ॑ಕಾ ಜುಷಂತಾಮ್ ॥ 43.1 (ತೈ. ಅರ. 6.43.1)
ಮಯಿ॑ ಮೇ॒ಧಾಂ ಮಯಿ॑ ಪ್ರ॒ಜಾಂ ಮಯ್ಯ॒ಗ್ನಿಸ್ತೇಜೋ॑ ದಧಾತು॒ ಮಯಿ॑ ಮೇ॒ಧಾಂ ಮಯಿ॑ ಪ್ರ॒ಜಾಂ ಮಯೀಂದ್ರ॑ ಇಂದ್ರಿ॒ಯಂ ದ॑ಧಾತು॒ ಮಯಿ॑ ಮೇ॒ಧಾಂ ಮಯಿ॑ ಪ್ರ॒ಜಾಂ ಮಯಿ॒ ಸೂರ್ಯೋ॒ ಭ್ರಾಜೋ॑ ದಧಾತು ॥ 44.1 (ತೈ. ಅರ. 6.44.1)
ಮೃತ್ಯುನಿವಾರಣ ಮಂತ್ರಾಃ (4.35)
ಅಪೈ॑ತು ಮೃ॒ತ್ಯು-ರ॒ಮೃತ॑ನ್ನ॒ ಆಗ॑ನ್. ವೈವಸ್ವ॒ತೋ ನೋ॒ ಅಭ॑ಯಂಕೃಣೋತು । ಪ॒ರ್ಣಂ-ವಁನ॒ಸ್ಪತೇ॑ ರಿವಾ॒ಭಿನಃ॑ ಶೀಯತಾಗ್ಂ ರ॒ಯಿಃ ಸಚ॑ತಾನ್ನಃ॒ ಶಚೀ॒ಪತಿಃ॑ ॥ 45.1 (ತೈ. ಅರ. 6.45.1)
ಪರಂ॑ ಮೃತ್ಯೋ॒ ಅನು॒ ಪರೇ॑ಹಿ॒ ಪಂಥಾಂ॒-ಯಁಸ್ತೇ॒ಸ್ವ ಇತ॑ರೋ ದೇವ॒ಯಾನಾ᳚ತ್ । ಚಕ್ಷು॑ಷ್ಮತೇ ಶೃಣ್ವ॒ತೇ ತೇ᳚ ಬ್ರವೀಮಿ॒ ಮಾನಃ॑ ಪ್ರ॒ಜಾಗ್ಂ ರೀ॑ರಿಷೋ॒ ಮೋತ ವೀ॒ರಾನ್ ॥ 46.1 (ತೈ. ಅರ. 6.46.1)
ವಾತಂ॑ ಪ್ರಾ॒ಣಂ ಮನ॑ಸಾ॒ ನ್ವಾರ॑ಭಾಮಹೇ ಪ್ರ॒ಜಾಪ॑ತಿಂ॒-ಯೋಁ ಭುವ॑ನಸ್ಯ ಗೋ॒ಪಾಃ । ಸನೋ॑ ಮೃ॒ತ್ಯೋ ಸ್ತ್ರಾ॑ಯತಾಂ॒ ಪಾತ್ವಗ್ಂಹ॑ಸೋ॒ ಜ್ಯೋಗ್ ಜೀ॒ವಾ ಜ॒ರಾಮ॑ಶೀಮಹಿ ॥ 47.1 (ತೈ. ಅರ. 6.47.1)
ಅ॒ಮು॒ತ್ರ॒ ಭೂಯಾ॒ದಧ॒ ಯದ್ಯ॒ಮಸ್ಯ॒ ಬೃಹ॑ಸ್ಪತೇ ಅ॒ಭಿಶ॑ಸ್ತೇ॒ರ ಮುಂ॑ಚಃ । ಪ್ರತ್ಯೌ॑ಹತಾ ಮ॒ಶ್ವಿನಾ॑ ಮೃ॒ತ್ಯು ಮ॑ಸ್ಮಾ-ದ್ದೇ॒ವಾನಾ॑ಮಗ್ನೇ ಭಿ॒ಷಜಾ॒ ಶಚೀ॑ಭಿಃ ॥ 48.1 (ತೈ. ಅರ. 6.48.1)
ಹರಿ॒ಗ್ಂ॒ ಹರಂ॑ತ॒- ಮನು॑ಯಂತಿ ದೇ॒ವಾ ವಿಶ್ವ॒ಸ್ಯೇಶಾ॑ನಂ-ವೃಁಷ॒ಭಂ ಮ॑ತೀ॒ನಾಮ್ । ಬ್ರಹ್ಮ॒ ಸರೂ॑ಪ॒-ಮನು॑ಮೇ॒ದಮಾ॑ಗಾ॒-ದಯ॑ನಂ॒ ಮಾ ವಿವ॑ಧೀ॒-ರ್ವಿಕ್ರ॑ಮಸ್ವ ॥ 49.1 (ತೈ. ಅರ. 6.49.1)
ಶಲ್ಕೈ॑ರ॒ಗ್ನಿ-ಮಿಂ॑ಧಾ॒ನ ಉ॒ಭೌ ಲೋ॒ಕೌ ಸ॑ನೇಮ॒ಹಮ್ । ಉ॒ಭಯೋ᳚ ರ್ಲೋ॒ಕಯಾ॑-ರ್ಋ॒ಧ್ದ್ವಾಽತಿ॑ ಮೃ॒ತ್ಯುಂ ತ॑ರಾಮ್ಯ॒ಹಮ್ ॥ 50.1 (ತೈ. ಅರ. 6.50.1)
ಮಾ ಛಿ॑ದೋ ಮೃತ್ಯೋ॒ ಮಾ ವ॑ಧೀ॒ರ್ಮಾ ಮೇ॒ ಬಲಂ॒-ವಿಁವೃ॑ಹೋ॒ ಮಾ ಪ್ರಮೋ॑ಷೀಃ । ಪ್ರ॒ಜಾಂ ಮಾ ಮೇ॑ ರೀರಿಷ॒ ಆಯು॑ರುಗ್ರ ನೃ॒ಚಕ್ಷ॑ಸಂ ತ್ವಾ ಹ॒ವಿಷಾ॑ ವಿಧೇಮ ॥ 51.1 (ತೈ. ಅರ. 6.51.1)
ಮಾ ನೋ॑ ಮ॒ಹಾಂತ॑ಮು॒ತ ಮಾ ನೋ॑ ಅರ್ಭ॒ಕಂ ಮಾ ನ॒ ಉಕ್ಷಂ॑ತಮು॒ತ ಮಾ ನ॑ ಉಕ್ಷಿ॒ತಮ್ । ಮಾ ನೋ॑ ವಧೀಃ ಪಿ॒ತರಂ॒ ಮೋತ ಮಾ॒ತರಂ॑ ಪ್ರಿ॒ಯಾ ಮಾ ನ॑ಸ್ತ॒ನುವೋ॑ ರುದ್ರ ರೀರಿಷಃ ॥ 52.1 (ತೈ. ಅರ. 6.52.1)
ಮಾ ನ॑ಸ್ತೋ॒ಕೇ ತನ॑ಯೇ॒ ಮಾ ನ॒ ಆಯು॑ಷಿ॒ ಮಾ ನೋ॒ ಗೋಷು॒ ಮಾ ನೋ॒ ಅಶ್ವೇ॑ಷು ರೀರಿಷಃ । ವೀ॒ರಾನ್ಮಾ ನೋ॑ ರುದ್ರ ಭಾಮಿ॒ತೋವ॑ಧೀ-ರ್ಹ॒ವಿಷ್ಮಂ॑ತೋ॒ ನಮ॑ಸಾ ವಿಧೇಮ ತೇ ॥ 53.1 (ತೈ. ಅರ. 6.53.1)
ಪ್ರಜಾಪತಿ-ಪ್ರಾರ್ಥನಾ ಮಂತ್ರಃ (4.36)
ಪ್ರಜಾ॑ಪತೇ॒ ನ ತ್ವದೇ॒ತಾ-ನ್ಯ॒ನ್ಯೋ ವಿಶ್ವಾ॑ ಜಾ॒ತಾನಿ॒ ಪರಿ॒ತಾ ಬ॑ಭೂವ । ಯತ್ ಕಾ॑ಮಾಸ್ತೇ ಜುಹು॒ಮಸ್ತನ್ನೋ॑ ಅಸ್ತು ವ॒ಯಗ್ಗ್ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥ 54.1 (ತೈ. ಅರ. 6.54.1)
ಇಂದ್ರಪ್ರಾರ್ಥನಾ ಮಂತ್ರಃ (4.37)
ಸ್ವ॒ಸ್ತಿ॒ದಾ ವಿ॒ಶಸ್ಪತಿ॑-ರ್ವೃತ್ರ॒ಹಾ ವಿಮೃಧೋ॑ ವ॒ಶೀ । ವೃಷೇಂದ್ರಃ॑ ಪು॒ರ ಏ॑ತು ನಸ್ಸ್ವಸ್ತಿ॒ದಾ ಅ॑ಭಯಂ ಕ॒ರಃ ॥ 55.1 (ತೈ. ಅರ. 6.55.1)
ಮೃತ್ಯುಂಜಯ ಮಂತ್ರಾಃ (4.38)
ತ್ರ್ಯಂ॑ಬಕಂ-ಯಁಜಾಮಹೇ ಸುಗಂ॒ಧಿಂ ಪು॑ಷ್ಟಿ॒ವರ್ಧ॑ನಮ್ । ಉ॒ರ್ವಾ॒ರು॒ಕಮಿ॑ವ॒ ಬಂಧ॑ನಾನ್-ಮೃ॒ತ್ಯೋ-ರ್ಮು॑ಕ್ಷೀಯ॒ ಮಾಽಮೃತಾ᳚ತ್ ॥ 56.1 (ತೈ. ಅರ. 6.56.1)
ಯೇ ತೇ॑ ಸ॒ಹಸ್ರ॑ಮ॒ಯುತಂ॒ ಪಾಶಾ॒ ಮೃತ್ಯೋ॒ ಮರ್ತ್ಯಾ॑ಯ॒ ಹಂತ॑ವೇ । ತಾನ್. ಯ॒ಜ್ಞಸ್ಯ॑ ಮಾ॒ಯಯಾ॒ ಸರ್ವಾ॒ನವ॑ ಯಜಾಮಹೇ । ಮೃ॒ತ್ಯವೇ॒ ಸ್ವಾಹಾ॑ ಮೃ॒ತ್ಯವೇ॒ ಸ್ವಾಹಾ᳚ ॥ 58.1 (ತೈ. ಅರ. 6.57-58)
ಪಾಪನಿವಾರಕಾ ಮಂತ್ರಾಃ (4.39)
ದೇ॒ವಕೃ॑ತ॒ಸ್ಯೈನ॑ಸೋ-ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಮ॒ನು॒ಷ್ಯ॑ಕೃತ॒ಸ್ಯೈನ॑ಸೋ ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಪಿ॒ತೃಕೃ॑ತ॒ಸ್ಯೈನ॑ಸೋ ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಆ॒ತ್ಮಕೃ॑ತ॒ಸ್ಯೈನ॑ಸೋ ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಅ॒ನ್ಯಕೃ॑ತ॒ಸ್ಯೈನ॑ಸೋ ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಅ॒ಸ್ಮತ್ಕೃ॑ತ॒ಸ್ಯೈನ॑ಸೋ ಽವ॒ಯಜ॑ನಮಸಿ॒ ಸ್ವಾಹಾ᳚ ।
ಯದ್ದಿ॒ವಾ ಚ॒ ನಕ್ತಂ॒ ಚೈನ॑ಶ್ಚಕೃ॒ಮ ತಸ್ಯಾ॑ ವ॒ಯಜ॑ನಮಸಿ॒ ಸ್ವಾಹಾ᳚ ।
ಯಥ್ ಸ್ವ॒ಪಂತ॑ಶ್ಚ॒ ಜಾಗ್ರ॑ತ॒-ಶ್ಚೈನ॑ಶ್ಚ-ಕೃ॒ಮ ತಸ್ಯಾ॑ ವ॒ಯಜ॑ನಮಸಿ॒ ಸ್ವಾಹಾ᳚ ।
ಯಥ್ ಸು॒ಷುಪ್ತ॑ಶ್ಚ॒ ಜಾಗ್ರ॑ತ॒-ಶ್ಚೈನ॑ಶ್ಚ-ಕೃ॒ಮ ತಸ್ಯಾ॑ ವ॒ಯಜ॑ನಮಸಿ॒ ಸ್ವಾಹಾ᳚ ।
ಯ-ದ್ವಿ॒ದ್ವಾಗ್ಂಸ॒ಶ್ಚಾ ವಿ॑ದ್ವಾಗ್ಂಸ॒ಶ್ಚೈನ॑ಶ್ಚ-ಕೃ॒ಮ ತಸ್ಯಾ॑ ವ॒ಯಜ॑ನಮಸಿ॒ ಸ್ವಾಹಾ᳚ ।
ಏನಸ ಏನಸೋ ವಯಜನಮ॑ಸಿ ಸ್ವಾ॒ಹಾ ॥ 59.1 (ತೈ. ಅರ. 6.59.1)
ವಸು-ಪ್ರಾರ್ಥನಾ ಮಂತ್ರಃ (4.40)
ಯದ್ವೋ॑ ದೇವಾಶ್ಚಕೃ॒ಮ ಜಿ॒ಹ್ವಯಾ॑ ಗು॒ರುಮನ॑ಸೋ ವಾ॒ ಪ್ರಯು॑ತೀ ದೇವ॒ ಹೇಡ॑ನಮ್ । ಅರಾ॑ವಾ॒ಯೋ ನೋ॑ ಅ॒ಭಿದು॑ಚ್ಛುನಾ॒ಯತೇ॒ ತಸ್ಮಿ॒ನ್ ತದೇನೋ॑ ವಸವೋ॒
ನಿಧೇ॑ತನ॒ ಸ್ವಾಹಾ᳚ ॥ 60.1 (ತೈ. ಅರ. 6.60.1)
ಕಾಮೋಽಕಾರ್ಷೀತ್ – ಮನ್ಯುರಕಾರ್ಷೀತ್ ಮಂತ್ರಃ (4.41)
ಕಾಮೋಽಕಾರ್ಷೀ᳚ನ್ ನಮೋ॒ ನಮಃ । ಕಾಮೋಽಕಾರ್ಷೀತ್ ಕಾಮಃ ಕರೋತಿ ನಾಹಂ ಕರೋಮಿ ಕಾಮಃ ಕರ್ತಾ ನಾಹಂ ಕರ್ತಾ ಕಾಮಃ॑ ಕಾರ॒ಯಿತಾ ನಾಹಂ॑ ಕಾರ॒ಯಿತಾ ಏಷ ತೇ ಕಾಮ ಕಾಮಾ॑ಯ ಸ್ವಾ॒ಹಾ ॥ 61.1 (ತೈ. ಅರ. 6.61.1)
ಮನ್ಯುರಕಾರ್ಷೀ᳚ನ್ ನಮೋ॒ ನಮಃ । ಮನ್ಯುರಕಾರ್ಷೀನ್ ಮನ್ಯುಃ ಕರೋತಿ ನಾಹಂ ಕರೋಮಿ ಮನ್ಯುಃ ಕರ್ತಾ ನಾಹಂ ಕರ್ತಾ ಮನ್ಯುಃ॑ ಕಾರ॒ಯಿತಾ ನಾಹಂ॑ ಕಾರ॒ಯಿತಾ ಏಷ ತೇ ಮನ್ಯೋ ಮನ್ಯ॑ವೇ ಸ್ವಾ॒ಹಾ ॥ 62.1 (ತೈ. ಅರ. 6.62.1)
ವಿರಜಾ ಹೋಮ ಮಂತ್ರಾಃ (4.42)
ತಿಲಾಂಜುಹೋಮಿ ಸರಸಾಗ್ಂ ಸಪಿಷ್ಟಾನ್ ಗಂಧಾರ ಮಮ ಚಿತ್ತೇ ರಮಂ॑ತು ಸ್ವಾ॒ಹಾ । ಗಾವೋ ಹಿರಣ್ಯಂ ಧನಮನ್ನಪಾನಗ್ಂ ಸರ್ವೇಷಾಗ್ಗ್ ಶ್ರಿ॑ಯೈ ಸ್ವಾ॒ಹಾ । ಶ್ರಿಯಂಚ ಲಕ್ಷ್ಮಿಂಚ ಪುಷ್ಟಿಂಚ ಕೀರ್ತಿಂ॑ ಚಾ ನೃ॒ಣ್ಯತಾಮ್ । ಬ್ರಹ್ಮಣ್ಯಂ ಬ॑ಹುಪು॒ತ್ರತಾಮ್ । ಶ್ರದ್ಧಾಮೇಧೇ ಪ್ರಜಾಃ ಸಂದದಾ॑ತು ಸ್ವಾ॒ಹಾ ॥ 63.3 (ತೈ. ಅರ. 6.63.1)
ತಿಲಾಃ ಕೃಷ್ಣಾ-ಸ್ತಿ॑ಲಾಃ ಶ್ವೇ॒ತಾ॒-ಸ್ತಿಲಾಃ ಸೌಮ್ಯಾ ವ॑ಶಾನು॒ಗಾಃ । ತಿಲಾಃ ಪುನಂತು॑ ಮೇ ಪಾ॒ಪಂ॒-ಯಁತ್ಕಿಂಚಿ-ದ್ದುರಿತಂ ಮ॑ಯಿ ಸ್ವಾ॒ಹಾ । ಚೋರ॒ಸ್ಯಾನ್ನಂ ನ॑ವಶ್ರಾ॒ದ್ಧಂ॒ ಬ್ರ॒ಹ್ಮ॒ಹಾ ಗು॑ರುತ॒ಲ್ಪಗಃ । ಗೋಸ್ತೇಯಗ್ಂ ಸ॑ರಾಪಾ॒ನಂ॒ ಭ್ರೂಣಹತ್ಯಾ ತಿಲಾ ಶಾಂತಿಗ್ಂ ಶಮಯಂ॑ತು ಸ್ವಾ॒ಹಾ । ಶ್ರೀಶ್ಚ ಲಕ್ಷ್ಮೀಶ್ಚ ಪುಷ್ಟೀಶ್ಚ ಕೀರ್ತಿಂ॑ ಚಾ ನೃ॒ಣ್ಯತಾಮ್ । ಬ್ರಹ್ಮಣ್ಯಂ ಬ॑ಹುಪು॒ತ್ರತಾಮ್ । ಶ್ರದ್ಧಾಮೇಧೇ ಪ್ರಜ್ಞಾತು ಜಾತವೇದಃ ಸಂದದಾ॑ತು ಸ್ವಾ॒ಹಾ ॥ 64.3 (ತೈ. ಅರ. 6.64.1)
ಪ್ರಾಣಾಪಾನ-ವ್ಯಾನೋದಾನ-ಸಮಾನಾ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ । ವಾಂ-ಮನ-ಶ್ಚಕ್ಷುಃ-ಶ್ರೋತ್ರ-ಜಿಹ್ವಾ-ಘ್ರಾಣ-ರೇತೋ-ಬುದ್ಧ್ಯಾಕೂತಿಃ ಸಂಕಲ್ಪಾ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ । ತ್ವಕ್-ಚರ್ಮ-ಮಾಗ್ಂಸ-ರುಧಿರ-ಮೇದೋ-ಮಜ್ಜಾ-ಸ್ನಾಯವೋ-ಽಸ್ಥೀನಿ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ । ಶಿರಃ ಪಾಣಿ ಪಾದ ಪಾರ್ಶ್ವ ಪೃಷ್ಠೋ-ರೂದರ-ಜಂಘ-ಶಿಶ್ರ್ನೋಪಸ್ಥ ಪಾಯವೋ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ । ಉತ್ತಿಷ್ಠ ಪುರುಷ ಹರಿತ-ಪಿಂಗಲ ಲೋಹಿತಾಕ್ಷಿ ದೇಹಿ ದೇಹಿ ದದಾಪಯಿತಾ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥ 65.5 (ತೈ. ಅರ. 6.65.1)
ಪೃಥಿವ್ಯಾಪ ಸ್ತೇಜೋ ವಾಯು-ರಾಕಾಶಾ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ । ಶಬ್ದ-ಸ್ಪರ್ಶ-ರೂಪರಸ-ಗಂಧಾ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ । ಮನೋ-ವಾಕ್-ಕಾಯ-ಕರ್ಮಾಣಿ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ । ಅವ್ಯಕ್ತಭಾವೈ-ರ॑ಹಂಕಾ॒ರ॒-ರ್ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ । ಆತ್ಮಾ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ । ಅಂತರಾತ್ಮಾ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ । ಪರಮಾತ್ಮಾ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ । ಕ್ಷು॒ಧೇ ಸ್ವಾಹಾ᳚ । ಕ್ಷುತ್ಪಿ॑ಪಾಸಾಯ॒ ಸ್ವಾಹಾ᳚ । ವಿವಿ॑ಟ್ಯೈ॒ ಸ್ವಾಹಾ᳚ । ಋಗ್ವಿ॑ಧಾನಾಯ॒ ಸ್ವಾಹಾ᳚ । ಕ॒ಷೋ᳚ತ್ಕಾಯ॒ ಸ್ವಾಹಾ᳚ । ಕ್ಷು॒ತ್ಪಿ॒ಪಾ॒ಸಾಮ॑ಲಂ ಜ್ಯೇ॒ಷ್ಠಾ॒ಮ॒ಲ॒ಕ್ಷ್ಮೀ-ರ್ನಾ॑ಶಯಾ॒ಮ್ಯಹಮ್ । ಅಭೂ॑ತಿ॒-ಮಸ॑ಮೃದ್ಧಿಂ॒ಚ॒ ಸರ್ವಾಂ (ಸರ್ವಾ) ನಿರ್ಣುದ ಮೇ ಪಾಪ್ಮಾ॑ನಗ್ಗ್ ಸ್ವಾ॒ಹಾ । ಅನ್ನಮಯ-ಪ್ರಾಣಮಯ-ಮನೋಮಯ-ವಿಜ್ಞಾನಮಯ-ಮಾನಂದಮಯ-ಮಾತ್ಮಾ ಮೇ॑ ಶುದ್ಧ್ಯಂ॒ತಾಂ॒ ಜ್ಯೋತಿ॑ ರ॒ಹಂ-ವಿಁ॒ರಜಾ॑ ವಿಪಾ॒ಪ್ಮಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥ 66.10 (ತೈ. ಅರ. 6.66.1)
ವೈಶ್ವದೇವ ಮಂತ್ರಾಃ (4.43)
ಅ॒ಗ್ನಯೇ॒ ಸ್ವಾಹಾ᳚ । ವಿಶ್ವೇ᳚ಭ್ಯೋ ದೇ॒ವೇಭ್ಯಃ॒ ಸ್ವಾಹಾ᳚ । ಧ್ರು॒ವಾಯ॑ ಭೂ॒ಮಾಯ॒ ಸ್ವಾಹಾ᳚ । ಧ್ರು॒ವ॒ಕ್ಷಿತ॑ಯೇ॒ ಸ್ವಾಹಾ᳚ । ಅ॒ಚ್ಯು॒ತ॒ಕ್ಷಿತ॑ಯೇ॒ ಸ್ವಾಹಾ᳚ । ಅ॒ಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹಾ᳚ । ಧರ್ಮಾ॑ಯ॒ ಸ್ವಾಹಾ᳚ । ಅಧ॑ರ್ಮಾಯ॒ ಸ್ವಾಹಾ᳚ । ಅ॒ದ್ಭ್ಯಃ ಸ್ವಾಹಾ᳚ । ಓ॒ಷ॒ಧಿ॒ವ॒ನ॒ಸ್ಪ॒ತಿಭ್ಯಃ॒ ಸ್ವಾಹಾ᳚ । 67.1 (ತೈ. ಅರ. 6.67.1)
ರ॒ಕ್ಷೋ॒ದೇ॒ವ॒ಜ॒ನೇಭ್ಯಃ॒ ಸ್ವಾಹಾ᳚ ।
ಗೃಹ್ಯಾ᳚ಭ್ಯಃ॒ ಸ್ವಾಹಾ᳚ । ಅ॒ವ॒ಸಾನೇ᳚ಭ್ಯಃ॒ ಸ್ವಾಹಾ᳚ । ಅ॒ವ॒ಸಾನ॑ಪತಿಭ್ಯಃ॒ ಸ್ವಾಹಾ᳚ । ಸ॒ರ್ವ॒ಭೂ॒ತೇಭ್ಯಃ॒ ಸ್ವಾಹಾ᳚ । ಕಾಮಾ॑ಯ॒ ಸ್ವಾಹಾ᳚ । ಅಂ॒ತರಿ॑ಕ್ಷಾಯ॒ ಸ್ವಾಹಾ᳚ । ಯದೇಜ॑ತಿ॒ ಜಗ॑ತಿ॒ ಯಚ್ಚ॒ ಚೇಷ್ಟ॑ತಿ॒ ನಾಮ್ನೋ॑ ಭಾ॒ಗೋಽಯಂ ನಾಮ್ನೇ॒ ಸ್ವಾಹಾ᳚ । ಪೃ॒ಥಿ॒ವ್ಯೈ ಸ್ವಾಹಾ᳚ । ಅಂ॒ತರಿ॑ಕ್ಷಾಯ॒ ಸ್ವಾಹಾ᳚ । 67.2 (ತೈ. ಅರ. 6.67.2)
ದಿ॒ವೇ ಸ್ವಾಹಾ᳚ । ಸೂರ್ಯಾ॑ಯ॒ ಸ್ವಾಹಾ᳚ । ಚಂ॒ದ್ರಮ॑ಸೇ॒ ಸ್ವಾಹಾ᳚ । ನಕ್ಷ॑ತ್ರೇಭ್ಯಃ॒ ಸ್ವಾಹಾ᳚ । ಇಂದ್ರಾ॑ಯ॒ ಸ್ವಾಹಾ᳚ । ಬೃಹ॒ಸ್ಪತ॑ಯೇ॒ ಸ್ವಾಹಾ᳚ । ಪ್ರ॒ಜಾಪ॑ತಯೇ॒ ಸ್ವಾಹಾ᳚ । ಬ್ರಹ್ಮ॑ಣೇ॒ ಸ್ವಾಹಾ᳚ । ಸ್ವ॒ಧಾ ಪಿ॒ತೃಭ್ಯಃ॒ ಸ್ವಾಹಾ᳚ । ನಮೋ॑ ರು॒ದ್ರಾಯ॑ ಪಶು॒ಪತ॑ಯೇ॒ ಸ್ವಾಹಾ᳚ । 67.3 (ತೈ. ಅರ. 6.67.3)
ದೇ॒ವೇಭ್ಯಃ॒ ಸ್ವಾಹಾ᳚ । ಪಿ॒ತೃಭ್ಯಃ॑ ಸ್ವ॒ಧಾಽಸ್ತು॑ । ಭೂ॒ತೇಭ್ಯೋ॒ ನಮಃ॑ । ಮ॒ನು॒ಷ್ಯೇ᳚ಭ್ಯೋ॒ ಹಂತಾ᳚ । ಪ್ರ॒ಜಾಪ॑ತಯೇ॒ ಸ್ವಾಹಾ᳚ । ಪ॒ರ॒ಮೇ॒ಷ್ಠಿನೇ॒ ಸ್ವಾಹಾ᳚ । ಯಥಾ ಕೂ॑ಪಃ ಶ॒ತಧಾ॑ರಃ ಸ॒ಹಸ್ರ॑ಧಾರೋ॒ ಅಕ್ಷಿ॑ತಃ । ಏ॒ವಾ ಮೇ॑ ಅಸ್ತು ಧಾ॒ನ್ಯಗ್ಂ ಸ॒ಹಸ್ರ॑ಧಾರ॒-ಮಕ್ಷಿ॑ತಮ್ । ಧನ॑ಧಾನ್ಯೈ॒ ಸ್ವಾಹಾ᳚ ॥ ಯೇ ಭೂ॒ತಾಃ ಪ್ರ॒ಚರಂ॑ತಿ॒ ದಿವಾ॒ನಕ್ತಂ॒ ಬಲಿ॑-ಮಿ॒ಚ್ಛಂತೋ॑ ವಿ॒ತುದ॑ಸ್ಯ॒ ಪ್ರೇಷ್ಯಾಃ᳚ । ತೇಭ್ಯೋ॑ ಬ॒ಲಿಂ ಪು॑ಷ್ಟಿ॒ಕಾಮೋ॑ ಹರಾಮಿ॒ ಮಯಿ॒ ಪುಷ್ಟಿಂ॒ ಪುಷ್ಟಿ॑ಪತಿ-ರ್ದಧಾತು॒ ಸ್ವಾಹಾ᳚ ॥ 67.4 (ತೈ. ಅರ. 6.67.4)
(ಓ॒ಷ॒ಧಿ॒ವ॒ನ॒ಸ್ಪ॒ತಿಭ್ಯಃ॒ ಸ್ವಾಹಾ॒ – ಽಂತರಿ॑ಕ್ಷಾಯ॒ ಸ್ವಾಹಾ॒ – ನಮೋ॑ ರು॒ದ್ರಾಯ॑ ಪಶು॒ಪತ॑ಯೇ॒ ಸ್ವಾಹಾ॑ – ವಿ॒ತುದ॑ಸ್ಯ॒ ಪ್ರೇಷ್ಯಾ॒ ಏಕಂ॑ ಚ)
ಓಂ᳚ ತ-ದ್ಬ್ರ॒ಹ್ಮ । ಓಂ᳚ ತ-ದ್ವಾ॒ಯುಃ । ಓಂ᳚ ತದಾ॒ತ್ಮಾ । ಓಂ᳚ ತಥ್ ಸ॒ತ್ಯಮ್ । ಓಂ᳚ ತಥ್ ಸರ್ವ᳚ಮ್ । ಓಂ᳚ ತತ್ ಪುರೋ॒-ರ್ನಮಃ । ಅಂತಶ್ಚರತಿ॑ ಭೂತೇ॒ಷು॒ ಗುಹಾಯಾಂ-ವಿಁ॑ಶ್ವ ಮೂ॒ರ್ತಿಷು । ತ್ವಂ-ಯಁಜ್ಞಸ್ತ್ವಂ-ವಁಷಟ್ಕಾರಸ್ತ್ವ-ಮಿದ್ರಸ್ತ್ವಗ್ಂ ರುದ್ರಸ್ತ್ವಂವಿಁಷ್ಣುಸ್ತ್ವಂ ಬ್ರಹ್ಮತ್ವಂ॑ ಪ್ರಜಾ॒ಪತಿಃ । ತ್ವಂ ತ॑ದಾಪ॒ ಆಪೋ॒ ಜ್ಯೋತೀ॒ ರಸೋ॒ಽಮೃತಂ॒ ಬ್ರಹ್ಮ॒ ಭೂರ್ಭುವ॒ಸ್ಸುವ॒ರೋಮ್ ॥ 68.2 (ತೈ. ಅರ. 6.68.1)
4.44 ಪ್ರಾಣಾಹುತಿ ಮಂತ್ರಾಃ
ಶ್ರ॒ದ್ಧಾಯಾಂ᳚ ಪ್ರಾ॒ಣೇ ನಿವಿ॑ಷ್ಟೋ॒ಽಮೃತಂ॑ ಜುಹೋಮಿ ।
ಶ್ರ॒ದ್ಧಾಯಾ॑ಮಪಾ॒ನೇ ನಿವಿ॑ಷ್ಟೋ॒ಽಮೃತಂ॑ ಜುಹೋಮಿ ।
ಶ್ರ॒ದ್ಧಾಯಾಂ᳚-ವ್ಯಾಁ॒ನೇ ನಿವಿ॑ಷ್ಟೋ॒ಽಮೃತಂ॑ ಜುಹೋಮಿ ।
ಶ್ರ॒ದ್ಧಾಯಾ॑ಮುದಾ॒ನೇ ನಿವಿ॑ಷ್ಟೋ॒ಽಮೃತಂ॑ ಜುಹೋಮಿ ।
ಶ್ರ॒ದ್ಧಾಯಾಗ್ಂ॑ ಸಮಾ॒ನೇ ನಿವಿ॑ಷ್ಟೋ॒ಽಮೃತಂ॑ ಜುಹೋಮಿ ।
ಬ್ರಹ್ಮ॑ಣಿ ಮ ಆ॒ತ್ಮಾಽಮೃ॑ತ॒ತ್ವಾಯ॑ ॥
ಅ॒ಮೃ॒ತೋ॒ಪ॒ಸ್ತರ॑ಣಮಸಿ ॥
ಶ್ರ॒ದ್ಧಾಯಾಂ᳚ ಪ್ರಾ॒ಣೇ ನಿವಿ॑ಷ್ಟೋ॒ಽಮೃತಂ॑ ಜುಹೋಮಿ ।
ಶಿ॒ವೋ ಮಾ॑ ವಿ॒ಶಾಪ್ರ॑ದಾಹಾಯ । ಪ್ರಾ॒ಣಾಯ॒ ಸ್ವಾಹಾ᳚ ।
ಶ್ರ॒ದ್ಧಾಯಾ॑ಮಪಾ॒ನೇ ನಿವಿ॑ಷ್ಟೋ॒ಽಮೃತಂ॑ ಜುಹೋಮಿ ।
ಶಿ॒ವೋ ಮಾ॑ ವಿ॒ಶಾಪ್ರ॑ದಾಹಾಯ । ಅ॒ಪಾ॒ನಾಯ॒ ಸ್ವಾಹಾ᳚ ।
ಶ್ರ॒ದ್ಧಾಯಾಂ᳚-ವ್ಯಾಁ॒ನೇ ನಿವಿ॑ಷ್ಟೋ॒ಽಮೃತಂ॑ ಜುಹೋಮಿ ।
ಶಿ॒ವೋ ಮಾ॑ ವಿ॒ಶಾಪ್ರ॑ದಾಹಾಯ । ವ್ಯಾ॒ನಾಯ॒ ಸ್ವಾಹಾ᳚ ।
ಶ್ರ॒ದ್ಧಾಯಾ॑-ಮುದಾ॒ನೇ ನಿವಿ॑ಷ್ಟೋ॒ಽಮೃತಂ॑ ಜುಹೋಮಿ ।
ಶಿ॒ವೋ ಮಾ॑ ವಿ॒ಶಾಪ್ರ॑ದಾಹಾಯ । ಉ॒ದಾ॒ನಾಯ॒ ಸ್ವಾಹಾ᳚ ।
ಶ್ರ॒ದ್ಧಾಯಾಗ್ಂ॑ ಸಮಾ॒ನೇ ನಿವಿ॑ಷ್ಟೋ॒ಽಮೃತಂ॑ ಜುಹೋಮಿ ।
ಶಿ॒ವೋ ಮಾ॑ ವಿ॒ಶಾಪ್ರ॑ದಾಹಾಯ । ಸ॒ಮಾ॒ನಾಯ॒ ಸ್ವಾಹಾ᳚ ।
ಬ್ರಹ್ಮ॑ಣಿ ಮ ಆ॒ತ್ಮಾಽಮೃ॑ತ॒ತ್ವಾಯ॑ ॥
ಅ॒ಮೃ॒ತಾ॒ಪಿ॒ಧಾ॒ನಮ॑ಸಿ ॥ 69.4 (ತೈ. ಅರ. 6.69.1)
ಭುಕ್ತಾನ್ನಾಭಿಮಂತ್ರಣ ಮಂತ್ರಾಃ (4.45)
ಶ್ರ॒ದ್ಧಾಯಾಂ᳚ ಪ್ರಾ॒ಣೇ ನಿವಿ॑ಶ್ಯಾ॒ಽಮೃತಗ್ಂ॑ ಹು॒ತಮ್ । ಪ್ರಾ॒ಣ ಮನ್ನೇ॑ನಾಪ್ಯಾಯಸ್ವ ।
ಶ್ರ॒ದ್ಧಾಯಾ॑ಮಪಾ॒ನೇ ನಿವಿ॑ಶ್ಯಾ॒ಽಮೃತಗ್ಂ॑ ಹು॒ತಮ್ । ಅ॒ಪಾ॒ನ ಮನ್ನೇ॑ನಾಪ್ಯಾಯಸ್ವ ।
ಶ್ರ॒ದ್ಧಾಯಾಂ᳚-ವ್ಯಾಁ॒ನೇ ನಿವಿ॑ಶ್ಯಾ॒ಽಮೃತಗ್ಂ॑ ಹು॒ತಮ್ । ವ್ಯಾ॒ನ ಮನ್ನೇ॑ನಾಪ್ಯಾಯಸ್ವ ।
ಶ್ರ॒ದ್ಧಾಯಾ॑-ಮುದಾ॒ನೇ ನಿವಿ॑ಶ್ಯಾ॒ಽಮೃತಗ್ಂ॑ ಹು॒ತಮ್ । ಉ॒ದಾ॒ನ ಮನ್ನೇ॑ನಾಪ್ಯಾಯಸ್ವ ।
ಶ್ರ॒ದ್ಧಾಯಾಗ್ಂ॑ ಸಮಾ॒ನೇ ನಿವಿ॑ಶ್ಯಾ॒ಽಮೃತಗ್ಂ॑ ಹು॒ತಮ್ । ಸ॒ಮಾನ॒ ಮನ್ನೇ॑ನಾಪ್ಯಾಯಸ್ವ ॥ 70.1 (ತೈ. ಅರ. 6.70.1)
ಭೋಜನಾಂತೇ ಆತ್ಮಾನುಸಂಧಾನ ಮಂತ್ರಾಃ (4.46)
ಅಂಗುಷ್ಠಮಾತ್ರಃ ಪುರುಷೋಽಂಗುಷ್ಠಂಚ॑ ಸಮಾ॒ಶ್ರಿತಃ । ಈಶಃ ಸರ್ವಸ್ಯ ಜಗತಃ ಪ್ರಭುಃ ಪ್ರೀಣಾತಿ॑ ವಿಶ್ವ॒ಭುಕ್ ॥ 71.1 (ತೈ. ಅರ. 6.71.1)
ಅವಯವಸ್ವಸ್ಥತಾ ಪ್ರಾರ್ಥನಾ ಮಂತ್ರಃ (4.47)
ವಾಂಮ॑ ಆ॒ಸನ್ನ್ । ನ॒ಸೋಃ ಪ್ರಾ॒ಣಃ । ಅ॒ಕ್ಷ್ಯೋ-ಶ್ಚಕ್ಷುಃ॑ । ಕರ್ಣ॑ಯೋಃ॒ ಶ್ರೋತ್ರ᳚ಮ್ । ಬಾ॒ಹು॒ವೋ-ರ್ಬಲ᳚ಮ್ । ಊ॒ರು॒ವೋ ರೋಜಃ॑ । ಅರಿ॑ಷ್ಟಾ॒ ವಿಶ್ವಾ॒ನ್ಯಂಗಾ॑ನಿ ತ॒ನೂಃ । ತ॒ನುವಾ॑ ಮೇ ಸ॒ಹ ನಮ॑ಸ್ತೇ ಅಸ್ತು॒ ಮಾ ಮಾ॑ ಹಿಗ್ಂಸೀಃ ॥ 72.1 (ತೈ. ಅರ. 6.72.1)
ಇಂದ್ರ ಸಪ್ತರ್ಷಿ ಸಂವಾಁದ ಮಂತ್ರಃ (4.48)
ವಯಃ॑ ಸುಪ॒ರ್ಣಾ ಉಪ॑ಸೇದು॒ರಿಂದ್ರಂ॑ ಪ್ರಿ॒ಯ ಮೇ॑ಧಾ॒ ಋಷ॑ಯೋ॒ ನಾಧ॑ಮಾನಾಃ । ಅಪ॑ದ್ಧ್ವಾಂ॒ತ ಮೂ᳚ರ್ಣು॒ಹಿ ಪೂ॒ರ್ಧಿ ಚಕ್ಷು॑-ರ್ಮುಮು॒ಗ್ಧ್ಯ॑ಸ್ಮಾನ್ ನಿ॒ಧಯೇ॑ ಽವಬ॒ದ್ಧಾನ್ ॥ 73.1 (ತೈ. ಅರ. 6.73.1)
ಹೃದಯಾಲಂಭನ ಮಂತ್ರಃ (4.49)
ಪ್ರಾಣಾನಾಂ ಗ್ರಂಥಿರಸಿ ರುದ್ರೋ ಮಾ॑ ವಿಶಾಂ॒ತಕಃ । ತೇನಾನ್ನೇನಾ᳚-ಪ್ಯಾಯ॒ಸ್ವ ॥ 74.1 (ತೈ. ಅರ. 6.74.1)
ದೇವತಾ ಪ್ರಾಣನಿರೂಪಣ ಮಂತ್ರಃ (4.50)
ನಮೋ ರುದ್ರಾಯ ವಿಷ್ಣವೇ ಮೃತ್ಯು॑ರ್ಮೇ ಪಾ॒ಹಿ ॥ 75.1 (ತೈ. ಅರ. 6.75.1)
ಅಗ್ನಿ ಸ್ತುತಿ ಮಂತ್ರಃ (4.51)
ತ್ವಮ॑ಗ್ನೇ॒ ದ್ಯುಭಿ॒-ಸ್ತ್ವಮಾ॑ಶು-ಶು॒ಕ್ಷಣಿ॒-ಸ್ತ್ವಮ॒ದ್ಭ್ಯ-ಸ್ತ್ವಮಶ್ಮ॑ನ॒ಸ್ಪರಿ॑ । ತ್ವಂ-ವಁನೇ᳚ಭ್ಯ॒-ಸ್ತ್ವಮೋಷ॑ಧೀಭ್ಯ॒-ಸ್ತ್ವಂ ನೃ॒ಣಾಂ ನೃ॑ಪತೇ ಜಾಯಸೇ॒ ಶುಚಿಃ॑ ॥ 76.1 (ತೈ. ಅರ. 6.76.1)
ಅಭೀಷ್ಟ ಯಾಚನಾ ಮಂತ್ರಃ (4.52)
ಶಿ॒ವೇನ॑ ಮೇ॒ ಸಂತಿ॑ಷ್ಠಸ್ವ ಸ್ಯೋ॒ನೇನ॑ ಮೇ॒ ಸಂತಿ॑ಷ್ಠಸ್ವ ಸುಭೂ॒ತೇನ॑ ಮೇ॒ ಸಂತಿ॑ಷ್ಠಸ್ವ ಬ್ರಹ್ಮವರ್ಚ॒ಸೇನ॑ ಮೇ॒ ಸಂತಿ॑ಷ್ಠಸ್ವ ಯ॒ಜ್ಞಸ್ಯರ್ಧಿ॒ ಮನು॒ ಸಂತಿ॑ಷ್ಠ॒ ಸ್ವೋಪ॑ ತೇ ಯಜ್ಞ॒ ನಮ॒ ಉಪ॑ ತೇ॒ ನಮ॒ ಉಪ॑ ತೇ॒ ನಮಃ॑ ॥ 77.1 (ತೈ. ಅರ. 6.77.1)
ಪರ ತತ್ತ್ವ ನಿರೂಪಣಂ (4.53)
ಸ॒ತ್ಯಂ ಪರಂ॒ ಪರಗ್ಂ॑ ಸ॒ತ್ಯಗ್ಂ ಸ॒ತ್ಯೇನ॒ ನ ಸು॑ವ॒ರ್ಗಾ-ಲ್ಲೋ॒ಕಾಚ್ಚ್ಯ॑ವಂತೇ
ಕ॒ದಾಚ॒ನ ಸ॒ತಾಗ್ಂ ಹಿ ಸ॒ತ್ಯಂ ತಸ್ಮಾ᳚ಥ್ ಸ॒ತ್ಯೇ ರ॑ಮಂತೇ॒,
ತಪ॒ ಇತಿ॒ ತಪೋ॒ ನಾನಶ॑ನಾ॒ತ್ ಪರಂ॒-ಯಁದ್ಧಿ ಪರಂ॒ ತಪ॒ಸ್ತ-ದ್ದುಧ॑ರ್ಷಂ॒
ತ-ದ್ದುರಾ॑ಧರ್ಷಂ॒ ತಸ್ಮಾ॒ತ್ ತಪ॑ಸಿ ರಮಂತೇ॒,
ದಮ॒ ಇತಿ॒ ನಿಯ॑ತಂ ಬ್ರಹ್ಮಚಾ॒ರಿಣ॒-ಸ್ತಸ್ಮಾ॒-ದ್ದಮೇ॑ ರಮಂತೇ॒,
ಶಮ॒ ಇತ್ಯರ॑ಣ್ಯೇ ಮು॒ನಯ॒-ಸ್ತಸ್ಮಾ॒ಚ್ಛಮೇ॑ ರಮಂತೇ,
ದಾ॒ನಮಿತಿ॒ ಸರ್ವಾ॑ಣಿ ಭೂ॒ತಾನಿ॑ ಪ್ರ॒ಶಗ್ಂಸಂ॑ತಿ ದಾ॒ನಾನ್ನಾತಿ॑ ದು॒ಶ್ಚರಂ॒ ತಸ್ಮಾ᳚-ದ್ದಾ॒ನೇ ರ॑ಮಂತೇ,
ಧ॒ರ್ಮ ಇತಿ॒ ಧರ್ಮೇ॑ಣ॒ ಸರ್ವ॑ಮಿ॒ದಂ ಪರಿ॑ಗೃಹೀತಂ ಧ॒ರ್ಮಾನ್ನಾತಿ॑-ದು॒ಷ್ಕರಂ॒ ತಸ್ಮಾ᳚-ದ್-ಧ॒ರ್ಮೇ ರ॑ಮಂತೇ,
ಪ್ರ॒ಜನ॒ ಇತಿ॒ ಭೂಯಾಗ್ಂ॑॑ಸ॒-ಸ್ತಸ್ಮಾ॒-ದ್ಭೂಯಿ॑ಷ್ಠಾಃ॒ ಪ್ರಜಾ॑ಯಂತೇ॒ ತಸ್ಮಾ॒-ದ್ಭೂಯಿ॑ಷ್ಠಾಃ ಪ್ರ॒ಜನ॑ನೇ ರಮಂತೇ॒,
ಽಗ್ನಯ॒ ಇತ್ಯಾ॑ಹ॒ ತಸ್ಮಾ॑-ದ॒ಗ್ನಯ॒ ಆಧಾ॑ತವ್ಯಾ ಅಗ್ನಿಹೋ॒ತ್ರ-ಮಿತ್ಯಾ॑ಹ॒ ತಸ್ಮಾ॑-ದಗ್ನಿಹೋ॒ತ್ರೇ ರ॑ಮಂತೇ,
ಯ॒ಜ್ಞ ಇತಿ॑ ಯ॒ಜ್ಞೋ ಹಿ ದೇ॒ವಾ ಸ್ತಸ್ಮಾ᳚-ದ್ಯ॒ಜ್ಞೇ ರ॑ಮಂತೇ,
ಮಾನ॒ಸ-ಮಿತಿ॑ ವಿ॒ದ್ವಾಗ್ಂಸ॒-ಸ್ತಸ್ಮಾ᳚-ದ್ವಿ॒ದ್ವಾಗ್ಂಸ॑ ಏ॒ವ ಮಾ॑ನ॒ಸೇ ರ॑ಮಂತೇ,
ನ್ಯಾ॒ಸ ಇತಿ॑ ಬ್ರ॒ಹ್ಮಾ ಬ್ರ॒ಹ್ಮಾ ಹಿ ಪರಃ॒ ಪರೋ॑ ಹಿ ಬ್ರ॒ಹ್ಮಾ ತಾನಿ॒ ವಾ ಏ॒ತಾನ್ಯವ॑ರಾಣಿ॒ ಪರಾಗ್ಂ॑ಸಿ ನ್ಯಾ॒ಸ ಏ॒ವಾತ್ಯ॑ರೇಚಯ॒-ದ್ಯ ಏ॒ವಂ-ವೇಁದೇ᳚ತ್ಯುಪ॒ನಿಷತ್ ॥ 78.11 (ತೈ. ಅರ. 6.78.1)
4.54 ಜ್ಞಾನ ಸಾಧನ ನಿರೂಪಣಂ
ಪ್ರಾ॒ಜಾ॒ಪ॒ತ್ಯೋ ಹಾರು॑ಣಿಃ ಸುಪ॒ರ್ಣೇಯಃ॑ ಪ್ರ॒ಜಾಪ॑ತಿಂ ಪಿ॒ತರ॒-ಮುಪ॑ಸಸಾರ॒ ಕಿಂ ಭ॑ಗವಂ॒ತಃ ಪ॑ರ॒ಮಂ-ವಁ॑ದಂ॒ತೀತಿ॒ ತಸ್ಮೈ॒ ಪ್ರೋ॑ವಾಚ,
ಸ॒ತ್ಯೇನ॑ ವಾ॒ಯುರಾವಾ॑ತಿ ಸ॒ತ್ಯೇ-ನಾ॑ದಿ॒ತ್ಯೋ ರೋ॑ಚತೇ ದಿ॒ವಿ ಸ॒ತ್ಯಂ-ವಾಁ॒ಚಃ ಪ್ರ॑ತಿ॒ಷ್ಠಾ ಸ॒ತ್ಯೇ ಸ॒ರ್ವಂ ಪ್ರತಿ॑ಷ್ಠಿತಂ॒ ತಸ್ಮಾ᳚ಥ್ ಸ॒ತ್ಯಂ ಪ॑ರ॒ಮಂ-ವಁದಂ॑ತಿ॒,
ತಪ॑ಸಾ ದೇ॒ವಾ ದೇ॒ವತಾ॒-ಮಗ್ರ॑ ಆಯ॒ನ್ ತಪ॒ಸರ್ಷ॑ಯಃ॒ ಸುವ॒ರನ್ವ॑-ವಿಂದ॒ನ್ ತಪ॑ಸಾ ಸ॒ಪತ್ನಾ॒ನ್ ಪ್ರಣು॑ದಾ॒-ಮಾರಾ॑ತೀ॒ ಸ್ತಪ॑ಸಿ ಸ॒ರ್ವಂ ಪ್ರತಿ॑ಷ್ಠಿತಂ॒ ತಸ್ಮಾ॒ತ್ ತಪಃ॑ ಪರ॒ಮಂ-ವಁದಂ॑ತಿ॒,
ದಮೇ॑ನ ದಾಂ॒ತಾಃ ಕಿ॒ಲ್ಬಿಷ॑-ಮವಧೂ॒ನ್ವಂತಿ॒ ದಮೇ॑ನ ಬ್ರಹ್ಮಚಾ॒ರಿಣಃ॒ ಸುವ॑ರಗಚ್ಛ॒ನ್ ದಮೋ॑ ಭೂ॒ತಾನಾಂ᳚ ದುರಾ॒ಧರ್ಷಂ॒ ದಮೇ॑ ಸ॒ರ್ವಂ ಪ್ರತಿ॑ಷ್ಠಿತಂ॒ ತಸ್ಮಾ॒-ದ್ದಮಃ॑ ಪರ॒ಮಂ-ವಁದಂ॑ತಿ॒,
ಶಮೇ॑ನ ಶಾಂ॒ತಾಃ ಶಿ॒ವ-ಮಾ॒ಚರಂ॑ತಿ॒ ಶಮೇ॑ನ ನಾ॒ಕಂ ಮು॒ನಯೋ॒-ಽನ್ವವಿಂ॑ದ॒ನ್ ಛಮೋ॑ ಭೂ॒ತಾನಾಂ᳚ ದುರಾ॒ಧರ್ಷಂ॒ ಛಮೇ॑ ಸ॒ರ್ವಂ ಪ್ರತಿ॑ಷ್ಠಿತಂ॒ ತಸ್ಮಾ॒ಚ್ಛಮಃ॑ ಪರ॒ಮಂ-ವಁದಂ॑ತಿ,
ದಾ॒ನಂ-ಯಁ॒ಜ್ಞಾನಾಂ॒-ವಁರೂ॑ಥಂ॒ ದಕ್ಷಿ॑ಣಾ ಲೋ॒ಕೇ ದಾ॒ತಾರಗ್ಂ॑ ಸರ್ವ ಭೂ॒ತಾನ್ಯು॑ಪಜೀ॒ವಂತಿ॑ ದಾ॒ನೇನಾರಾ॑ತೀ॒-ರಪಾ॑ನುದಂತ ದಾ॒ನೇನ॑ ದ್ವಿಷಂ॒ತೋ ಮಿ॒ತ್ರಾ ಭ॑ವಂತಿ ದಾ॒ನೇ ಸ॒ರ್ವಂ ಪ್ರತಿ॑ಷ್ಠಿತಂ॒ ತಸ್ಮಾ᳚-ದ್ದಾ॒ನಂ ಪ॑ರ॒ಮಂ-ವಁದಂ॑ತಿ,
ಧ॒ರ್ಮೋ ವಿಶ್ವ॑ಸ್ಯ॒ ಜಗ॑ತಃ ಪ್ರತಿ॒ಷ್ಠಾ ಲೋ॒ಕೇ ಧ॒ರ್ಮಿಷ್ಠಂ॑ ಪ್ರ॒ಜಾ ಉ॑ಪಸ॒ರ್ಪಂತಿ॑ ಧ॒ರ್ಮೇಣ॑ ಪಾ॒ಪ-ಮ॑ಪ॒ನುದ॑ತಿ ಧ॒ರ್ಮೇ ಸ॒ರ್ವಂ ಪ್ರತಿ॑ಷ್ಠಿತಂ॒ ತಸ್ಮಾ᳚-ದ್ಧ॒ರ್ಮಂ ಪ॑ರ॒ಮಂ-ವಁದಂ॑ತಿ,
ಪ್ರ॒ಜನ॑ನಂ॒-ವೈಁ ಪ್ರ॑ತಿ॒ಷ್ಠಾ ಲೋ॒ಕೇ ಸಾ॒ಧು ಪ್ರ॒ಜಾಯಾ᳚ ಸ್ತಂ॒ತುಂ-ತ॑ನ್ವಾ॒ನಃ ಪಿ॑ತೃ॒ಣಾ ಮ॑ನೃ॒ಣೋ ಭವ॑ತಿ॒ ತದೇ॑ವ ತ॒ಸ್ಯಾ ಅನೃ॑ಣಂ॒ ತಸ್ಮಾ᳚ತ್ ಪ್ರ॒ಜನ॑ನಂ ಪರ॒ಮಂ-ವಁದಂ॑ತ್ಯ॒,
ಗ್ನಯೋ॒ ವೈ ತ್ರಯೀ॑ ವಿ॒ದ್ಯಾ ದೇ॑ವ॒ಯಾನಃ॒ ಪಂಥಾ॑ ಗಾರ್ಹಪ॒ತ್ಯ ಋಕ್-ಪೃ॑ಥಿ॒ವೀ ರ॑ಥಂತ॒ರ-ಮ॑ನ್ವಾಹಾ-ರ್ಯ॒ಪಚ॑ನಂ॒-ಯಁಜು॑ರಂ॒ತರಿ॑ಕ್ಷಂ-ವಾಁಮದೇ॒ವ್ಯ ಮಾ॑ಹವ॒ನೀಯಃ॒ ಸಾಮ॑ಸುವ॒ರ್ಗೋ ಲೋ॒ಕೋ ಬೃ॒ಹತ್-ತಸ್ಮಾ॑-ದ॒ಗ್ನೀನ್ ಪ॑ರ॒ಮಂ-ವಁದಂ॑ತ್ಯ,
ಗ್ನಿಹೋ॒ತ್ರಗ್ಂ ಸಾ॑ಯಂ ಪ್ರಾ॒ತ-ರ್ಗೃ॒ಹಾಣಾಂ॒-ನಿಷ್ಕೃ॑ತಿಃ॒ ಸ್ವಿ॑ಷ್ಟಗ್ಂ ಸುಹು॒ತಂ-ಯಁ॑ಜ್ಞಕ್ರತೂ॒ನಾಂ ಪ್ರಾಯ॑ಣಗ್ಂ ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಜ್ಯೋತಿ॒-ಸ್ತಸ್ಮಾ॑-ದಗ್ನಿಹೋ॒ತ್ರಂ ಪ॑ರ॒ಮಂ-ವಁದಂ॑ತಿ,
ಯ॒ಜ್ಞ ಇತಿ॑ ಯ॒ಜ್ಞೇನ॒ ಹಿ ದೇ॒ವಾ ದಿವಂ॑ ಗ॒ತಾ ಯ॒ಜ್ಞೇನಾಸು॑ರಾ॒-ನಪಾ॑ನುದಂತ ಯ॒ಜ್ಞೇನ॑ ದ್ವಿಷಂ॒ತೋ ಮಿ॒ತ್ರಾ ಭ॑ವಂತಿ ಯ॒ಜ್ಞೇ ಸ॒ರ್ವಂ ಪ್ರತಿ॑ಷ್ಠಿತಂ॒ ತಸ್ಮಾ᳚-ದ್ಯ॒ಜ್ಞಂ ಪ॑ರ॒ಮಂ-ವಁದಂ॑ತಿ,
ಮಾನ॒ಸಂ-ವೈಁ ಪ್ರಾ॑ಜಾಪ॒ತ್ಯಂ ಪ॒ವಿತ್ರಂ॑ ಮಾನ॒ಸೇನ॒ ಮನ॑ಸಾ ಸಾ॒ಧು ಪ॑ಶ್ಯತಿ ಮಾನ॒ಸಾ ಋಷ॑ಯಃ ಪ್ರ॒ಜಾ ಅ॑ಸೃಜಂತ ಮಾನ॒ಸೇ ಸ॒ರ್ವಂ ಪ್ರತಿ॑ಷ್ಠಿತಂ॒ ತಸ್ಮಾ᳚ನ್ ಮಾನ॒ಸಂ ಪ॑ರ॒ಮಂ-ವಁದಂ॑ತಿ,
ನ್ಯಾ॒ಸ ಇ॒ತ್ಯಾಹು॑-ರ್ಮನೀ॒ಷಿಣೋ᳚ ಬ್ರ॒ಹ್ಮಾಣಂ॑ ಬ್ರ॒ಹ್ಮಾ ವಿಶ್ವಃ॑ ಕತ॒ಮಃ ಸ್ವ॑ಯ॒ಭುಂಃ ಪ್ರ॒ಜಾಪ॑ತಿಃ ಸಂವಁಥ್ಸರ॒ ಇತಿ॑, ಸಂವಁಥ್ಸ॒ರೋ॑ ಽಸಾವಾ॑ದಿ॒ತ್ಯೋ ಯ ಏ॒ಷ ಆ॑ದಿ॒ತ್ಯೇ ಪುರು॑ಷಃ॒ ಸ ಪ॑ರಮೇ॒ಷ್ಠೀ ಬ್ರಹ್ಮಾ॒ತ್ಮಾ,
ಯಾಭಿ॑ರಾದಿ॒ತ್ಯ-ಸ್ತಪ॑ತಿ ರ॒ಶ್ಮಿಭಿ॒ಸ್ತಾಭಿಃ॑ ಪ॒ರ್ಜನ್ಯೋ॑ ವರ್ಷತಿ ಪ॒ರ್ಜನ್ಯೇ॑-ನೌಷಧಿ-ವನಸ್ಪ॒ತಯಃ॒ ಪ್ರಜಾ॑ಯಂತ ಓಷಧಿ-ವನಸ್ಪ॒ತಿಭಿ॒-ರನ್ನಂ॑ ಭವ॒ತ್ಯನ್ನೇ॑ನ ಪ್ರಾ॒ಣಾಃ ಪ್ರಾ॒ಣೈ-ರ್ಬಲಂ॒ ಬಲೇ॑ನ॒ ತಪ॒-ಸ್ತಪ॑ಸಾ ಶ್ರ॒ದ್ಧಾ ಶ್ರ॒ದ್ಧಯಾ॑ ಮೇ॒ಧಾ ಮೇ॒ಧಯಾ॑ ಮನೀ॒ಷಾ ಮ॑ನೀ॒ಷಯಾ॒ ಮನೋ॒ ಮನ॑ಸಾ॒ ಶಾಂತಿಃ॒ ಶಾಂತ್ಯಾ॑ ಚಿ॒ತ್ತಂ ಚಿ॒ತ್ತೇನ॒ ಸ್ಮೃತಿ॒ಗ್ಗ್॒ ಸ್ಮೃತ್ಯಾ॒ ಸ್ಮಾರ॒ಗ್ಗ್॒ ಸ್ಮಾರೇ॑ಣ ವಿ॒ಜ್ಞಾನಂ॑-ವಿಁ॒ಜ್ಞಾನೇ॑-ನಾ॒ತ್ಮಾನಂ॑-ವೇಁದಯತಿ॒ ತಸ್ಮಾ॑ದ॒ನ್ನಂ ದದಂ॒ಥ್ ಸರ್ವಾ᳚ಣ್ಯೇ॒ತಾನಿ॑ ದದಾ॒-ತ್ಯನ್ನಾ᳚ತ್ ಪ್ರಾ॒ಣಾ ಭ॑ವಂತಿ,
ಭೂ॒ತಾನಾಂ᳚ ಪ್ರಾ॒ಣೈ-ರ್ಮನೋ॒ ಮನ॑ಸಶ್ಚ ವಿ॒ಜ್ಞಾನಂ॑-ವಿಁ॒ಜ್ಞಾನಾ॑-ದಾನಂ॒ದೋ ಬ್ರ॑ಹ್ಮ ಯೋ॒ನಿಃ ಸ ವಾ ಏ॒ಷ ಪುರು॑ಷಃ ಪಂಚ॒ಧಾ ಪಂ॑ಚಾ॒ತ್ಮಾ ಯೇನ॒ ಸರ್ವ॑ಮಿ॒ದಂ ಪ್ರೋತಂ॑ ಪೃಥಿ॒ವೀ ಚಾಂ॒ತರಿ॑ಕ್ಷಂ ಚ॒ ದ್ಯೌಶ್ಚ॒ ದಿಶ॑ಶ್ಚಾವಾಂತರದಿ॒ಶಾಶ್ಚ॒ ಸ ವೈ ಸರ್ವ॑ಮಿ॒ದಂ ಜಗ॒ಥ್ಸ ಸ॒ಭೂತಗ್ಂ॑ ಸ ಭ॒ವ್ಯಂ ಜಿ॑ಜ್ಞಾಸ ಕ್ಲೃ॒ಪ್ತ ಋ॑ತ॒ಜಾ ರಯಿ॑ಷ್ಠಾ,
ಶ್ರ॒ದ್ಧಾ ಸ॒ತ್ಯೋ ಮಹ॑ಸ್ವಾನ್ ತ॒ಪಸೋ॒ ಪರಿ॑ಷ್ಠಾ॒ದ್ (ವರಿ॑ಷ್ಠಾ॒ದ್) ಜ್ಞಾತ್ವಾ॑ ತಮೇ॒ವಂ ಮನ॑ಸಾ ಹೃ॒ದಾ ಚ॒ ಭೂಯೋ॑ ನ ಮೃ॒ತ್ಯು-ಮುಪ॑ಯಾಹಿ ವಿ॒ದ್ವಾನ್ ತಸ್ಮಾ᳚-ನ್ನ್ಯಾ॒ಸ-ಮೇ॒ಷಾಂ ತಪ॑ಸಾ-ಮತಿರಿಕ್ತ॒ಮಾಹು॑-ರ್ವಸುರ॒ಣ್ವೋ॑ ವಿ॒ಭೂರ॑ಸಿ ಪ್ರಾ॒ಣೇ ತ್ವಮಸಿ॑ ಸಂಧಾ॒ತಾ
ಬ್ರಹ್ಮ॑ನ್ ತ್ವಮಸಿ॑ ವಿಶ್ವ॒ಧೃತ್ತೇ॑-ಜೋ॒ದಾಸ್ ತ್ವಮ॑ಸ್ಯ॒ಗ್ನಿ-ರ॑ಸಿ ವರ್ಚೋ॒ದಾ-ಸ್ತ್ವಮ॑ಸಿ॒ ಸೂರ್ಯ॑ಸ್ಯ ದ್ಯುಮ್ನೋ॒ದಾ ಸ್ತ್ವಮ॑ಸಿ ಚಂ॒ದ್ರಮ॑ಸ ಉಪಯಾ॒ಮಗೃ॑ಹೀತೋಽಸಿ ಬ್ರ॒ಹ್ಮಣೇ᳚ ತ್ವಾ॒ ಮಹಸ॒,
ಓಮಿತ್ಯಾ॒ತ್ಮಾನಂ॑-ಯುಂಁಜೀತೈ॒ತದ್ವೈ ಮ॑ಹೋಪ॒ನಿಷ॑ದಂ ದೇ॒ವಾನಾಂ॒ ಗುಹ್ಯಂ॒-ಯಁ ಏ॒ವಂ-ವೇಁದ॑ ಬ್ರ॒ಹ್ಮಣೋ॑ ಮಹಿ॒ಮಾನ॑-ಮಾಪ್ನೋತಿ॒ ತಸ್ಮಾ᳚-ದ್ಬ್ರ॒ಹ್ಮಣೋ॑ ಮಹಿ॒ಮಾನ॑-ಮಿತ್ಯುಪ॒ನಿಷತ್ ॥ 79.20 (ತೈ. ಅರ. 6.79.1)
ಜ್ಞಾನಯಜ್ಞಃ (4.55)
ತಸ್ಯೈ॒ವಂ-ವಿಁ॒ದುಷೋ॑ ಯ॒ಜ್ಞಸ್ಯಾ॒ತ್ಮಾ ಯಜ॑ಮಾನಃ-ಶ್ರ॒ಧ್ದಾಪತ್ನೀ॒ ಶರೀ॑ರ-ಮಿ॒ದ್ಧ್ಮಮುರೋ॒
ವೇದಿ॒-ರ್ಲೋಮಾ॑ನಿ ಬ॒ರ॒ಃಇ-ರ್ವೇ॒ದಃ-ಶಿಖಾ॒ ಹೃದ॑ಯಂ॒-ಯೂಁಪಃ॒ ಕಾಮ॒ ಆಜ್ಯಂ॑ ಮ॒ನ್ಯುಃ ಪ॒ಶು-ಸ್ತಪೋ॒ಽಗ್ನಿ-ರ್ದಮಃ॑ ಶಮಯಿ॒ತಾ ದಕ್ಷಿ॑ಣಾ॒-ವಾಗ್ಘೋತಾ᳚ ಪ್ರಾ॒ಣ
ಉ॑ದ್ಗ॒ತಾ ಚಕ್ಷು॑ರಧ್ವ॒ರ್ಯು-ರ್ಮನೋ॒ ಬ್ರಹ್ಮಾ॒ ಶ್ರೋತ್ರ॑ಮ॒ಗ್ನೀ-ಧ್ಯಾವ॒ಧ್ದ್ರಿಯ॑ತೇ॒ ಸಾ ದೀ॒ಕ್ಷಾ ಯದಶ್ರ್ನಾ॑ತಿ॒ ತಧ್ದವಿ॒-ರ್ಯತ್ಪಿಬ॑ತಿ॒ ತದ॑ಸ್ಯ ಸೋಮಪಾ॒ನಂ-ಯಁದ್ರಮ॑ತೇ॒ ತದು॑ಪ॒ಸದೋ॒ ಯಥ್ ಸಂ॒ಚರ॑-ತ್ಯುಪ॒ವಿಶ॑-ತ್ಯು॒ತ್ತಿಷ್ಠ॑ತೇ ಚ॒ ಸಪ್ರ॑ವ॒ರ್ಗ್ಯೋ॑ ಯನ್ಮುಖಂ॒ ತದಾ॑ಹವ॒ನೀಯೋ॒ ಯಾ ವ್ಯಾಹೃ॑ತಿ-ರಾಹು॒ತಿ-ರ್ಯದ॑ಸ್ಯ ವಿ॒ಜ್ಞಾನಂ॒ ತಜ್ಜು॒ಹೋತಿ॒ ಯಥ್ಸಾ॒ಯಂ ಪ್ರಾ॒ತರ॑ತ್ತಿ॒ ತಥ್ಸ॒ಮಿಧಂ॒-ಯಁತ್ಪ್ರಾ॒ತ-ರ್ಮ॒ದ್ಧ್ಯಂದಿ॑ನಗ್ಂ ಸಾ॒ಯಂ ಚ॒ ತಾನಿ॒ ಸವ॑ನಾನಿ॒ ಯೇ ಅ॑ಹೋರಾ॒ತ್ರೇ ತೇ ದ॑ರ್ಶಪೂರ್ಣಮಾ॒ಸೌ ಯೇ᳚ಽರ್ಧಮಾ॒ಸಾಶ್ಚ॒ ಮಾಸಾ᳚ಶ್ಚ॒ ತೇ ಚಾ॑ತುರ್ಮಾ॒ಸ್ಯಾನಿ॒ ಯ ಋ॒ತವ॒ಸ್ತೇ ಪ॑ಶುಬಂ॒ಧಾ ಯೇ ಸಂ॑ವಁಥ್ಸ॒ರಾಶ್ಚ॑ ಪರಿವಥ್ಸ॒ರಾಶ್ಚ॒ ತೇಽಹ॑ರ್ಗ॒ಣಾಃ ಸ॑ರ್ವ ವೇದ॒ಸಂ-ವಾಁ ಏ॒ತಥ್ ಸ॒ತ್ರಂ-ಯಁನ್ಮರ॑ಣಂ॒ ತದ॑ವ॒ಭೃಥ॑
ಏ॒ತದ್ವೈ ಜ॑ರಾಮರ್ಯ-ಮಗ್ನಿಹೋ॒ತ್ರಗ್ಂ ಸ॒ತ್ರಂ-ಯಁ ಏ॒ವಂ-ವಿಁ॒ದ್ವಾ-ನು॑ದ॒ಗಯ॑ನೇ ಪ್ರ॒ಮೀಯ॑ತೇ
ದೇ॒ವಾನಾ॑ಮೇ॒ವ ಮ॑ಹಿ॒ಮಾನಂ॑ ಗ॒ತ್ವಾಽಽದಿ॒ತ್ಯಸ್ಯ॒ ಸಾಯು॑ಜ್ಯಂ ಗಚ್ಛ॒ತ್ಯಥ॒ ಯೋ ದ॑ಕ್ಷಿ॒ಣೇ ಪ್ರ॒ಮೀಯ॑ತೇ ಪಿತೃ॒ಣಾ-ಮೇ॒ವ ಮ॑ಹಿ॒ಮಾನಂ॑ ಗ॒ತ್ವಾ ಚಂ॒ದ್ರಮ॑ಸಃ॒ ಸಾಯು॑ಜ್ಯಗ್ಂ ಸಲೋ॒ಕತಾ॑-ಮಾಪ್ನೋತ್ಯೇ॒ತೌ ವೈ ಸೂ᳚ರ್ಯಾ ಚಂದ್ರ॒ಮಸೌ᳚-ರ್ಮಹಿ॒ಮಾನೌ᳚ ಬ್ರಾಹ್ಮ॒ಣೋ ವಿ॒ದ್ವಾ-ನ॒ಭಿಜ॑ಯತಿ॒ ತಸ್ಮಾ᳚-ದ್ಬ್ರ॒ಹ್ಮಣೋ॑ ಮಹಿ॒ಮಾನ॑ಮಾಪ್ನೋತಿ॒ ತಸ್ಮಾ᳚-ದ್ಬ್ರ॒ಹ್ಮಣೋ॑ ಮಹಿ॒ಮಾನ॑-ಮಿತ್ಯುಪ॒ನಿಷತ್ ॥ 80.1 (ತೈ. ಅರ. 6.80.1)
ಸ॒ಹ ನಾ॑ ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯಂ॑ ಕರವಾವಹೈ । ತೇ॒ಜ॒ಸ್ವಿನಾ॒ ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ ॥
॥ ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ॥
ಇತಿ ಮಹಾನಾರಾಯಣೋಪನಿಷತ್ ಸಮಾಪ್ತಾ
(ಅಂಭ॒ಸ್ಯೈಕ॑ಪಂಚಾ॒ಶಚ್ಛ॒ತಂ – ಜಾ॒ತವೇ॑ದಸೇ॒ ಚತು॑ರ್ದಶ॒ – ಭೂರನ್ನಂ॒ – ಭೂರ॒ಗ್ನಯೇ॒ – ಭೂರ॒ಗ್ನಯೇ॒ ಚೈಕ॑ಮೇಕಂ – ಪಾಹಿ – ಪಾ॒ಹಿ ಚ॒ತ್ವಾರಿ॑ ಚತ್ವಾರಿ॒ – ಯಃ ಛಂದ॑ಸಾಂ॒ ದ್ವೇ – ನಮೋ॒ ಬ್ರಹ್ಮ॑ಣೇ – ಋ॒ತಂ ತಪೋ॒ – ಯಥಾ॑ ವೃ॒ಕ್ಷಸ್ಯೈಕ॑ ಮೇಕ – ಮ॒ಣೋರಣೀ॑ಯಾ॒ಗ್ಗ್॒ ಶ್ಚತು॑ಸ್ತ್ರಿಗ್ಂಶಥ್ – ಸಹಸ್ರ॒ಶೀ॑ಷ॒ಗ್ಂ॒ ಷಟ್ವಿ॑ಗ್ಂಶತಿ – ರಾದಿ॒ತ್ಯೋ ವಾ ಏ॒ಷ – ಆ॑ದಿ॒ತ್ಯೋ ವೈ ತೇಜ॒ ಏಕ॑ಮೇಕಂ॒ – ನಿಧ॑ನಪತಯೇ॒ ತ್ರಯೋ॑ವಿಗ್ಂಶತಿಃ – ಸ॒ದ್ಯೋಜಾ॒ತಂ ತ್ರೀಣಿ॑ – ವಾಮದೇ॒ವಾಯೈಕ॑ – ಮ॒ಘೋರೇ᳚ಭ್ಯ॒ – ಸ್ತತ್ಪುರು॑ಷಾಯ॒ ದ್ವೇ ದ್ವೇ॒ – ಈಶಾನೋ – ನಮೋ ಹಿರಣ್ಯಬಾಹವ॒ ಏಕ॑ಮೇಕ – ಮೃ॒ತಗ್ಂ ಸ॒ತ್ಯಂ ದ್ವೇ – ಸರ್ವೋ॒ ವೈ ಚ॒ತ್ವಾರಿ॒ – ಕದ್ರು॒ದ್ರಾಯ॒ ತ್ರೀಣಿ॒ – ಯಸ್ಯ॒ ವೈ ಕಂಕ॑ತೀ – ಕೃಣು॒ಷ್ವ ಪಾಜೋ – ಽದಿ॑ತಿ॒ – ರಾಪೋ॒ ವಾ ಇ॒ದಗ್ಂ ಸರ್ವ॒ ಮೇಕ॑ಮೇಕ॒ – ಮಾಪಃ॑ ಪುನಂತು ಚ॒ತ್ವಾ – ರ್ಯಗ್ನಿಶ್ಚ – ಸೂರ್ಯಶ್ಚ ನವ॑ – ನ॒ವೋಮಿತಿ॑ ಚ॒ತ್ವಾ – ರ್ಯಾಯಾ॑ತು॒ ಪಚೌ – ಜೋ॑ಽಸಿ॒ ದಶೋ॒ – ತ್ತಮೇ॑ ಚ॒ತ್ವಾರಿ॒ – ಘೃಣಿ॒ಸ್ತ್ರೀಣಿ॒ – ಬ್ರಹ್ಮ॑ಮೇತು॒ ಮಾಂ-ಯಾಁಸ್ತೇ᳚ ಬ್ರಹ್ಮಹ॒ತ್ಯಾಂ ದ್ವಾದ॑ಶ॒ – ಬ್ರಹ್ಮ॑ ಮೇ॒ಧಯಾ॒ಽದ್ಯಾ ನ॑ ಇ॒ಮಂ ಭ್ರೂ॑ಷಹ॒ತ್ಯಾಂ – ಬ್ರಹ್ಮ॑ ಮೇ॒ಧವಾ᳚ ಬ್ರ॒ಹ್ಮಾ ದೇ॒ವಾನಾ॑ಮಿ॒ದಂ-ವೀಁ॑ರಹ॒ತ್ಯಾಮೇಕಾ॒ನ್ನ ವಿ॑ಗ್ಂಶತಿ॒ ರೇಕಾ॒ನ್ನವಿ॑ಗ್ಂಶತಿ–ರ್ ಮೇ॒ಧಾ ದೇ॒ವೀ – ಮೇ॒ಧಾಂ ಮ॒ ಇಂದ್ರ॑ಶ್ಚ॒ತ್ವಾರಿ॑ ಚತ್ವಾ॒ರ್ಯಾ – ಮಾಂ᳚ ಮೇ॒ಧಾ ದ್ವೇ – ಮಯಿ॑ ಮೇ॒ಧಾ ಮೇಕ॒- ಮಪೈ॑ತು॒ – ಪರಂ॒ – ವಾಁತಂ॑ ಪ್ರಾ॒ಣ – ಮ॑ಮುತ್ರ॒ಭೂಯಾ॒-ದ್- ದ್ಧರಿ॒ಗ್ಂ॒ – ಶಲ್ಕೈ॑ರ॒ಗ್ನಿಂ – ಮಾ ಛಿ॑ದೋ ಮೃತ್ಯೋ॒ – ಮಾ ನೋ॑ ಮ॒ಹಾಂತಂ॒ – ಮಾನ॑ಸ್ತೋ॒ಕೇ – ಪ್ರಜಾ॑ಪತೇ – ಸ್ವಸ್ತಿ॒ದಾ – ತ್ರ್ಯಂ॑ಬಕಂ॒ – ಯೇಁ ತೇ॑ ಸ॒ಹಸ್ರಂ॒ ದ್ವೇ ದ್ವೇ – ಮೃ॒ತ್ಯವೇ॒ ಸ್ವಾಹೈಕಂ॑ – ದೇ॒ವಕೃ॑ತ॒ಸ್ಯೈಕಾ॑ದಶ॒ – ಯದ್ವೋ॑ ದೇವಾಃ॒ – ಕಾಮೋಽಕಾರ್ಷೀ॒ನ್ – ಮನ್ಯುರಕಾರ್ಷೀ॒-ದ್ದ್ವೇ ದ್ವೇ॒ – ತಿಲಾಂಜುಹೋಮಿ ಗಾವಃ ಶ್ರಿಯಂ ಪ್ರ॑ಜಾಃ ಪಂಚ॒ – ತಿಲಾಃ ಕೃಣ್ಷಾಶ್ಚೋರ॑ಸ್ಯ॒ ಶ್ರೀಃ ಪ್ರಜ್ಞಾತು ಜಾತವೇ॑ದಃ ಸ॒ಪ್ತ – ಪ್ರಾಣ ವಾಕ್ ತ್ವಕ್ ಛಿರ ಉತ್ತಿಷ್ಠ ಪುರುಷ॑ ಪಂಚ॒ – ಪೃಥಿವೀ ಶಬ್ದ ಮನೋ ವಾಗ್ ವ್ಯಕ್ತಾಽಽತ್ಮಾಽಂತರಾತ್ಮಾ ಪರಮಾತ್ಮಾ ಮೇ᳚ ಕ್ಷು॒ಧೇಽನ್ನಮಯ॒ ಪಂಚ॑ದಶಾ॒ – ಗ್ನಯೇ॒ ಸ್ವಾಹೈಕ॑ಚತ್ವಾರಿ॒ಗ್ಂ॒ಶ – ರ್ದೋ᳚ ಂತದ್ಬ್ರ॒ಹ್ಮ ನವ॑ – ಶ್ರ॒ದ್ಧಾಯಾಂ᳚ ಪ್ರಾ॒ಣೇ ನಿವಿಷ್ಟ॒ ಶ್ಚತು॑ರ್ವಿಗ್ಂಶತಿಃ – ಶ್ರ॒ದ್ಧಾಯಾಂ॒ ದಶಾ – ಂಗುಷ್ಠ ಮಾತ್ರಃ ಪುರುಷೋ ದ್ವೇ – ವಾಂಮ॑ ಆ॒ಸನ್ನ॒ಷ್ಟೌ – ವಯಃ॑ ಸುಪ॒ರ್ಷಾಃ – ಪ್ರಾಣಾನಾಂ ಗ್ರಂಥಿರಸಿ ದ್ವೇ ದ್ವೇ – ನಮೋ ರುದ್ರಾಯೈಕಂ॒ – ತ್ವಮ॑ಗ್ನೇ॒ ದ್ಯುಭಿರ್॒ ದ್ವೇ – ಶಿ॒ವೇನ॑ ಮೇ॒ ಸಂತಿ॑ಷ್ಠಸ್ವ – ಸ॒ತ್ಯಂ – ಪ್ರಾ॑ಜಾಪ॒ತ್ಯ – ಸ್ತಸ್ಯೈ॒ವ ಮೇಕ॑ ಮೇಕ॒ ಮಶತಿಃ)