ദ്വിരദവദന വിഷമരദ വരദ ജയേശാന ശാംതവരസദന ।
സദനവസാദന ദയയാ കുരു സാദനമംതരായസ്യ ॥ 1 ॥
ഇംദുകലാ കലിതാലിക സാലികശുംഭത്കപോലപാലിയുഗ ।
വികടസ്ഫുടകടധാരാധാരോഽസ്യസ്യ പ്രപംചസ്യ ॥ 2 ॥
വരപരശുപാശപാണേ പണിതപണായാപണായിതോഽസി യതഃ ।
ആരൂഹ്യ വജ്രദംതം ആഖും വിദധാസി വിപദംതമ് ॥ 3 ॥
ലംബോദര ദൂര്വാസന ശയധൃതസാമോദമോദകാശനക ।
ശനകൈരവലോകയ മാം യമാംതരായാപഹാരിചാരുദൃശാ ॥ 4 ॥
ആനംദതുംദിലാഖിലവൃംദാരകവൃംദവംദിതാംഘ്രിയുഗ ।
സുഖധൃതദംഡരസാലോ നാഗജഭാലോഽതിഭാസി വിഭോ ॥ 5 ॥
അഗണേയഗുണേശാത്മജ ചിംതകചിംതാമണേ ഗണേശാന ।
സ്വചരണശരണം കരുണാവരുണാലയ ദേവ പാഹി മാം ദീനമ് ॥ 6 ॥
രുചിരവചോഽമൃതരാവോന്നീതാ നീതാ ദിവം സ്തുതിഃ സ്ഫീതാ ।
ഇതി ഷട്പദീ മദീയാ ഗണപതിപാദാംബുജേ വിശതു ॥ 7 ॥
ഇതി ചിംതാമണിഷട്പദീ ॥