દ્વિરદવદન વિષમરદ વરદ જયેશાન શાંતવરસદન ।
સદનવસાદન દયયા કુરુ સાદનમંતરાયસ્ય ॥ 1 ॥
ઇંદુકલા કલિતાલિક સાલિકશુંભત્કપોલપાલિયુગ ।
વિકટસ્ફુટકટધારાધારોઽસ્યસ્ય પ્રપંચસ્ય ॥ 2 ॥
વરપરશુપાશપાણે પણિતપણાયાપણાયિતોઽસિ યતઃ ।
આરૂહ્ય વજ્રદંતં આખું વિદધાસિ વિપદંતમ્ ॥ 3 ॥
લંબોદર દૂર્વાસન શયધૃતસામોદમોદકાશનક ।
શનકૈરવલોકય માં યમાંતરાયાપહારિચારુદૃશા ॥ 4 ॥
આનંદતુંદિલાખિલવૃંદારકવૃંદવંદિતાંઘ્રિયુગ ।
સુખધૃતદંડરસાલો નાગજભાલોઽતિભાસિ વિભો ॥ 5 ॥
અગણેયગુણેશાત્મજ ચિંતકચિંતામણે ગણેશાન ।
સ્વચરણશરણં કરુણાવરુણાલય દેવ પાહિ માં દીનમ્ ॥ 6 ॥
રુચિરવચોઽમૃતરાવોન્નીતા નીતા દિવં સ્તુતિઃ સ્ફીતા ।
ઇતિ ષટ્પદી મદીયા ગણપતિપાદાંબુજે વિશતુ ॥ 7 ॥
ઇતિ ચિંતામણિષટ્પદી ॥