പ്രസന്നാംഗരാഗം പ്രഭാകാംചനാംഗം
ജഗദ്ഭീതശൌര്യം തുഷാരാദ്രിധൈര്യമ് ।
തൃണീഭൂതഹേതിം രണോദ്യദ്വിഭൂതിം
ഭജേ വായുപുത്രം പവിത്രാപ്തമിത്രമ് ॥ 1 ॥
ഭജേ പാവനം ഭാവനാ നിത്യവാസം
ഭജേ ബാലഭാനു പ്രഭാ ചാരുഭാസമ് ।
ഭജേ ചംദ്രികാ കുംദ മംദാര ഹാസം
ഭജേ സംതതം രാമഭൂപാല ദാസമ് ॥ 2 ॥
ഭജേ ലക്ഷ്മണപ്രാണരക്ഷാതിദക്ഷം
ഭജേ തോഷിതാനേക ഗീര്വാണപക്ഷമ് ।
ഭജേ ഘോര സംഗ്രാമ സീമാഹതാക്ഷം
ഭജേ രാമനാമാതി സംപ്രാപ്തരക്ഷമ് ॥ 3 ॥
കൃതാഭീലനാധക്ഷിതക്ഷിപ്തപാദം
ഘനക്രാംത ഭൃംഗം കടിസ്ഥോരു ജംഘമ് ।
വിയദ്വ്യാപ്തകേശം ഭുജാശ്ലേഷിതാശ്മം
ജയശ്രീ സമേതം ഭജേ രാമദൂതമ് ॥ 4 ॥
ചലദ്വാലഘാതം ഭ്രമച്ചക്രവാളം
കഠോരാട്ടഹാസം പ്രഭിന്നാബ്ജജാംഡമ് ।
മഹാസിംഹനാദാ ദ്വിശീര്ണത്രിലോകം
ഭജേ ചാംജനേയം പ്രഭും വജ്രകായമ് ॥ 5 ॥
രണേ ഭീഷണേ മേഘനാദേ സനാദേ
സരോഷേ സമാരോപണാമിത്ര മുഖ്യേ ।
ഖഗാനാം ഘനാനാം സുരാണാം ച മാര്ഗേ
നടംതം സമംതം ഹനൂമംതമീഡേ ॥ 6 ॥
ഘനദ്രത്ന ജംഭാരി ദംഭോളി ഭാരം
ഘനദ്ദംത നിര്ധൂത കാലോഗ്രദംതമ് ।
പദാഘാത ഭീതാബ്ധി ഭൂതാദിവാസം
രണക്ഷോണിദക്ഷം ഭജേ പിംഗളാക്ഷമ് ॥ 7 ॥
മഹാഗ്രാഹപീഡാം മഹോത്പാതപീഡാം
മഹാരോഗപീഡാം മഹാതീവ്രപീഡാമ് ।
ഹരത്യസ്തു തേ പാദപദ്മാനുരക്തോ
നമസ്തേ കപിശ്രേഷ്ഠ രാമപ്രിയായ ॥ 8 ॥
ജരാഭാരതോ ഭൂരി പീഡാം ശരീരേ
നിരാധാരണാരൂഢ ഗാഢ പ്രതാപീ ।
ഭവത്പാദഭക്തിം ഭവദ്ഭക്തിരക്തിം
കുരു ശ്രീഹനൂമത്പ്രഭോ മേ ദയാളോ ॥ 9 ॥
മഹായോഗിനോ ബ്രഹ്മരുദ്രാദയോ വാ
ന ജാനംതി തത്ത്വം നിജം രാഘവസ്യ ।
കഥം ജ്ഞായതേ മാദൃശേ നിത്യമേവ
പ്രസീദ പ്രഭോ വാനരേംദ്രോ നമസ്തേ ॥ 10 ॥
നമസ്തേ മഹാസത്ത്വവാഹായ തുഭ്യം
നമസ്തേ മഹാവജ്രദേഹായ തുഭ്യമ് ।
നമസ്തേ പരീഭൂത സൂര്യായ തുഭ്യം
നമസ്തേ കൃതാമര്ത്യ കാര്യായ തുഭ്യമ് ॥ 11 ॥
നമസ്തേ സദാ ബ്രഹ്മചര്യായ തുഭ്യം
നമസ്തേ സദാ വായുപുത്രായ തുഭ്യമ് ।
നമസ്തേ സദാ പിംഗളാക്ഷായ തുഭ്യം
നമസ്തേ സദാ രാമഭക്തായ തുഭ്യമ് ॥ 12 ॥
ഹനൂമദ്ഭുജംഗപ്രയാതം പ്രഭാതേ
പ്രദോഷേഽപി വാ ചാര്ധരാത്രേഽപി മര്ത്യഃ ।
പഠന്നശ്നതോഽപി പ്രമുക്തോഘജാലോ
സദാ സര്വദാ രാമഭക്തിം പ്രയാതി ॥ 13 ॥
ഇതി ശ്രീമദാംജനേയ ഭുജംഗപ്രയാത സ്തോത്രമ് ।