ପ୍ରସନ୍ନାଂଗରାଗଂ ପ୍ରଭାକାଂଚନାଂଗଂ
ଜଗଦ୍ଭୀତଶୌର୍ୟଂ ତୁଷାରାଦ୍ରିଧୈର୍ୟମ୍ ।
ତୃଣୀଭୂତହେତିଂ ରଣୋଦ୍ୟଦ୍ଵିଭୂତିଂ
ଭଜେ ଵାୟୁପୁତ୍ରଂ ପଵିତ୍ରାପ୍ତମିତ୍ରମ୍ ॥ 1 ॥
ଭଜେ ପାଵନଂ ଭାଵନା ନିତ୍ୟଵାସଂ
ଭଜେ ବାଲଭାନୁ ପ୍ରଭା ଚାରୁଭାସମ୍ ।
ଭଜେ ଚଂଦ୍ରିକା କୁଂଦ ମଂଦାର ହାସଂ
ଭଜେ ସଂତତଂ ରାମଭୂପାଲ ଦାସମ୍ ॥ 2 ॥
ଭଜେ ଲକ୍ଷ୍ମଣପ୍ରାଣରକ୍ଷାତିଦକ୍ଷଂ
ଭଜେ ତୋଷିତାନେକ ଗୀର୍ଵାଣପକ୍ଷମ୍ ।
ଭଜେ ଘୋର ସଂଗ୍ରାମ ସୀମାହତାକ୍ଷଂ
ଭଜେ ରାମନାମାତି ସଂପ୍ରାପ୍ତରକ୍ଷମ୍ ॥ 3 ॥
କୃତାଭୀଲନାଧକ୍ଷିତକ୍ଷିପ୍ତପାଦଂ
ଘନକ୍ରାଂତ ଭୃଂଗଂ କଟିସ୍ଥୋରୁ ଜଂଘମ୍ ।
ଵିୟଦ୍ଵ୍ୟାପ୍ତକେଶଂ ଭୁଜାଶ୍ଲେଷିତାଶ୍ମଂ
ଜୟଶ୍ରୀ ସମେତଂ ଭଜେ ରାମଦୂତମ୍ ॥ 4 ॥
ଚଲଦ୍ଵାଲଘାତଂ ଭ୍ରମଚ୍ଚକ୍ରଵାଳଂ
କଠୋରାଟ୍ଟହାସଂ ପ୍ରଭିନ୍ନାବ୍ଜଜାଂଡମ୍ ।
ମହାସିଂହନାଦା ଦ୍ଵିଶୀର୍ଣତ୍ରିଲୋକଂ
ଭଜେ ଚାଂଜନେୟଂ ପ୍ରଭୁଂ ଵଜ୍ରକାୟମ୍ ॥ 5 ॥
ରଣେ ଭୀଷଣେ ମେଘନାଦେ ସନାଦେ
ସରୋଷେ ସମାରୋପଣାମିତ୍ର ମୁଖ୍ୟେ ।
ଖଗାନାଂ ଘନାନାଂ ସୁରାଣାଂ ଚ ମାର୍ଗେ
ନଟଂତଂ ସମଂତଂ ହନୂମଂତମୀଡେ ॥ 6 ॥
ଘନଦ୍ରତ୍ନ ଜଂଭାରି ଦଂଭୋଳି ଭାରଂ
ଘନଦ୍ଦଂତ ନିର୍ଧୂତ କାଲୋଗ୍ରଦଂତମ୍ ।
ପଦାଘାତ ଭୀତାବ୍ଧି ଭୂତାଦିଵାସଂ
ରଣକ୍ଷୋଣିଦକ୍ଷଂ ଭଜେ ପିଂଗଳାକ୍ଷମ୍ ॥ 7 ॥
ମହାଗ୍ରାହପୀଡାଂ ମହୋତ୍ପାତପୀଡାଂ
ମହାରୋଗପୀଡାଂ ମହାତୀଵ୍ରପୀଡାମ୍ ।
ହରତ୍ୟସ୍ତୁ ତେ ପାଦପଦ୍ମାନୁରକ୍ତୋ
ନମସ୍ତେ କପିଶ୍ରେଷ୍ଠ ରାମପ୍ରିୟାୟ ॥ 8 ॥
ଜରାଭାରତୋ ଭୂରି ପୀଡାଂ ଶରୀରେ
ନିରାଧାରଣାରୂଢ ଗାଢ ପ୍ରତାପୀ ।
ଭଵତ୍ପାଦଭକ୍ତିଂ ଭଵଦ୍ଭକ୍ତିରକ୍ତିଂ
କୁରୁ ଶ୍ରୀହନୂମତ୍ପ୍ରଭୋ ମେ ଦୟାଳୋ ॥ 9 ॥
ମହାୟୋଗିନୋ ବ୍ରହ୍ମରୁଦ୍ରାଦୟୋ ଵା
ନ ଜାନଂତି ତତ୍ତ୍ଵଂ ନିଜଂ ରାଘଵସ୍ୟ ।
କଥଂ ଜ୍ଞାୟତେ ମାଦୃଶେ ନିତ୍ୟମେଵ
ପ୍ରସୀଦ ପ୍ରଭୋ ଵାନରେଂଦ୍ରୋ ନମସ୍ତେ ॥ 10 ॥
ନମସ୍ତେ ମହାସତ୍ତ୍ଵଵାହାୟ ତୁଭ୍ୟଂ
ନମସ୍ତେ ମହାଵଜ୍ରଦେହାୟ ତୁଭ୍ୟମ୍ ।
ନମସ୍ତେ ପରୀଭୂତ ସୂର୍ୟାୟ ତୁଭ୍ୟଂ
ନମସ୍ତେ କୃତାମର୍ତ୍ୟ କାର୍ୟାୟ ତୁଭ୍ୟମ୍ ॥ 11 ॥
ନମସ୍ତେ ସଦା ବ୍ରହ୍ମଚର୍ୟାୟ ତୁଭ୍ୟଂ
ନମସ୍ତେ ସଦା ଵାୟୁପୁତ୍ରାୟ ତୁଭ୍ୟମ୍ ।
ନମସ୍ତେ ସଦା ପିଂଗଳାକ୍ଷାୟ ତୁଭ୍ୟଂ
ନମସ୍ତେ ସଦା ରାମଭକ୍ତାୟ ତୁଭ୍ୟମ୍ ॥ 12 ॥
ହନୂମଦ୍ଭୁଜଂଗପ୍ରୟାତଂ ପ୍ରଭାତେ
ପ୍ରଦୋଷେଽପି ଵା ଚାର୍ଧରାତ୍ରେଽପି ମର୍ତ୍ୟଃ ।
ପଠନ୍ନଶ୍ନତୋଽପି ପ୍ରମୁକ୍ତୋଘଜାଲୋ
ସଦା ସର୍ଵଦା ରାମଭକ୍ତିଂ ପ୍ରୟାତି ॥ 13 ॥
ଇତି ଶ୍ରୀମଦାଂଜନେୟ ଭୁଜଂଗପ୍ରୟାତ ସ୍ତୋତ୍ରମ୍ ।