॥ dvitīya muṇḍakē prathamaḥ khaṇḍaḥ ॥
tadēta-thsatyaṃ
yathā sudīptā-tpāvakādvisphuliṅgāḥ
sahasraśaḥ prabhavantē sarūpāḥ ।
tathā-‘kṣarādvividhā-ssōmya bhāvāḥ
prajāyantē tatra chaivāpi yanti ॥ 1॥
divyō hyamūrtaḥ puruṣa-ssa bāhyābhyantarō hyajaḥ ।
aprāṇō hyamanā-śśubhrō hyakṣarā-tparataḥ paraḥ ॥ 2॥
ētasmājjāyatē prāṇō mana-ssarvēndriyāṇi cha ।
khaṃ vāyurjyōtirāpaḥ pṛthivī viśvasya dhāriṇī ॥ 3॥
agnīrmūrdhā chakṣuṣī chandrasūryau
diśa-śśrōtrē vāg vivṛtāścha vēdāḥ ।
vāyuḥ prāṇō hṛdayaṃ viśvamasya padbhyāṃ
pṛthivī hyēṣa sarvabhūtāntarātmā ॥ 4॥
tasmādagni-ssamidhō yasya sūryaḥ
sōmā-tparjanya ōṣadhayaḥ pṛthivyām ।
pumā-nrēta-ssiñchati yōṣitāyāṃ
bahvīḥ prajāḥ puruṣā-thsamprasūtāḥ ॥ 5॥
tasmādṛcha-ssāma yajūṃṣi dīkṣā
yajñāścha sarvē kratavō dakṣiṇāścha ।
saṃvatsaraścha yajamānaścha lōkāḥ
sōmō yatra pavatē yatra sūryaḥ ॥ 6॥
tasmāchcha dēvā bahudhā samprasūtāḥ
sādhyā manuṣyāḥ paśavō vayāṃsi ।
prāṇāpānau vrīhiyavau tapaścha
śraddhā satya-mbrahmacharyaṃ vidhiścha ॥ 7॥
sapta prāṇāḥ prabhavanti tasmāt
saptārchiṣa-ssamidha-ssapta hōmāḥ ।
sapta imē lōkā yēṣu charanti prāṇā
guhāśayā nihitā-ssapta sapta ॥ 8॥
ata-ssamudrā girayaścha sarvē-‘smāt
syandantē sindhava-ssarvarūpāḥ ।
ataścha sarvā ōṣadhayō rasaścha
yēnaiṣa bhūtaistiṣṭhatē hyantarātmā ॥ 9॥
puruṣa ēvēdaṃ viśva-ṅkarma tapō brahma parāmṛtam ।
ētadyō vēda nihita-ṅguhāyāṃ
sō-‘vidyāgranthiṃ vikiratīha sōmya ॥ 10॥
॥ iti muṇḍakōpaniṣadi dvitīyamuṇḍakē prathamaḥ khaṇḍaḥ ॥