(ଋଗ୍ଵେଦ – 10.037)
ନମୋ॑ ମି॒ତ୍ରସ୍ୟ॒ ଵରୁ॑ଣସ୍ୟ॒ ଚକ୍ଷ॑ସେ ମ॒ହୋ ଦେ॒ଵାୟ॒ ତଦୃ॒ତଂ ସ॑ପର୍ୟତ ।
ଦୂ॒ରେ॒ଦୃଶେ॑ ଦେ॒ଵଜା॑ତାୟ କେ॒ତଵେ॑ ଦି॒ଵସ୍ପୁ॒ତ୍ରାୟ॒ ସୂ॒ର୍ୟା॑ୟ ଶଂସତ ॥ 1
ସା ମା॑ ସ॒ତ୍ୟୋକ୍ତିଃ॒ ପରି॑ ପାତୁ ଵି॒ଶ୍ଵତୋ॒ ଦ୍ୟାଵା॑ ଚ॒ ୟତ୍ର॑ ତ॒ତନ॒ନ୍ନହା॑ନି ଚ ।
ଵିଶ୍ଵ॑ମ॒ନ୍ୟନ୍ନି ଵି॑ଶତେ॒ ୟଦେଜ॑ତି ଵି॒ଶ୍ଵାହାପୋ॑ ଵି॒ଶ୍ଵାହୋଦେ॑ତି॒ ସୂର୍ୟଃ॑ ॥ 2
ନ ତେ॒ ଅଦେ॑ଵଃ ପ୍ର॒ଦିଵୋ॒ ନି ଵା॑ସତେ॒ ୟଦେ॑ତ॒ଶେଭିଃ॑ ପତ॒ରୈ ର॑ଥ॒ର୍ୟସି॑ ।
ପ୍ରା॒ଚୀନ॑ମ॒ନ୍ୟଦନୁ॑ ଵର୍ତତେ॒ ରଜ॒ ଉଦ॒ନ୍ୟେନ॒ ଜ୍ୟାତି॑ଷା ୟାସି ସୂର୍ୟ ॥ 3
ୟେନ॑ ସୂର୍ୟ॒ ଜ୍ୟୋତି॑ଷା॒ ବାଧ॑ସେ॒ ତମୋ॒ ଜଗ॑ଚ୍ଚ॒ ଵିଶ୍ଵ॑ମୁଦି॒ୟର୍ଷି॑ ଭା॒ନୁନା॑ ।
ତେନା॒ସ୍ମଦ୍ଵିଶ୍ଵା॒ମନି॑ରା॒ମନା॑ହୁତି॒ମପାମୀ॑ଵା॒ମପ॑ ଦୁ॒ଷ୍ଷ୍ଵପ୍ନ୍ୟଂ॑ ସୁଵ ॥ 4
ଵିଶ୍ଵ॑ସ୍ୟ॒ ହି ପ୍ରେଷି॑ତୋ॒ ରକ୍ଷ॑ସି ଵ୍ର॒ତମହେ॑ଳୟନ୍ନୁ॒ଚ୍ଚର॑ସି ସ୍ଵ॒ଧା ଅନୁ॑ ।
ୟଦ॒ଦ୍ୟ ତ୍ଵା॑ ସୂର୍ୟୋପ॒ବ୍ରଵା॑ମହୈ॒ ତଂ ନୋ॑ ଦେ॒ଵା ଅନୁ॑ ମଂସୀରତ॒ କ୍ରତୁ॑ମ୍ ॥ 5
ତଂ ନୋ॒ ଦ୍ୟାଵା॑ପୃଥି॒ଵୀ ତନ୍ନ॒ ଆପ॒ ଇଂଦ୍ରଃ॑ ଶୃଣ୍ଵଂତୁ ମ॒ରୁତୋ॒ ହଵଂ॒-ଵଁଚଃ॑ ।
ମା ଶୂନେ॑ ଭୂମ॒ ସୂର୍ୟ॑ସ୍ୟ ସଂ॒ଦୃଶି॑ ଭ॒ଦ୍ରଂ ଜୀଵଂ॑ତୋ ଜର॒ଣାମ॑ଶୀମହି ॥ 6
ଵି॒ଶ୍ଵାହା॑ ତ୍ଵା ସୁ॒ମନ॑ସଃ ସୁ॒ଚକ୍ଷ॑ସଃ ପ୍ର॒ଜାଵଂ॑ତୋ ଅନମୀ॒ଵା ଅନା॑ଗସଃ ।
ଉ॒ଦ୍ୟଂତଂ॑ ତ୍ଵା ମିତ୍ରମହୋ ଦି॒ଵେଦି॑ଵେ॒ ଜ୍ୟୋଗ୍ଜୀ॒ଵାଃ ପ୍ରତି॑ ପଶ୍ୟେମ ସୂର୍ୟ ॥ 7
ମହି॒ ଜ୍ୟୋତି॒ର୍ବିଭ୍ର॑ତଂ ତ୍ଵା ଵିଚକ୍ଷଣ॒ ଭାସ୍ଵଂ॑ତଂ॒ ଚକ୍ଷୁ॑ଷେଚକ୍ଷୁଷେ॒ ମୟଃ॑ ।
ଆ॒ରୋହଂ॑ତଂ ବୃହ॒ତଃ ପାଜ॑ସ॒ସ୍ପରି॑ ଵ॒ୟଂ ଜୀ॒ଵାଃ ପ୍ରତି॑ ପଶ୍ୟେମ ସୂର୍ୟ ॥ 8
ୟସ୍ୟ॑ ତେ॒ ଵିଶ୍ଵା॒ ଭୁଵ॑ନାନି କେ॒ତୁନା॒ ପ୍ର ଚେର॑ତେ॒ ନି ଚ॑ ଵି॒ଶଂତେ॑ ଅ॒କ୍ତୁଭିଃ॑ ।
ଅ॒ନା॒ଗା॒ସ୍ତ୍ଵେନ॑ ହରିକେଶ ସୂ॒ର୍ୟାହ୍ନା॑ହ୍ନା ନୋ॒ ଵସ୍ୟ॑ସାଵସ୍ୟ॒ସୋଦି॑ହି ॥ 9
ଶଂ ନୋ॑ ଭଵ॒ ଚକ୍ଷ॑ସା॒ ଶଂ ନୋ॒ ଅହ୍ନା॒ ଶଂ ଭା॒ନୁନା॒ ଶଂ ହି॒ମା ଶଂ ଘୃଣେନ॑ ।
ୟଥା॒ ଶମଧ୍ଵଂ॒ଛମସ॑ଦ୍ଦୁରୋ॒ଣେ ତତ୍ସୂ॑ର୍ୟ॒ ଦ୍ରଵି॑ଣଂ ଧେହି ଚି॒ତ୍ରମ୍ ॥ 10
ଅ॒ସ୍ମାକଂ॑ ଦେଵା ଉ॒ଭୟା॑ୟ॒ ଜନ୍ମ॑ନେ॒ ଶର୍ମ॑ ୟଚ୍ଛତ ଦ୍ଵି॒ପଦେ॒ ଚତୁ॑ଷ୍ପଦେ ।
ଅ॒ଦତ୍ପିବ॑ଦୂ॒ର୍ଜୟ॑ମାନ॒ମାଶି॑ତଂ॒ ତଦ॒ସ୍ମେ ଶଂ-ୟୋଁର॑ର॒ପୋ ଦ॑ଧାତନ ॥ 11
ୟଦ୍ଵୋ॑ ଦେଵାଶ୍ଚକୃ॒ମ ଜି॒ହ୍ଵୟା॑ ଗୁ॒ରୁ ମନ॑ସୋ ଵା॒ ପ୍ରୟୁ॑ତୀ ଦେଵ॒ହେଳ॑ନମ୍ ।
ଅରା॑ଵା॒ ୟୋ ନୋ॑ ଅ॒ଭି ଦୁ॑ଚ୍ଛୁନା॒ୟତେ॒ ତସ୍ମିଂ॒ତଦେନୋ॑ ଵସଵୋ॒ ନି ଧେ॑ତନ ॥ 12
ଓଂ ଶାଂତିଃ॒ ଶାଂତିଃ॒ ଶାଂତିଃ॑ ।