අස්යාඃ චාක්ෂුෂීවිද්යායාඃ අහිර්බුධ්න්ය ඍෂිඃ । ගායත්රී ඡංදඃ । සූර්යෝ දේවතා । චක්ෂුරෝගනිවෘත්තයේ ජපේ විනියෝගඃ ।
ඕං චක්ෂුශ්චක්ෂුශ්චක්ෂුඃ තේජඃ ස්ථිරෝ භව । මාං පාහි පාහි । ත්වරිතං චක්ෂුරෝගාන් ශමය ශමය । මම ජාතරූපං තේජෝ දර්ශය දර්ශය । යථාහං අංධෝ න ස්යාං තථා කල්පය කල්පය । කල්යාණං කුරු කුරු । යානි මම පූර්වජන්මෝපාර්ජිතානි චක්ෂුඃ ප්රතිරෝධක දුෂ්කෘතානි සර්වාණි නිර්මූලය නිර්මූලය ।
ඕං නමඃ චක්ෂුස්තේජෝදාත්රේ දිව්යාය භාස්කරාය । ඕං නමඃ කරුණාකරායාऽමෘතාය । ඕං නමඃ සූර්යාය । ඕං නමෝ භගවතේ සූර්යායාක්ෂිතේජසේ නමඃ । ඛේචරාය නමඃ । මහතේ නමඃ । රජසේ නමඃ । තමසේ නමඃ । අසතෝ මා සද්ගමය । තමසෝ මා ජ්යෝතිර්ගමය । මෘත්යෝර්මා අමෘතං ගමය । උෂ්ණෝ භගවාන් ශුචිරූපඃ । හංසෝ භගවාන් ශුචිරප්රතිරූපඃ ।
ය ඉමාං චක්ෂුෂ්මතීං විද්යාං බ්රාහ්මණෝ නිත්යමධීතේ න තස්ය අක්ෂිරෝගෝ භවති । න තස්ය කුලේ අංධෝ භවති । අෂ්ටෞ බ්රාහ්මණාන් ග්රාහයිත්වා විද්යාසිද්ධිර්භවති ।
විශ්වරූපං ඝෘණිනං ජාතවේදසං හිරණ්මයං පුරුෂං ජ්යෝතීරූපං තපංතං සහස්රරශ්මිඃ ශතධාවර්තමානඃ । පුරඃ ප්රජානාමුදයත්යේෂ සූර්යඃ ।
ඕං නමෝ භගවතේ ආදිත්යාය අක්ෂිතේජසේ අහෝ වාහිනි වාහිනි ස්වාහා ।
[ඕං නමෝ භගවතේ ආදිත්යාය සූර්යායාහෝ වාහින්යහෝවාහිනී ස්වාහා ।]