අශ්වතර උවාච ।
ජගද්ධාත්රීමහං දේවීමාරිරාධයිෂුඃ ශුභාම් ।
ස්තෝෂ්යේ ප්රණම්ය ශිරසා බ්රහ්මයෝනිං සරස්වතීම් ॥ 1 ॥
සදසද්දේවි යත්කිංචින්මෝක්ෂවච්චාර්ථවත්පදම් ।
තත්සර්වං ත්වය්යසංයෝගං යෝගවද්දේවි සංස්ථිතම් ॥ 2 ॥
ත්වමක්ෂරං පරං දේවි යත්ර සර්වං ප්රතිෂ්ඨිතම් ।
අක්ෂරං පරමං දේවි සංස්ථිතං පරමාණුවත් ॥ 3 ॥
අක්ෂරං පරමං බ්රහ්ම විශ්වංචෛතත්ක්ෂරාත්මකම් ।
දාරුණ්යවස්ථිතෝ වහ්නිර්භෞමාශ්ච පරමාණවඃ ॥ 4 ॥
තථා ත්වයි ස්ථිතං බ්රහ්ම ජගච්චේදමශේෂතඃ ।
ඕංකාරාක්ෂරසංස්ථානං යත්තු දේවි ස්ථිරාස්ථිරම් ॥ 5 ॥
තත්ර මාත්රාත්රයං සර්වමස්ති යද්දේවි නාස්ති ච ।
ත්රයෝ ලෝකාස්ත්රයෝ වේදාස්ත්රෛවිද්යං පාවකත්රයම් ॥ 6 ॥
ත්රීණි ජ්යෝතීංෂි වර්ණාශ්ච ත්රයෝ ධර්මාගමාස්තථා ।
ත්රයෝ ගුණාස්ත්රයඃ ශබ්දස්ත්රයෝ වේදාස්තථාශ්රමාඃ ॥ 7 ॥
ත්රයඃ කාලාස්තථාවස්ථාඃ පිතරෝऽහර්නිශාදයඃ ।
ඒතන්මාත්රාත්රයං දේවි තව රූපං සරස්වති ॥ 8 ॥
විභින්නදර්ශිනාමාද්යා බ්රහ්මණෝ හි සනාතනාඃ ।
සෝමසංස්ථා හවිඃ සංස්ථාඃ පාකසංස්ථාශ්ච සප්ත යාඃ ॥ 9 ॥
තාස්ත්වදුච්චාරණාද්දේවි ක්රියංතේ බ්රහ්මවාදිභිඃ ।
අනිර්දේශ්යං තථා චාන්යදර්ධමාත්රාන්විතං පරම් ॥ 10 ॥
අවිකාර්යක්ෂයං දිව්යං පරිණාමවිවර්ජිතම් ।
තවෛතත්පරමං රූපං යන්න ශක්යං මයෝදිතුම් ॥ 11 ॥
න චාස්යේන ච තජ්ජිහ්වා තාම්රෝෂ්ඨාදිභිරුච්යතේ ।
ඉංද්රෝऽපි වසවෝ බ්රහ්මා චංද්රාර්කෞ ජ්යෝතිරේව ච ॥ 12 ॥
විශ්වාවාසං විශ්වරූපං විශ්වේශං පරමේශ්වරම් ।
සාංඛ්යවේදාංතවාදෝක්තං බහුශාඛාස්ථිරීකෘතම් ॥ 13 ॥
අනාදිමධ්යනිධනං සදසන්න සදේව යත් ।
ඒකංත්වනේකං නාප්යේකං භවභේදසමාශ්රිතම් ॥ 14 ॥
අනාඛ්යං ෂඩ්ගුණාඛ්යංච වර්ගාඛ්යං ත්රිගුණාශ්රයම් ।
නානාශක්තිමතාමේකං ශක්තිවෛභවිකං පරම් ॥ 15 ॥
සුඛාසුඛං මහාසෞඛ්යරූපං ත්වයි විභාව්යතේ ।
ඒවං දේවි ත්වයා ව්යාප්තං සකලං නිෂ්කලංච යත් ।
අද්වෛතාවස්ථිතං බ්රහ්ම යච්ච ද්වෛතේ ව්යවස්ථිතම් ॥ 16 ॥
යේऽර්ථා නිත්යා යේ විනශ්යංති චාන්යේ
යේ වා ස්ථූලා යේ ච සූක්ෂ්මාතිසූක්ෂ්මාඃ ।
යේ වා භූමෞ යේऽංතරීක්ෂේऽන්යතෝ වා
තේෂාං තේෂාං ත්වත්ත ඒවෝපලබ්ධිඃ ॥ 17 ॥
යච්චාමූර්තං යච්ච මූර්තං සමස්තං
යද්වා භූතේෂ්වේකමේකංච කිංචිත් ।
යද්දිව්යස්ති ක්ෂ්මාතලේ ඛේऽන්යතෝ වා
ත්වත්සංබංධං ත්වත්ස්වරෛර්ව්යංජනෛශ්ච ॥ 18 ॥
ඉති ශ්රීමාර්කංඩේයපුරාණේ ත්රයෝවිංශෝऽධ්යායේ අශ්වතර ප්රෝක්ත මහාසරස්වතී ස්තවම් ।