සදා බාලරූපාऽපි විඝ්නාද්රිහංත්රී
මහාදංතිවක්ත්රාऽපි පංචාස්යමාන්යා ।
විධීංද්රාදිමෘග්යා ගණේශාභිධා මේ
විධත්තාං ශ්රියං කාऽපි කළ්යාණමූර්තිඃ ॥ 1 ॥
න ජානාමි ශබ්දං න ජානාමි චාර්ථං
න ජානාමි පද්යං න ජානාමි ගද්යම් ।
චිදේකා ෂඩාස්යා හෘදි ද්යෝතතේ මේ
මුඛාන්නිඃසරංතේ ගිරශ්චාපි චිත්රම් ॥ 2 ॥
මයූරාධිරූඪං මහාවාක්යගූඪං
මනෝහාරිදේහං මහච්චිත්තගේහම් ।
මහීදේවදේවං මහාවේදභාවං
මහාදේවබාලං භජේ ලෝකපාලම් ॥ 3 ॥
යදා සංනිධානං ගතා මානවා මේ
භවාංභෝධිපාරං ගතාස්තේ තදෛව ।
ඉති ව්යංජයන්සිංධුතීරේ ය ආස්තේ
තමීඩේ පවිත්රං පරාශක්තිපුත්රම් ॥ 4 ॥
යථාබ්ධේස්තරංගා ලයං යාංති තුංගා-
ස්තථෛවාපදඃ සංනිධෞ සේවතාං මේ ।
ඉතීවෝර්මිපංක්තීර්නෘණාං දර්ශයංතං
සදා භාවයේ හෘත්සරෝජේ ගුහං තම් ॥ 5 ॥
ගිරෞ මන්නිවාසේ නරා යේऽධිරූඪා-
ස්තදා පර්වතේ රාජතේ තේऽධිරූඪාඃ ।
ඉතීව බ්රුවන්ගංධශෛලාධිරූඪඃ
ස දේවෝ මුදේ මේ සදා ෂණ්මුඛෝऽස්තු ॥ 6 ॥
මහාංභෝධිතීරේ මහාපාපචෝරේ
මුනීංද්රානුකූලේ සුගංධාඛ්යශෛලේ ।
ගුහායාං වසංතං ස්වභාසා ලසංතං
ජනාර්තිං හරංතං ශ්රයාමෝ ගුහං තම් ॥ 7 ॥
ලසත්ස්වර්ණගේහේ නෘණාං කාමදෝහේ
සුමස්තෝමසංඡන්නමාණික්යමංචේ ।
සමුද්යත්සහස්රාර්කතුල්යප්රකාශං
සදා භාවයේ කාර්තිකේයං සුරේශම් ॥ 8 ॥
රණද්ධංසකේ මංජුලේऽත්යංතශෝණේ
මනෝහාරිලාවණ්යපීයූෂපූර්ණේ ।
මනඃෂට්පදෝ මේ භවක්ලේශතප්තඃ
සදා මෝදතාං ස්කංද තේ පාදපද්මේ ॥ 9 ॥
සුවර්ණාභදිව්යාංබරෛර්භාසමානාං
ක්වණත්කිංකිණීමේඛලාශෝභමානාම් ।
ලසද්ධේමපට්ටේන විද්යෝතමානාං
කටිං භාවයේ ස්කංද තේ දීප්යමානාම් ॥ 10 ॥
පුලිංදේශකන්යාඝනාභෝගතුංග-
ස්තනාලිංගනාසක්තකාශ්මීරරාගම් ।
නමස්යාම්යහං තාරකාරේ තවෝරඃ
ස්වභක්තාවනේ සර්වදා සානුරාගම් ॥ 11 ॥
විධෞ ක්ලෘප්තදංඩාන්ස්වලීලාධෘතාංඩා-
න්නිරස්තේභශුංඩාංද්විෂත්කාලදංඩාන් ।
හතේංද්රාරිෂංඩාන්ජගත්රාණශෞංඩා-
න්සදා තේ ප්රචංඩාන්ශ්රයේ බාහුදංඩාන් ॥ 12 ॥
සදා ශාරදාඃ ෂණ්මෘගාංකා යදි ස්යුඃ
සමුද්යංත ඒව ස්ථිතාශ්චේත්සමංතාත් ।
සදා පූර්ණබිංබාඃ කළංකෛශ්ච හීනා-
ස්තදා ත්වන්මුඛානාං බ්රුවේ ස්කංද සාම්යම් ॥ 13 ॥
ස්ඵුරන්මංදහාසෛඃ සහංසානි චංච-
ත්කටාක්ෂාවලීභෘංගසංඝෝජ්ජ්වලානි ।
සුධාස්යංදිබිංබාධරාණීශසූනෝ
තවාලෝකයේ ෂණ්මුඛාංභෝරුහාණි ॥ 14 ॥
විශාලේෂු කර්ණාංතදීර්ඝේෂ්වජස්රං
දයාස්යංදිෂු ද්වාදශස්වීක්ෂණේෂු ।
මයීෂත්කටාක්ෂඃ සකෘත්පාතිතශ්චේ-
ද්භවේත්තේ දයාශීල කා නාම හානිඃ ॥ 15 ॥
සුතාංගෝද්භවෝ මේऽසි ජීවේති ෂඩ්ධා
ජපන්මංත්රමීශෝ මුදා ජිඝ්රතේ යාන් ।
ජගද්භාරභෘද්භ්යෝ ජගන්නාථ තේභ්යඃ
කිරීටෝජ්ජ්වලේභ්යෝ නමෝ මස්තකේභ්යඃ ॥ 16 ॥
ස්ඵුරද්රත්නකේයූරහාරාභිරාම-
ශ්චලත්කුංඩලශ්රීලසද්ගංඩභාගඃ ।
කටෞ පීතවාසාඃ කරේ චාරුශක්තිඃ
පුරස්තාන්මමාස්තාං පුරාරේස්තනූජඃ ॥ 17 ॥
ඉහායාහි වත්සේති හස්තාන්ප්රසාර්යා-
හ්වයත්යාදරාච්ඡංකරේ මාතුරංකාත් ।
සමුත්පත්ය තාතං ශ්රයංතං කුමාරං
හරාශ්ලිෂ්ටගාත්රං භජේ බාලමූර්තිම් ॥ 18 ॥
කුමාරේශසූනෝ ගුහ ස්කංද සේනා-
පතේ ශක්තිපාණේ මයූරාධිරූඪ ।
පුලිංදාත්මජාකාංත භක්තාර්තිහාරින්
ප්රභෝ තාරකාරේ සදා රක්ෂ මාං ත්වම් ॥ 19 ॥
ප්රශාංතේංද්රියේ නෂ්ටසංජ්ඤේ විචේෂ්ටේ
කඵෝද්ගාරිවක්ත්රේ භයෝත්කංපිගාත්රේ ।
ප්රයාණෝන්මුඛේ මය්යනාථේ තදානීං
ද්රුතං මේ දයාලෝ භවාග්රේ ගුහ ත්වම් ॥ 20 ॥
කෘතාංතස්ය දූතේෂු චංඩේෂු කෝපා-
ද්දහච්ඡිංද්ධි භිංද්ධීති මාං තර්ජයත්සු ।
මයූරං සමාරුහ්ය මා භෛරිති ත්වං
පුරඃ ශක්තිපාණිර්මමායාහි ශීඝ්රම් ॥ 21 ॥
ප්රණම්යාසකෘත්පාදයෝස්තේ පතිත්වා
ප්රසාද්ය ප්රභෝ ප්රාර්ථයේऽනේකවාරම් ।
න වක්තුං ක්ෂමෝऽහං තදානීං කෘපාබ්ධේ
න කාර්යාංතකාලේ මනාගප්යුපේක්ෂා ॥ 22 ॥
සහස්රාංඩභෝක්තා ත්වයා ශූරනාමා
හතස්තාරකඃ සිංහවක්ත්රශ්ච දෛත්යඃ ।
මමාංතර්හෘදිස්ථං මනඃක්ලේශමේකං
න හංසි ප්රභෝ කිං කරෝමි ක්ව යාමි ॥ 23 ॥
අහං සර්වදා දුඃඛභාරාවසන්නෝ
භවාංදීනබංධුස්ත්වදන්යං න යාචේ ।
භවද්භක්තිරෝධං සදා ක්ලෘප්තබාධං
මමාධිං ද්රුතං නාශයෝමාසුත ත්වම් ॥ 24 ॥
අපස්මාරකුෂ්ටක්ෂයාර්ශඃ ප්රමේහ-
ජ්වරෝන්මාදගුල්මාදිරෝගා මහාංතඃ ।
පිශාචාශ්ච සර්වේ භවත්පත්රභූතිං
විලෝක්ය ක්ෂණාත්තාරකාරේ ද්රවංතේ ॥ 25 ॥
දෘශි ස්කංදමූර්තිඃ ශ්රුතෞ ස්කංදකීර්ති-
ර්මුඛේ මේ පවිත්රං සදා තච්චරිත්රම් ।
කරේ තස්ය කෘත්යං වපුස්තස්ය භෘත්යං
ගුහේ සංතු ලීනා මමාශේෂභාවාඃ ॥ 26 ॥
මුනීනාමුතාහෝ නෘණාං භක්තිභාජා-
මභීෂ්ටප්රදාඃ සංති සර්වත්ර දේවාඃ ।
නෘණාමංත්යජානාමපි ස්වාර්ථදානේ
ගුහාද්දේවමන්යං න ජානේ න ජානේ ॥ 27 ॥
කලත්රං සුතා බංධුවර්ගඃ පශුර්වා
නරෝ වාථ නාරී ගෘහේ යේ මදීයාඃ ।
යජංතෝ නමංතඃ ස්තුවංතෝ භවංතං
ස්මරංතශ්ච තේ සංතු සර්වේ කුමාර ॥ 28 ॥
මෘගාඃ පක්ෂිණෝ දංශකා යේ ච දුෂ්ටා-
ස්තථා ව්යාධයෝ බාධකා යේ මදංගේ ।
භවච්ඡක්තිතීක්ෂ්ණාග්රභින්නාඃ සුදූරේ
විනශ්යංතු තේ චූර්ණිතක්රෞංචශෛල ॥ 29 ॥
ජනිත්රී පිතා ච ස්වපුත්රාපරාධං
සහේතේ න කිං දේවසේනාධිනාථ ।
අහං චාතිබාලෝ භවාන් ලෝකතාතඃ
ක්ෂමස්වාපරාධං සමස්තං මහේශ ॥ 30 ॥
නමඃ කේකිනේ ශක්තයේ චාපි තුභ්යං
නමශ්ඡාග තුභ්යං නමඃ කුක්කුටාය ।
නමඃ සිංධවේ සිංධුදේශාය තුභ්යං
පුනඃ ස්කංදමූර්තේ නමස්තේ නමෝऽස්තු ॥ 31 ॥
ජයානංදභූමං ජයාපාරධාමං
ජයාමෝඝකීර්තේ ජයානංදමූර්තේ ।
ජයානංදසිංධෝ ජයාශේෂබංධෝ
ජය ත්වං සදා මුක්තිදානේශසූනෝ ॥ 32 ॥
භුජංගාඛ්යවෘත්තේන ක්ලෘප්තං ස්තවං යඃ
පඨේද්භක්තියුක්තෝ ගුහං සංප්රණම්ය ।
ස පුත්රාන්කලත්රං ධනං දීර්ඝමායු-
ර්ලභේත්ස්කංදසායුජ්යමංතේ නරඃ සඃ ॥ 33 ॥