ଅସ୍ୟ ଶ୍ରୀ ଶିଵକଵଚ ସ୍ତୋତ୍ର\f1 \f0 ମହାମଂତ୍ରସ୍ୟ ଋଷଭୟୋଗୀଶ୍ଵର ଋଷିଃ ।
ଅନୁଷ୍ଟୁପ୍ ଛଂଦଃ ।
ଶ୍ରୀସାଂବସଦାଶିଵୋ ଦେଵତା ।
ଓଂ ବୀଜମ୍ ।
ନମଃ ଶକ୍ତିଃ ।
ଶିଵାୟେତି କୀଲକମ୍ ।
ମମ ସାଂବସଦାଶିଵପ୍ରୀତ୍ୟର୍ଥେ ଜପେ ଵିନିୟୋଗଃ ॥
କରନ୍ୟାସଃ
ଓଂ ସଦାଶିଵାୟ ଅଂଗୁଷ୍ଠାଭ୍ୟାଂ ନମଃ । ନଂ ଗଂଗାଧରାୟ ତର୍ଜନୀଭ୍ୟାଂ ନମଃ । ମଂ ମୃତ୍ୟୁଂଜୟାୟ ମଧ୍ୟମାଭ୍ୟାଂ ନମଃ ।
ଶିଂ ଶୂଲପାଣୟେ ଅନାମିକାଭ୍ୟାଂ ନମଃ । ଵାଂ ପିନାକପାଣୟେ କନିଷ୍ଠିକାଭ୍ୟାଂ ନମଃ । ୟଂ ଉମାପତୟେ କରତଲକରପୃଷ୍ଠାଭ୍ୟାଂ ନମଃ ।
ହୃଦୟାଦି ଅଂଗନ୍ୟାସଃ
ଓଂ ସଦାଶିଵାୟ ହୃଦୟାୟ ନମଃ । ନଂ ଗଂଗାଧରାୟ ଶିରସେ ସ୍ଵାହା । ମଂ ମୃତ୍ୟୁଂଜୟାୟ ଶିଖାୟୈ ଵଷଟ୍ ।
ଶିଂ ଶୂଲପାଣୟେ କଵଚାୟ ହୁମ୍ । ଵାଂ ପିନାକପାଣୟେ ନେତ୍ରତ୍ରୟାୟ ଵୌଷଟ୍ । ୟଂ ଉମାପତୟେ ଅସ୍ତ୍ରାୟ ଫଟ୍ । ଭୂର୍ଭୁଵସ୍ସୁଵରୋମିତି ଦିଗ୍ବଂଧଃ ॥
ଧ୍ୟାନମ୍
ଵଜ୍ରଦଂଷ୍ଟ୍ରଂ ତ୍ରିନୟନଂ କାଲକଂଠ ମରିଂଦମମ୍ ।
ସହସ୍ରକରମତ୍ୟୁଗ୍ରଂ ଵଂଦେ ଶଂଭୁଂ ଉମାପତିମ୍ ॥
ରୁଦ୍ରାକ୍ଷକଂକଣଲସତ୍କରଦଂଡୟୁଗ୍ମଃ ପାଲାଂତରାଲସିତଭସ୍ମଧୃତତ୍ରିପୁଂଡ୍ରଃ ।
ପଂଚାକ୍ଷରଂ ପରିପଠନ୍ ଵରମଂତ୍ରରାଜଂ ଧ୍ୟାୟନ୍ ସଦା ପଶୁପତିଂ ଶରଣଂ ଵ୍ରଜେଥାଃ ॥
ଅତଃ ପରଂ ସର୍ଵପୁରାଣଗୁହ୍ୟଂ ନିଃଶେଷପାପୌଘହରଂ ପଵିତ୍ରମ୍ ।
ଜୟପ୍ରଦଂ ସର୍ଵଵିପତ୍ପ୍ରମୋଚନଂ ଵକ୍ଷ୍ୟାମି ଶୈଵଂ କଵଚଂ ହିତାୟ ତେ ॥
ପଂଚପୂଜା
ଲଂ ପୃଥିଵ୍ୟାତ୍ମନେ ଗଂଧଂ ସମର୍ପୟାମି ।
ହଂ ଆକାଶାତ୍ମନେ ପୁଷ୍ପୈଃ ପୂଜୟାମି ।
ୟଂ ଵାୟ୍ଵାତ୍ମନେ ଧୂପଂ ଆଘ୍ରାପୟାମି ।
ରଂ ଅଗ୍ନ୍ୟାତ୍ମନେ ଦୀପଂ ଦର୍ଶୟାମି ।
ଵଂ ଅମୃତାତ୍ମନେ ଅମୃତଂ ମହାନୈଵେଦ୍ୟଂ ନିଵେଦୟାମି ।
ସଂ ସର୍ଵାତ୍ମନେ ସର୍ଵୋପଚାରପୂଜାଂ ସମର୍ପୟାମି ॥
ମଂତ୍ରଃ
ଋଷଭ ଉଵାଚ
ନମସ୍କୃତ୍ୟ ମହାଦେଵଂ ଵିଶ୍ଵଵ୍ୟାପିନମୀଶ୍ଵରମ୍ ।
ଵକ୍ଷ୍ୟେ ଶିଵମୟଂ ଵର୍ମ ସର୍ଵରକ୍ଷାକରଂ ନୃଣାମ୍ ॥ 1 ॥
ଶୁଚୌ ଦେଶେ ସମାସୀନୋ ୟଥାଵତ୍କଲ୍ପିତାସନଃ ।
ଜିତେଂଦ୍ରିୟୋ ଜିତପ୍ରାଣଶ୍ଚିଂତୟେଚ୍ଛିଵମଵ୍ୟୟମ୍ ॥ 2 ॥
ହୃତ୍ପୁଂଡରୀକାଂତରସନ୍ନିଵିଷ୍ଟଂ ସ୍ଵତେଜସା ଵ୍ୟାପ୍ତନଭୋଽଵକାଶମ୍ ।
ଅତୀଂଦ୍ରିୟଂ ସୂକ୍ଷ୍ମମନଂତମାଦ୍ୟଂ ଧ୍ୟାୟେତ୍ ପରାନଂଦମୟଂ ମହେଶମ୍ ॥
ଧ୍ୟାନାଵଧୂତାଖିଲକର୍ମବଂଧ- ଶ୍ଚିରଂ ଚିଦାନଂଦ ନିମଗ୍ନଚେତାଃ ।
ଷଡକ୍ଷରନ୍ୟାସ ସମାହିତାତ୍ମା ଶୈଵେନ କୁର୍ୟାତ୍କଵଚେନ ରକ୍ଷାମ୍ ॥
ମାଂ ପାତୁ ଦେଵୋଽଖିଲଦେଵତାତ୍ମା ସଂସାରକୂପେ ପତିତଂ ଗଭୀରେ ।
ତନ୍ନାମ ଦିଵ୍ୟଂ ପରମଂତ୍ରମୂଲଂ ଧୁନୋତୁ ମେ ସର୍ଵମଘଂ ହୃଦିସ୍ଥମ୍ ॥
ସର୍ଵତ୍ର ମାଂ ରକ୍ଷତୁ ଵିଶ୍ଵମୂର୍ତି- ର୍ଜ୍ୟୋତିର୍ମୟାନଂଦଘନଶ୍ଚିଦାତ୍ମା ।
ଅଣୋରଣିୟାନୁରୁଶକ୍ତିରେକଃ ସ ଈଶ୍ଵରଃ ପାତୁ ଭୟାଦଶେଷାତ୍ ॥
ୟୋ ଭୂସ୍ଵରୂପେଣ ବିଭର୍ତି ଵିଶ୍ଵଂ ପାୟାତ୍ସ ଭୂମେର୍ଗିରିଶୋଽଷ୍ଟମୂର୍ତିଃ ।
ୟୋଽପାଂ ସ୍ଵରୂପେଣ ନୃଣାଂ କରୋତି ସଂଜୀଵନଂ ସୋଽଵତୁ ମାଂ ଜଲେଭ୍ୟଃ ॥
କଲ୍ପାଵସାନେ ଭୁଵନାନି ଦଗ୍ଧ୍ଵା ସର୍ଵାଣି ୟୋ ନୃତ୍ୟତି ଭୂରିଲୀଲଃ ।
ସ କାଲରୁଦ୍ରୋଽଵତୁ ମାଂ ଦଵାଗ୍ନେଃ ଵାତ୍ୟାଦିଭୀତେରଖିଲାଚ୍ଚ ତାପାତ୍ ॥
ପ୍ରଦୀପ୍ତଵିଦ୍ୟୁତ୍କନକାଵଭାସୋ ଵିଦ୍ୟାଵରାଭୀତି କୁଠାରପାଣିଃ ।
ଚତୁର୍ମୁଖସ୍ତତ୍ପୁରୁଷସ୍ତ୍ରିନେତ୍ରଃ ପ୍ରାଚ୍ୟାଂ ସ୍ଥିତୋ ରକ୍ଷତୁ ମାମଜସ୍ରମ୍ ॥
କୁଠାରଖେଟାଂକୁଶ ଶୂଲଢକ୍କା- କପାଲପାଶାକ୍ଷ ଗୁଣାଂଦଧାନଃ ।
ଚତୁର୍ମୁଖୋ ନୀଲରୁଚିସ୍ତ୍ରିନେତ୍ରଃ ପାୟାଦଘୋରୋ ଦିଶି ଦକ୍ଷିଣସ୍ୟାମ୍ ॥
କୁଂଦେଂଦୁଶଂଖସ୍ଫଟିକାଵଭାସୋ ଵେଦାକ୍ଷମାଲା ଵରଦାଭୟାଂକଃ ।
ତ୍ର୍ୟକ୍ଷଶ୍ଚତୁର୍ଵକ୍ତ୍ର ଉରୁପ୍ରଭାଵଃ ସଦ୍ୟୋଽଧିଜାତୋଽଵତୁ ମାଂ ପ୍ରତୀଚ୍ୟାମ୍ ॥
ଵରାକ୍ଷମାଲାଭୟଟଂକହସ୍ତଃ ସରୋଜକିଂଜଲ୍କସମାନଵର୍ଣଃ ।
ତ୍ରିଲୋଚନଶ୍ଚାରୁଚତୁର୍ମୁଖୋ ମାଂ ପାୟାଦୁଦୀଚ୍ୟାଂ ଦିଶି ଵାମଦେଵଃ ॥
ଵେଦାଭୟେଷ୍ଟାଂକୁଶଟଂକପାଶ- କପାଲଢକ୍କାକ୍ଷରଶୂଲପାଣିଃ ।
ସିତଦ୍ୟୁତିଃ ପଂଚମୁଖୋଽଵତାନ୍ମାଂ ଈଶାନ ଊର୍ଧ୍ଵଂ ପରମପ୍ରକାଶଃ ॥
ମୂର୍ଧାନମଵ୍ୟାନ୍ମମ ଚଂଦ୍ରମୌଲିଃ ଭାଲଂ ମମାଵ୍ୟାଦଥ ଭାଲନେତ୍ରଃ ।
ନେତ୍ରେ ମମାଵ୍ୟାଦ୍ଭଗନେତ୍ରହାରୀ ନାସାଂ ସଦା ରକ୍ଷତୁ ଵିଶ୍ଵନାଥଃ ॥
ପାୟାଚ୍ଛ୍ରୁତୀ ମେ ଶ୍ରୁତିଗୀତକୀର୍ତିଃ କପୋଲମଵ୍ୟାତ୍ସତତଂ କପାଲୀ ।
ଵକ୍ତ୍ରଂ ସଦା ରକ୍ଷତୁ ପଂଚଵକ୍ତ୍ରୋ ଜିହ୍ଵାଂ ସଦା ରକ୍ଷତୁ ଵେଦଜିହ୍ଵଃ ॥
କଂଠଂ ଗିରୀଶୋଽଵତୁ ନୀଲକଂଠଃ ପାଣିଦ୍ଵୟଂ ପାତୁ ପିନାକପାଣିଃ ।
ଦୋର୍ମୂଲମଵ୍ୟାନ୍ମମ ଧର୍ମବାହୁଃ ଵକ୍ଷଃସ୍ଥଲଂ ଦକ୍ଷମଖାଂତକୋଽଵ୍ୟାତ୍ ॥
ମମୋଦରଂ ପାତୁ ଗିରୀଂଦ୍ରଧନ୍ଵା ମଧ୍ୟଂ ମମାଵ୍ୟାନ୍ମଦନାଂତକାରୀ ।
ହେରଂବତାତୋ ମମ ପାତୁ ନାଭିଂ ପାୟାତ୍କଟିଂ ଧୂର୍ଜଟିରୀଶ୍ଵରୋ ମେ ॥
ଊରୁଦ୍ଵୟଂ ପାତୁ କୁବେରମିତ୍ରୋ ଜାନୁଦ୍ଵୟଂ ମେ ଜଗଦୀଶ୍ଵରୋଽଵ୍ୟାତ୍ ।
ଜଂଘାୟୁଗଂ ପୁଂଗଵକେତୁରଵ୍ୟାତ୍ ପାଦୌ ମମାଵ୍ୟାତ୍ସୁରଵଂଦ୍ୟପାଦଃ ॥
ମହେଶ୍ଵରଃ ପାତୁ ଦିନାଦିୟାମେ ମାଂ ମଧ୍ୟୟାମେଽଵତୁ ଵାମଦେଵଃ ।
ତ୍ରିଲୋଚନଃ ପାତୁ ତୃତୀୟୟାମେ ଵୃଷଧ୍ଵଜଃ ପାତୁ ଦିନାଂତ୍ୟୟାମେ ॥
ପାୟାନ୍ନିଶାଦୌ ଶଶିଶେଖରୋ ମାଂ ଗଂଗାଧରୋ ରକ୍ଷତୁ ମାଂ ନିଶୀଥେ ।
ଗୌରୀପତିଃ ପାତୁ ନିଶାଵସାନେ ମୃତ୍ୟୁଂଜୟୋ ରକ୍ଷତୁ ସର୍ଵକାଲମ୍ ॥
ଅଂତଃସ୍ଥିତଂ ରକ୍ଷତୁ ଶଂକରୋ ମାଂ ସ୍ଥାଣୁଃ ସଦା ପାତୁ ବହିଃସ୍ଥିତଂ ମାମ୍ ।
ତଦଂତରେ ପାତୁ ପତିଃ ପଶୂନାଂ ସଦାଶିଵୋ ରକ୍ଷତୁ ମାଂ ସମଂତାତ୍ ॥
ତିଷ୍ଠଂତମଵ୍ୟାଦ୍ ଭୁଵନୈକନାଥଃ ପାୟାଦ୍ଵ୍ରଜଂତଂ ପ୍ରମଥାଧିନାଥଃ ।
ଵେଦାଂତଵେଦ୍ୟୋଽଵତୁ ମାଂ ନିଷଣ୍ଣଂ ମାମଵ୍ୟୟଃ ପାତୁ ଶିଵଃ ଶୟାନମ୍ ॥
ମାର୍ଗେଷୁ ମାଂ ରକ୍ଷତୁ ନୀଲକଂଠଃ ଶୈଲାଦିଦୁର୍ଗେଷୁ ପୁରତ୍ରୟାରିଃ ।
ଅରଣ୍ୟଵାସାଦି ମହାପ୍ରଵାସେ ପାୟାନ୍ମୃଗଵ୍ୟାଧ ଉଦାରଶକ୍ତିଃ ॥
କଲ୍ପାଂତକାଲୋଗ୍ରପଟୁପ୍ରକୋପ- ସ୍ଫୁଟାଟ୍ଟହାସୋଚ୍ଚଲିତାଂଡକୋଶଃ ।
ଘୋରାରିସେନାର୍ଣଵ ଦୁର୍ନିଵାର- ମହାଭୟାଦ୍ରକ୍ଷତୁ ଵୀରଭଦ୍ରଃ ॥
ପତ୍ତ୍ୟଶ୍ଵମାତଂଗରଥାଵରୂଥିନୀ- ସହସ୍ରଲକ୍ଷାୟୁତ କୋଟିଭୀଷଣମ୍ ।
ଅକ୍ଷୌହିଣୀନାଂ ଶତମାତତାୟିନାଂ ଛିଂଦ୍ୟାନ୍ମୃଡୋ ଘୋରକୁଠାର ଧାରୟା ॥
ନିହଂତୁ ଦସ୍ୟୂନ୍ପ୍ରଲୟାନଲାର୍ଚିଃ ଜ୍ଵଲତ୍ତ୍ରିଶୂଲଂ ତ୍ରିପୁରାଂତକସ୍ୟ । ଶାର୍ଦୂଲସିଂହର୍କ୍ଷଵୃକାଦିହିଂସ୍ରାନ୍ ସଂତ୍ରାସୟତ୍ଵୀଶଧନୁଃ ପିନାକଃ ॥
ଦୁଃ ସ୍ଵପ୍ନ ଦୁଃ ଶକୁନ ଦୁର୍ଗତି ଦୌର୍ମନସ୍ୟ- ଦୁର୍ଭିକ୍ଷ ଦୁର୍ଵ୍ୟସନ ଦୁଃସହ ଦୁର୍ୟଶାଂସି । ଉତ୍ପାତତାପଵିଷଭୀତିମସଦ୍ଗ୍ରହାର୍ତିଂ ଵ୍ୟାଧୀଂଶ୍ଚ ନାଶୟତୁ ମେ ଜଗତାମଧୀଶଃ ॥
ଓଂ ନମୋ ଭଗଵତେ ସଦାଶିଵାୟ
ସକଲତତ୍ଵାତ୍ମକାୟ ସର୍ଵମଂତ୍ରସ୍ଵରୂପାୟ ସର୍ଵୟଂତ୍ରାଧିଷ୍ଠିତାୟ ସର୍ଵତଂତ୍ରସ୍ଵରୂପାୟ ସର୍ଵତତ୍ଵଵିଦୂରାୟ ବ୍ରହ୍ମରୁଦ୍ରାଵତାରିଣେ ନୀଲକଂଠାୟ ପାର୍ଵତୀମନୋହରପ୍ରିୟାୟ ସୋମସୂର୍ୟାଗ୍ନିଲୋଚନାୟ ଭସ୍ମୋଦ୍ଧୂଲିତଵିଗ୍ରହାୟ ମହାମଣି ମୁକୁଟଧାରଣାୟ ମାଣିକ୍ୟଭୂଷଣାୟ ସୃଷ୍ଟିସ୍ଥିତିପ୍ରଲୟକାଲ- ରୌଦ୍ରାଵତାରାୟ ଦକ୍ଷାଧ୍ଵରଧ୍ଵଂସକାୟ ମହାକାଲଭେଦନାୟ ମୂଲଧାରୈକନିଲୟାୟ ତତ୍ଵାତୀତାୟ ଗଂଗାଧରାୟ ସର୍ଵଦେଵାଦିଦେଵାୟ ଷଡାଶ୍ରୟାୟ ଵେଦାଂତସାରାୟ ତ୍ରିଵର୍ଗସାଧନାୟ ଅନଂତକୋଟିବ୍ରହ୍ମାଂଡନାୟକାୟ ଅନଂତ ଵାସୁକି ତକ୍ଷକ- କର୍କୋଟକ ଶଂଖ କୁଲିକ- ପଦ୍ମ ମହାପଦ୍ମେତି- ଅଷ୍ଟମହାନାଗକୁଲଭୂଷଣାୟ ପ୍ରଣଵସ୍ଵରୂପାୟ ଚିଦାକାଶାୟ ଆକାଶ ଦିକ୍ ସ୍ଵରୂପାୟ ଗ୍ରହନକ୍ଷତ୍ରମାଲିନେ ସକଲାୟ କଲଂକରହିତାୟ ସକଲଲୋକୈକକର୍ତ୍ରେ ସକଲଲୋକୈକଭର୍ତ୍ରେ ସକଲଲୋକୈକସଂହର୍ତ୍ରେ ସକଲଲୋକୈକଗୁରଵେ ସକଲଲୋକୈକସାକ୍ଷିଣେ ସକଲନିଗମଗୁହ୍ୟାୟ ସକଲଵେଦାଂତପାରଗାୟ ସକଲଲୋକୈକଵରପ୍ରଦାୟ ସକଲଲୋକୈକଶଂକରାୟ ସକଲଦୁରିତାର୍ତିଭଂଜନାୟ ସକଲଜଗଦଭୟଂକରାୟ ଶଶାଂକଶେଖରାୟ ଶାଶ୍ଵତନିଜାଵାସାୟ ନିରାକାରାୟ ନିରାଭାସାୟ ନିରାମୟାୟ ନିର୍ମଲାୟ ନିର୍ମଦାୟ ନିଶ୍ଚିଂତାୟ ନିରହଂକାରାୟ ନିରଂକୁଶାୟ ନିଷ୍କଲଂକାୟ ନିର୍ଗୁଣାୟ ନିଷ୍କାମାୟ ନିରୂପପ୍ଲଵାୟ ନିରୁପଦ୍ରଵାୟ ନିରଵଦ୍ୟାୟ ନିରଂତରାୟ ନିଷ୍କାରଣାୟ ନିରାତଂକାୟ ନିଷ୍ପ୍ରପଂଚାୟ ନିସ୍ସଂଗାୟ ନିର୍ଦ୍ଵଂଦ୍ଵାୟ ନିରାଧାରାୟ ନୀରାଗାୟ ନିଷ୍କ୍ରୋଧାୟ ନିର୍ଲୋପାୟ ନିଷ୍ପାପାୟ ନିର୍ଭୟାୟ ନିର୍ଵିକଲ୍ପାୟ ନିର୍ଭେଦାୟ ନିଷ୍କ୍ରିୟାୟ ନିସ୍ତୁଲାୟ ନିଃସଂଶୟାୟ ନିରଂଜନାୟ ନିରୁପମଵିଭଵାୟ ନିତ୍ୟଶୁଦ୍ଧବୁଦ୍ଧମୁକ୍ତପରିପୂର୍ଣ- ସଚ୍ଚିଦାନଂଦାଦ୍ଵୟାୟ ପରମଶାଂତସ୍ଵରୂପାୟ ପରମଶାଂତପ୍ରକାଶାୟ ତେଜୋରୂପାୟ ତେଜୋମୟାୟ ତେଜୋଽଧିପତୟେ ଜୟ ଜୟ ରୁଦ୍ର ମହାରୁଦ୍ର ମହାରୌଦ୍ର ଭଦ୍ରାଵତାର ମହାଭୈରଵ କାଲଭୈରଵ କଲ୍ପାଂତଭୈରଵ କପାଲମାଲାଧର ଖଟ୍ଵାଂଗ ଚର୍ମଖଡ୍ଗଧର ପାଶାଂକୁଶ- ଡମରୂଶୂଲ ଚାପବାଣଗଦାଶକ୍ତିଭିଂଦିପାଲ- ତୋମର ମୁସଲ ମୁଦ୍ଗର ପାଶ ପରିଘ- ଭୁଶୁଂଡୀ ଶତଘ୍ନୀ ଚକ୍ରାଦ୍ୟାୟୁଧଭୀଷଣାକାର- ସହସ୍ରମୁଖଦଂଷ୍ଟ୍ରାକରାଲଵଦନ ଵିକଟାଟ୍ଟହାସ ଵିସ୍ଫାରିତ ବ୍ରହ୍ମାଂଡମଂଡଲ ନାଗେଂଦ୍ରକୁଂଡଲ ନାଗେଂଦ୍ରହାର ନାଗେଂଦ୍ରଵଲୟ ନାଗେଂଦ୍ରଚର୍ମଧର ନାଗେଂଦ୍ରନିକେତନ ମୃତ୍ୟୁଂଜୟ ତ୍ର୍ୟଂବକ ତ୍ରିପୁରାଂତକ ଵିଶ୍ଵରୂପ ଵିରୂପାକ୍ଷ ଵିଶ୍ଵେଶ୍ଵର ଵୃଷଭଵାହନ ଵିଷଵିଭୂଷଣ ଵିଶ୍ଵତୋମୁଖ ସର୍ଵତୋମୁଖ ମାଂ ରକ୍ଷ ରକ୍ଷ ଜ୍ଵଲଜ୍ଵଲ ପ୍ରଜ୍ଵଲ ପ୍ରଜ୍ଵଲ ମହାମୃତ୍ୟୁଭୟଂ ଶମୟ ଶମୟ ଅପମୃତ୍ୟୁଭୟଂ ନାଶୟ ନାଶୟ ରୋଗଭୟଂ ଉତ୍ସାଦୟୋତ୍ସାଦୟ ଵିଷସର୍ପଭୟଂ ଶମୟ ଶମୟ ଚୋରାନ୍ ମାରୟ ମାରୟ ମମ ଶତ୍ରୂନ୍ ଉଚ୍ଚାଟୟୋଚ୍ଚାଟୟ ତ୍ରିଶୂଲେନ ଵିଦାରୟ ଵିଦାରୟ କୁଠାରେଣ ଭିଂଧି ଭିଂଧି ଖଡ୍ଗେନ ଛିଂଦ୍ଦି ଛିଂଦ୍ଦି ଖଟ୍ଵାଂଗେନ ଵିପୋଧୟ ଵିପୋଧୟ ମୁସଲେନ ନିଷ୍ପେଷୟ ନିଷ୍ପେଷୟ ବାଣୈଃ ସଂତାଡୟ ସଂତାଡୟ ୟକ୍ଷ ରକ୍ଷାଂସି ଭୀଷୟ ଭୀଷୟ ଅଶେଷ ଭୂତାନ୍ ଵିଦ୍ରାଵୟ ଵିଦ୍ରାଵୟ କୂଷ୍ମାଂଡଭୂତଵେତାଲମାରୀଗଣ- ବ୍ରହ୍ମରାକ୍ଷସଗଣାନ୍ ସଂତ୍ରାସୟ ସଂତ୍ରାସୟ ମମ ଅଭୟଂ କୁରୁ କୁରୁ ମମ ପାପଂ ଶୋଧୟ ଶୋଧୟ ଵିତ୍ରସ୍ତଂ ମାଂ ଆଶ୍ଵାସୟ ଆଶ୍ଵାସୟ ନରକମହାଭୟାନ୍ ମାଂ ଉଦ୍ଧର ଉଦ୍ଧର ଅମୃତକଟାକ୍ଷଵୀକ୍ଷଣେନ ମାଂ- ଆଲୋକୟ ଆଲୋକୟ ସଂଜୀଵୟ ସଂଜୀଵୟ କ୍ଷୁତ୍ତୃଷ୍ଣାର୍ତଂ ମାଂ ଆପ୍ୟାୟୟ ଆପ୍ୟାୟୟ ଦୁଃଖାତୁରଂ ମାଂ ଆନଂଦୟ ଆନଂଦୟ ଶିଵକଵଚେନ ମାଂ ଆଚ୍ଛାଦୟ ଆଚ୍ଛାଦୟ
ହର ହର ମୃତ୍ୟୁଂଜୟ ତ୍ର୍ୟଂବକ ସଦାଶିଵ ପରମଶିଵ ନମସ୍ତେ ନମସ୍ତେ ନମଃ ॥
ପୂର୍ଵଵତ୍ – ହୃଦୟାଦି ନ୍ୟାସଃ ।
ପଂଚପୂଜା ॥
ଭୂର୍ଭୁଵସ୍ସୁଵରୋମିତି ଦିଗ୍ଵିମୋକଃ ॥
ଫଲଶ୍ରୁତିଃ
ଋଷଭ ଉଵାଚ ଇତ୍ୟେତତ୍ପରମଂ ଶୈଵଂ କଵଚଂ ଵ୍ୟାହୃତଂ ମୟା ।
ସର୍ଵ ବାଧା ପ୍ରଶମନଂ ରହସ୍ୟଂ ସର୍ଵ ଦେହିନାମ୍ ॥
ୟଃ ସଦା ଧାରୟେନ୍ମର୍ତ୍ୟଃ ଶୈଵଂ କଵଚମୁତ୍ତମମ୍ ।
ନ ତସ୍ୟ ଜାୟତେ କାପି ଭୟଂ ଶଂଭୋରନୁଗ୍ରହାତ୍ ॥
କ୍ଷୀଣାୟୁଃ ପ୍ରାପ୍ତମୃତ୍ୟୁର୍ଵା ମହାରୋଗହତୋଽପି ଵା ।
ସଦ୍ୟଃ ସୁଖମଵାପ୍ନୋତି ଦୀର୍ଘମାୟୁଶ୍ଚ ଵିଂଦତି ॥
ସର୍ଵଦାରିଦ୍ରୟଶମନଂ ସୌମାଂଗଲ୍ୟଵିଵର୍ଧନମ୍ ।
ୟୋ ଧତ୍ତେ କଵଚଂ ଶୈଵଂ ସ ଦେଵୈରପି ପୂଜ୍ୟତେ ॥
ମହାପାତକସଂଘାତୈର୍ମୁଚ୍ୟତେ ଚୋପପାତକୈଃ ।
ଦେହାଂତେ ମୁକ୍ତିମାପ୍ନୋତି ଶିଵଵର୍ମାନୁଭାଵତଃ ॥
ତ୍ଵମପି ଶ୍ରଦ୍ଦୟା ଵତ୍ସ ଶୈଵଂ କଵଚମୁତ୍ତମମ୍ ।
ଧାରୟସ୍ଵ ମୟା ଦତ୍ତଂ ସଦ୍ୟଃ ଶ୍ରେୟୋ ହ୍ୟଵାପ୍ସ୍ୟସି ॥
ଶ୍ରୀସୂତ ଉଵାଚ
ଇତ୍ୟୁକ୍ତ୍ଵା ଋଷଭୋ ୟୋଗୀ ତସ୍ମୈ ପାର୍ଥିଵ ସୂନଵେ ।
ଦଦୌ ଶଂଖଂ ମହାରାଵଂ ଖଡ୍ଗଂ ଚ ଅରିନିଷୂଦନମ୍ ॥
ପୁନଶ୍ଚ ଭସ୍ମ ସଂମଂତ୍ର୍ୟ ତଦଂଗଂ ପରିତୋଽସ୍ପୃଶତ୍ ।
ଗଜାନାଂ ଷଟ୍ସହସ୍ରସ୍ୟ ତ୍ରିଗୁଣସ୍ୟ ବଲଂ ଦଦୌ ॥
ଭସ୍ମପ୍ରଭାଵାତ୍ ସଂପ୍ରାପ୍ତବଲୈଶ୍ଵର୍ୟ ଧୃତି ସ୍ମୃତିଃ ।
ସ ରାଜପୁତ୍ରଃ ଶୁଶୁଭେ ଶରଦର୍କ ଇଵ ଶ୍ରିୟା ॥
ତମାହ ପ୍ରାଂଜଲିଂ ଭୂୟଃ ସ ୟୋଗୀ ନୃପନଂଦନମ୍ ।
ଏଷ ଖଡ୍ଗୋ ମୟା ଦତ୍ତସ୍ତପୋମଂତ୍ରାନୁଭାଵତଃ ॥
ଶିତଧାରମିମଂ ଖଡ୍ଗଂ ୟସ୍ମୈ ଦର୍ଶୟସେ ସ୍ଫୁଟମ୍ ।
ସ ସଦ୍ୟୋ ମ୍ରିୟତେ ଶତ୍ରୁଃ ସାକ୍ଷାନ୍ମୃତ୍ୟୁରପି ସ୍ଵୟମ୍ ॥
ଅସ୍ୟ ଶଂଖସ୍ୟ ନିର୍ହ୍ରାଦଂ ୟେ ଶୃଣ୍ଵଂତି ତଵାହିତାଃ ।
ତେ ମୂର୍ଚ୍ଛିତାଃ ପତିଷ୍ୟଂତି ନ୍ୟସ୍ତଶସ୍ତ୍ରା ଵିଚେତନାଃ ॥
ଖଡ୍ଗଶଂଖାଵିମୌ ଦିଵ୍ୟୌ ପରସୈନ୍ୟଵିନାଶକୌ ।
ଆତ୍ମସୈନ୍ୟସ୍ଵପକ୍ଷାଣାଂ ଶୌର୍ୟତେଜୋଵିଵର୍ଧନୌ ॥
ଏତୟୋଶ୍ଚ ପ୍ରଭାଵେନ ଶୈଵେନ କଵଚେନ ଚ ।
ଦ୍ଵିଷଟ୍ସହସ୍ର ନାଗାନାଂ ବଲେନ ମହତାପି ଚ ॥
ଭସ୍ମଧାରଣ ସାମର୍ଥ୍ୟାଚ୍ଛତ୍ରୁସୈନ୍ୟଂ ଵିଜେଷ୍ୟସେ ।
ପ୍ରାପ୍ୟ ସିଂହାସନଂ ପିତ୍ର୍ୟଂ ଗୋପ୍ତାଽସି ପୃଥିଵୀମିମାମ୍ ॥
ଇତି ଭଦ୍ରାୟୁଷଂ ସମ୍ୟଗନୁଶାସ୍ୟ ସମାତୃକମ୍ ।
ତାଭ୍ୟାଂ ସଂପୂଜିତଃ ସୋଽଥ ୟୋଗୀ ସ୍ଵୈରଗତିର୍ୟୟୌ ॥
ଇତି ଶ୍ରୀସ୍କାଂଦମହାପୁରାଣେ ବ୍ରହ୍ମୋତ୍ତରଖଂଡେ ଶିଵକଵଚ ପ୍ରଭାଵ ଵର୍ଣନଂ ନାମ ଦ୍ଵାଦଶୋଽଧ୍ୟାୟଃ ସଂପୂର୍ଣଃ ॥ ॥
ଦ୍\f2