ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಸಪ್ತಮಕಾಣ್ಡೇ ಪ್ರಥಮಃ ಪ್ರಶ್ನಃ- ಅಶ್ವಮೇಧಗತಮನ್ತ್ರಾಣಾಮಭಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಪ್ರ॒ಜನ॑ನ॒-ಞ್ಜ್ಯೋತಿ॑ರ॒ಗ್ನಿ-ರ್ದೇ॒ವತಾ॑ನಾ॒-ಞ್ಜ್ಯೋತಿ॑ರ್ವಿ॒ರಾಟ್ ಛನ್ದ॑ಸಾ॒-ಞ್ಜ್ಯೋತಿ॑ರ್ವಿ॒ರಾ-ಡ್ವಾ॒ಚೋ᳚-ಽಗ್ನೌ ಸ-ನ್ತಿ॑ಷ್ಠತೇ ವಿ॒ರಾಜ॑ಮ॒ಭಿ ಸಮ್ಪ॑ದ್ಯತೇ॒ ತಸ್ಮಾ॒-ತ್ತಜ್ಜ್ಯೋತಿ॑ರುಚ್ಯತೇ॒ ದ್ವೌ ಸ್ತೋಮೌ᳚ ಪ್ರಾತಸ್ಸವ॒ನಂ-ವಁ॑ಹತೋ॒ ಯಥಾ᳚ ಪ್ರಾ॒ಣಶ್ಚಾ॑-ಽಪಾ॒ನಶ್ಚ॒ ದ್ವೌ ಮಾದ್ಧ್ಯ॑ದಿನ್ನ॒ಗ್ಂ॒ ಸವ॑ನಂ॒-ಯಁಥಾ॒ ಚಖ್ಷು॑ಶ್ಚ॒ ಶ್ರೋತ್ರ॑-ಞ್ಚ॒ ದ್ವೌ ತೃ॑ತೀಯಸವ॒ನಂ-ಯಁಥಾ॒ ವಾಕ್ಚ॑ ಪ್ರತಿ॒ಷ್ಠಾ ಚ॒ ಪುರು॑ಷಸಮ್ಮಿತೋ॒ ವಾ ಏ॒ಷ ಯ॒ಜ್ಞೋ-ಽಸ್ಥೂ॑ರಿ॒- [ಯ॒ಜ್ಞೋ-ಽಸ್ಥೂ॑ರಿಃ, ಯ-ಙ್ಕಾಮ॑-ಙ್ಕಾ॒ಮಯ॑ತೇ॒] 1
-ರ್ಯ-ಙ್ಕಾಮ॑-ಙ್ಕಾ॒ಮಯ॑ತೇ॒ ತಮೇ॒ತೇನಾ॒ಭ್ಯ॑ಶ್ಞುತೇ॒ ಸರ್ವ॒ಗ್ಗ್॒ ಹ್ಯಸ್ಥೂ॑ರಿಣಾ-ಽಭ್ಯಶ್ಞು॒ತೇ᳚ ಽಗ್ನಿಷ್ಟೋ॒ಮೇನ॒ ವೈ ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ॒ ತಾ ಅ॑ಗ್ನಿಷ್ಟೋ॒ಮೇನೈ॒ವ ಪರ್ಯ॑ಗೃಹ್ಣಾ॒-ತ್ತಾಸಾ॒-ಮ್ಪರಿ॑ಗೃಹೀತಾನಾ-ಮಶ್ವತ॒ರೋ-ಽತ್ಯ॑ಪ್ರವತ॒ ತಸ್ಯಾ॑ನು॒ಹಾಯ॒ರೇತ॒ ಆ-ಽದ॑ತ್ತ॒ ತ-ದ್ಗ॑ರ್ದ॒ಭೇ ನ್ಯ॑ಮಾ॒ರ್-ಟ್ತಸ್ಮಾ᳚-ದ್ಗರ್ದ॒ಭೋ ದ್ವಿ॒ರೇತಾ॒ ಅಥೋ॑ ಆಹು॒ರ್ವಡ॑ಬಾಯಾ॒-ನ್ನ್ಯ॑ಮಾ॒ರ್ಡಿತಿ॒ ತಸ್ಮಾ॒-ದ್ವಡ॑ಬಾ ದ್ವಿ॒ರೇತಾ॒ ಅಥೋ॑ ಆಹು॒-ರೋಷ॑ಧೀಷು॒- [ಆಹು॒-ರೋಷ॑ಧೀಷು, ನ್ಯ॑ಮಾ॒ರ್ಡಿತಿ॒] 2
-ನ್ಯ॑ಮಾ॒ರ್ಡಿತಿ॒ ತಸ್ಮಾ॒ದೋಷ॑ಧ॒ಯೋ ಽನ॑ಭ್ಯಕ್ತಾ ರೇಭ॒ನ್ತ್ಯಥೋ॑ ಆಹುಃ ಪ್ರ॒ಜಾಸು॒ ನ್ಯ॑ಮಾ॒ರ್ಡಿತಿ॒ ತಸ್ಮಾ᳚-ದ್ಯ॒ಮೌ ಜಾ॑ಯೇತೇ॒ ತಸ್ಮಾ॑ದಶ್ವತ॒ರೋ ನ ಪ್ರ ಜಾ॑ಯತ॒ ಆತ್ತ॑ರೇತಾ॒ ಹಿ ತಸ್ಮಾ᳚-ದ್ಬ॒ರ್॒ಹಿಷ್ಯನ॑ವಕೢಪ್ತ-ಸ್ಸರ್ವವೇದ॒ಸೇ ವಾ॑ ಸ॒ಹಸ್ರೇ॒ ವಾ-ಽವ॑ ಕೢ॒ಪ್ತೋ-ಽತಿ॒ ಹ್ಯಪ್ರ॑ವತ॒ ಯ ಏ॒ವಂ-ವಿಁ॒ದ್ವಾನ॑ಗ್ನಿಷ್ಟೋ॒ಮೇನ॒ ಯಜ॑ತೇ॒ ಪ್ರಾಜಾ॑ತಾಃ ಪ್ರ॒ಜಾ ಜ॒ನಯ॑ತಿ॒ ಪರಿ॒ ಪ್ರಜಾ॑ತಾ ಗೃಹ್ಣಾತಿ॒ ತಸ್ಮಾ॑ದಾಹುರ್ಜ್ಯೇಷ್ಠಯ॒ಜ್ಞ ಇತಿ॑ [ ] 3
ಪ್ರ॒ಜಾಪ॑ತಿ॒ರ್ವಾವ ಜ್ಯೇಷ್ಠ॒-ಸ್ಸ ಹ್ಯೇ॑ತೇನಾಗ್ರೇ-ಽಯ॑ಜತ ಪ್ರ॒ಜಾಪ॑ತಿರಕಾಮಯತ॒ ಪ್ರ ಜಾ॑ಯೇ॒ಯೇತಿ॒ ಸ ಮು॑ಖ॒ತಸ್ತ್ರಿ॒ವೃತ॒-ನ್ನಿರ॑ಮಿಮೀತ॒ ತಮ॒ಗ್ನಿರ್ದೇ॒ವತಾ ಽನ್ವ॑ಸೃಜ್ಯತ ಗಾಯ॒ತ್ರೀ ಛನ್ದೋ॑ ರಥನ್ತ॒ರಗ್ಂ ಸಾಮ॑ ಬ್ರಾಹ್ಮ॒ಣೋ ಮ॑ನು॒ಷ್ಯಾ॑ಣಾಮ॒ಜಃ ಪ॑ಶೂ॒ನಾ-ನ್ತಸ್ಮಾ॒-ತ್ತೇ ಮುಖ್ಯಾ॑ ಮುಖ॒ತೋ ಹ್ಯಸೃ॑ಜ್ಯ॒ನ್ತೋರ॑ಸೋ ಬಾ॒ಹುಭ್ಯಾ᳚-ಮ್ಪಞ್ಚದ॒ಶ-ನ್ನಿರ॑ಮಿಮೀತ॒ ತಮಿನ್ದ್ರೋ॑ ದೇ॒ವತಾ ಽನ್ವ॑ಸೃಜ್ಯತ ತ್ರಿ॒ಷ್ಟು-ಪ್ಛನ್ದೋ॑ ಬೃ॒ಹ- [ಬೃ॒ಹತ್, ಸಾಮ॑ ರಾಜ॒ನ್ಯೋ॑] 4
-ಥ್ಸಾಮ॑ ರಾಜ॒ನ್ಯೋ॑ ಮನು॒ಷ್ಯಾ॑ಣಾ॒ಮವಿಃ॑ ಪಶೂ॒ನಾ-ನ್ತಸ್ಮಾ॒-ತ್ತೇ ವೀ॒ರ್ಯಾ॑ವನ್ತೋ ವೀ॒ರ್ಯಾ᳚ದ್ಧ್ಯಸೃ॑ಜ್ಯನ್ತ ಮದ್ಧ್ಯ॒ತ-ಸ್ಸ॑ಪ್ತದ॒ಶ-ನ್ನಿರ॑ಮಿಮೀತ॒ ತಂ-ವಿಁಶ್ವೇ॑ ದೇ॒ವಾ ದೇ॒ವತಾ॒ ಅನ್ವ॑ಸೃಜ್ಯನ್ತ॒ ಜಗ॑ತೀ॒ ಛನ್ದೋ॑ ವೈ ರೂ॒ಪಗ್ಂ ಸಾಮ॒ ವೈಶ್ಯೋ॑ ಮನು॒ಷ್ಯಾ॑ಣಾ॒-ಙ್ಗಾವಃ॑ ಪಶೂ॒ನಾ-ನ್ತಸ್ಮಾ॒-ತ್ತ ಆ॒ದ್ಯಾ॑ ಅನ್ನ॒ಧಾನಾ॒ದ್ಧ್ಯ ಸೃ॑ಜ್ಯನ್ತ॒ ತಸ್ಮಾ॒-ದ್ಭೂಯಾಗ್ಂ॑ಸೋ॒ ಽನ್ಯೇಭ್ಯೋ॒ ಭೂಯಿ॑ಷ್ಠಾ॒ ಹಿ ದೇ॒ವತಾ॒ ಅನ್ವಸೃ॑ಜ್ಯನ್ತ ಪ॒ತ್ತ ಏ॑ಕವಿ॒ಗ್ಂ॒ ಶ-ನ್ನಿರ॑ಮಿಮೀತ॒ ತಮ॑ನು॒ಷ್ಟು-ಪ್ಛನ್ದೋ- [ತಮ॑ನು॒ಷ್ಟು-ಪ್ಛನ್ದಃ॑, ಅನ್ವ॑ಸೃಜ್ಯತ] 5
-ಽನ್ವ॑ಸೃಜ್ಯತ ವೈರಾ॒ಜಗ್ಂ ಸಾಮ॑ ಶೂ॒ದ್ರೋ ಮ॑ನು॒ಷ್ಯಾ॑ಣಾ॒-ಮಶ್ವಃ॑ ಪಶೂ॒ನಾ-ನ್ತಸ್ಮಾ॒-ತ್ತೌ ಭೂ॑ತಸ-ಙ್ಕ್ರಾ॒ಮಿಣಾ॒ವಶ್ವ॑ಶ್ಚ ಶೂ॒ದ್ರಶ್ಚ॒ ತಸ್ಮಾ᳚ಚ್ಛೂ॒ದ್ರೋ ಯ॒ಜ್ಞೇ-ಽನ॑ವಕೢಪ್ತೋ॒ ನ ಹಿ ದೇ॒ವತಾ॒ ಅನ್ವಸೃ॑ಜ್ಯತ॒ ತಸ್ಮಾ॒-ತ್ಪಾದಾ॒ವುಪ॑ ಜೀವತಃ ಪ॒ತ್ತೋ ಹ್ಯಸೃ॑ಜ್ಯೇತಾ-ಮ್ಪ್ರಾ॒ಣಾ ವೈ ತ್ರಿ॒ವೃದ॑ರ್ಧಮಾ॒ಸಾಃ ಪ॑ಞ್ಚದ॒ಶಃ ಪ್ರ॒ಜಾಪ॑ತಿ-ಸ್ಸಪ್ತದ॒ಶಸ್ತ್ರಯ॑ ಇ॒ಮೇ ಲೋ॒ಕಾ ಅ॒ಸಾವಾ॑ದಿ॒ತ್ಯ ಏ॑ಕವಿ॒ಗ್ಂ॒ಶ ಏ॒ತಸ್ಮಿ॒ನ್ ವಾ ಏ॒ತೇ ಶ್ರಿ॒ತಾ ಏ॒ತಸ್ಮಿ॒-ನ್ಪ್ರತಿ॑ಷ್ಠಿತಾ॒ ಯ ಏ॒ವಂ-ವೇಁದೈ॒ತಸ್ಮಿ॑ನ್ನೇ॒ವ ಶ್ರ॑ಯತ ಏ॒ತಸ್ಮಿ॒-ನ್ಪ್ರತಿ॑ ತಿಷ್ಠತಿ ॥ 6 ॥
(ಅಸ್ಥೂ॑ರಿ॒ – ರೋಷ॑ಧೀಷು – ಜ್ಯೇಷ್ಠಯ॒ಜ್ಞ ಇತಿ॑ – ಬೃ॒ಹ – ದ॑ನು॒ಷ್ಟು-ಪ್ಛನ್ದಃ॒ – ಪ್ರತಿ॑ಷ್ಠಿತಾ॒ – ನವ॑ ಚ) (ಅ. 1)
ಪ್ರಾ॒ತ॒ಸ್ಸ॒ವ॒ನೇ ವೈ ಗಾ॑ಯ॒ತ್ರೇಣ॒ ಛನ್ದ॑ಸಾ ತ್ರಿ॒ವೃತೇ॒ ಸ್ತೋಮಾ॑ಯ॒ ಜ್ಯೋತಿ॒ರ್ದಧ॑ದೇತಿ ತ್ರಿ॒ವೃತಾ᳚ ಬ್ರಹ್ಮವರ್ಚ॒ಸೇನ॑ ಪಞ್ಚದ॒ಶಾಯ॒ ಜ್ಯೋತಿ॒ರ್ದಧ॑ದೇತಿ ಪಞ್ಚದ॒ಶೇನೌಜ॑ಸಾ ವೀ॒ರ್ಯೇ॑ಣ ಸಪ್ತದ॒ಶಾಯ॒ ಜ್ಯೋತಿ॒ರ್ದಧ॑ದೇತಿ ಸಪ್ತದ॒ಶೇನ॑ ಪ್ರಾಜಾಪ॒ತ್ಯೇನ॑ ಪ್ರ॒ಜನ॑ನೇನೈಕವಿ॒ಗ್ಂ॒ಶಾಯ॒ ಜ್ಯೋತಿ॒ರ್ದಧ॑ದೇತಿ॒ ಸ್ತೋಮ॑ ಏ॒ವ ತ-ಥ್ಸ್ತೋಮಾ॑ಯ॒ ಜ್ಯೋತಿ॒ರ್ದಧ॑ದೇ॒ತ್ಯಥೋ॒ ಸ್ತೋಮ॑ ಏ॒ವ ಸ್ತೋಮ॑ಮ॒ಭಿ ಪ್ರ ಣ॑ಯತಿ॒ ಯಾವ॑ನ್ತೋ॒ ವೈ ಸ್ತೋಮಾ॒ಸ್ತಾವ॑ನ್ತಃ॒ ಕಾಮಾ॒ಸ್ತಾವ॑ನ್ತೋ ಲೋ॒ಕಾ -ಸ್ತಾವ॑ನ್ತಿ॒ ಜ್ಯೋತೀಗ್॑ಷ್ಯೇ॒ತಾವ॑ತ ಏ॒ವ ಸ್ತೋಮಾ॑ನೇ॒ತಾವ॑ತಃ॒ ಕಾಮಾ॑ನೇ॒ತಾವ॑ತೋ ಲೋ॒ಕಾನೇ॒ತಾವ॑ನ್ತಿ॒ ಜ್ಯೋತೀ॒ಗ್॒ಷ್ಯವ॑ ರುನ್ಧೇ ॥ 7 ॥
(ತಾವ॑ನ್ತೋ ಲೋ॒ಕಾ – ಸ್ತ್ರಯೋ॑ದಶ ಚ) (ಅ. 2)
ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ॒ ಸ ತ್ವೈ ಯ॑ಜೇತ॒ ಯೋ᳚-ಽಗ್ನಿಷ್ಟೋ॒ಮೇನ॒ ಯಜ॑ಮಾ॒ನೋ-ಽಥ॒ ಸರ್ವ॑ಸ್ತೋಮೇನ॒ ಯಜೇ॒ತೇತಿ॒ ಯಸ್ಯ॑ ತ್ರಿ॒ವೃತ॑ಮನ್ತ॒ರ್ಯನ್ತಿ॑ ಪ್ರಾ॒ಣಾಗ್-ಸ್ತಸ್ಯಾ॒ನ್ತರ್ಯ॑ನ್ತಿ ಪ್ರಾ॒ಣೇಷು॒ ಮೇ-ಽಪ್ಯ॑ಸ॒ದಿತಿ॒ ಖಲು॒ ವೈ ಯ॒ಜ್ಞೇನ॒ ಯಜ॑ಮಾನೋ ಯಜತೇ॒ ಯಸ್ಯ॑ ಪಞ್ಚದ॒ಶಮ॑ನ್ತ॒ರ್ಯನ್ತಿ॑ ವೀ॒ರ್ಯ॑-ನ್ತಸ್ಯಾ॒ನ್ತರ್ಯ॑ನ್ತಿ ವೀ॒ರ್ಯೇ॑ ಮೇ-ಽಪ್ಯ॑ಸ॒ದಿತಿ॒ ಖಲು॒ ವೈ ಯ॒ಜ್ಞೇನ॒ ಯಜ॑ಮಾನೋ ಯಜತೇ॒ ಯಸ್ಯ॑ ಸಪ್ತದ॒ಶ-ಮ॑ನ್ತ॒ರ್ಯನ್ತಿ॑ [ ] 8
ಪ್ರ॒ಜಾ-ನ್ತಸ್ಯಾ॒ನ್ತರ್ಯ॑ನ್ತಿ ಪ್ರ॒ಜಾಯಾ॒-ಮ್ಮೇ-ಽಪ್ಯ॑ಸ॒ದಿತಿ॒ ಖಲು॒ ವೈ ಯ॒ಜ್ಞೇನ॒ ಯಜ॑ಮಾನೋ ಯಜತೇ॒ ಯಸ್ಯೈ॑ಕವಿ॒ಗ್ಂ॒ಶಮ॑ನ್ತ॒ರ್ಯನ್ತಿ॑ ಪ್ರತಿ॒ಷ್ಠಾ-ನ್ತಸ್ಯಾ॒ನ್ತರ್ಯ॑ನ್ತಿ ಪ್ರತಿ॒ಷ್ಠಾಯಾ॒-ಮ್ಮೇ-ಽಪ್ಯ॑ಸ॒ದಿತಿ॒ ಖಲು॒ ವೈ ಯ॒ಜ್ಞೇನ॒ ಯಜ॑ಮಾನೋ ಯಜತೇ॒ ಯಸ್ಯ॑ ತ್ರಿಣ॒ವಮ॑ನ್ತ॒ರ್ಯನ್ತ್ಯೃ॒ತೂಗ್ಶ್ಚ॒ ತಸ್ಯ॑ ನಖ್ಷ॒ತ್ರಿಯಾ᳚-ಞ್ಚ ವಿ॒ರಾಜ॑ಮ॒ನ್ತರ್ಯ॑ನ್ತ್ಯೃ॒ತುಷು॒ ಮೇ-ಽಪ್ಯ॑ಸನ್ನಖ್ಷ॒ತ್ರಿಯಾ॑ಯಾ-ಞ್ಚ ವಿ॒ರಾಜೀತಿ॒ [ವಿ॒ರಾಜೀತಿ॑, ಖಲು॒ ವೈ] 9
ಖಲು॒ ವೈ ಯ॒ಜ್ಞೇನ॒ ಯಜ॑ಮಾನೋ ಯಜತೇ॒ ಯಸ್ಯ॑ ತ್ರಯಸ್ತ್ರಿ॒ಗ್ಂ॒ಶಮ॑ನ್ತ॒ರ್ಯನ್ತಿ॑ ದೇ॒ವತಾ॒ಸ್ತಸ್ಯಾ॒ನ್ತರ್ಯ॑ನ್ತಿ ದೇ॒ವತಾ॑ಸು॒ ಮೇ-ಽಪ್ಯ॑ಸ॒ದಿತಿ॒ ಖಲು॒ ವೈ ಯ॒ಜ್ಞೇನ॒ ಯಜ॑ಮಾನೋ ಯಜತೇ॒ ಯೋ ವೈ ಸ್ತೋಮಾ॑ನಾಮವ॒ಮ-ಮ್ಪ॑ರ॒ಮತಾ॒-ಙ್ಗಚ್ಛ॑ನ್ತಂ॒-ವೇಁದ॑ ಪರ॒ಮತಾ॑ಮೇ॒ವ ಗ॑ಚ್ಛತಿ ತ್ರಿ॒ವೃದ್ವೈ ಸ್ತೋಮಾ॑ನಾಮವ॒ಮಸ್ತ್ರಿ॒ವೃ-ತ್ಪ॑ರ॒ಮೋ ಯ ಏ॒ವಂ-ವೇಁದ॑ ಪರ॒ಮತಾ॑ಮೇ॒ವ ಗ॑ಚ್ಛತಿ ॥ 10 ॥
(ಸ॒ಪ್ತ॒ದ॒ಶಮ॑ನ್ತ॒ರ್ಯನ್ತಿ॑ – ವಿ॒ರಾಜೀತಿ॒ – ಚತು॑ಶ್ಚತ್ವಾರಿಗ್ಂಶಚ್ಚ) (ಅ. 3)
ಅಙ್ಗಿ॑ರಸೋ॒ ವೈ ಸ॒ತ್ರಮಾ॑ಸತ॒ ತೇ ಸು॑ವ॒ರ್ಗಂ-ಲೋಁ॒ಕಮಾ॑ಯ॒-ನ್ತೇಷಾಗ್ಂ॑ ಹ॒ವಿಷ್ಮಾಗ್॑ಶ್ಚ ಹವಿ॒ಷ್ಕೃಚ್ಚಾ॑-ಽಹೀಯೇತಾ॒-ನ್ತಾವ॑ಕಾಮಯೇತಾಗ್ಂ ಸುವ॒ರ್ಗಂ-ಲೋಁ॒ಕಮಿ॑ಯಾ॒ವೇತಿ॒ ತಾವೇ॒ತ-ನ್ದ್ವಿ॑ರಾ॒ತ್ರಮ॑ಪಶ್ಯತಾ॒-ನ್ತಮಾ-ಽಹ॑ರತಾ॒-ನ್ತೇನಾ॑ಯಜೇತಾ॒-ನ್ತತೋ॒ ವೈ ತೌ ಸು॑ವ॒ರ್ಗಂ-ಲೋಁ॒ಕಮೈ॑ತಾಂ॒-ಯಁ ಏ॒ವಂ-ವಿಁ॒ದ್ವಾ-ನ್ದ್ವಿ॑ರಾ॒ತ್ರೇಣ॒ ಯಜ॑ತೇ ಸುವ॒ರ್ಗಮೇ॒ವ ಲೋ॒ಕಮೇ॑ತಿ॒ ತಾವೈತಾ॒-ಮ್ಪೂರ್ವೇ॒ಣಾಹ್ನಾ ಽಗ॑ಚ್ಛತಾ॒-ಮುತ್ತ॑ರೇಣಾ- [-ಮುತ್ತ॑ರೇಣ, ಅ॒ಭಿ॒ಪ್ಲ॒ವಃ ಪೂರ್ವ॒] 11
-ಭಿಪ್ಲ॒ವಃ ಪೂರ್ವ॒-ಮಹ॑ರ್ಭವತಿ॒ ಗತಿ॒ರುತ್ತ॑ರ॒-ಞ್ಜ್ಯೋತಿ॑ಷ್ಟೋಮೋ-ಽಗ್ನಿಷ್ಟೋ॒ಮಃ ಪೂರ್ವ॒ಮಹ॑ರ್ಭವತಿ॒ ತೇಜ॒ಸ್ತೇನಾವ॑ ರುನ್ಧೇ॒ ಸರ್ವ॑ಸ್ತೋಮೋ-ಽತಿರಾ॒ತ್ರ ಉತ್ತ॑ರ॒ಗ್ಂ॒ ಸರ್ವ॒ಸ್ಯಾ-ಽಽಪ್ತ್ಯೈ॒ ಸರ್ವ॒ಸ್ಯಾ-ಽವ॑ರುದ್ಧ್ಯೈ ಗಾಯ॒ತ್ರ-ಮ್ಪೂರ್ವೇ-ಽಹ॒ನ್ಥ್ಸಾಮ॑ ಭವತಿ॒ ತೇಜೋ॒ ವೈ ಗಾ॑ಯ॒ತ್ರೀ ಗಾ॑ಯ॒ತ್ರೀ ಬ್ರ॑ಹ್ಮವರ್ಚ॒ಸ-ನ್ತೇಜ॑ ಏ॒ವ ಬ್ರ॑ಹ್ಮವರ್ಚ॒ಸಮಾ॒ತ್ಮ-ನ್ಧ॑ತ್ತೇ॒ ತ್ರೈಷ್ಟು॑ಭ॒ಮುತ್ತ॑ರ॒ ಓಜೋ॒ ವೈ ವೀ॒ರ್ಯ॑-ನ್ತ್ರಿ॒ಷ್ಟುಗೋಜ॑ ಏ॒ವ ವೀ॒ರ್ಯ॑ಮಾ॒ತ್ಮ-ನ್ಧ॑ತ್ತೇ ರಥನ್ತ॒ರ-ಮ್ಪೂರ್ವೇ॑- [ರಥನ್ತ॒ರ-ಮ್ಪೂರ್ವೇ᳚, ಅಹ॒ನ್-ಥ್ಸಾಮ॑] 12
-ಽಹ॒ನ್-ಥ್ಸಾಮ॑ ಭವತೀ॒ಯಂ-ವೈಁ ರ॑ಥನ್ತ॒ರಮ॒ಸ್ಯಾಮೇ॒ವ ಪ್ರತಿ॑ ತಿಷ್ಠತಿ ಬೃ॒ಹದುತ್ತ॑ರೇ॒-ಽಸೌ ವೈ ಬೃ॒ಹದ॒ಮುಷ್ಯಾ॑ಮೇ॒ವ ಪ್ರತಿ॑ ತಿಷ್ಠತಿ॒ ತದಾ॑ಹುಃ॒ ಕ್ವ॑ ಜಗ॑ತೀ ಚಾ-ಽನು॒ಷ್ಟು-ಪ್ಚೇತಿ॑ ವೈಖಾನ॒ಸ-ಮ್ಪೂರ್ವೇ-ಽಹ॒ನ್-ಥ್ಸಾಮ॑ ಭವತಿ॒ ತೇನ॒ ಜಗ॑ತ್ಯೈ॒ ನೈತಿ॑ ಷೋಡ॒ಶ್ಯುತ್ತ॑ರೇ॒ ತೇನಾ॑ನು॒ಷ್ಟುಭೋ-ಽಥಾ॑ ಽಽಹು॒ರ್ಯ-ಥ್ಸ॑ಮಾ॒ನೇ᳚-ಽರ್ಧಮಾ॒ಸೇ ಸ್ಯಾತಾ॑-ಮನ್ಯತ॒ರಸ್ಯಾಹ್ನೋ॑ ವೀ॒ರ್ಯ॑ಮನು॑ ಪದ್ಯೇ॒ತೇತ್ಯ॑-ಮಾವಾ॒ಸ್ಯಾ॑ಯಾ॒-ಮ್ಪೂರ್ವ॒ಮಹ॑-ರ್ಭವ॒ತ್ಯುತ್ತ॑ರಸ್ಮಿ॒-ನ್ನುತ್ತ॑ರ॒-ನ್ನಾನೈ॒ವಾ ಽರ್ಧ॑ಮಾ॒ಸಯೋ᳚ರ್ಭವತೋ॒ ನಾನಾ॑ವೀರ್ಯೇ ಭವತೋ ಹ॒ವಿಷ್ಮ॑ನ್ನಿಧನ॒-ಮ್ಪೂರ್ವ॒ಮಹ॑ರ್ಭವತಿ ಹವಿ॒ಷ್ಕೃನ್ನಿ॑ಧನ॒-ಮುತ್ತ॑ರ॒-ಮ್ಪ್ರತಿ॑ಷ್ಠಿತ್ಯೈ ॥ 13 ॥
(ಉತ್ತ॑ರೇಣ – ರಥನ್ತ॒ರ-ಮ್ಪೂರ್ವೇ – ಽನ್ವೇ – ಕ॑ವಿಗ್ಂಶತಿಶ್ಚ) (ಅ. 4)
ಆಪೋ॒ ವಾ ಇ॒ದಮಗ್ರೇ॑ ಸಲಿ॒ಲಮಾ॑ಸೀ॒-ತ್ತಸ್ಮಿ॑-ನ್ಪ್ರ॒ಜಾಪ॑ತಿ-ರ್ವಾ॒ಯುರ್ಭೂ॒ತ್ವಾ ಽಚ॑ರ॒-ಥ್ಸ ಇ॒ಮಾಮ॑ಪಶ್ಯ॒-ತ್ತಾಂ-ವಁ॑ರಾ॒ಹೋ ಭೂ॒ತ್ವಾ-ಽಹ॑ರ॒-ತ್ತಾಂ-ವಿಁ॒ಶ್ವಕ॑ರ್ಮಾ ಭೂ॒ತ್ವಾ ವ್ಯ॑ಮಾ॒ಟ್ರ್-ಥ್ಸಾ-ಽಪ್ರ॑ಥತ॒ ಸಾ ಪೃ॑ಥಿ॒ವ್ಯ॑ಭವ॒-ತ್ತ-ತ್ಪೃ॑ಥಿ॒ವ್ಯೈ ಪೃ॑ಥಿವಿ॒ತ್ವ-ನ್ತಸ್ಯಾ॑ಮಶ್ರಾಮ್ಯ-ತ್ಪ್ರ॒ಜಾಪ॑ತಿ॒-ಸ್ಸ ದೇ॒ವಾನ॑ಸೃಜತ॒ ವಸೂ᳚-ನ್ರು॒ದ್ರಾನಾ॑ದಿ॒ತ್ಯಾ-ನ್ತೇ ದೇ॒ವಾಃ ಪ್ರ॒ಜಾಪ॑ತಿಮಬ್ರುವ॒-ನ್ಪ್ರಜಾ॑ಯಾಮಹಾ॒ ಇತಿ॒ ಸೋ᳚-ಽಬ್ರವೀ॒- [ಸೋ᳚-ಽಬ್ರವೀತ್, ಯಥಾ॒-ಽಹಂ-] 14
-ದ್ಯಥಾ॒-ಽಹಂ-ಯುಁ॒ಷ್ಮಾಗ್ಸ್ತಪ॒ಸಾ ಽಸೃ॑ಖ್ಷ್ಯೇ॒ವ-ನ್ತಪ॑ಸಿ ಪ್ರ॒ಜನ॑ನ-ಮಿಚ್ಛದ್ಧ್ವ॒ಮಿತಿ॒ ತೇಭ್ಯೋ॒-ಽಗ್ನಿಮಾ॒ಯತ॑ನ॒-ಮ್ಪ್ರಾ-ಽಯ॑ಚ್ಛದೇ॒ತೇನಾ॒-ಽಽಯತ॑ನೇನ ಶ್ರಾಮ್ಯ॒ತೇತಿ॒ ತೇ᳚-ಽಗ್ನಿನಾ॒-ಽಽಯತ॑ನೇನಾ-ಽ-ಶ್ರಾಮ್ಯ॒-ನ್ತೇ ಸಂ॑ವಁಥ್ಸ॒ರ ಏಕಾ॒-ಙ್ಗಾಮ॑ಸೃಜನ್ತ॒ ತಾಂ-ವಁಸು॑ಭ್ಯೋ ರು॒ದ್ರೇಭ್ಯ॑ ಆದಿ॒ತ್ಯೇಭ್ಯಃ॒ ಪ್ರಾ-ಽಯ॑ಚ್ಛನ್ನೇ॒ತಾಗ್ಂ ರ॑ಖ್ಷದ್ಧ್ವ॒ಮಿತಿ॒ ತಾಂ-ವಁಸ॑ವೋ ರು॒ದ್ರಾ ಆ॑ದಿ॒ತ್ಯಾ ಅ॑ರಖ್ಷನ್ತ॒ ಸಾ ವಸು॑ಭ್ಯೋ ರು॒ದ್ರೇಭ್ಯ॑ ಆದಿ॒ತ್ಯೇಭ್ಯಃ॒ ಪ್ರಾಜಾ॑ಯತ॒ತ್ರೀಣಿ॑ ಚ [ ] 15
ಶ॒ತಾನಿ॒ ತ್ರಯ॑ಸ್ತ್ರಿಗ್ಂಶತ॒-ಞ್ಚಾಥ॒ ಸೈವ ಸ॑ಹಸ್ರತ॒ಮ್ಯ॑ಭವ॒-ತ್ತೇ ದೇ॒ವಾಃ ಪ್ರ॒ಜಾಪ॑ತಿಮಬ್ರುವನ್-ಥ್ಸ॒ಹಸ್ರೇ॑ಣ ನೋ ಯಾಜ॒ಯೇತಿ॒ ಸೋ᳚-ಽಗ್ನಿಷ್ಟೋ॒ಮೇನ॒ ವಸೂ॑ನಯಾಜಯ॒-ತ್ತ ಇ॒ಮಂ-ಲೋಁ॒ಕಮ॑ಜಯ॒-ನ್ತಚ್ಚಾ॑ದದು॒-ಸ್ಸ ಉ॒ಕ್ಥ್ಯೇ॑ನ ರು॒ದ್ರಾನ॑ಯಾಜಯ॒-ತ್ತೇ᳚-ಽನ್ತರಿ॑ಖ್ಷಮಜಯ॒-ನ್ತಚ್ಚಾ॑ದದು॒-ಸ್ಸೋ॑-ಽತಿರಾ॒ತ್ರೇಣಾ॑-ಽಽದಿ॒ತ್ಯಾನ॑ಯಾಜಯ॒-ತ್ತೇ॑-ಽಮುಂ-ಲೋಁ॒ಕಮ॑ಜಯ॒-ನ್ತಚ್ಚಾ॑-ಽದದು॒-ಸ್ತದ॒ನ್ತರಿ॑ಖ್ಷಂ॒- [-ಸ್ತದ॒ನ್ತರಿ॑ಖ್ಷಮ್, ವ್ಯವೈ᳚ರ್ಯತ॒] 16
-ವ್ಯಁವೈ᳚ರ್ಯತ॒ ತಸ್ಮಾ᳚-ದ್ರು॒ದ್ರಾ ಘಾತು॑ಕಾ ಅನಾಯತ॒ನಾ ಹಿ ತಸ್ಮಾ॑ದಾಹು-ಶ್ಶಿಥಿ॒ಲಂ-ವೈಁ ಮ॑ದ್ಧ್ಯ॒ಮ-ಮಹ॑ಸ್ತ್ರಿರಾ॒ತ್ರಸ್ಯ॒ ವಿ ಹಿ ತದ॒ವೈರ್ಯ॒ತೇತಿ॒ ತ್ರೈಷ್ಟು॑ಭ-ಮ್ಮದ್ಧ್ಯ॒ಮಸ್ಯಾಹ್ನ॒ ಆಜ್ಯ॑-ಮ್ಭವತಿ ಸಂ॒ಯಾಁನಾ॑ನಿ ಸೂ॒ಕ್ತಾನಿ॑ ಶಗ್ಂಸತಿ ಷೋಡ॒ಶಿನಗ್ಂ॑ ಶಗ್ಂಸ॒ತ್ಯಹ್ನೋ॒ ಧೃತ್ಯಾ॒ ಅಶಿ॑ಥಿಲಮ್ಭಾವಾಯ॒ ತಸ್ಮಾ᳚-ತ್ತ್ರಿರಾ॒ತ್ರಸ್ಯಾ᳚ಗ್ನಿಷ್ಟೋ॒ಮ ಏ॒ವ ಪ್ರ॑ಥ॒ಮಮಹ॑-ಸ್ಸ್ಯಾ॒ದಥೋ॒ಕ್ಥ್ಯೋ ಽಥಾ॑-ಽತಿರಾ॒ತ್ರ ಏ॒ಷಾಂ-ಲೋಁ॒ಕಾನಾಂ॒-ವಿಁಧೃ॑ತ್ಯೈ॒ ತ್ರೀಣಿ॑ತ್ರೀಣಿ ಶ॒ತಾ-ನ್ಯ॑ನೂಚೀನಾ॒ಹ-ಮವ್ಯ॑ವಚ್ಛಿನ್ನಾನಿ ದದಾ- [ದದಾತಿ, ಏ॒ಷಾಂ-ಲೋಁ॒ಕಾನಾ॒-] 17
-ತ್ಯೇ॒ಷಾಂ-ಲೋಁ॒ಕಾನಾ॒-ಮನು॒ ಸನ್ತ॑ತ್ಯೈ ದ॒ಶತ॒-ನ್ನ ವಿಚ್ಛಿ॑ನ್ದ್ಯಾ-ದ್ವಿ॒ರಾಜ॒-ನ್ನೇದ್ವಿ॑ಚ್ಛಿ॒ನದಾ॒ನೀತ್ಯಥ॒ ಯಾ ಸ॑ಹಸ್ರತ॒ಮ್ಯಾಸೀ॒-ತ್ತಸ್ಯಾ॒ಮಿನ್ದ್ರ॑ಶ್ಚ॒ ವಿಷ್ಣು॑ಶ್ಚ॒ ವ್ಯಾಯ॑ಚ್ಛೇತಾ॒ಗ್ಂ॒ ಸ ಇನ್ದ್ರೋ॑-ಽಮನ್ಯತಾ॒ನಯಾ॒ ವಾ ಇ॒ದಂ-ವಿಁಷ್ಣು॑-ಸ್ಸ॒ಹಸ್ರಂ॑-ವಁರ್ಖ್ಷ್ಯತ॒ ಇತಿ॒ ತಸ್ಯಾ॑ಮಕಲ್ಪೇತಾ॒-ನ್ದ್ವಿಭಾ॑ಗ॒ ಇನ್ದ್ರ॒ಸ್ತೃತೀ॑ಯೇ॒ ವಿಷ್ಣು॒ಸ್ತದ್ವಾ ಏ॒ಷಾ-ಽಭ್ಯನೂ᳚ಚ್ಯತ ಉ॒ಭಾ ಜಿ॑ಗ್ಯಥು॒ರಿತಿ॒ ತಾಂ-ವಾಁ ಏ॒ತಾಮ॑ಚ್ಛಾವಾ॒ಕ [ಏ॒ತಾಮ॑ಚ್ಛಾವಾ॒ಕಃ, ಏ॒ವ] 18
ಏ॒ವ ಶಗ್ಂ॑ಸ॒ತ್ಯಥ॒ ಯಾ ಸ॑ಹಸ್ರತ॒ಮೀ ಸಾ ಹೋತ್ರೇ॒ ದೇಯೇತಿ॒ ಹೋತಾ॑ರಂ॒-ವಾಁ ಅ॒ಭ್ಯತಿ॑ರಿಚ್ಯತೇ॒ ಯದ॑ತಿ॒ರಿಚ್ಯ॑ತೇ॒ ಹೋತಾ ಽನಾ᳚ಪ್ತಸ್ಯಾ-ಽಽಪಯಿ॒ತಾ ಽಥಾ॑-ಽಹುರುನ್ನೇ॒ತ್ರೇ ದೇಯೇತ್ಯತಿ॑ರಿಕ್ತಾ॒ ವಾ ಏ॒ಷಾ ಸ॒ಹಸ್ರ॒ಸ್ಯಾತಿ॑ರಿಕ್ತ ಉನ್ನೇ॒ತರ್ತ್ವಿಜಾ॒ಮಥಾ॑-ಽಽಹು॒-ಸ್ಸರ್ವೇ᳚ಭ್ಯ-ಸ್ಸದ॒ಸ್ಯೇ᳚ಭ್ಯೋ॒ ದೇಯೇತ್ಯಥಾ॑-ಽಽಹುರುದಾ॒ ಕೃತ್ಯಾ॒ ಸಾ ವಶ॑-ಞ್ಚರೇ॒ದಿತ್ಯಥಾ॑-ಽಽಹುರ್ಬ್ರ॒ಹ್ಮಣೇ॑ ಚಾ॒ಗ್ನೀಧೇ॑ ಚ॒ ದೇಯೇತಿ॒ [ದೇಯೇತಿ, ದ್ವಿಭಾ॑ಗ-] 19
ದ್ವಿಭಾ॑ಗ-ಮ್ಬ್ರ॒ಹ್ಮಣೇ॒ ತೃತೀ॑ಯಮ॒ಗ್ನೀಧ॑ ಐ॒ನ್ದ್ರೋ ವೈ ಬ್ರ॒ಹ್ಮಾ ವೈ᳚ಷ್ಣ॒ವೋ᳚-ಽಗ್ನೀದ್ಯಥೈ॒ವ ತಾವಕ॑ಲ್ಪೇತಾ॒ಮಿತ್ಯಥಾ॑ ಽಽಹು॒ರ್ಯಾ ಕ॑ಲ್ಯಾ॒ಣೀ ಬ॑ಹುರೂ॒ಪಾ ಸಾ ದೇಯೇತ್ಯಥಾ॑ ಽಽಹು॒ರ್ಯಾ ದ್ವಿ॑ರೂ॒ಪೋಭ॒ಯತ॑ಏನೀ॒ ಸಾ ದೇಯೇತಿ॑ ಸ॒ಹಸ್ರ॑ಸ್ಯ॒ ಪರಿ॑ಗೃಹೀತ್ಯೈ॒ ತದ್ವಾ ಏ॒ತ-ಥ್ಸ॒ಹಸ್ರ॒ಸ್ಯಾ-ಽಯ॑ನಗ್ಂ ಸ॒ಹಸ್ರಗ್ಗ್॑ ಸ್ತೋ॒ತ್ರೀಯಾ᳚-ಸ್ಸ॒ಹಸ್ರ॒-ನ್ದಖ್ಷಿ॑ಣಾ-ಸ್ಸ॒ಹಸ್ರ॑ಸಮ್ಮಿತ-ಸ್ಸುವ॒ರ್ಗೋ ಲೋ॒ಕ-ಸ್ಸು॑ವ॒ರ್ಗಸ್ಯ॑ ಲೋ॒ಕಸ್ಯಾ॒ಭಿಜಿ॑ತ್ಯೈ ॥ 20 ॥
(ಅ॒ಬ್ರ॒ವೀ॒ – ಚ್ಚ॒ – ತದ॒ನ್ತರಿ॑ಖ್ಷಂ – ದದಾತ್ಯ – ಚ್ಛಾವಾ॒ಕ – ಶ್ಚ॒ ದೇಯೇತಿ॑ – ಸ॒ಪ್ತಚ॑ತ್ವಾರಿಗ್ಂಶಚ್ಚ) (ಅ. 5)
ಸೋಮೋ॒ ವೈ ಸ॒ಹಸ್ರ॑ಮವಿನ್ದ॒-ತ್ತಮಿನ್ದ್ರೋ ಽನ್ವ॑ವಿನ್ದ॒-ತ್ತೌ ಯ॒ಮೋ ನ್ಯಾಗ॑ಚ್ಛ॒-ತ್ತಾವ॑ಬ್ರವೀ॒ದಸ್ತು॒ ಮೇ-ಽತ್ರಾ-ಽಪೀತ್ಯಸ್ತು॒ ಹೀ(3) ಇತ್ಯ॑ಬ್ರೂತಾ॒ಗ್ಂ॒ ಸ ಯ॒ಮ ಏಕ॑ಸ್ಯಾಂ-ವೀಁ॒ರ್ಯ॑-ಮ್ಪರ್ಯ॑ಪಶ್ಯದಿ॒ಯಂ-ವಾಁ ಅ॒ಸ್ಯ ಸ॒ಹಸ್ರ॑ಸ್ಯ ವೀ॒ರ್ಯ॑-ಮ್ಬಿಭ॒ರ್ತೀತಿ॒ ತಾವ॑ಬ್ರವೀದಿ॒ಯ-ಮ್ಮಮಾಸ್ತ್ವೇ॒ತ-ದ್ಯು॒ವಯೋ॒ರಿತಿ॒ ತಾವ॑ಬ್ರೂತಾ॒ಗ್ಂ॒ ಸರ್ವೇ॒ ವಾ ಏ॒ತದೇ॒ತಸ್ಯಾಂ᳚-ವೀಁ॒ರ್ಯ॑- [ಏ॒ತದೇ॒ತಸ್ಯಾಂ᳚-ವೀಁ॒ರ್ಯ᳚ಮ್, ಪರಿ॑] 21
-ಮ್ಪರಿ॑ ಪಶ್ಯಾ॒ಮೋ-ಽಗ್ಂಶ॒ಮಾ ಹ॑ರಾಮಹಾ॒ ಇತಿ॒ ತಸ್ಯಾ॒ಮಗ್ಂಶ॒ಮಾ-ಽಹ॑ರನ್ತ॒ ತಾಮ॒ಫ್ಸು ಪ್ರಾ-ಽವೇ॑ಶಯ॒ನ್-ಥ್ಸೋಮಾ॑ಯೋ॒ದೇಹೀತಿ॒ ಸಾ ರೋಹಿ॑ಣೀ ಪಿಙ್ಗ॒ಲೈಕ॑ಹಾಯನೀ ರೂ॒ಪ-ಙ್ಕೃ॒ತ್ವಾ ತ್ರಯ॑ಸ್ತ್ರಿಗ್ಂಶತಾ ಚ ತ್ರಿ॒ಭಿಶ್ಚ॑ ಶ॒ತೈ-ಸ್ಸ॒ಹೋದೈ-ತ್ತಸ್ಮಾ॒-ದ್ರೋಹಿ॑ಣ್ಯಾ ಪಿಙ್ಗ॒ಲಯೈಕ॑ಹಾಯನ್ಯಾ॒ ಸೋಮ॑-ಙ್ಕ್ರೀಣೀಯಾ॒ದ್ಯ ಏ॒ವಂ-ವಿಁ॒ದ್ವಾ-ನ್ರೋಹಿ॑ಣ್ಯಾ ಪಿಙ್ಗ॒ಲಯೈಕ॑ಹಾಯನ್ಯಾ॒ ಸೋಮ॑-ಙ್ಕ್ರೀ॒ಣಾತಿ॒ ತ್ರಯ॑ಸ್ತ್ರಿಗ್ಂಶತಾ ಚೈ॒ವಾಸ್ಯ॑ ತ್ರಿ॒ಭಿಶ್ಚ॑ [ ] 22
ಶ॒ತೈ-ಸ್ಸೋಮಃ॑ ಕ್ರೀ॒ತೋ ಭ॑ವತಿ॒ ಸುಕ್ರೀ॑ತೇನ ಯಜತೇ॒ ತಾಮ॒ಫ್ಸು ಪ್ರಾವೇ॑ಶಯ॒-ನ್ನಿನ್ದ್ರಾ॑ಯೋ॒ದೇಹೀತಿ॒ ಸಾ ರೋಹಿ॑ಣೀ ಲಖ್ಷ್ಮ॒ಣಾ ಪ॑ಷ್ಠೌ॒ಹೀ ವಾರ್ತ್ರ॑ಘ್ನೀ ರೂ॒ಪ-ಙ್ಕೃ॒ತ್ವಾ ತ್ರಯ॑ಸ್ತ್ರಿಗ್ಂಶತಾ ಚ ತ್ರಿ॒ಭಿಶ್ಚ॑ ಶ॒ತೈ-ಸ್ಸ॒ಹೋದೈ-ತ್ತಸ್ಮಾ॒-ದ್ರೋಹಿ॑ಣೀಂ-ಲಁಖ್ಷ್ಮ॒ಣಾ-ಮ್ಪ॑ಷ್ಠೌ॒ಹೀಂ-ವಾಁರ್ತ್ರ॑ಘ್ನೀ-ನ್ದದ್ಯಾ॒ದ್ಯ ಏ॒ವಂ-ವಿಁ॒ದ್ವಾ-ನ್ರೋಹಿ॑ಣೀಂ-ಲಁಖ್ಷ್ಮ॒ಣಾ-ಮ್ಪ॑ಷ್ಠೌ॒ಹೀಂ-ವಾಁರ್ತ್ರ॑ಘ್ನೀ॒-ನ್ದದಾ॑ತಿ॒ ತ್ರಯ॑ಸ್ತ್ರಿಗ್ಂಶಚ್ಚೈ॒ವಾಸ್ಯ॒ ತ್ರೀಣಿ॑ ಚ ಶ॒ತಾನಿ॒ ಸಾ ದ॒ತ್ತಾ [ದ॒ತ್ತಾ, ಭ॒ವ॒ತಿ॒ ತಾಮ॒ಫ್ಸು] 23
ಭ॑ವತಿ॒ ತಾಮ॒ಫ್ಸು ಪ್ರಾವೇ॑ಶಯನ್ ಯ॒ಮಾಯೋ॒ದೇಹೀತಿ॒ ಸಾ ಜರ॑ತೀ ಮೂ॒ರ್ಖಾ ತ॑ಜ್ಜಘ॒ನ್ಯಾ ರೂ॒ಪ-ಙ್ಕೃ॒ತ್ವಾ ತ್ರಯ॑ಸ್ತ್ರಿಗ್ಂಶತಾ ಚ ತ್ರಿ॒ಭಿಶ್ಚ॑ ಶ॒ತೈ-ಸ್ಸ॒ಹೋದೈ-ತ್ತಸ್ಮಾ॒ಜ್ಜರ॑ತೀ-ಮ್ಮೂ॒ರ್ಖಾ-ನ್ತ॑ಜ್ಜಘ॒ನ್ಯಾ-ಮ॑ನು॒ಸ್ತರ॑ಣೀ-ಙ್ಕುರ್ವೀತ॒ ಯ ಏ॒ವಂ-ವಿಁ॒ದ್ವಾಞ್ಜರ॑ತೀ-ಮ್ಮೂ॒ರ್ಖಾ-ನ್ತ॑ಜ್ಜಘ॒ನ್ಯಾ-ಮ॑ನು॒ಸ್ತರ॑ಣೀ-ಙ್ಕುರು॒ತೇ ತ್ರಯ॑ಸ್ತ್ರಿಗ್ಂಶಚ್ಚೈ॒ವಾಸ್ಯ॒ ತ್ರೀಣಿ॑ ಚ ಶ॒ತಾನಿ॒ ಸಾ-ಽಮುಷ್ಮಿ॑ಲ್ಲೋಁ॒ಕೇ ಭ॑ವತಿ॒ ವಾಗೇ॒ವ ಸ॑ಹಸ್ರತ॒ಮೀ ತಸ್ಮಾ॒- [ತಸ್ಮಾ᳚ತ್, ವರೋ॒ ದೇಯ॒-ಸ್ಸಾ] 24
-ದ್ವರೋ॒ ದೇಯ॒-ಸ್ಸಾ ಹಿ ವರ॑-ಸ್ಸ॒ಹಸ್ರ॑ಮಸ್ಯ॒ ಸಾ ದ॒ತ್ತಾ ಭ॑ವತಿ॒ ತಸ್ಮಾ॒-ದ್ವರೋ॒ ನ ಪ್ರ॑ತಿ॒ಗೃಹ್ಯ॒-ಸ್ಸಾ ಹಿ ವರ॑-ಸ್ಸ॒ಹಸ್ರ॑ಮಸ್ಯ॒ ಪ್ರತಿ॑ಗೃಹೀತ-ಮ್ಭವತೀ॒ಯಂ-ವಁರ॒ ಇತಿ॑ ಬ್ರೂಯಾ॒ದಥಾ॒ನ್ಯಾ-ಮ್ಬ್ರೂ॑ಯಾದಿ॒ಯ-ಮ್ಮಮೇತಿ॒ ತಥಾ᳚-ಽಸ್ಯ॒ ತ-ಥ್ಸ॒ಹಸ್ರ॒-ಮಪ್ರ॑ತಿಗೃಹೀತ-ಮ್ಭವತ್ಯುಭಯತಏ॒ನೀ ಸ್ಯಾ॒-ತ್ತದಾ॑ಹುರನ್ಯತ ಏ॒ನೀ ಸ್ಯಾ᳚-ಥ್ಸ॒ಹಸ್ರ॑-ಮ್ಪ॒ರಸ್ತಾ॒ದೇತ॒ಮಿತಿ॒ ಯೈವ ವರಃ॑ [ವರಃ॑, ಕ॒ಲ್ಯಾ॒ಣೀ ರೂ॒ಪಸ॑ಮೃದ್ಧಾ॒ ಸಾ] 25
ಕಲ್ಯಾ॒ಣೀ ರೂ॒ಪಸ॑ಮೃದ್ಧಾ॒ ಸಾ ಸ್ಯಾ॒-ಥ್ಸಾ ಹಿ ವರ॒-ಸ್ಸಮೃ॑ದ್ಧ್ಯೈ॒ ತಾಮುತ್ತ॑ರೇ॒ಣಾ-ಽಽಗ್ನೀ᳚ದ್ಧ್ರ-ಮ್ಪರ್ಯಾ॒ಣೀಯಾ॑-ಽಽಹವ॒ನೀಯ॒ಸ್ಯಾನ್ತೇ᳚ ದ್ರೋಣಕಲ॒ಶಮವ॑ ಘ್ರಾಪಯೇ॒ದಾ ಜಿ॑ಘ್ರ ಕ॒ಲಶ॑-ಮ್ಮಹ್ಯು॒ರುಧಾ॑ರಾ॒ ಪಯ॑ಸ್ವ॒ತ್ಯಾ ತ್ವಾ॑ ವಿಶ॒ನ್ತ್ವಿನ್ದ॑ವ-ಸ್ಸಮು॒ದ್ರಮಿ॑ವ॒ ಸಿನ್ಧ॑ವ॒-ಸ್ಸಾ ಮಾ॑ ಸ॒ಹಸ್ರ॒ ಆ ಭ॑ಜ ಪ್ರ॒ಜಯಾ॑ ಪ॒ಶುಭಿ॑-ಸ್ಸ॒ಹ ಪುನ॒ರ್ಮಾ ಽಽವಿ॑ಶತಾ-ದ್ರ॒ಯಿರಿತಿ॑ ಪ್ರ॒ಜಯೈ॒ವೈನ॑-ಮ್ಪ॒ಶುಭೀ॑ ರ॒ಯ್ಯಾ ಸ- [ರ॒ಯ್ಯಾ ಸಮ್, ಅ॒ರ್ಧ॒ಯ॒ತಿ॒ ಪ್ರ॒ಜಾವಾ᳚-] 26
-ಮ॑ರ್ಧಯತಿ ಪ್ರ॒ಜಾವಾ᳚-ನ್ಪಶು॒ಮಾ-ನ್ರ॑ಯಿ॒ಮಾ-ನ್ಭ॑ವತಿ॒ ಯ ಏ॒ವಂ-ವೇಁದ॒ ತಯಾ॑ ಸ॒ಹಾ-ಽಽಗ್ನೀ᳚ದ್ಧ್ರ-ಮ್ಪ॒ರೇತ್ಯ॑ ಪು॒ರಸ್ತಾ᳚-ತ್ಪ್ರ॒ತೀಚ್ಯಾ॒-ನ್ತಿಷ್ಠ॑ನ್ತ್ಯಾ-ಞ್ಜುಹುಯಾದು॒ಭಾ ಜಿ॑ಗ್ಯಥು॒ರ್ನ ಪರಾ॑ ಜಯೇಥೇ॒ ನ ಪರಾ॑ ಜಿಗ್ಯೇ ಕತ॒ರಶ್ಚ॒ನೈನೋಃ᳚ । ಇನ್ದ್ರ॑ಶ್ಚ ವಿಷ್ಣೋ॒ ಯದಪ॑ಸ್ಪೃಧೇಥಾ-ನ್ತ್ರೇ॒ಧಾ ಸ॒ಹಸ್ರಂ॒-ವಿಁ ತದೈ॑ರಯೇಥಾ॒ಮಿತಿ॑, ತ್ರೇಧಾವಿಭ॒ಕ್ತಂ-ವೈಁ ತ್ರಿ॑ರಾ॒ತ್ರೇ ಸ॒ಹಸ್ರಗ್ಂ॑ ಸಾಹ॒ಸ್ರೀಮೇ॒ವೈನಾ᳚-ಙ್ಕರೋತಿ ಸ॒ಹಸ್ರ॑ಸ್ಯೈ॒ವೈನಾ॒-ಮ್ಮಾತ್ರಾ᳚- [-ಮ್ಮಾತ್ರಾ᳚ಮ್, ಕ॒ರೋ॒ತಿ॒ ರೂ॒ಪಾಣಿ॑ ಜುಹೋತಿ] 27
-ಙ್ಕರೋತಿ ರೂ॒ಪಾಣಿ॑ ಜುಹೋತಿ ರೂ॒ಪೈರೇ॒ವೈನಾ॒ಗ್ಂ॒ ಸಮ॑ರ್ಧಯತಿ॒ ತಸ್ಯಾ॑ ಉಪೋ॒ತ್ಥಾಯ॒ ಕರ್ಣ॒ಮಾ ಜ॑ಪೇ॒ದಿಡೇ॒ ರನ್ತೇ-ಽದಿ॑ತೇ॒ ಸರ॑ಸ್ವತಿ॒ ಪ್ರಿಯೇ॒ ಪ್ರೇಯ॑ಸಿ॒ ಮಹಿ॒ ವಿಶ್ರು॑ತ್ಯೇ॒ತಾನಿ॑ ತೇ ಅಘ್ನಿಯೇ॒ ನಾಮಾ॑ನಿ ಸು॒ಕೃತ॑-ಮ್ಮಾ ದೇ॒ವೇಷು॑ ಬ್ರೂತಾ॒ದಿತಿ॑ ದೇ॒ವೇಭ್ಯ॑ ಏ॒ವೈನ॒ಮಾ ವೇ॑ದಯ॒ತ್ಯನ್ವೇ॑ನ-ನ್ದೇ॒ವಾ ಬು॑ದ್ಧ್ಯನ್ತೇ ॥ 28 ॥
( ಏ॒ತದೇ॒ತಸ್ಯಾಂ᳚-ವೀಁ॒ರ್ಯ॑ – ಮಸ್ಯ ತ್ರಿ॒ಭಿಶ್ಚ॑ – ದ॒ತ್ತಾ – ಸ॑ಹಸ್ರತ॒ಮೀ ತಸ್ಮಾ॑ – ದೇ॒ವ ವರಃ॒ – ಸಂ – ಮಾತ್ರಾ॒ – ಮೇಕಾ॒ನ್ನಚ॑ತ್ವಾರಿ॒ಗ್ಂ॒ಶಚ್ಚ॑) (ಅ. 6)
ಸ॒ಹ॒ಸ್ರ॒ತ॒ಮ್ಯಾ॑ ವೈ ಯಜ॑ಮಾನ-ಸ್ಸುವ॒ರ್ಗಂ-ಲೋಁ॒ಕಮೇ॑ತಿ॒ ಸೈನಗ್ಂ॑ ಸುವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ॒ ಸಾ ಮಾ॑ ಸುವ॒ರ್ಗಂ-ಲೋಁ॒ಕ-ಙ್ಗ॑ಮ॒ಯೇತ್ಯಾ॑ಹ ಸುವ॒ರ್ಗಮೇ॒ವೈನಂ॑-ಲೋಁ॒ಕ-ಙ್ಗ॑ಮಯತಿ॒ ಸಾ ಮಾ॒ ಜ್ಯೋತಿ॑ಷ್ಮನ್ತಂ-ಲೋಁ॒ಕ-ಙ್ಗ॑ಮ॒ಯೇತ್ಯಾ॑ಹ॒ ಜ್ಯೋತಿ॑ಷ್ಮನ್ತಮೇ॒ವೈನಂ॑-ಲೋಁ॒ಕ-ಙ್ಗ॑ಮಯತಿ॒ ಸಾ ಮಾ॒ ಸರ್ವಾ॒-ನ್ಪುಣ್ಯಾ᳚-ಲ್ಲೋಁ॒ಕಾ-ನ್ಗ॑ಮ॒ಯೇತ್ಯಾ॑ಹ॒ ಸರ್ವಾ॑ನೇ॒ವೈನ॒-ಮ್ಪುಣ್ಯಾಂ᳚-ಲೋಁ॒ಕಾ-ನ್ಗ॑ಮಯತಿ॒ ಸಾ [ಸಾ, ಮಾ॒ ಪ್ರ॒ತಿ॒ಷ್ಠಾ-ಙ್ಗ॑ಮಯ ಪ್ರ॒ಜಯಾ॑] 29
ಮಾ᳚ ಪ್ರತಿ॒ಷ್ಠಾ-ಙ್ಗ॑ಮಯ ಪ್ರ॒ಜಯಾ॑ ಪ॒ಶುಭಿ॑-ಸ್ಸ॒ಹ ಪುನ॒ರ್ಮಾ-ಽಽ ವಿ॑ಶತಾ-ದ್ರ॒ಯಿರಿತಿ॑ ಪ್ರ॒ಜಯೈ॒ವೈನ॑-ಮ್ಪ॒ಶುಭೀ॑ ರ॒ಯ್ಯಾ-ಮ್ಪ್ರತಿ॑ ಷ್ಠಾಪಯತಿ ಪ್ರ॒ಜಾವಾ᳚-ನ್ಪಶು॒ಮಾ-ನ್ರ॑ಯಿ॒ಮಾ-ನ್ಭ॑ವತಿ॒ ಯ ಏ॒ವಂ-ವೇಁದ॒ ತಾಮ॒ಗ್ನೀಧೇ॑ ವಾ ಬ್ರ॒ಹ್ಮಣೇ॑ ವಾ॒ ಹೋತ್ರೇ॑ ವೋದ್ಗಾ॒ತ್ರೇ ವಾ᳚-ಽದ್ಧ್ವ॒ರ್ಯವೇ॑ ವಾ ದದ್ಯಾ-ಥ್ಸ॒ಹಸ್ರ॑ಮಸ್ಯ॒ ಸಾ ದ॒ತ್ತಾ ಭ॑ವತಿ ಸ॒ಹಸ್ರ॑ಮಸ್ಯ॒ ಪ್ರತಿ॑ಗೃಹೀತ-ಮ್ಭವತಿ॒ ಯಸ್ತಾಮವಿ॑ದ್ವಾ- [ಯಸ್ತಾಮವಿ॑ದ್ವಾನ್, ಪ್ರ॒ತಿ॒ಗೃ॒ಹ್ಣಾತಿ॒] 30
-ನ್ಪ್ರತಿಗೃ॒ಹ್ಣಾತಿ॒ ತಾ-ಮ್ಪ್ರತಿ॑ಗೃಹ್ಣೀಯಾ॒ದೇಕಾ॑-ಽಸಿ॒ ನ ಸ॒ಹಸ್ರ॒ಮೇಕಾ᳚-ನ್ತ್ವಾ ಭೂ॒ತಾ-ಮ್ಪ್ರತಿ॑ ಗೃಹ್ಣಾಮಿ॒ ನ ಸ॒ಹಸ್ರ॒ಮೇಕಾ॑ ಮಾ ಭೂ॒ತಾ-ಽಽ ವಿ॑ಶ॒ ಮಾ ಸ॒ಹಸ್ರ॒ಮಿತ್ಯೇಕಾ॑ಮೇ॒ವೈನಾ᳚-ಮ್ಭೂ॒ತಾ-ಮ್ಪ್ರತಿ॑ಗೃಹ್ಣಾತಿ॒ ನ ಸ॒ಹಸ್ರಂ॒-ಯಁ ಏ॒ವಂ-ವೇಁದ॑ ಸ್ಯೋ॒ನಾ-ಽಸಿ॑ ಸು॒ಷದಾ॑ ಸು॒ಶೇವಾ᳚ ಸ್ಯೋ॒ನಾ ಮಾ ಽಽವಿ॑ಶ ಸು॒ಷದಾ॒ ಮಾ ಽಽವಿ॑ಶ ಸು॒ಶೇವಾ॒ ಮಾ ಽಽವಿ॒ಶೇ- [ಮಾ ಽಽವಿ॑ಶ, ಇತ್ಯಾ॑ಹ] 31
-ತ್ಯಾ॑ಹ ಸ್ಯೋ॒ನೈವೈನಗ್ಂ॑ ಸು॒ಷದಾ॑ ಸು॒ಶೇವಾ॑ ಭೂ॒ತಾ-ಽಽ ವಿ॑ಶತಿ॒ ನೈನಗ್ಂ॑ ಹಿನಸ್ತಿ ಬ್ರಹ್ಮವಾ॒ದಿನೋ॑ ವದನ್ತಿ ಸ॒ಹಸ್ರಗ್ಂ॑ ಸಹಸ್ರತ॒ಮ್ಯನ್ವೇ॒ತೀ(3) ಸ॑ಹಸ್ರತ॒ಮೀಗ್ಂ ಸ॒ಹಸ್ರಾ(3)ಮಿತಿ॒ ಯ-ತ್ಪ್ರಾಚೀ॑ಮು-ಥ್ಸೃ॒ಜೇ-ಥ್ಸ॒ಹಸ್ರಗ್ಂ॑ ಸಹಸ್ರತ॒ಮ್ಯನ್ವಿ॑ಯಾ॒-ತ್ತ-ಥ್ಸ॒ಹಸ್ರ॑ಮಪ್ರಜ್ಞಾ॒ತ್ರಗ್ಂ ಸು॑ವ॒ರ್ಗಂ-ಲೋಁ॒ಕ-ನ್ನ ಪ್ರ ಜಾ॑ನೀಯಾ-ತ್ಪ್ರ॒ತೀಚೀ॒-ಮುಥ್ಸೃ॑ಜತಿ॒ ತಾಗ್ಂ ಸ॒ಹಸ್ರ॒ಮನು॑ ಪ॒ರ್ಯಾವ॑ರ್ತತೇ॒ ಸಾ ಪ್ರ॑ಜಾನ॒ತೀ ಸು॑ವ॒ರ್ಗಂ-ಲೋಁ॒ಕಮೇ॑ತಿ॒ ಯಜ॑ಮಾನ -ಮ॒ಭ್ಯು-ಥ್ಸೃ॑ಜತಿ ಖ್ಷಿ॒ಪ್ರೇ ಸ॒ಹಸ್ರ॒-ಮ್ಪ್ರ ಜಾ॑ಯತ ಉತ್ತ॒ಮಾ ನೀ॒ಯತೇ᳚ ಪ್ರಥ॒ಮಾ ದೇ॒ವಾ-ನ್ಗ॑ಚ್ಛತಿ ॥ 32 ॥
(ಲೋ॒ಕಾ-ನ್ಗ॑ಮಯತಿ॒ ಸಾ – ಽವಿ॑ದ್ವಾನ್ಥ್ – ಸು॒ಶೇವಾ॒ ಮಾ-ಽಽ ವಿ॑ಶ॒ – ಯಜ॑ಮಾನಂ॒ – ದ್ವಾದ॑ಶ ಚ) (ಅ. 7)
ಅತ್ರಿ॑ರದದಾ॒ದೌರ್ವಾ॑ಯ ಪ್ರ॒ಜಾ-ಮ್ಪು॒ತ್ರಕಾ॑ಮಾಯ॒ ಸ ರಿ॑ರಿಚಾ॒ನೋ॑-ಽಮನ್ಯತ॒ ನಿರ್ವೀ᳚ರ್ಯ-ಶ್ಶಿಥಿ॒ಲೋ ಯಾ॒ತಯಾ॑ಮಾ॒ ಸ ಏ॒ತ-ಞ್ಚ॑ತೂರಾ॒ತ್ರ-ಮ॑ಪಶ್ಯ॒-ತ್ತಮಾ-ಽಹ॑ರ॒-ತ್ತೇನಾ॑ಯಜತ॒ ತತೋ॒ ವೈ ತಸ್ಯ॑ ಚ॒ತ್ವಾರೋ॑ ವೀ॒ರಾ ಆ-ಽಜಾ॑ಯನ್ತ॒ ಸುಹೋ॑ತಾ॒ ಸೂ᳚ದ್ಗಾತಾ॒ ಸ್ವ॑ದ್ಧ್ವರ್ಯು॒-ಸ್ಸುಸ॑ಭೇಯೋ॒ ಯ ಏ॒ವಂ-ವಿಁ॒ದ್ವಾಗ್ಶ್ಚ॑ತೂರಾ॒ತ್ರೇಣ॒ ಯಜ॑ತ॒ ಆ-ಽಸ್ಯ॑ ಚ॒ತ್ವಾರೋ॑ ವೀ॒ರಾ ಜಾ॑ಯನ್ತೇ॒ ಸುಹೋ॑ತಾ॒ ಸೂ᳚ದ್ಗಾತಾ॒ ಸ್ವ॑ದ್ಧ್ವರ್ಯು॒-ಸ್ಸುಸ॑ಭೇಯೋ॒ ಯೇ ಚ॑ತುರ್ವಿ॒ಗ್ಂ॒ಶಾಃ ಪವ॑ಮಾನಾ ಬ್ರಹ್ಮವರ್ಚ॒ಸ-ನ್ತ- [ಬ್ರಹ್ಮವರ್ಚ॒ಸ-ನ್ತತ್, ಯ ಉ॒ದ್ಯನ್ತ॒-] 33
-ದ್ಯ ಉ॒ದ್ಯನ್ತ॒-ಸ್ಸ್ತೋಮಾ॒-ಶ್ಶ್ರೀ-ಸ್ಸಾ ಽತ್ರಿಗ್ಗ್॑ ಶ್ರ॒ದ್ಧಾದೇ॑ವಂ॒-ಯಁಜ॑ಮಾನ-ಞ್ಚ॒ತ್ವಾರಿ॑ ವೀ॒ರ್ಯಾ॑ಣಿ॒ ನೋಪಾ॑-ಽನಮ॒-ನ್ತೇಜ॑ ಇನ್ದ್ರಿ॒ಯ-ಮ್ಬ್ರ॑ಹ್ಮವರ್ಚ॒ಸ-ಮ॒ನ್ನಾದ್ಯ॒ಗ್ಂ॒ ಸ ಏ॒ತಾಗ್ಶ್ಚ॒ತುರ॒ಶ್ಚತು॑ಷ್ಟೋಮಾ॒ನ್-ಥ್ಸೋಮಾ॑ನ-ಪಶ್ಯ॒-ತ್ತಾನಾ-ಽಹ॑ರ॒-ತ್ತೈರ॑ಯಜತ॒ ತೇಜ॑ ಏ॒ವ ಪ್ರ॑ಥ॒ಮೇನಾ ಽವಾ॑ರುನ್ಧೇನ್ದ್ರಿ॒ಯ-ನ್ದ್ವಿ॒ತೀಯೇ॑ನ ಬ್ರಹ್ಮವರ್ಚ॒ಸ-ನ್ತೃ॒ತೀಯೇ॑ನಾ॒ನ್ನಾದ್ಯ॑-ಞ್ಚತು॒ರ್ಥೇನ॒ ಯ ಏ॒ವಂ-ವಿಁ॒ದ್ವಾಗ್ಶ್ಚ॒ತುರ॒ಶ್ಚತು॑ಷ್ಟೋಮಾ॒ನ್-ಥ್ಸೋಮಾ॑ನಾ॒ಹರ॑ತಿ॒ ತೈರ್ಯಜ॑ತೇ॒ ತೇಜ॑ ಏ॒ವ ಪ್ರ॑ಥ॒ಮೇನಾವ॑ ರುನ್ಧ ಇನ್ದ್ರಿ॒ಯ-ನ್ದ್ವಿ॒ತೀಯೇ॑ನ ಬ್ರಹ್ಮವರ್ಚ॒ಸ-ನ್ತೃ॒ತೀಯೇ॑ನಾ॒-ಽನ್ನಾದ್ಯ॑-ಞ್ಚತು॒ರ್ಥೇನ॒ ಯಾಮೇ॒ವಾತ್ರಿ॒ರ್॒ ಋದ್ಧಿ॒ಮಾರ್ಧ್ನೋ॒-ತ್ತಾಮೇ॒ವ ಯಜ॑ಮಾನ ಋದ್ಧ್ನೋತಿ ॥ 34 ॥
( ತತ್-ತೇಜ॑ ಏ॒ವಾ-ಷ್ಟಾದ॑ಶ ಚ) (ಅ. 8)
ಜ॒ಮದ॑ಗ್ನಿಃ॒ ಪುಷ್ಟಿ॑ಕಾಮ-ಶ್ಚತೂರಾ॒ತ್ರೇಣಾ॑-ಯಜತ॒ ಸ ಏ॒ತಾ-ನ್ಪೋಷಾಗ್ಂ॑ ಅಪುಷ್ಯ॒-ತ್ತಸ್ಮಾ᳚-ತ್ಪಲಿ॒ತೌ ಜಾಮ॑ದಗ್ನಿಯೌ॒ ನ ಸ-ಞ್ಜಾ॑ನಾತೇ ಏ॒ತಾನೇ॒ವ ಪೋಷಾ᳚-ನ್ಪುಷ್ಯತಿ॒ ಯ ಏ॒ವಂ-ವಿಁ॒ದ್ವಾಗ್ಶ್ಚ॑ತೂರಾ॒ತ್ರೇಣ॒ ಯಜ॑ತೇ ಪುರೋಡಾ॒ಶಿನ್ಯ॑ ಉಪ॒ಸದೋ॑ ಭವನ್ತಿ ಪ॒ಶವೋ॒ ವೈ ಪು॑ರೋ॒ಡಾಶಃ॑ ಪ॒ಶೂನೇ॒ವಾವ॑ ರು॒ನ್ಧೇ ಽನ್ನಂ॒-ವೈಁ ಪು॑ರೋ॒ಡಾಶೋ-ಽನ್ನ॑ಮೇ॒ವಾವ॑ ರುನ್ಧೇ ಽನ್ನಾ॒ದಃ ಪ॑ಶು॒ಮಾ-ನ್ಭ॑ವತಿ॒ ಯ ಏ॒ವಂ-ವಿಁ॒ದ್ವಾಗ್ಶ್ಚ॑ತೂರಾ॒ತ್ರೇಣ॒ ಯಜ॑ತೇ ॥ 35 ॥
(ಜ॒ಮದ॑ಗ್ನಿ – ರ॒ಷ್ಟಾಚ॑ತ್ವಾರಿಗ್ಂಶತ್) (ಅ. 9)
ಸಂ॒ವಁ॒ಥ್ಸ॒ರೋ ವಾ ಇ॒ದಮೇಕ॑ ಆಸೀ॒-ಥ್ಸೋ॑-ಽಕಾಮಯತ॒ರ್ತೂನ್-ಥ್ಸೃ॑ಜೇ॒ಯೇತಿ॒ ಸ ಏ॒ತ-ಮ್ಪ॑ಞ್ಚರಾ॒ತ್ರಮ॑ಪಶ್ಯ॒-ತ್ತಮಾ-ಽಹ॑ರ॒-ತ್ತೇನಾ॑ಯಜತ॒ ತತೋ॒ ವೈ ಸ ಋ॒ತೂನ॑ಸೃಜತ॒ ಯ ಏ॒ವಂ-ವಿಁ॒ದ್ವಾ-ನ್ಪ॑ಞ್ಚರಾ॒ತ್ರೇಣ॒ ಯಜ॑ತೇ॒ ಪ್ರೈವ ಜಾ॑ಯತೇ॒ ತ ಋ॒ತವ॑-ಸ್ಸೃ॒ಷ್ಟಾ ನ ವ್ಯಾವ॑ರ್ತನ್ತ॒ ತ ಏ॒ತ-ಮ್ಪ॑ಞ್ಚರಾ॒ತ್ರಮ॑ಪಶ್ಯ॒-ನ್ತಮಾ-ಽಹ॑ರ॒-ನ್ತೇನಾ॑ಯಜನ್ತ॒ ತತೋ॒ ವೈ ತೇ ವ್ಯಾವ॑ರ್ತನ್ತ॒ [ವ್ಯಾವ॑ರ್ತನ್ತ, ಯ ಏ॒ವಂ-ವಿಁ॒ದ್ವಾ-ನ್ಪ॑ಞ್ಚರಾ॒ತ್ರೇಣ॒] 36
ಯ ಏ॒ವಂ-ವಿಁ॒ದ್ವಾ-ನ್ಪ॑ಞ್ಚರಾ॒ತ್ರೇಣ॒ ಯಜ॑ತೇ॒ ವಿ ಪಾ॒ಪ್ಮನಾ॒ ಭ್ರಾತೃ॑ವ್ಯೇ॒ಣಾ-ಽಽ ವ॑ರ್ತತೇ॒ ಸಾರ್ವ॑ಸೇನಿ-ಶ್ಶೌಚೇ॒ಯೋ॑-ಽಕಾಮಯತ ಪಶು॒ಮಾನ್-ಥ್ಸ್ಯಾ॒ಮಿತಿ॒ ಸ ಏ॒ತ-ಮ್ಪ॑ಞ್ಚರಾ॒ತ್ರಮಾ-ಽಹ॑ರ॒-ತ್ತೇನಾ॑-ಽಯಜತ॒ ತತೋ॒ ವೈ ಸ ಸ॒ಹಸ್ರ॑-ಮ್ಪ॒ಶೂ-ನ್ಪ್ರಾ-ಽಽಪ್ನೋ॒ದ್ಯ ಏ॒ವಂ-ವಿಁ॒ದ್ವಾ-ನ್ಪ॑ಞ್ಚರಾ॒ತ್ರೇಣ॒ ಯಜ॑ತೇ॒ ಪ್ರ ಸ॒ಹಸ್ರ॑-ಮ್ಪ॒ಶೂನಾ᳚ಪ್ನೋತಿ ಬಬ॒ರಃ ಪ್ರಾವಾ॑ಹಣಿ-ರಕಾಮಯತ ವಾ॒ಚಃ ಪ್ರ॑ವದಿ॒ತಾ ಸ್ಯಾ॒ಮಿತಿ॒ ಸ ಏ॒ತ-ಮ್ಪ॑ಞ್ಚರಾ॒ತ್ರಮಾ- [ಏ॒ತ-ಮ್ಪ॑ಞ್ಚರಾ॒ತ್ರಮಾ, ಆ॒ಹ॒ರ॒-ತ್ತೇನಾ॑-] 37
-ಽಹ॑ರ॒-ತ್ತೇನಾ॑-ಯಜತ॒ ತತೋ॒ ವೈ ಸ ವಾ॒ಚಃ ಪ್ರ॑ವದಿ॒ತಾ-ಽಭ॑ವ॒ದ್ಯ ಏ॒ವಂ-ವಿಁ॒ದ್ವಾ-ನ್ಪ॑ಞ್ಚರಾ॒ತ್ರೇಣ॒ ಯಜ॑ತೇ ಪ್ರವದಿ॒ತೈವ ವಾ॒ಚೋ ಭ॑ವ॒ತ್ಯಥೋ॑ ಏನಂ-ವಾಁ॒ಚಸ್ಪತಿ॒-ರಿತ್ಯಾ॑ಹು॒ರನಾ᳚ಪ್ತ-ಶ್ಚತೂರಾ॒ತ್ರೋ-ಽತಿ॑ರಿಕ್ತ-ಷ್ಷಡ್-ರಾ॒ತ್ರೋ-ಽಥ॒ ವಾ ಏ॒ಷ ಸ॑ಪ್ರ॒ನ್ತಿ ಯ॒ಜ್ಞೋ ಯ-ತ್ಪ॑ಞ್ಚರಾ॒ತ್ರೋ ಯ ಏ॒ವಂ-ವಿಁ॒ದ್ವಾ-ನ್ಪ॑ಞ್ಚರಾ॒ತ್ರೇಣ॒ ಯಜ॑ತೇ ಸಮ್ಪ್ರ॒ತ್ಯೇ॑ವ ಯ॒ಜ್ಞೇನ॑ ಯಜತೇ ಪಞ್ಚರಾ॒ತ್ರೋ ಭ॑ವತಿ॒ ಪಞ್ಚ॒ ವಾ ಋ॒ತವ॑-ಸ್ಸಂವಁಥ್ಸ॒ರ [ಋ॒ತವ॑-ಸ್ಸಂವಁಥ್ಸ॒ರಃ, ಋ॒ತುಷ್ವೇ॒ವ ಸಂ॑ವಁಥ್ಸ॒ರೇ] 38
ಋ॒ತುಷ್ವೇ॒ವ ಸಂ॑ವಁಥ್ಸ॒ರೇ ಪ್ರತಿ॑ ತಿಷ್ಠ॒ತ್ಯಥೋ॒ ಪಞ್ಚಾ᳚ಖ್ಷರಾ ಪ॒ಙ್ಕ್ತಿಃ ಪಾಙ್ಕ್ತೋ॑ ಯ॒ಜ್ಞೋ ಯ॒ಜ್ಞಮೇ॒ವಾವ॑ ರುನ್ಧೇ ತ್ರಿ॒ವೃದ॑ಗ್ನಿಷ್ಟೋ॒ಮೋ ಭ॑ವತಿ॒ ತೇಜ॑ ಏ॒ವಾವ॑ ರುನ್ಧೇ ಪಞ್ಚದ॒ಶೋ ಭ॑ವತೀನ್ದ್ರಿ॒ಯಮೇ॒ವಾವ॑ ರುನ್ಧೇ ಸಪ್ತದ॒ಶೋ ಭ॑ವತ್ಯ॒ನ್ನಾದ್ಯ॒ಸ್ಯಾ-ವ॑ರುದ್ಧ್ಯಾ॒ ಅಥೋ॒ ಪ್ರೈವ ತೇನ॑ ಜಾಯತೇ ಪಞ್ಚವಿ॒ಗ್ಂ॒ಶೋ᳚ ಽಗ್ನಿಷ್ಟೋ॒ಮೋ ಭ॑ವತಿ ಪ್ರ॒ಜಾಪ॑ತೇ॒ರಾಪ್ತ್ಯೈ॑ ಮಹಾವ್ರ॒ತವಾ॑-ನ॒ನ್ನಾದ್ಯ॒ಸ್ಯಾ-ವ॑ರುದ್ಧ್ಯೈ ವಿಶ್ವ॒ಜಿ-ಥ್ಸರ್ವ॑ಪೃಷ್ಠೋ-ಽತಿರಾ॒ತ್ರೋ ಭ॑ವತಿ॒ ಸರ್ವ॑ಸ್ಯಾ॒ಭಿಜಿ॑ತ್ಯೈ ॥ 39 ॥
(ತೇ ವ್ಯಾವ॑ರ್ತನ್ತ – ಪ್ರವದಿ॒ತಾ ಸ್ಯಾ॒ಮಿತಿ॒ ಸ ಏ॒ತ-ಮ್ಪ॑ಞ್ಚರಾ॒ತ್ರಮಾ – ಸಂ॑ವಁಥ್ಸ॒ರೋ॑- ಭಿಜಿ॑ತ್ಯೈ) (ಅ. 10)
ದೇ॒ವಸ್ಯ॑ತ್ವಾ ಸವಿ॒ತುಃ ಪ್ರ॑ಸ॒ವೇ᳚-ಽಶ್ವಿನೋ᳚ರ್ಬಾ॒ಹುಭ್ಯಾ᳚-ಮ್ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಾ ದ॑ದ ಇ॒ಮಾಮ॑ಗೃಭ್ಣ-ನ್ರಶ॒ನಾಮೃ॒ತಸ್ಯ॒ ಪೂರ್ವ॒ ಆಯು॑ಷಿ ವಿ॒ದಥೇ॑ಷು ಕ॒ವ್ಯಾ । ತಯಾ॑ ದೇ॒ವಾ-ಸ್ಸು॒ತಮಾ ಬ॑ಭೂವುರ್-ಋ॒ತಸ್ಯ॒ ಸಾಮ᳚ನ್-ಥ್ಸ॒ರಮಾ॒ರಪ॑ನ್ತೀ ॥ ಅ॒ಭಿ॒ಧಾ ಅ॑ಸಿ॒ ಭುವ॑ನಮಸಿ ಯ॒ನ್ತಾ-ಽಸಿ॑ ಧ॒ರ್ತಾ-ಽಸಿ॒ ಸೋ᳚-ಽಗ್ನಿಂ-ವೈಁ᳚ಶ್ವಾನ॒ರಗ್ಂ ಸಪ್ರ॑ಥಸ-ಙ್ಗಚ್ಛ॒ ಸ್ವಾಹಾ॑ಕೃತಃ ಪೃಥಿ॒ವ್ಯಾಂ-ಯಁ॒ನ್ತಾ ರಾಡ್ ಯ॒ನ್ತಾ-ಽಸಿ॒ ಯಮ॑ನೋ ಧ॒ರ್ತಾ-ಽಸಿ॑ ಧ॒ರುಣಃ॑ ಕೃ॒ಷ್ಯೈ ತ್ವಾ॒ ಖ್ಷೇಮಾ॑ಯ ತ್ವಾ ರ॒ಯ್ಯೈ ತ್ವಾ॒ ಪೋಷಾ॑ಯ ತ್ವಾ ಪೃಥಿ॒ವ್ಯೈ ತ್ವಾ॒ ಽನ್ತರಿ॑ಖ್ಷಾಯ ತ್ವಾ ದಿ॒ವೇ ತ್ವಾ॑ ಸ॒ತೇ ತ್ವಾ-ಽಸ॑ತೇ ತ್ವಾ॒ದ್ಭ್ಯಸ್ತ್ವೌ-ಷ॑ಧೀಭ್ಯಸ್ತ್ವಾ॒ ವಿಶ್ವೇ᳚ಭ್ಯಸ್ತ್ವಾ ಭೂ॒ತೇಭ್ಯಃ॑ ॥ 40 ॥
(ಧ॒ರುಣಃ॒ – ಪಞ್ಚ॑ವಿಗ್ಂಶತಿಶ್ಚ) (ಅ. 11)
ವಿ॒ಭೂರ್ಮಾ॒ತ್ರಾ ಪ್ರ॒ಭೂಃ ಪಿ॒ತ್ರಾಶ್ವೋ॑-ಽಸಿ॒ ಹಯೋ॒-ಽಸ್ಯತ್ಯೋ॑-ಽಸಿ॒ ನರೋ॒-ಽಸ್ಯರ್ವಾ॑-ಽಸಿ॒ ಸಪ್ತಿ॑ರಸಿ ವಾ॒ಜ್ಯ॑ಸಿ॒ ವೃಷಾ॑-ಽಸಿ ನೃ॒ಮಣಾ॑ ಅಸಿ॒ ಯಯು॒ರ್ನಾಮಾ᳚ಸ್ಯಾದಿ॒ತ್ಯಾನಾ॒-ಮ್ಪತ್ವಾನ್ವಿ॑ಹ್ಯ॒ಗ್ನಯೇ॒ ಸ್ವಾಹಾ॒ ಸ್ವಾಹೇ᳚ನ್ದ್ರಾ॒ಗ್ನಿಭ್ಯಾ॒ಗ್॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ॒ ವಿಶ್ವೇ᳚ಭ್ಯೋ ದೇ॒ವೇಭ್ಯ॒-ಸ್ಸ್ವಾಹಾ॒ ಸರ್ವಾ᳚ಭ್ಯೋ ದೇ॒ವೇತಾ᳚ಭ್ಯ ಇ॒ಹ ಧೃತಿ॒-ಸ್ಸ್ವಾಹೇ॒ಹ ವಿಧೃ॑ತಿ॒-ಸ್ಸ್ವಾಹೇ॒ಹ ರನ್ತಿ॒-ಸ್ಸ್ವಾಹೇ॒ -ಹ ರಮ॑ತಿ॒-ಸ್ಸ್ವಾಹಾ॒ ಭೂರ॑ಸಿ ಭು॒ವೇ ತ್ವಾ॒ ಭವ್ಯಾ॑ಯ ತ್ವಾ ಭವಿಷ್ಯ॒ತೇ ತ್ವಾ॒ ವಿಶ್ವೇ᳚ಭ್ಯಸ್ತ್ವಾ ಭೂ॒ತೇಭ್ಯೋ॒ ದೇವಾ॑ ಆಶಾಪಾಲಾ ಏ॒ತ-ನ್ದೇ॒ವೇಭ್ಯೋ-ಽಶ್ವ॒-ಮ್ಮೇಧಾ॑ಯ॒ ಪ್ರೋಖ್ಷಿ॑ತ-ಙ್ಗೋಪಾಯತ ॥ 41 ॥
(ರನ್ತಿ॒-ಸ್ಸ್ವಾಹಾ॒ – ದ್ವಾವಿಗ್ಂ॑ಶತಿಶ್ಚ) (ಅ. 12)
ಆಯ॑ನಾಯ॒ ಸ್ವಾಹಾ॒ ಪ್ರಾಯ॑ಣಾಯ॒ ಸ್ವಾಹೋ᳚ದ್ದ್ರಾ॒ವಾಯ॒ ಸ್ವಾಹೋದ್ದ್ರು॑ತಾಯ॒ ಸ್ವಾಹಾ॑ ಶೂಕಾ॒ರಾಯ॒ ಸ್ವಾಹಾ॒ ಶೂಕೃ॑ತಾಯ॒ ಸ್ವಾಹಾ॒ ಪಲಾ॑ಯಿತಾಯ॒ ಸ್ವಾಹಾ॒ ಽಽಪಲಾ॑ಯಿತಾಯ॒ ಸ್ವಾಹಾ॒ ಽಽವಲ್ಗ॑ತೇ॒ ಸ್ವಾಹಾ॑ ಪರಾ॒ವಲ್ಗ॑ತೇ॒ ಸ್ವಾಹಾ॑ ಽಽಯ॒ತೇ ಸ್ವಾಹಾ᳚ ಪ್ರಯ॒ತೇ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 42 ॥
(ಆಯ॑ನಾ॒ಯೋತ್ತ॑ರಮಾ॒ಪಲಾ॑ಯಿತಾಯ॒ ಷಡ್ವಿಗ್ಂ॑ಶತಿಃ) (ಅ. 13)
ಅ॒ಗ್ನಯೇ॒ ಸ್ವಾಹಾ॒ ಸೋಮಾ॑ಯ॒ ಸ್ವಾಹಾ॑ ವಾ॒ಯವೇ॒ ಸ್ವಾಹಾ॒ ಽಪಾ-ಮ್ಮೋದಾ॑ಯ॒ ಸ್ವಾಹಾ॑ ಸವಿ॒ತ್ರೇ ಸ್ವಾಹಾ॒ ಸರ॑ಸ್ವತ್ಯೈ॒ ಸ್ವಾಹೇ-ನ್ದ್ರಾ॑ಯ॒ ಸ್ವಾಹಾ॒ ಬೃಹ॒ಸ್ಪತ॑ಯೇ॒ ಸ್ವಾಹಾ॑ ಮಿ॒ತ್ರಾಯ॒ ಸ್ವಾಹಾ॒ ವರು॑ಣಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 43 ॥
(ಅ॒ಗ್ನಯೇ॑ ವಾ॒ಯವೇ॒-ಽಪಾ-ಮ್ಮೋದಾ॒ಯೇನ್ದ್ರಾ॑ಯ॒ ತ್ರಯೋ॑ವಿಗ್ಂಶತಿಃ) (ಅ. 14)
ಪೃ॒ಥಿ॒ವ್ಯೈ ಸ್ವಾಹಾ॒ ಽನ್ತರಿ॑ಖ್ಷಾಯ॒ ಸ್ವಾಹಾ॑ ದಿ॒ವೇ ಸ್ವಾಹಾ॒ ಸೂರ್ಯಾ॑ಯ॒ ಸ್ವಾಹಾ॑ ಚ॒ನ್ದ್ರಮ॑ಸೇ॒ ಸ್ವಾಹಾ॒ ನಖ್ಷ॑ತ್ರೇಭ್ಯ॒-ಸ್ಸ್ವಾಹಾ॒ ಪ್ರಾಚ್ಯೈ॑ ದಿ॒ಶೇ ಸ್ವಾಹಾ॒ ದಖ್ಷಿ॑ಣಾಯೈ ದಿ॒ಶೇ ಸ್ವಾಹಾ᳚ ಪ್ರ॒ತೀಚ್ಯೈ॑ ದಿ॒ಶೇ ಸ್ವಾಹೋ-ದೀ᳚ಚ್ಯೈ ದಿ॒ಶೇ ಸ್ವಾಹೋ॒ರ್ಧ್ವಾಯೈ॑ ದಿ॒ಶೇ ಸ್ವಾಹಾ॑ ದಿ॒ಗ್ಭ್ಯ-ಸ್ಸ್ವಾಹಾ॑ ಽವಾನ್ತರದಿ॒ಶಾಭ್ಯ॒-ಸ್ಸ್ವಾಹಾ॒ ಸಮಾ᳚ಭ್ಯ॒-ಸ್ಸ್ವಾಹಾ॑ ಶ॒ರದ್ಭ್ಯ॒-ಸ್ಸ್ವಾಹಾ॑ ಽಹೋರಾ॒ತ್ರೇಭ್ಯ॒-ಸ್ಸ್ವಾಹಾ᳚ ಽರ್ಧಮಾ॒ಸೇಭ್ಯ॒-ಸ್ಸ್ವಾಹಾ॒ ಮಾಸೇ᳚ಭ್ಯ॒-ಸ್ಸ್ವಾಹ॒ರ್ತುಭ್ಯ॒-ಸ್ಸ್ವಾಹಾ॑ ಸಂವಁಥ್ಸ॒ರಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 44 ॥
(ಪೃ॒ಥಿ॒ವ್ಯೈ ಸೂರ್ಯಾ॑ಯ॒ ನಖ್ಷ॑ತ್ರೇಭ್ಯಃ॒ ಪ್ರಾಚ್ಯೈ॑ ಸ॒ಪ್ತಚ॑ತ್ವಾರಿಗ್ಂಶತ್) (ಅ. 15)
ಅ॒ಗ್ನಯೇ॒ ಸ್ವಾಹಾ॒ ಸೋಮಾ॑ಯ॒ ಸ್ವಾಹಾ॑ ಸವಿ॒ತ್ರೇ ಸ್ವಾಹಾ॒ ಸರ॑ಸ್ವತ್ಯೈ॒ ಸ್ವಾಹಾ॑ ಪೂ॒ಷ್ಣೇ ಸ್ವಾಹಾ॒ ಬೃಹ॒ಸ್ಪತ॑ಯೇ॒ ಸ್ವಾಹಾ॒ ಽಪಾ-ಮ್ಮೋದಾ॑ಯ॒ ಸ್ವಾಹಾ॑ ವಾ॒ಯವೇ॒ ಸ್ವಾಹಾ॑ ಮಿ॒ತ್ರಾಯ॒ ಸ್ವಾಹಾ॒ ವರು॑ಣಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 45 ॥
(ಅ॒ಗ್ನಯೇ॑ ಸವಿ॒ತ್ರೇ ಪೂ॒ಷ್ಣೇ॑-ಽಪಾ-ಮ್ಮೋದಾ॑ಯ ವಾ॒ಯವೇ॒ ತ್ರಯೋ॑ವಿಗ್ಂಶತಿಃ) (ಅ. 16)
ಪೃ॒ಥಿ॒ವ್ಯೈ ಸ್ವಾಹಾ॒ ಽನ್ತರಿ॑ಖ್ಷಾಯ॒ ಸ್ವಾಹಾ॑ ದಿ॒ವೇ ಸ್ವಾಹಾ॒ ಽಗ್ನಯೇ॒ ಸ್ವಾಹಾ॒ ಸೋಮಾ॑ಯ॒ ಸ್ವಾಹಾ॒ ಸೂರ್ಯಾ॑ಯ॒ ಸ್ವಾಹಾ॑ ಚ॒ನ್ದ್ರಮ॑ಸೇ॒ ಸ್ವಾಹಾ ಽಹ್ನೇ॒ ಸ್ವಾಹಾ॒ ರಾತ್ರಿ॑ಯೈ॒ ಸ್ವಾಹ॒ರ್ಜವೇ॒ ಸ್ವಾಹಾ॑ ಸಾ॒ಧವೇ॒ ಸ್ವಾಹಾ॑ ಸುಖ್ಷಿ॒ತ್ಯೈ ಸ್ವಾಹಾ᳚ ಖ್ಷು॒ಧೇ ಸ್ವಾಹಾ॑ ಽಽಶಿತಿ॒ಮ್ನೇ ಸ್ವಾಹಾ॒ ರೋಗಾ॑ಯ॒ ಸ್ವಾಹಾ॑ ಹಿ॒ಮಾಯ॒ ಸ್ವಾಹಾ॑ ಶೀ॒ತಾಯ॒ ಸ್ವಾಹಾ॑ ಽಽತ॒ಪಾಯ॒ ಸ್ವಾಹಾ ಽರ॑ಣ್ಯಾಯ॒ ಸ್ವಾಹಾ॑ ಸುವ॒ರ್ಗಾಯ॒ ಸ್ವಾಹಾ॑ ಲೋ॒ಕಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 46 ॥
(ಪೃ॒ಥಿ॒ವ್ಯಾ ಅ॒ಗ್ನಯೇ-ಽಹ್ನೇ॒ ರಾತ್ರಿ॑ಯೈ॒ ಚತು॑ಶ್ಚತ್ವಾರಿಗ್ಂಶತ್) (ಅ. 17)
ಭುವೋ॑ ದೇ॒ವಾನಾ॒-ಙ್ಕರ್ಮ॑ಣಾ॒-ಽಪಸ॒ರ್ತಸ್ಯ॑ ಪ॒ಥ್ಯಾ॑-ಽಸಿ॒ ವಸು॑ಭಿ-ರ್ದೇ॒ವೇಭಿ॑-ರ್ದೇ॒ವತ॑ಯಾ ಗಾಯ॒ತ್ರೇಣ॑ ತ್ವಾ॒ ಛನ್ದ॑ಸಾ ಯುನಜ್ಮಿ ವಸ॒ನ್ತೇನ॑ ತ್ವ॒ರ್ತುನಾ॑ ಹ॒ವಿಷಾ॑ ದೀಖ್ಷಯಾಮಿ ರು॒ದ್ರೇಭಿ॑-ರ್ದೇ॒ವೇಭಿ॑-ರ್ದೇ॒ವತ॑ಯಾ॒ ತ್ರೈಷ್ಟು॑ಭೇನ ತ್ವಾ॒ ಛನ್ದ॑ಸಾ ಯುನಜ್ಮಿ ಗ್ರೀ॒ಷ್ಮೇಣ॑ ತ್ವ॒ರ್ತುನಾ॑ ಹ॒ವಿಷಾ॑ ದೀಖ್ಷಯಾ-ಮ್ಯಾದಿ॒ತ್ಯೇಭಿ॑-ರ್ದೇ॒ವೇಭಿ॑-ರ್ದೇ॒ವತ॑ಯಾ॒ ಜಾಗ॑ತೇನ ತ್ವಾ॒ ಛನ್ದ॑ಸಾ ಯುನಜ್ಮಿ ವ॒ರ್॒ಷಾಭಿ॑ಸ್ತ್ವ॒ರ್ತುನಾ॑ ಹ॒ವಿಷಾ॑ ದೀಖ್ಷಯಾಮಿ॒ ವಿಶ್ವೇ॑ಭಿ-ರ್ದೇ॒ವೇಭಿ॑-ರ್ದೇ॒ವತ॒ಯಾ ಽಽನು॑ಷ್ಟುಭೇನ ತ್ವಾ॒ ಛನ್ದ॑ಸಾ ಯುನಜ್ಮಿ [ ] 47
ಶ॒ರದಾ᳚ ತ್ವ॒ರ್ತುನಾ॑ ಹ॒ವಿಷಾ॑ ದೀಖ್ಷಯಾ॒ಮ್ಯಙ್ಗಿ॑ರೋಭಿ-ರ್ದೇ॒ವೇಭಿ॑-ರ್ದೇ॒ವತ॑ಯಾ॒ ಪಾಙ್ಕ್ತೇ॑ನ ತ್ವಾ॒ ಛನ್ದ॑ಸಾ ಯುನಜ್ಮಿ ಹೇಮನ್ತಶಿಶಿ॒ರಾಭ್ಯಾ᳚-ನ್ತ್ವ॒ರ್ತುನಾ॑ ಹ॒ವಿಷಾ॑ ದೀಖ್ಷಯಾ॒ಮ್ಯಾ-ಽಹ-ನ್ದೀ॒ಖ್ಷಾಮ॑ರುಹಮೃ॒ತಸ್ಯ॒ ಪತ್ನೀ᳚-ಙ್ಗಾಯ॒ತ್ರೇಣ॒ ಛನ್ದ॑ಸಾ॒ ಬ್ರಹ್ಮ॑ಣಾ ಚ॒ರ್ತಗ್ಂ ಸ॒ತ್ಯೇ॑-ಽಧಾಗ್ಂ ಸ॒ತ್ಯಮೃ॒ತೇ॑-ಽಧಾಮ್ ॥ ಮ॒ಹೀ ಮೂ ॒ಷು >1ಸು॒ತ್ರಾಮಾ॑ಣ >2-ಮಿ॒ಹ ಧೃತಿ॒-ಸ್ಸ್ವಾಹೇ॒ಹ ವಿಧೃ॑ತಿ॒-ಸ್ಸ್ವಾಹೇ॒ಹ ರನ್ತಿ॒-ಸ್ಸ್ವಾಹೇ॒ಹ ರಮ॑ತಿ॒-ಸ್ಸ್ವಾಹಾ᳚ ॥ 48 ॥
(ಆನು॑ಷ್ಟುಭೇನ ತ್ವಾ॒ ಛನ್ದ॑ಸಾ ಯುನ॒ಜ್ಮ್ಯೇ – ಕಾ॒ನ್ನ ಪ॑ಞ್ಚಾ॒ಶಚ್ಚ॑) (ಅ. 18)
ಈ॒ಕಾಂ॒ರಾಯ॒ ಸ್ವಾಹೇ-ಙ್ಕೃ॑ತಾಯ॒ ಸ್ವಾಹಾ॒ ಕ್ರನ್ದ॑ತೇ॒ ಸ್ವಾಹಾ॑ ಽವ॒ಕ್ರನ್ದ॑ತೇ॒ ಸ್ವಾಹಾ॒ ಪ್ರೋಥ॑ತೇ॒ ಸ್ವಾಹಾ᳚ ಪ್ರ॒ಪ್ರೋಥ॑ತೇ॒ ಸ್ವಾಹಾ॑ ಗ॒ನ್ಧಾಯ॒ ಸ್ವಾಹಾ᳚ ಘ್ರಾ॒ತಾಯ॒ ಸ್ವಾಹಾ᳚ ಪ್ರಾ॒ಣಾಯ॒ ಸ್ವಾಹಾ᳚ ವ್ಯಾ॒ನಾಯ॒ ಸ್ವಾಹಾ॑ ಽಪಾ॒ನಾಯ॒ ಸ್ವಾಹಾ॑ ಸನ್ದೀ॒ಯಮಾ॑ನಾಯ॒ ಸ್ವಾಹಾ॒ ಸನ್ದಿ॑ತಾಯ॒ ಸ್ವಾಹಾ॑ ವಿಚೃ॒ತ್ಯಮಾ॑ನಾಯ॒ ಸ್ವಾಹಾ॒ ವಿಚೃ॑ತ್ತಾಯ॒ ಸ್ವಾಹಾ॑ ಪಲಾಯಿ॒ಷ್ಯಮಾ॑ಣಾಯ॒ ಸ್ವಾಹಾ॒ ಪಲಾ॑ಯಿತಾಯ॒ ಸ್ವಾಹೋ॑ಪರಗ್ಗ್ಸ್ಯ॒ತೇ ಸ್ವಾಹೋಪ॑ರತಾಯ॒ ಸ್ವಾಹಾ॑ ನಿವೇಖ್ಷ್ಯ॒ತೇ ಸ್ವಾಹಾ॑ ನಿವಿ॒ಶಮಾ॑ನಾಯ॒ ಸ್ವಾಹಾ॒ ನಿವಿ॑ಷ್ಟಾಯ॒ ಸ್ವಾಹಾ॑ ನಿಷಥ್ಸ್ಯ॒ತೇ ಸ್ವಾಹಾ॑ ನಿ॒ಷೀದ॑ತೇ॒ ಸ್ವಾಹಾ॒ ನಿಷ॑ಣ್ಣಾಯ॒ ಸ್ವಾಹಾ॑- [ನಿಷ॑ಣ್ಣಾಯ॒ ಸ್ವಾಹಾ᳚, ಆ॒ಸಿ॒ಷ್ಯ॒ತೇ ಸ್ವಾಹಾ] 49
-ಽಽಸಿಷ್ಯ॒ತೇ ಸ್ವಾಹಾ ಽಽಸೀ॑ನಾಯ॒ ಸ್ವಾಹಾ॑ ಽಽಸಿ॒ತಾಯ॒ ಸ್ವಾಹಾ॑ ನಿಪಥ್ಸ್ಯ॒ತೇ ಸ್ವಾಹಾ॑ ನಿ॒ಪದ್ಯ॑ಮಾನಾಯ॒ ಸ್ವಾಹಾ॒ ನಿಪ॑ನ್ನಾಯ॒ ಸ್ವಾಹಾ॑ ಶಯಿಷ್ಯ॒ತೇ ಸ್ವಾಹಾ॒ ಶಯಾ॑ನಾಯ॒ ಸ್ವಾಹಾ॑ ಶಯಿ॒ತಾಯ॒ ಸ್ವಾಹಾ॑ ಸಮ್ಮೀಲಿಷ್ಯ॒ತೇ ಸ್ವಾಹಾ॑ ಸ॒ಮೀಂಲಁ॑ತೇ॒ ಸ್ವಾಹಾ॒ ಸಮ್ಮೀ॑ಲಿತಾಯ॒ ಸ್ವಾಹಾ᳚ ಸ್ವಫ್ಸ್ಯ॒ತೇ ಸ್ವಾಹಾ᳚ ಸ್ವಪ॒ತೇ ಸ್ವಾಹಾ॑ ಸು॒ಪ್ತಾಯ॒ ಸ್ವಾಹಾ᳚ ಪ್ರಭೋಥ್ಸ್ಯ॒ತೇ ಸ್ವಾಹಾ᳚ ಪ್ರ॒ಬುದ್ಧ್ಯ॑ಮಾನಾಯ॒ ಸ್ವಾಹಾ॒ ಪ್ರಬು॑ದ್ಧಾಯ॒ ಸ್ವಾಹಾ॑ ಜಾಗರಿಷ್ಯ॒ತೇ ಸ್ವಾಹಾ॒ ಜಾಗ್ರ॑ತೇ॒ ಸ್ವಾಹಾ॑ ಜಾಗರಿ॒ತಾಯ॒ ಸ್ವಾಹಾ॒ ಶುಶ್ರೂ॑ಷಮಾಣಾಯ॒ ಸ್ವಾಹಾ॑ ಶೃಣ್ವ॒ತೇ ಸ್ವಾಹಾ᳚ ಶ್ರು॒ತಾಯ॒ ಸ್ವಾಹಾ॑ ವೀಖ್ಷಿಷ್ಯ॒ತೇ ಸ್ವಾಹಾ॒ [ವೀಖ್ಷಿಷ್ಯ॒ತೇ ಸ್ವಾಹಾ᳚, ವೀಖ್ಷ॑ಮಾಣಾಯ॒ ಸ್ವಾಹಾ॒] 50
ವೀಖ್ಷ॑ಮಾಣಾಯ॒ ಸ್ವಾಹಾ॒ ವೀಖ್ಷಿ॑ತಾಯ॒ ಸ್ವಾಹಾ॑ ಸಗ್ಂಹಾಸ್ಯ॒ತೇ ಸ್ವಾಹಾ॑ ಸ॒ಜಿಂಹಾ॑ನಾಯ॒ ಸ್ವಾಹೋ॒-ಜ್ಜಿಹಾ॑ನಾಯ॒ ಸ್ವಾಹಾ॑ ವಿವರ್ಥ್ಸ್ಯ॒ತೇ ಸ್ವಾಹಾ॑ ವಿ॒ವರ್ತ॑ಮಾನಾಯ॒ ಸ್ವಾಹಾ॒ ವಿವೃ॑ತ್ತಾಯ॒ ಸ್ವಾಹೋ᳚-ತ್ಥಾಸ್ಯ॒ತೇ ಸ್ವಾಹೋ॒ತ್ತಿಷ್ಠ॑ತೇ॒ ಸ್ವಾಹೋತ್ಥಿ॑ತಾಯ॒ ಸ್ವಾಹಾ॑ ವಿಧವಿಷ್ಯ॒ತೇ ಸ್ವಾಹಾ॑ ವಿಧೂನ್ವಾ॒ನಾಯ॒ ಸ್ವಾಹಾ॒ ವಿಧೂ॑ತಾಯ॒ ಸ್ವಾಹೋ᳚-ತ್ಕ್ರಗ್ಗ್ಸ್ಯ॒ತೇ ಸ್ವಾಹೋ॒ತ್ಕ್ರಾಮ॑ತೇ॒ ಸ್ವಾಹೋತ್ಕ್ರಾ᳚ನ್ತಾಯ॒ ಸ್ವಾಹಾ॑ ಚಙ್ಕ್ರಮಿಷ್ಯ॒ತೇ ಸ್ವಾಹಾ॑ ಚಙ್ಕ್ರ॒ಮ್ಯಮಾ॑ಣಾಯ॒ ಸ್ವಾಹಾ॑ ಚಙ್ಕ್ರಮಿ॒ತಾಯ॒ ಸ್ವಾಹಾ॑ ಕಣ್ಡೂಯಿಷ್ಯ॒ತೇ ಸ್ವಾಹಾ॑ ಕಣ್ಡೂ॒ಯಮಾ॑ನಾಯ॒ ಸ್ವಾಹಾ॑ ಕಣ್ಡೂಯಿ॒ತಾಯ॒ ಸ್ವಾಹಾ॑ ನಿಕಷಿಷ್ಯ॒ತೇ ಸ್ವಾಹಾ॑ ನಿ॒ಕಷ॑ಮಾಣಾಯ॒ ಸ್ವಾಹಾ॒ ನಿಕ॑ಷಿತಾಯ॒ ಸ್ವಾಹಾ॒ ಯದತ್ತಿ॒ ತಸ್ಮೈ॒ ಸ್ವಾಹಾ॒ ಯ-ತ್ಪಿಬ॑ತಿ॒ ತಸ್ಮೈ॒ ಸ್ವಾಹಾ॒ ಯನ್ಮೇಹ॑ತಿ॒ ತಸ್ಮೈ॒ ಸ್ವಾಹಾ॒ ಯಚ್ಛಕೃ॑-ತ್ಕ॒ರೋತಿ॒ ತಸ್ಮೈ॒ ಸ್ವಾಹಾ॒ ರೇತ॑ಸೇ॒ ಸ್ವಾಹಾ᳚ ಪ್ರ॒ಜಾಭ್ಯ॒-ಸ್ಸ್ವಾಹಾ᳚ ಪ್ರ॒ಜನ॑ನಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 51 ॥
(ನಿಷ॑ಣ್ಣಾಯ॒ ಸ್ವಾಹಾ॑ – ವೀಖ್ಷಿಷ್ಯ॒ತೇ ಸ್ವಾಹಾ॑ – ನಿ॒ಕಷ॑ಮಾಣಾಯ॒ ಸ್ವಾಹಾ॑ – ಸ॒ಪ್ತವಿಗ್ಂ॑ಶತಿಶ್ಚ) (ಅ. 19)
ಅ॒ಗ್ನಯೇ॒ ಸ್ವಾಹಾ॑ ವಾ॒ಯವೇ॒ ಸ್ವಾಹಾ॒ ಸೂರ್ಯಾ॑ಯ॒ ಸ್ವಾಹ॒ರ್ತ-ಮ॑ಸ್ಯೃ॒ತಸ್ಯ॒ರ್ತಮ॑ಸಿ ಸ॒ತ್ಯಮ॑ಸಿ ಸ॒ತ್ಯಸ್ಯ॑ ಸ॒ತ್ಯ-ಮ॑ಸ್ಯೃ॒ತಸ್ಯ॒ ಪನ್ಥಾ॑ ಅಸಿ ದೇ॒ವಾನಾ᳚-ಞ್ಛಾ॒ಯಾ-ಽಮೃತ॑ಸ್ಯ॒ ನಾಮ॒ ತ-ಥ್ಸ॒ತ್ಯಂ-ಯಁ-ತ್ತ್ವ-ಮ್ಪ್ರ॒ಜಾಪ॑ತಿ॒ರಸ್ಯಧಿ॒ ಯದ॑ಸ್ಮಿನ್ ವಾ॒ಜಿನೀ॑ವ॒ ಶುಭ॒-ಸ್ಸ್ಪರ್ಧ॑ನ್ತೇ॒ ದಿವ॒-ಸ್ಸೂರ್ಯೇ॑ಣ॒ ವಿಶೋ॒-ಽಪೋ ವೃ॑ಣಾ॒ನಃ ಪ॑ವತೇ ಕ॒ವ್ಯ-ನ್ಪ॒ಶು-ನ್ನ ಗೋ॒ಪಾ ಇರ್ಯಃ॒ ಪರಿ॑ಜ್ಮಾ ॥ 52 ॥
(ಅ॒ಗ್ನಯೇ॑ ವಾ॒ಯವೇ॒ ಸೂರ್ಯಾ॑ಯಾ॒ – ಽಷ್ಟಾಚ॑ತ್ವಾರಿಗ್ಂಶತ್) (ಅ. 20)
(ಪ್ರ॒ಜನ॑ನಂ – ಪ್ರಾತಸ್ಸವ॒ನೇ ವೈ – ಬ್ರ॑ಹ್ಮವಾ॒ದಿನ॒-ಸ್ಸ ತ್ವಾ – ಅಙ್ಗಿ॑ರಸ॒- ಆಪೋ॒ ವೈ – ಸೋಮೋ॒ ವೈ – ಸ॑ಹಸ್ರತ॒ಮ್ಯಾ – ತ್ರಿ॑ – ರ್ಜ॒ಮದ॑ಗ್ನಿಃ – ಸಂವಁಥ್ಸ॒ರೋ – ದೇ॒ವಸ್ಯ॑ -ವಿ॒ಭೂ – ರಾಯ॑ನಾಯಾ॒- ಽಗ್ನಯೇ॑ – ಪೃಥಿ॒ವ್ಯಾ – ಅ॒ಗ್ನಯೇ॑ – ಪೃಥಿ॒ವ್ಯೈ – ಭುವ॑ – ಈಕಾಂ॒ರಾಯಾ॒ – ಗ್ನಯೇ॑ ವಾ॒ಯವೇ॒ ಸೂರ್ಯಾ॑ಯ – ವಿಗ್ಂಶ॒ತಿಃ )
(ಪ್ರ॒ಜನ॑ನ॒ – ಮಙ್ಗಿ॑ರಸಃ॒ – ಸೋಮೋ॒ ವೈ – ಪ್ರ॑ತಿಗೃ॒ಹ್ಣಾತಿ॑ – ವಿ॒ಭೂ – ರ್ವೀಖ್ಷ॑ಮಾಣಾಯ॒ – ದ್ವಿಪ॑ಞ್ಚಾ॒ಶತ್)
(ಪ್ರ॒ಜನ॑ನ॒, ಮ್ಪರಿ॑ಜ್ಮಾ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಸಪ್ತಮಕಾಣ್ಡೇ ಪ್ರಥಮಃ ಪ್ರಶ್ನ-ಸ್ಸಮಾಪ್ತಃ ॥