ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಸಪ್ತಮಕಾಣ್ಡೇ ತೃತೀಯಃ ಪ್ರಶ್ನಃ – ಸತ್ರಜಾತನಿರೂಪಣಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಪ್ರ॒ಜವಂ॒-ವಾಁ ಏ॒ತೇನ॑ ಯನ್ತಿ॒ ಯ-ದ್ದ॑ಶ॒ಮಮಹಃ॑ ಪಾಪಾವ॒ಹೀಯಂ॒-ವಾಁ ಏ॒ತೇನ॑ ಭವನ್ತಿ॒ ಯ-ದ್ದ॑ಶ॒ಮಮಹ॒ರ್ಯೋ ವೈ ಪ್ರ॒ಜವಂ॑-ಯಁ॒ತಾಮಪ॑ಥೇನ ಪ್ರತಿ॒ಪದ್ಯ॑ತೇ॒ ಯ-ಸ್ಸ್ಥಾ॒ಣುಗ್ಂ ಹನ್ತಿ॒ ಯೋ ಭ್ರೇಷ॒-ನ್ನ್ಯೇತಿ॒ ಸ ಹೀ॑ಯತೇ॒ ಸ ಯೋ ವೈ ದ॑ಶ॒ಮೇ-ಽಹ॑ನ್ನವಿವಾ॒ಕ್ಯ ಉ॑ಪಹ॒ನ್ಯತೇ॒ ಸ ಹೀ॑ಯತೇ॒ ತಸ್ಮೈ॒ ಯ ಉಪ॑ಹತಾಯ॒ ವ್ಯಾಹ॒ ತಮೇ॒ವಾನ್ವಾ॒ರಭ್ಯ॒ ಸಮ॑ಶ್ಞು॒ತೇ-ಽಥ॒ ಯೋ ವ್ಯಾಹ॒ ಸ [ವ್ಯಾಹ॒ ಸಃ, ಹೀ॑ಯತೇ॒ ತಸ್ಮಾ᳚-ದ್ದಶ॒ಮೇ] 1
ಹೀ॑ಯತೇ॒ ತಸ್ಮಾ᳚-ದ್ದಶ॒ಮೇ ಽಹ॑ನ್ನವಿವಾ॒ಕ್ಯ ಉಪ॑ಹತಾಯ॒ ನ ವ್ಯುಚ್ಯ॒ಮಥೋ॒ ಖಲ್ವಾ॑ಹುರ್ಯ॒ಜ್ಞಸ್ಯ॒ ವೈ ಸಮೃ॑ದ್ಧೇನ ದೇ॒ವಾ-ಸ್ಸು॑ವ॒ರ್ಗಂ-ಲೋಁ॒ಕಮಾ॑ಯನ್ ಯ॒ಜ್ಞಸ್ಯ॒ ವ್ಯೃ॑ದ್ಧೇ॒ನಾಸು॑ರಾ॒-ನ್ಪರಾ॑-ಽಭಾವಯ॒ನ್ನಿತಿ॒ ಯ-ತ್ಖಲು॒ ವೈ ಯ॒ಜ್ಞಸ್ಯ॒ ಸಮೃ॑ದ್ಧ॒-ನ್ತ-ದ್ಯಜ॑ಮಾನಸ್ಯ॒ ಯದ್ವ್ಯೃ॑ದ್ಧ॒-ನ್ತದ್ಭ್ರಾತೃ॑ವ್ಯಸ್ಯ॒ ಸ ಯೋ ವೈ ದ॑ಶ॒ಮೇ-ಽಹ॑ನ್ನವಿವಾ॒ಕ್ಯ ಉ॑ಪಹ॒ನ್ಯತೇ॒ ಸ ಏ॒ವಾತಿ॑ ರೇಚಯತಿ॒ ತೇ ಯೇ ಬಾಹ್ಯಾ॑ ದೃಶೀ॒ಕವ॒- [ಯೇ ಬಾಹ್ಯಾ॑ ದೃಶೀ॒ಕವಃ॑, ಸ್ಯುಸ್ತೇ ವಿ] 2
-ಸ್ಸ್ಯುಸ್ತೇ ವಿ ಬ್ರೂ॑ಯು॒ರ್ಯದಿ॒ ತತ್ರ॒ ನ ವಿ॒ನ್ದೇಯು॑-ರನ್ತಸ್ಸದ॒ಸಾ-ದ್ವ್ಯುಚ್ಯಂ॒-ಯಁದಿ॒ ತತ್ರ॒ ನ ವಿ॒ನ್ದೇಯು॑-ರ್ಗೃ॒ಹಪ॑ತಿನಾ॒ ವ್ಯುಚ್ಯ॒-ನ್ತದ್ವ್ಯುಚ್ಯ॑-ಮೇ॒ವಾಥ॒ ವಾ ಏ॒ತ-ಥ್ಸ॑ರ್ಪರಾ॒ಜ್ಞಿಯಾ॑ ಋ॒ಗ್ಭಿ-ಸ್ಸ್ತು॑ವನ್ತ॒ಯಂ-ವೈಁ ಸರ್ಪ॑ತೋ॒ ರಾಜ್ಞೀ॒ ಯದ್ವಾ ಅ॒ಸ್ಯಾ-ಙ್ಕಿ-ಞ್ಚಾರ್ಚ॑ನ್ತಿ॒ ಯದಾ॑ನೃ॒ಚು-ಸ್ತೇನೇ॒ಯಗ್ಂ ಸ॑ರ್ಪರಾ॒ಜ್ಞೀ ತೇ ಯದೇ॒ವ ಕಿ-ಞ್ಚ॑ ವಾ॒ಚಾ ಽಽನೃ॒ಚುರ್ಯ-ದ॒ತೋ-ಽದ್ಧ್ಯ॑ರ್ಚಿ॒ತಾರ॒- [-ದ॒ತೋ-ಽದ್ಧ್ಯ॑ರ್ಚಿ॒ತಾರಃ॑, ತದು॒ಭಯ॑-ಮಾ॒ಪ್ತ್ವಾ] 3
-ಸ್ತದು॒ಭಯ॑-ಮಾ॒ಪ್ತ್ವಾ ಽವ॒ರುದ್ಧ್ಯೋ-ತ್ತಿ॑ಷ್ಠಾ॒ಮೇತಿ॒ ತಾಭಿ॒ರ್ಮನ॑ಸಾ ಸ್ತುವತೇ॒ ನ ವಾ ಇ॒ಮಾಮ॑ಶ್ವರ॒ಥೋ ನಾ-ಽಶ್ವ॑ತರೀರ॒ಥ-ಸ್ಸ॒ದ್ಯಃ ಪರ್ಯಾ᳚ಪ್ತುಮರ್ಹತಿ॒ ಮನೋ॒ ವಾ ಇ॒ಮಾಗ್ಂ ಸ॒ದ್ಯಃ ಪರ್ಯಾ᳚ಪ್ತುಮರ್ಹತಿ॒ ಮನಃ॒ ಪರಿ॑ಭವಿತು॒ಮಥ॒ ಬ್ರಹ್ಮ॑ ವದನ್ತಿ॒ ಪರಿ॑ಮಿತಾ॒ ವಾ ಋಚಃ॒ ಪರಿ॑ಮಿತಾನಿ॒ ಸಾಮಾ॑ನಿ॒ ಪರಿ॑ಮಿತಾನಿ॒ ಯಜೂ॒ಗ್॒ಷ್ಯಥೈ॒ತಸ್ಯೈ॒ವಾನ್ತೋ॒ ನಾಸ್ತಿ॒ ಯ-ದ್ಬ್ರಹ್ಮ॒ ತ-ತ್ಪ್ರ॑ತಿಗೃಣ॒ತ ಆ ಚ॑ಖ್ಷೀತ॒ ಸ ಪ್ರ॑ತಿಗ॒ರಃ ॥ 4 ॥
(ವ್ಯಾಹ॒ ಸ – ದೃ॑ಶೀ॒ಕವೋ᳚ – ಽರ್ಚಿ॒ತಾರಃ॒ – ಸ – ಏಕ॑-ಞ್ಚ) (ಅ. 1)
ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ॒ ಕಿ-ನ್ದ್ವಾ॑ದಶಾ॒ಹಸ್ಯ॑ ಪ್ರಥ॒ಮೇನಾ-ಽಹ್ನ॒ರ್ತ್ವಿಜಾಂ॒-ಯಁಜ॑ಮಾನೋ ವೃಙ್ಕ್ತ॒ ಇತಿ॒ ತೇಜ॑ ಇನ್ದ್ರಿ॒ಯ-ಮಿತಿ॒ ಕಿ-ನ್ದ್ವಿ॒ತೀಯೇ॒ನೇತಿ॑ ಪ್ರಾ॒ಣಾ-ನ॒ನ್ನಾದ್ಯ॒-ಮಿತಿ॒ ಕಿ-ನ್ತೃ॒ತೀಯೇ॒ನೇತಿ॒ ತ್ರೀನಿ॒ಮಾ-ಲ್ಲೋಁ॒ಕಾ-ನಿತಿ॒ ಕಿ-ಞ್ಚ॑ತು॒ರ್ಥೇನೇತಿ॒ ಚತು॑ಷ್ಪದಃ ಪ॒ಶೂ-ನಿತಿ॒ ಕಿ-ಮ್ಪ॑ಞ್ಚ॒ಮೇನೇತಿ॒ ಪಞ್ಚಾ᳚ಖ್ಷರಾ-ಮ್ಪ॒ಙ್ಕ್ತಿ-ಮಿತಿ॒ ಕಿಗ್ಂ ಷ॒ಷ್ಠೇನೇತಿ॒ ಷ-ಡೃ॒ತೂನಿತಿ॒ ಕಿಗ್ಂ ಸ॑ಪ್ತ॒ಮೇನೇತಿ॑ ಸ॒ಪ್ತಪ॑ದಾ॒ಗ್ಂ॒ ಶಕ್ವ॑ರೀ॒ಮಿತಿ॒ [ಶಕ್ವ॑ರೀ॒ಮಿತಿ॑, ಕಿ-ಮ॑ಷ್ಟ॒ಮೇನೇತ್ಯ॒ಷ್ಟಾಖ್ಷ॑ರಾ-] 5
ಕಿ-ಮ॑ಷ್ಟ॒ಮೇನೇತ್ಯ॒ಷ್ಟಾಖ್ಷ॑ರಾ-ಙ್ಗಾಯ॒ತ್ರೀ-ಮಿತಿ॒ ಕಿ-ನ್ನ॑ವ॒ಮೇನೇತಿ॑ ತ್ರಿ॒ವೃತ॒ಗ್ಗ್॒ ಸ್ತೋಮ॒-ಮಿತಿ॒ ಕಿ-ನ್ದ॑ಶ॒ಮೇನೇತಿ॒ ದಶಾ᳚ಖ್ಷರಾಂ-ವಿಁ॒ರಾಜ॒ಮಿತಿ॒ ಕಿಮೇ॑ಕಾದ॒ಶೇನೇತ್ಯೇಕಾ॑ದಶಾಖ್ಷರಾ-ನ್ತ್ರಿ॒ಷ್ಟುಭ॒-ಮಿತಿ॒ ಕಿ-ನ್ದ್ವಾ॑ದ॒ಶೇನೇತಿ॒ ದ್ವಾದ॑ಶಾಖ್ಷರಾ॒-ಞ್ಜಗ॑ತೀ॒-ಮಿತ್ಯೇ॒ತಾವ॒ದ್ವಾ ಅ॑ಸ್ತಿ॒ ಯಾವ॑-ದೇ॒ತ-ದ್ಯಾವ॑-ದೇ॒ವಾ-ಽಸ್ತಿ॒ ತ-ದೇ॑ಷಾಂ-ವೃಁಙ್ಕ್ತೇ ॥ 6 ॥
(ಶಕ್ವ॑ರೀ॒ಮಿತ್ಯೇ – ಕ॑ಚತ್ವಾರಿಗ್ಂಶಚ್ಚ) (ಅ. 2)
ಏ॒ಷ ವಾ ಆ॒ಪ್ತೋ ದ್ವಾ॑ದಶಾ॒ಹೋ ಯ-ತ್ತ್ರ॑ಯೋದಶರಾ॒ತ್ರ-ಸ್ಸ॑ಮಾ॒ನಗ್ಗ್ ಹ್ಯೇ॑ತದಹ॒ರ್ಯ-ತ್ಪ್ರಾ॑ಯ॒ಣೀಯ॑ಶ್ಚೋದಯ॒ನೀಯ॑ಶ್ಚ॒ ತ್ರ್ಯ॑ತಿರಾತ್ರೋ ಭವತಿ॒ ತ್ರಯ॑ ಇ॒ಮೇ ಲೋ॒ಕಾ ಏ॒ಷಾಂ-ಲೋಁ॒ಕಾನಾ॒ಮಾಪ್ತ್ಯೈ᳚ ಪ್ರಾ॒ಣೋ ವೈ ಪ್ರ॑ಥ॒ಮೋ॑-ಽತಿರಾ॒ತ್ರೋ ವ್ಯಾ॒ನೋ ದ್ವಿ॒ತೀಯೋ॑ ಽಪಾ॒ನಸ್ತೃ॒ತೀಯಃ॑ ಪ್ರಾಣಾಪಾನೋ-ದಾ॒ನೇಷ್ವೇ॒ವಾ-ಽನ್ನಾದ್ಯೇ॒ ಪ್ರತಿ॑ ತಿಷ್ಠನ್ತಿ॒ ಸರ್ವ॒-ಮಾಯು॑-ರ್ಯನ್ತಿ॒ ಯ ಏ॒ವಂ ವಿಁ॒ದ್ವಾಗ್ಂಸ॑-ಸ್ತ್ರಯೋದಶರಾ॒ತ್ರ-ಮಾಸ॑ತೇ॒ ತದಾ॑ಹು॒-ರ್ವಾಗ್ವಾ ಏ॒ಷಾ ವಿತ॑ತಾ॒ [ವಿತ॑ತಾ, ಯ-ದ್ದ್ವಾ॑ದಶಾ॒ಹಸ್ತಾಂ-] 7
ಯ-ದ್ದ್ವಾ॑ದಶಾ॒ಹಸ್ತಾಂ-ವಿಁಚ್ಛಿ॑ನ್ದ್ಯು॒-ರ್ಯನ್ಮದ್ಧ್ಯೇ॑ ಽತಿರಾ॒ತ್ರ-ಙ್ಕು॒ರ್ಯು-ರು॑ಪ॒ದಾಸು॑ಕಾ ಗೃ॒ಹಪ॑ತೇ॒-ರ್ವಾ-ಖ್ಸ್ಯಾ॑-ದು॒ಪರಿ॑ಷ್ಟಾ-ಚ್ಛನ್ದೋ॒ಮಾನಾ᳚-ಮ್ಮಹಾವ್ರ॒ತ-ಙ್ಕು॑ರ್ವನ್ತಿ॒ ಸನ್ತ॑ತಾ-ಮೇ॒ವ ವಾಚ॒-ಮವ॑ ರುನ್ಧ॒ತೇ-ಽನು॑ಪದಾಸುಕಾ ಗೃ॒ಹಪ॑ತೇ॒-ರ್ವಾಗ್-ಭ॑ವತಿ ಪ॒ಶವೋ॒ ವೈ ಛ॑ನ್ದೋ॒ಮಾ ಅನ್ನ॑-ಮ್ಮಹಾವ್ರ॒ತಂ-ಯಁದು॒ಪರಿ॑ಷ್ಟಾ-ಚ್ಛನ್ದೋ॒ಮಾನಾ᳚-ಮ್ಮಹಾವ್ರ॒ತ-ಙ್ಕು॒ರ್ವನ್ತಿ॑ ಪ॒ಶುಷು॑ ಚೈ॒ವಾನ್ನಾದ್ಯೇ॑ ಚ॒ ಪ್ರತಿ॑ ತಿಷ್ಠನ್ತಿ ॥ 8 ॥
(ವಿತ॑ತಾ॒ – ತ್ರಿಚ॑ತ್ವಾರಿಗ್ಂಶಚ್ಚ) (ಅ. 3)
ಆ॒ದಿ॒ತ್ಯಾ ಅ॑ಕಾಮಯನ್ತೋ॒-ಭಯೋ᳚ರ್ಲೋ॒ಕಯೋರ್॑ ಋದ್ಧ್ನುಯಾ॒ಮೇತಿ॒ ತ ಏ॒ತ-ಞ್ಚ॑ತುರ್ದಶರಾ॒ತ್ರ- ಮ॑ಪಶ್ಯ॒-ನ್ತಮಾ-ಽಹ॑ರ॒-ನ್ತೇನಾ॑ಯಜನ್ತ॒ ತತೋ॒ ವೈ ತ ಉ॒ಭಯೋ᳚-ರ್ಲೋ॒ಕಯೋ॑-ರಾರ್ಧ್ನುವನ್ನ॒ಸ್ಮಿಗ್ಗ್ಶ್ಚಾ॒-ಮುಷ್ಮಿಗ್ಗ್॑ಶ್ಚ॒ ಯ ಏ॒ವಂ-ವಿಁ॒ದ್ವಾಗ್ಂಸ॑-ಶ್ಚತುರ್ದಶರಾ॒ತ್ರಮಾಸ॑ತ ಉ॒ಭಯೋ॑ರೇ॒ವ ಲೋ॒ಕಯೋರ್॑. ಋದ್ಧ್ನುವನ್ತ್ಯ॒ಸ್ಮಿಗ್ಗ್ಶ್ಚಾ॒-ಮುಷ್ಮಿಗ್ಗ್॑ಶ್ಚ ಚತುರ್ದಶರಾ॒ತ್ರೋ ಭ॑ವತಿ ಸ॒ಪ್ತ ಗ್ರಾ॒ಮ್ಯಾ ಓಷ॑ಧಯ-ಸ್ಸ॒ಪ್ತಾ-ಽಽರ॒ಣ್ಯಾ ಉ॒ಭಯೀ॑ಷಾ॒ಮವ॑ರುದ್ಧ್ಯೈ॒ ಯ-ತ್ಪ॑ರಾ॒ಚೀನಾ॑ನಿ ಪೃ॒ಷ್ಠಾನಿ॒ [ಪೃ॒ಷ್ಠಾನಿ॑, ಭವ॑ನ್ತ್ಯ॒ಮು-] 9
ಭವ॑ನ್ತ್ಯ॒ಮು-ಮೇ॒ವ ತೈ-ರ್ಲೋ॒ಕ-ಮ॒ಭಿ ಜ॑ಯನ್ತಿ॒ ಯ-ತ್ಪ್ರ॑ತೀ॒ಚೀನಾ॑ನಿ ಪೃ॒ಷ್ಠಾನಿ॒ ಭವ॑ನ್ತೀ॒ಮ-ಮೇ॒ವ ತೈ-ರ್ಲೋ॒ಕ-ಮ॒ಭಿ ಜ॑ಯನ್ತಿ ತ್ರಯಸ್ತ್ರಿ॒ಗ್ಂ॒ಶೌ ಮ॑ದ್ಧ್ಯ॒ತ-ಸ್ಸ್ತೋಮೌ॑ ಭವತ॒-ಸ್ಸಾಮ್ರಾ᳚ಜ್ಯಮೇ॒ವ ಗ॑ಚ್ಛನ್ತ್ಯಧಿರಾ॒ಜೌ ಭ॑ವತೋ-ಽಧಿರಾ॒ಜಾ ಏ॒ವ ಸ॑ಮಾ॒ನಾನಾ᳚-ಮ್ಭವನ್ತ್ಯತಿರಾ॒ತ್ರಾ-ವ॒ಭಿತೋ॑ ಭವತಃ॒ ಪರಿ॑ಗೃಹೀತ್ಯೈ ॥ 10 ॥
(ಪೃ॒ಷ್ಠಾನಿ॒ – ಚತು॑ಸ್ತ್ರಿಗ್ಂಶಚ್ಚ) (ಅ. 4)
ಪ್ರ॒ಜಾಪ॑ತಿ-ಸ್ಸುವ॒ರ್ಗಂ-ಲೋಁ॒ಕಮೈ॒-ತ್ತ-ನ್ದೇ॒ವಾ ಅನ್ವಾ॑ಯ॒-ನ್ತಾನಾ॑ದಿ॒ತ್ಯಾಶ್ಚ॑ ಪ॒ಶವ॒ಶ್ಚಾ-ಽನ್ವಾ॑ಯ॒-ನ್ತೇ ದೇ॒ವಾ ಅ॑ಬ್ರುವ॒ನ್॒. ಯಾ-ನ್ಪ॒ಶೂ-ನು॒ಪಾಜೀ॑ವಿಷ್ಮ॒ ತ ಇ॒ಮೇ᳚ ಽನ್ವಾಗ್ಮ॒-ನ್ನಿತಿ॒ ತೇಭ್ಯ॑ ಏ॒ತ-ಞ್ಚ॑ತುರ್ದಶರಾ॒ತ್ರ-ಮ್ಪ್ರತ್ಯೌ॑ಹ॒-ನ್ತ ಆ॑ದಿ॒ತ್ಯಾಃ ಪೃ॒ಷ್ಠೈ-ಸ್ಸು॑ವ॒ರ್ಗಂ-ಲೋಁ॒ಕಮಾ-ಽರೋ॑ಹ-ನ್ತ್ರ್ಯ॒ಹಾಭ್ಯಾ॑-ಮ॒ಸ್ಮಿ-ಲ್ಲೋಁ॒ಕೇ ಪ॒ಶೂ-ನ್ಪ್ರತ್ಯೌ॑ಹ-ನ್ಪೃ॒ಷ್ಠೈ-ರಾ॑ದಿ॒ತ್ಯಾ ಅ॒ಮುಷ್ಮಿ॑-ಲ್ಲೋಁ॒ಕ ಆರ್ಧ್ನು॑ವ-ನ್ತ್ರ್ಯ॒ಹಾಭ್ಯಾ॑-ಮ॒ಸ್ಮಿ- [ಆರ್ಧ್ನು॑ವ-ನ್ತ್ರ್ಯ॒ಹಾಭ್ಯಾ॑-ಮ॒ಸ್ಮಿನ್ನ್, ಲೋ॒ಕೇ ಪ॒ಶವೋ॒] 11
ಲ್ಲೋಁ॒ಕೇ ಪ॒ಶವೋ॒ ಯ ಏ॒ವಂ-ವಿಁ॒ದ್ವಾಗ್ಂಸ॑-ಶ್ಚತುರ್ದಶರಾ॒ತ್ರಮಾಸ॑ತ ಉ॒ಭಯೋ॑ರೇ॒ವ ಲೋ॒ಕಯೋರ್॑ ಋದ್ಧ್ನುವನ್ತ್ಯ॒ಸ್ಮಿಗ್ಗ್ಶ್ಚಾ॒-ಮುಷ್ಮಿಗ್ಗ್॑ಶ್ಚ ಪೃ॒ಷ್ಠೈ-ರೇ॒ವಾ-ಽಮುಷ್ಮಿ॑-ಲ್ಲೋಁ॒ಕ ಋ॑ದ್ಧ್ನು॒ವನ್ತಿ॑ ತ್ರ್ಯ॒ಹಾಭ್ಯಾ॑-ಮ॒ಸ್ಮಿ-ಲ್ಲೋಁ॒ಕೇ ಜ್ಯೋತಿ॒-ರ್ಗೌರಾಯು॒-ರಿತಿ॑ ತ್ರ್ಯ॒ಹೋ ಭ॑ವತೀ॒ಯಂ-ವಾಁವ ಜ್ಯೋತಿ॑-ರ॒ನ್ತರಿ॑ಖ್ಷ॒-ಙ್ಗೌ-ರ॒ಸಾ-ವಾಯು॑-ರಿ॒ಮಾ-ನೇ॒ವ ಲೋ॒ಕಾ-ನ॒ಭ್ಯಾರೋ॑ಹನ್ತಿ॒ ಯ-ದ॒ನ್ಯತಃ॑ ಪೃ॒ಷ್ಠಾನಿ॒ ಸ್ಯುರ್ವಿವಿ॑ವಧಗ್ಗ್ ಸ್ಯಾ॒ನ್ಮದ್ಧ್ಯೇ॑ ಪೃ॒ಷ್ಠಾನಿ॑ ಭವನ್ತಿ ಸವಿವಧ॒ತ್ವಾಯೌ- [ಸವಿವಧ॒ತ್ವಾಯ॑, ಓಜೋ॒ ವೈ] 12
-ಜೋ॒ ವೈ ವೀ॒ರ್ಯ॑-ಮ್ಪೃ॒ಷ್ಠಾನ್ಯೋಜ॑ ಏ॒ವ ವೀ॒ರ್ಯ॑-ಮ್ಮದ್ಧ್ಯ॒ತೋ ದ॑ಧತೇ ಬೃಹ-ದ್ರಥನ್ತ॒ರಾಭ್ಯಾಂ᳚-ಯಁನ್ತೀ॒ಯಂ-ವಾಁವ ರ॑ಥನ್ತ॒ರ-ಮ॒ಸೌ ಬೃ॒ಹ-ದಾ॒ಭ್ಯಾ-ಮೇ॒ವ ಯ॒ನ್ತ್ಯಥೋ॑ ಅ॒ನಯೋ॑-ರೇ॒ವ ಪ್ರತಿ॑ ತಿಷ್ಠನ್ತ್ಯೇ॒ತೇ ವೈ ಯ॒ಜ್ಞಸ್ಯಾ᳚-ಽಞ್ಜ॒ಸಾಯ॑ನೀ ಸ್ರು॒ತೀ ತಾಭ್ಯಾ॑-ಮೇ॒ವ ಸು॑ವ॒ರ್ಗಂ-ಲೋಁ॒ಕಂ-ಯಁ॑ನ್ತಿ॒ ಪರಾ᳚ಞ್ಚೋ॒ ವಾ ಏ॒ತೇ ಸು॑ವ॒ರ್ಗಂ-ಲೋಁ॒ಕ-ಮ॒ಭ್ಯಾರೋ॑ಹನ್ತಿ॒ ಯೇ ಪ॑ರಾ॒ಚೀನಾ॑ನಿ ಪೃ॒ಷ್ಠಾನ್ಯು॑ಪ॒ಯನ್ತಿ॑ ಪ್ರ॒ತ್ಯ-ನ್ತ್ರ್ಯ॒ಹೋ ಭ॑ವತಿ ಪ್ರ॒ತ್ಯವ॑ರೂಢ್ಯಾ॒ ಅಥೋ॒ ಪ್ರತಿ॑ಷ್ಠಿತ್ಯಾ ಉ॒ಭಯೋ᳚-ರ್ಲೋ॒ಕಯೋರ್॑ ಋ॒ದ್ಧ್ವೋ-ತ್ತಿ॑ಷ್ಠನ್ತಿ॒ ಚತು॑ರ್ದಶೈ॒ತಾ-ಸ್ತಾಸಾಂ॒-ಯಾಁ ದಶ॒ ದಶಾ᳚ಖ್ಷರಾ ವಿ॒ರಾಡನ್ನಂ॑-ವಿಁ॒ರಾ-ಡ್ವಿ॒ರಾಜೈ॒ವಾ-ಽನ್ನಾದ್ಯ॒-ಮವ॑ ರುನ್ಧತೇ॒ ಯಾಶ್ಚತ॑ಸ್ರ॒-ಶ್ಚತ॑ಸ್ರೋ॒ ದಿಶೋ॑ ದಿ॒ಖ್ಷ್ವೇ॑ವ ಪ್ರತಿ॑ ತಿಷ್ಠನ್ತ್ಯತಿರಾ॒ತ್ರಾ-ವ॒ಭಿತೋ॑ ಭವತಃ॒ ಪರಿ॑ಗೃಹೀತ್ಯೈ ॥ 13 ॥
(ಆರ್ಧ್ನು॑ವ-ನ್ತ್ರ್ಯ॒ಹಾಭ್ಯಾ॑ಮ॒ಸ್ಮಿನ್ಥ್ – ಸ॑ವಿವಧ॒ತ್ವಾಯ॒ – ಪ್ರತಿ॑ಷ್ಠತ್ಯಾ॒ – ಏಕ॑ತ್ರಿಗ್ಂಶಚ್ಚ) (ಅ. 5)
ಇನ್ದ್ರೋ॒ ವೈ ಸ॒ದೃ-ನ್ದೇ॒ವತಾ॑ಭಿರಾಸೀ॒-ಥ್ಸ ನ ವ್ಯಾ॒ವೃತ॑ಮಗಚ್ಛ॒-ಥ್ಸ ಪ್ರ॒ಜಾಪ॑ತಿ॒ಮುಪಾ॑ಧಾವ॒-ತ್ತಸ್ಮಾ॑ ಏ॒ತ-ಮ್ಪ॑ಞ್ಚದಶರಾ॒ತ್ರ-ಮ್ಪ್ರಾಯ॑ಚ್ಛ॒-ತ್ತಮಾ-ಽಹ॑ರ॒-ತ್ತೇನಾ॑ಯಜತ॒ ತತೋ॒ ವೈ ಸೋ᳚-ಽನ್ಯಾಭಿ॑-ರ್ದೇ॒ವತಾ॑ಭಿ-ರ್ವ್ಯಾ॒ವೃತ॑-ಮಗಚ್ಛ॒ದ್ಯ ಏ॒ವಂ-ವಿಁ॒ದ್ವಾಗ್ಂಸಃ॑ ಪಞ್ಚದಶರಾ॒ತ್ರ-ಮಾಸ॑ತೇ ವ್ಯಾ॒ವೃತ॑-ಮೇ॒ವ ಪಾ॒ಪ್ಮನಾ॒ ಭ್ರಾತೃ॑ವ್ಯೇಣ ಗಚ್ಛನ್ತಿ॒ ಜ್ಯೋತಿ॒-ರ್ಗೌರಾಯು॒-ರಿತಿ॑ ತ್ರ್ಯ॒ಹೋ ಭ॑ವತೀ॒ಯಂ-ವಾಁವ ಜ್ಯೋತಿ॑-ರ॒ನ್ತರಿ॑ಖ್ಷ॒- [ಜ್ಯೋತಿ॑-ರ॒ನ್ತರಿ॑ಖ್ಷಮ್, ] 14
-ಙ್ಗೌ-ರ॒ಸಾ-ವಾಯು॑-ರೇ॒ಷ್ವೇ॑ವ ಲೋ॒ಕೇಷು॒ ಪ್ರತಿ॑ ತಿಷ್ಠ॒ನ್ತ್ಯಸ॑ತ್ರಂ॒-ವಾಁ ಏ॒ತದ್ಯ-ದ॑ಛನ್ದೋ॒ಮಂ-ಯಁಚ್ಛ॑ನ್ದೋ॒ಮಾ ಭವ॑ನ್ತಿ॒ ತೇನ॑ ಸ॒ತ್ರ-ನ್ದೇ॒ವತಾ॑ ಏ॒ವ ಪೃ॒ಷ್ಠೈರವ॑ ರುನ್ಧತೇ ಪ॒ಶೂ-ಞ್ಛ॑ನ್ದೋ॒ಮೈ-ರೋಜೋ॒ ವಆವೈ ವೀ॒ರ್ಯ॑-ಮ್ಪೃ॒ಷ್ಠಾನಿ॑ ಪ॒ಶವ॑-ಶ್ಛನ್ದೋ॒ಮಾ ಓಜ॑ಸ್ಯೇ॒ವ ವೀ॒ರ್ಯೇ॑ ಪ॒ಶುಷು॒ ಪ್ರತಿ॑ ತಿಷ್ಠನ್ತಿ ಪಞ್ಚದಶರಾ॒ತ್ರೋ ಭ॑ವತಿ ಪಞ್ಚದ॒ಶೋ ವಜ್ರೋ॒ ವಜ್ರ॑ಮೇ॒ವ ಭ್ರಾತೃ॑ವ್ಯೇಭ್ಯಃ॒ ಪ್ರ ಹ॑ರನ್ತ್ಯತಿರಾ॒ತ್ರಾ-ವ॒ಭಿತೋ॑ ಭವತ ಇನ್ದ್ರಿ॒ಯಸ್ಯ॒ ಪರಿ॑ಗೃಹೀತ್ಯೈ ॥ 15 ॥
(ಅ॒ನ್ತರಿ॑ಖ್ಷ-ಮಿನ್ದ್ರಿ॒ಯಸ್ಯೈ-ಕ॑ಞ್ಚ) (ಅ. 6)
ಇನ್ದ್ರೋ॒ ವೈ ಶಿ॑ಥಿ॒ಲ ಇ॒ವಾ-ಽಪ್ರ॑ತಿಷ್ಠಿತ ಆಸೀ॒-ಥ್ಸೋ-ಽಸು॑ರೇಭ್ಯೋ-ಽಬಿಭೇ॒-ಥ್ಸ ಪ್ರ॒ಜಾಪ॑ತಿ॒ಮುಪಾ॑-ಽಧಾವ॒-ತ್ತಸ್ಮಾ॑ ಏ॒ತ-ಮ್ಪ॑ಞ್ಚದಶರಾ॒ತ್ರಂ-ವಁಜ್ರ॒-ಮ್ಪ್ರಾಯ॑ಚ್ಛ॒-ತ್ತೇನಾಸು॑ರಾ-ನ್ಪರಾ॒ಭಾವ್ಯ॑ ವಿ॒ಜಿತ್ಯ॒ ಶ್ರಿಯ॑ಮಗಚ್ಛದಗ್ನಿ॒ಷ್ಟುತಾ॑ ಪಾ॒ಪ್ಮಾನ॒-ನ್ನಿರ॑ದಹತ ಪಞ್ಚದಶರಾ॒ತ್ರೇಣೌಜೋ॒ ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯ॑ಮಾ॒ತ್ಮನ್ನ॑ಧತ್ತ॒ ಯ ಏ॒ವಂ-ವಿಁ॒ದ್ವಾಗ್ಂಸಃ॑ ಪಞ್ಚದಶರಾ॒ತ್ರಮಾಸ॑ತೇ॒ ಭ್ರಾತೃ॑ವ್ಯಾನೇ॒ವ ಪ॑ರಾ॒ಭಾವ್ಯ॑ ವಿ॒ಜಿತ್ಯ॒ ಶ್ರಿಯ॑-ಙ್ಗಚ್ಛನ್ತ್ಯಗ್ನಿ॒ಷ್ಟುತಾ॑ ಪಾ॒ಪ್ಮಾನ॒-ನ್ನಿ- [ಪಾ॒ಪ್ಮಾನ॒-ನ್ನಿಃ, ದ॒ಹ॒ನ್ತೇ॒ ಪ॒ಞ್ಚ॒ದ॒ಶ॒ರಾ॒ತ್ರೇಣೌಜೋ॒] 16
-ರ್ದ॑ಹನ್ತೇ ಪಞ್ಚದಶರಾ॒ತ್ರೇಣೌಜೋ॒ ಬಲ॑-ಮಿನ್ದ್ರಿ॒ಯಂ-ವೀಁ॒ರ್ಯ॑-ಮಾ॒ತ್ಮ-ನ್ದ॑ಧತ ಏ॒ತಾ ಏ॒ವ ಪ॑ಶ॒ವ್ಯಾಃ᳚ ಪಞ್ಚ॑ದಶ॒ ವಾ ಅ॑ರ್ಧಮಾ॒ಸಸ್ಯ॒ ರಾತ್ರ॑ಯೋ-ಽರ್ಧಮಾಸ॒ಶ-ಸ್ಸಂ॑ವಁಥ್ಸ॒ರ ಆ᳚ಪ್ಯತೇ ಸಂವಁಥ್ಸ॒ರ-ಮ್ಪ॒ಶವೋ-ಽನು॒ ಪ್ರ ಜಾ॑ಯನ್ತೇ॒ ತಸ್ಮಾ᳚-ತ್ಪಶ॒ವ್ಯಾ॑ ಏ॒ತಾ ಏ॒ವ ಸು॑ವ॒ರ್ಗ್ಯಾಃ᳚ ಪಞ್ಚ॑ದಶ॒ ವಾ ಅ॑ರ್ಧಮಾ॒ಸಸ್ಯ॒ ರಾತ್ರ॑ಯೋ-ಽರ್ಧಮಾಸ॒ಶ-ಸ್ಸಂ॑ವಁಥ್ಸ॒ರ ಆ᳚ಪ್ಯತೇ ಸಂವಁಥ್ಸ॒ರ-ಸ್ಸು॑ವ॒ರ್ಗೋ ಲೋ॒ಕಸ್ತಸ್ಮಾ᳚-ಥ್ಸುವ॒ರ್ಗ್ಯಾ᳚ ಜ್ಯೋತಿ॒-ರ್ಗೌರಾಯು॒-ರಿತಿ॑ ತ್ರ್ಯ॒ಹೋ ಭ॑ವತೀ॒ಯಂ-ವಾಁವ ಜ್ಯೋತಿ॑-ರ॒ನ್ತರಿ॑ಖ್ಷ॒- [-ರ॒ನ್ತರಿ॑ಖ್ಷಮ್, ಗೌ-ರ॒ಸಾವಾಯು॑-] 17
-ಙ್ಗೌ-ರ॒ಸಾವಾಯು॑-ರಿ॒ಮಾ-ನೇ॒ವ ಲೋ॒ಕಾ-ನ॒ಭ್ಯಾರೋ॑ಹನ್ತಿ॒ ಯದ॒ನ್ಯತಃ॑ ಪೃ॒ಷ್ಠಾನಿ॒ ಸ್ಯುರ್ವಿವಿ॑ವಧಗ್ಗ್ ಸ್ಯಾ॒ನ್ಮದ್ಧ್ಯೇ॑ ಪೃ॒ಷ್ಠಾನಿ॑ ಭವನ್ತಿ ಸವಿವಧ॒ತ್ವಾಯೌಜೋ॒ ವೈ ವೀ॒ರ್ಯ॑-ಮ್ಪೃ॒ಷ್ಠಾನ್ಯೋಜ॑ ಏ॒ವ ವೀ॒ರ್ಯ॑-ಮ್ಮದ್ಧ್ಯ॒ತೋ ದ॑ಧತೇ ಬೃಹ-ದ್ರಥನ್ತ॒ರಾಭ್ಯಾಂ᳚-ಯಁನ್ತೀ॒ಯಂ-ವಾಁವ ರ॑ಥನ್ತ॒ರಮ॒ಸೌ ಬೃ॒ಹದಾ॒ಭ್ಯಾಮೇ॒ವ ಯ॒ನ್ತ್ಯಥೋ॑ ಅ॒ನಯೋ॑ರೇ॒ವ ಪ್ರತಿ॑ ತಿಷ್ಠನ್ತ್ಯೇ॒ತೇ ವೈ ಯ॒ಜ್ಞಸ್ಯಾ᳚ಞ್ಜ॒ಸಾಯ॑ನೀ ಸ್ರು॒ತೀ ತಾಭ್ಯಾ॑ಮೇ॒ವ ಸು॑ವ॒ರ್ಗಂ-ಲೋಁ॒ಕಂ- [ಸು॑ವ॒ರ್ಗಂ-ಲೋಁ॒ಕಮ್, ಯ॒ನ್ತಿ॒ ಪರಾ᳚ಞ್ಚೋ॒ ವಾ ಏ॒ತೇ] 18
-ಯಁ॑ನ್ತಿ॒ ಪರಾ᳚ಞ್ಚೋ॒ ವಾ ಏ॒ತೇ ಸು॑ವ॒ರ್ಗಂ-ಲೋಁ॒ಕಮ॒ಭ್ಯಾರೋ॑ಹನ್ತಿ॒ ಯೇ ಪ॑ರಾ॒ಚೀನಾ॑ನಿ ಪೃ॒ಷ್ಠಾನ್ಯು॑ಪ॒ಯನ್ತಿ॑ ಪ್ರ॒ತ್ಯ-ನ್ತ್ರ್ಯ॒ಹೋ ಭ॑ವತಿ ಪ್ರ॒ತ್ಯವ॑ರೂಢ್ಯಾ॒ ಅಥೋ॒ ಪ್ರತಿ॑ಷ್ಠಿತ್ಯಾ ಉ॒ಭಯೋ᳚ರ್ಲೋ॒ಕಯೋರ್॑ ಋ॒ದ್ಧ್ವೋ-ತ್ತಿ॑ಷ್ಠನ್ತಿ॒ ಪಞ್ಚ॑ದಶೈ॒ತಾಸ್ತಾಸಾಂ॒-ಯಾಁ ದಶ॒ ದಶಾ᳚ಖ್ಷರಾ ವಿ॒ರಾಡನ್ನಂ॑-ವಿಁ॒ರಾ-ಡ್ವಿ॒ರಾಜೈ॒ವಾನ್ನಾದ್ಯ॒ಮವ॑ ರುನ್ಧತೇ॒ ಯಾಃ ಪಞ್ಚ॒ ಪಞ್ಚ॒ ದಿಶೋ॑ ದಿ॒ಖ್ಷ್ವೇ॑ವ ಪ್ರತಿ॑ ತಿಷ್ಠನ್ತ್ಯತಿರಾ॒ತ್ರಾವ॒ಭಿತೋ॑ ಭವತ ಇನ್ದ್ರಿ॒ಯಸ್ಯ॑ ವೀ॒ರ್ಯ॑ಸ್ಯ ಪ್ರ॒ಜಾಯೈ॑ ಪಶೂ॒ನಾ-ಮ್ಪರಿ॑ಗೃಹೀತ್ಯೈ ॥ 19 ॥
(ಗ॒ಚ್ಛ॒ನ್ತ್ಯ॒ಗ್ನಿ॒ಷ್ಟುತಾ॑ ಪಾ॒ಪ್ಮಾನ॒-ನ್ನಿ-ರ॒ನ್ತರಿ॑ಖ್ಷಂ – ಲೋಁ॒ಕಂ – ಪ್ರ॒ಜಾಯೈ॒ – ದ್ವೇ ಚ॑) (ಅ. 7)
ಪ್ರ॒ಜಾಪ॑ತಿ-ರಕಾಮಯತಾನ್ನಾ॒ದ-ಸ್ಸ್ಯಾ॒ಮಿತಿ॒ ಸ ಏ॒ತಗ್ಂ ಸ॑ಪ್ತದಶರಾ॒ತ್ರ-ಮ॑ಪಶ್ಯ॒-ತ್ತಮಾ-ಽಹ॑ರ॒-ತ್ತೇನಾ॑ಯಜತ॒ ತತೋ॒ ವೈ ಸೋ᳚-ಽನ್ನಾ॒ದೋ॑-ಽಭವ॒ದ್ಯ ಏ॒ವಂ-ವಿಁ॒ದ್ವಾಗ್ಂಸ॑-ಸ್ಸಪ್ತದಶ-ರಾ॒ತ್ರಮಾಸ॑ತೇ ಽನ್ನಾ॒ದಾ ಏ॒ವ ಭ॑ವನ್ತಿ ಪಞ್ಚಾ॒ಹೋ ಭ॑ವತಿ॒ ಪಞ್ಚ॒ ವಾ ಋ॒ತವ॑-ಸ್ಸಂವಁಥ್ಸ॒ರ ಋ॒ತುಷ್ವೇ॒ವ ಸಂ॑ವಁಥ್ಸ॒ರೇ ಪ್ರತಿ॑ ತಿಷ್ಠ॒ನ್ತ್ಯಥೋ॒ ಪಞ್ಚಾ᳚ಖ್ಷರಾ ಪ॒ಙ್ಕ್ತಿಃ ಪಾಙ್ಕ್ತೋ॑ ಯ॒ಜ್ಞೋ ಯ॒ಜ್ಞಮೇ॒ವಾ-ಽವ॑ ರುನ್ಧ॒ತೇ ಽಸ॑ತ್ರಂ॒-ವಾಁ ಏ॒ತ- [ಏ॒ತತ್, ಯದ॑ಛನ್ದೋ॒ಮಂ-ಯಁಚ್ಛ॑ನ್ದೋ॒ಮಾ] 20
-ದ್ಯದ॑ಛನ್ದೋ॒ಮಂ-ಯಁಚ್ಛ॑ನ್ದೋ॒ಮಾ ಭವ॑ನ್ತಿ॒ ತೇನ॑ ಸ॒ತ್ರ-ನ್ದೇ॒ವತಾ॑ ಏ॒ವ ಪೃ॒ಷ್ಠೈರವ॑ ರುನ್ಧತೇ ಪ॒ಶೂಞ್ಛ॑ನ್ದೋ॒ಮೈರೋಜೋ॒ ವೈ ವೀ॒ರ್ಯ॑-ಮ್ಪೃ॒ಷ್ಠಾನಿ॑ ಪ॒ಶವ॑-ಶ್ಛನ್ದೋ॒ಮಾ ಓಜ॑ಸ್ಯೇ॒ವ ವೀ॒ರ್ಯೇ॑ ಪ॒ಶುಷು॒ ಪ್ರತಿ॑ ತಿಷ್ಠನ್ತಿ ಸಪ್ತದಶರಾ॒ತ್ರೋ ಭ॑ವತಿ ಸಪ್ತದ॒ಶಃ ಪ್ರ॒ಜಾಪ॑ತಿಃ ಪ್ರ॒ಜಾಪ॑ತೇ॒ರಾಪ್ತ್ಯಾ॑ ಅತಿರಾ॒ತ್ರಾವ॒ಭಿತೋ॑ ಭವತೋ॒-ಽನ್ನಾದ್ಯ॑ಸ್ಯ॒ ಪರಿ॑ಗೃಹೀತ್ಯೈ ॥ 21 ॥
(ಏ॒ತಥ್ – ಸ॒ಪ್ತತ್ರಿಗ್ಂ॑ಶಚ್ಚ) (ಅ. 8)
ಸಾ ವಿ॒ರಾ-ಡ್ವಿ॒ಕ್ರಮ್ಯಾ॑ತಿಷ್ಠ॒-ದ್ಬ್ರಹ್ಮ॑ಣಾ ದೇ॒ವೇಷ್ವನ್ನೇ॒ನಾ-ಸು॑ರೇಷು॒ ತೇ ದೇ॒ವಾ ಅ॑ಕಾಮಯನ್ತೋ॒ಭಯ॒ಗ್ಂ॒ ಸಂ-ವೃಁ॑ಞ್ಜೀಮಹಿ॒ ಬ್ರಹ್ಮ॒ ಚಾನ್ನ॒-ಞ್ಚೇತಿ॒ ತ ಏ॒ತಾ ವಿಗ್ಂ॑ಶ॒ತಿಗ್ಂ ರಾತ್ರೀ॑ರಪಶ್ಯ॒-ನ್ತತೋ॒ ವೈ ತ ಉ॒ಭಯ॒ಗ್ಂ॒ ಸಮ॑ವೃಞ್ಜತ॒ ಬ್ರಹ್ಮ॒ ಚಾನ್ನ॑-ಞ್ಚ ಬ್ರಹ್ಮವರ್ಚ॒ಸಿನೋ᳚-ಽನ್ನಾ॒ದಾ ಅ॑ಭವ॒ನ್॒. ಯ ಏ॒ವಂ-ವಿಁ॒ದ್ವಾಗ್ಂಸ॑ ಏ॒ತಾ ಆಸ॑ತ ಉ॒ಭಯ॑ಮೇ॒ವ ಸಂ-ವೃಁ॑ಞ್ಜತೇ॒ ಬ್ರಹ್ಮ॒ ಚಾ-ಽನ್ನ॑-ಞ್ಚ [ಬ್ರಹ್ಮ॒ ಚಾ-ಽನ್ನ॑-ಞ್ಚ, ಬ್ರ॒ಹ್ಮ॒ವ॒ರ್ಚ॒ಸಿನೋ᳚-ಽನ್ನಾ॒ದಾ] 22
ಬ್ರಹ್ಮವರ್ಚ॒ಸಿನೋ᳚-ಽನ್ನಾ॒ದಾ ಭ॑ವನ್ತಿ॒ ದ್ವೇ ವಾ ಏ॒ತೇ ವಿ॒ರಾಜೌ॒ ತಯೋ॑ರೇ॒ವ ನಾನಾ॒ ಪ್ರತಿ॑ ತಿಷ್ಠನ್ತಿ ವಿ॒ಗ್ಂ॒ಶೋ ವೈ ಪುರು॑ಷೋ॒ ದಶ॒ ಹಸ್ತ್ಯಾ॑ ಅ॒ಙ್ಗುಲ॑ಯೋ॒ ದಶ॒ ಪದ್ಯಾ॒ ಯಾವಾ॑ನೇ॒ವ ಪುರು॑ಷ॒ಸ್ತ-ಮಾ॒ಪ್ತ್ವೋ-ತ್ತಿ॑ಷ್ಠನ್ತಿ॒ ಜ್ಯೋತಿ॒-ರ್ಗೌ-ರಾಯು॒-ರಿತಿ॑ ತ್ರ್ಯ॒ಹಾ ಭ॑ವನ್ತೀ॒ಯಂ-ವಾಁವ ಜ್ಯೋತಿ॑-ರ॒ನ್ತರಿ॑ಖ್ಷ॒-ಙ್ಗೌ-ರ॒ಸಾ-ವಾಯು॑-ರಿ॒ಮಾನೇ॒ವ ಲೋ॒ಕಾ-ನ॒ಭ್ಯಾರೋ॑ಹನ್ತ್ಯಭಿಪೂ॒ರ್ವ-ನ್ತ್ರ್ಯ॒ಹಾ ಭ॑ವನ್ತ್ಯಭಿಪೂ॒ರ್ವ-ಮೇ॒ವ ಸು॑ವ॒ರ್ಗ- [ಸು॑ವ॒ರ್ಗಮ್, ಲೋ॒ಕ-ಮ॒ಭ್ಯಾರೋ॑ಹನ್ತಿ॒] 23
-ಲ್ಲೋಁ॒ಕ-ಮ॒ಭ್ಯಾರೋ॑ಹನ್ತಿ॒ ಯದ॒ನ್ಯತಃ॑ ಪೃ॒ಷ್ಠಾನಿ॒ ಸ್ಯುರ್ವಿವಿ॑ವಧಗ್ಗ್ ಸ್ಯಾ॒ನ್ಮದ್ಧ್ಯೇ॑ ಪೃ॒ಷ್ಠಾನಿ॑ ಭವನ್ತಿ ಸವಿವಧ॒ತ್ವಾಯೌಜೋ॒ ವೈ ವೀ॒ರ್ಯ॑-ಮ್ಪೃ॒ಷ್ಠಾನ್ಯೋಜ॑ ಏ॒ವ ವೀ॒ರ್ಯ॑-ಮ್ಮದ್ಧ್ಯ॒ತೋ ದ॑ಧತೇ ಬೃಹ-ದ್ರಥನ್ತ॒ರಾಭ್ಯಾಂ᳚-ಯಁನ್ತೀ॒ಯಂ-ವಾಁವ ರ॑ಥನ್ತ॒ರಮ॒ಸೌ ಬೃ॒ಹದಾ॒ಭ್ಯಾಮೇ॒ವ ಯ॒ನ್ತ್ಯಥೋ॑ ಅ॒ನಯೋ॑ರೇ॒ವ ಪ್ರತಿ॑ ತಿಷ್ಠನ್ತ್ಯೇ॒ತೇ ವೈ ಯ॒ಜ್ಞಸ್ಯಾ᳚ಞ್ಜ॒ಸಾಯ॑ನೀ ಸ್ರು॒ತೀ ತಾಭ್ಯಾ॑ಮೇ॒ವ ಸು॑ವ॒ರ್ಗಂ-ಲೋಁ॒ಕಂ-ಯಁ॑ನ್ತಿ॒ ಪರಾ᳚ಞ್ಚೋ॒ ವಾ ಏ॒ತೇ ಸು॑ವ॒ರ್ಗಂ ಲೋಁ॒ಕಮ॒ಭ್ಯಾರೋ॑ಹನ್ತಿ॒ ಯೇ ಪ॑ರಾ॒ಚೀನಾ॑ನಿ ಪೃ॒ಷ್ಠಾನ್ಯು॑ಪ॒ಯನ್ತಿ॑ ಪ್ರ॒ತ್ಯ-ನ್ತ್ರ್ಯ॒ಹೋ ಭ॑ವತಿ ಪ್ರ॒ತ್ಯವ॑ರೂಢ್ಯಾ॒ ಅಥೋ॒ ಪ್ರತಿ॑ಷ್ಠಿತ್ಯಾ ಉ॒ಭಯೋ᳚ರ್ಲೋ॒ಕಯೋರ್॑. ಋ॒ದ್ಧ್ವೋ-ತ್ತಿ॑ಷ್ಠನ್ತ್ಯತಿರಾ॒ತ್ರಾವ॒ಭಿತೋ॑ ಭವತೋ ಬ್ರಹ್ಮವರ್ಚ॒ಸ-ಸ್ಯಾ॒ನ್ನಾದ್ಯ॑ಸ್ಯ॒ ಪರಿ॑ಗೃಹೀತ್ಯೈ ॥ 24 ॥
(ವೃ॒ಞ್ಜ॒ತೇ॒ ಬ್ರಹ್ಮ॒ ಚಾ-ನ್ನ॑-ಞ್ಚ – ಸುವ॒ರ್ಗ – ಮೇ॒ತೇ ಸು॑ವ॒ರ್ಗಂ – ತ್ರಯೋ॑ವಿಗ್ಂಶತಿಶ್ಚ) (ಅ. 9)
ಅ॒ಸಾವಾ॑ದಿ॒ತ್ಯೋ᳚-ಽಸ್ಮಿ-ಲ್ಲೋಁ॒ಕ ಆ॑ಸೀ॒-ತ್ತ-ನ್ದೇ॒ವಾಃ ಪೃ॒ಷ್ಠೈಃ ಪ॑ರಿ॒ಗೃಹ್ಯ॑ ಸುವ॒ರ್ಗಂ-ಲೋಁ॒ಕಮ॑ಗಮಯ॒-ನ್ಪರೈ॑ರ॒ವಸ್ತಾ॒-ತ್ಪರ್ಯ॑ಗೃಹ್ಣ-ನ್ದಿವಾಕೀ॒ರ್ತ್ಯೇ॑ನ ಸುವ॒ರ್ಗೇ ಲೋ॒ಕೇ ಪ್ರತ್ಯ॑ಸ್ಥಾಪಯ॒-ನ್ಪರೈಃ᳚ ಪ॒ರಸ್ತಾ॒-ತ್ಪರ್ಯ॑ಗೃಹ್ಣ-ನ್ಪೃ॒ಷ್ಠೈರು॒ಪಾವಾ॑ರೋಹ॒ನ್ಥ್ಸ ವಾ ಅ॒ಸಾವಾ॑ದಿ॒ತ್ಯೋ॑-ಽಮುಷ್ಮಿ॑-ಲ್ಲೋಁ॒ಕೇ ಪರೈ॑ರುಭ॒ಯತಃ॒ ಪರಿ॑ಗೃಹೀತೋ॒ ಯ-ತ್ಪೃ॒ಷ್ಠಾನಿ॒ ಭವ॑ನ್ತಿ ಸುವ॒ರ್ಗಮೇ॒ವ ತೈರ್ಲೋ॒ಕಂ-ಯಁಜ॑ಮಾನಾ ಯನ್ತಿ॒ ಪರೈ॑ರ॒ವಸ್ತಾ॒-ತ್ಪರಿ॑ ಗೃಹ್ಣನ್ತಿ ದಿವಾಕೀ॒ರ್ತ್ಯೇ॑ನ [ದಿವಾಕೀ॒ರ್ತ್ಯೇ॑ನ, ಸು॒ವ॒ರ್ಗೇ ಲೋ॒ಕೇ ಪ್ರತಿ॑] 25
ಸುವ॒ರ್ಗೇ ಲೋ॒ಕೇ ಪ್ರತಿ॑ ತಿಷ್ಠನ್ತಿ॒ ಪರೈಃ᳚ ಪ॒ರಸ್ತಾ॒-ತ್ಪರಿ॑ ಗೃಹ್ಣನ್ತಿ ಪೃ॒ಷ್ಠೈರು॒ಪಾವ॑ರೋಹನ್ತಿ॒ ಯ-ತ್ಪರೇ॑ ಪ॒ರಸ್ತಾ॒ನ್ನ ಸ್ಯುಃ ಪರಾ᳚ಞ್ಚ-ಸ್ಸುವ॒ರ್ಗಾ-ಲ್ಲೋ॒ಕಾನ್ನಿಷ್ಪ॑ದ್ಯೇರ॒ನ್॒. ಯದ॒ವಸ್ತಾ॒ನ್ನ ಸ್ಯುಃ ಪ್ರ॒ಜಾ ನಿರ್ದ॑ಹೇಯುರ॒ಭಿತೋ॑ ದಿವಾಕೀ॒ರ್ತ್ಯ॑-ಮ್ಪರ॑ಸ್ಸಾಮಾನೋ ಭವನ್ತಿ ಸುವ॒ರ್ಗ ಏ॒ವೈನಾ᳚-ಲ್ಲೋಁ॒ಕ ಉ॑ಭ॒ಯತಃ॒ ಪರಿ॑ ಗೃಹ್ಣನ್ತಿ॒ ಯಜ॑ಮಾನಾ॒ ವೈ ದಿ॑ವಾಕೀ॒ರ್ತ್ಯಗ್ಂ॑ ಸಂವಁಥ್ಸ॒ರಃ ಪರ॑ಸ್ಸಾಮಾನೋ॒-ಽಭಿತೋ॑ ದಿವಾಕೀ॒ರ್ತ್ಯ॑-ಮ್ಪರ॑ಸ್ಸಾಮಾನೋ ಭವನ್ತಿ ಸಂವಁಥ್ಸ॒ರ ಏ॒ವೋಭ॒ಯತಃ॒ [ಏ॒ವೋಭ॒ಯತಃ॑, ಪ್ರತಿ॑ ತಿಷ್ಠನ್ತಿ] 26
ಪ್ರತಿ॑ ತಿಷ್ಠನ್ತಿ ಪೃ॒ಷ್ಠಂ-ವೈಁ ದಿ॑ವಾಕೀ॒ರ್ತ್ಯ॑-ಮ್ಪಾ॒ರ್ಶ್ವೇ ಪರ॑ಸ್ಸಾಮಾನೋ॒ ಽಭಿತೋ॑ ದಿವಾಕೀ॒ರ್ತ್ಯ॑-ಮ್ಪರ॑ಸ್ಸಾಮಾನೋ ಭವನ್ತಿ॒ ತಸ್ಮಾ॑ದ॒ಭಿತಃ॑ ಪೃ॒ಷ್ಠ-ಮ್ಪಾ॒ರ್ಶ್ವೇ ಭೂಯಿ॑ಷ್ಠಾ॒ ಗ್ರಹಾ॑ ಗೃಹ್ಯನ್ತೇ॒ ಭೂಯಿ॑ಷ್ಠಗ್ಂ ಶಸ್ಯತೇ ಯ॒ಜ್ಞಸ್ಯೈ॒ವ ತನ್ಮ॑ದ್ಧ್ಯ॒ತೋ ಗ್ರ॒ನ್ಥಿ-ಙ್ಗ್ರ॑ಥ್ನ॒ನ್ತ್ಯವಿ॑ಸ್ರಗ್ಂಸಾಯ ಸ॒ಪ್ತ ಗೃ॑ಹ್ಯನ್ತೇ ಸ॒ಪ್ತ ವೈ ಶೀ॑ರ್ಷ॒ಣ್ಯಾಃ᳚ ಪ್ರಾ॒ಣಾಃ ಪ್ರಾ॒ಣಾನೇ॒ವ ಯಜ॑ಮಾನೇಷು ದಧತಿ॒ ಯ-ತ್ಪ॑ರಾ॒ಚೀನಾ॑ನಿ ಪೃ॒ಷ್ಠಾನಿ॒ ಭವ॑ನ್ತ್ಯ॒ಮುಮೇ॒ವ ತೈ-ರ್ಲೋ॒ಕಮ॒ಭ್ಯಾರೋ॑ಹನ್ತಿ॒ ಯದಿ॒ಮಂ-ಲೋಁ॒ಕ-ನ್ನ [ಯದಿ॒ಮಂ-ಲೋಁ॒ಕ-ನ್ನ, ಪ್ರ॒ತ್ಯ॒ವ॒-ರೋಹೇ॑ಯು॒-ರುದ್ವಾ॒] 27
ಪ್ರ॑ತ್ಯವ॒-ರೋಹೇ॑ಯು॒-ರುದ್ವಾ॒ ಮಾದ್ಯೇ॑ಯು॒ರ್ಯಜ॑ಮಾನಾಃ॒ ಪ್ರ ವಾ॑ ಮೀಯೇರ॒ನ್॒. ಯ-ತ್ಪ್ರ॑ತೀ॒ಚೀನಾ॑ನಿ ಪೃ॒ಷ್ಠಾನಿ॒ ಭವ॑ನ್ತೀ॒ಮ-ಮೇ॒ವ ತೈರ್ಲೋ॒ಕ-ಮ್ಪ್ರ॒ತ್ಯವ॑ರೋಹ॒ನ್ತ್ಯಥೋ॑ ಅ॒ಸ್ಮಿನ್ನೇ॒ವ ಲೋ॒ಕೇ ಪ್ರತಿ॑ ತಿಷ್ಠ॒ನ್ತ್ಯನು॑ನ್ಮಾದಾ॒ಯೇನ್ದ್ರೋ॒ ವಾ ಅಪ್ರ॑ತಿಷ್ಠಿತ ಆಸೀ॒-ಥ್ಸ ಪ್ರ॒ಜಾಪ॑ತಿ॒-ಮುಪಾ॑ಧಾವ॒-ತ್ತಸ್ಮಾ॑ ಏ॒ತ-ಮೇ॑ಕವಿಗ್ಂಶತಿರಾ॒ತ್ರ-ಮ್ಪ್ರಾಯ॑ಚ್ಛ॒-ತ್ತಮಾ-ಽಹ॑ರ॒-ತ್ತೇನಾ॑ಯಜತ॒ ತತೋ॒ ವೈ ಸ ಪ್ರತ್ಯ॑ತಿಷ್ಠ॒ದ್ಯೇ ಬ॑ಹುಯಾ॒ಜಿನೋ ಽಪ್ರ॑ತಿಷ್ಠಿತಾ॒- [ ಽಪ್ರ॑ತಿಷ್ಠಿತಾಃ, ಸ್ಯುಸ್ತ ಏ॑ಕವಿಗ್ಂಶತಿ-] 28
-ಸ್ಸ್ಯುಸ್ತ ಏ॑ಕವಿಗ್ಂಶತಿ-ರಾ॒ತ್ರ-ಮಾ॑ಸೀರ॒-ನ್ದ್ವಾದ॑ಶ॒ ಮಾಸಾಃ॒ ಪಞ್ಚ॒ರ್ತವ॒-ಸ್ತ್ರಯ॑ ಇ॒ಮೇ ಲೋ॒ಕಾ ಅ॒ಸಾವಾ॑ದಿ॒ತ್ಯ ಏ॑ಕವಿ॒ಗ್ಂ॒ಶ ಏ॒ತಾವ॑ನ್ತೋ॒ ವೈ ದೇ॑ವಲೋ॒ಕಾಸ್ತೇಷ್ವೇ॒ವ ಯ॑ಥಾ ಪೂ॒ರ್ವ-ಮ್ಪ್ರತಿ॑ ತಿಷ್ಠನ್ತ್ಯ॒ಸಾವಾ॑ದಿ॒ತ್ಯೋ ನ ವ್ಯ॑ರೋಚತ॒ ಸ ಪ್ರ॒ಜಾಪ॑ತಿ॒-ಮುಪಾ॑ಧಾವ॒-ತ್ತಸ್ಮಾ॑ ಏ॒ತಮೇ॑ಕವಿಗ್ಂಶತಿರಾ॒ತ್ರ-ಮ್ಪ್ರಾಯ॑ಚ್ಛ॒-ತ್ತಮಾ-ಽಹ॑ರ॒-ತ್ತೇನಾ॑ಯಜತ॒ ತತೋ॒ ವೈ ಸೋ॑ ಽರೋಚತ॒ ಯ ಏ॒ವಂ-ವಿಁ॒ದ್ವಾಗ್ಂಸ॑ ಏಕವಿಗ್ಂಶತಿರಾ॒ತ್ರ-ಮಾಸ॑ತೇ॒ ರೋಚ॑ನ್ತ ಏ॒ವೈಕ॑ವಿಗ್ಂಶತಿರಾ॒ತ್ರೋ ಭ॑ವತಿ॒ ರುಗ್ವಾ ಏ॑ಕವಿ॒ಗ್ಂ॒ಶೋ ರುಚ॑ಮೇ॒ವ ಗ॑ಚ್ಛ॒ನ್ತ್ಯಥೋ᳚ ಪ್ರತಿ॒ಷ್ಠಾಮೇ॒ವ ಪ್ರ॑ತಿ॒ಷ್ಠಾ ಹ್ಯೇ॑ಕವಿ॒ಗ್ಂ॒ಶೋ॑ ಽತಿರಾ॒ತ್ರಾವ॒ಭಿತೋ॑ ಭವತೋ ಬ್ರಹ್ಮವರ್ಚ॒ಸಸ್ಯ॒ ಪರಿ॑ಗೃಹೀತ್ಯೈ ॥ 29 ॥
(ಗೃ॒ಹ್ಣ॒ನ್ತಿ॒ ದಿ॒ವಾ॒ಕೀ॒ರ್ತ್ಯೇ॑ನೈ॒ – ವೋಭ॒ಯತೋ॒ – ನಾ – ಪ್ರ॑ತಿಷ್ಠಿತಾ॒ – ಆಸ॑ತ॒ – ಏಕ॑ವಿಗ್ಂಶತಿಶ್ಚ) (ಅ. 10)
ಅ॒ರ್ವಾಂ-ಯಁ॒ಜ್ಞ-ಸ್ಸ-ಙ್ಕ್ರಾ॑ಮತ್ವ॒ಮುಷ್ಮಾ॒-ದಧಿ॒ ಮಾಮ॒ಭಿ । ಋಷೀ॑ಣಾಂ॒-ಯಃ ಁಪು॒ರೋಹಿ॑ತಃ ॥ ನಿರ್ದೇ॑ವ॒-ನ್ನಿರ್ವೀ॑ರ-ಙ್ಕೃ॒ತ್ವಾ ವಿಷ್ಕ॑ನ್ಧ॒-ನ್ತಸ್ಮಿ॑ನ್ ಹೀಯತಾಂ॒-ಯೋಁ᳚-ಽಸ್ಮಾ-ನ್ದ್ವೇಷ್ಟಿ॑ । ಶರೀ॑ರಂ-ಯಁಜ್ಞಶಮ॒ಲ-ಙ್ಕುಸೀ॑ದ॒-ನ್ತಸ್ಮಿನ್᳚ಥ್ಸೀದತು॒ ಯೋ᳚-ಽಸ್ಮಾ-ನ್ದ್ವೇಷ್ಟಿ॑ ॥ ಯಜ್ಞ॑ ಯ॒ಜ್ಞಸ್ಯ॒ ಯ-ತ್ತೇಜ॒ಸ್ತೇನ॒ ಸಙ್ಕ್ರಾ॑ಮ॒ ಮಾಮ॒ಭಿ । ಬ್ರಾ॒ಹ್ಮ॒ಣಾ-ನೃ॒ತ್ವಿಜೋ॑ ದೇ॒ವಾನ್ ಯ॒ಜ್ಞಸ್ಯ॒ ತಪ॑ಸಾ ತೇ ಸವಾ॒ಹಮಾ ಹು॑ವೇ ॥ ಇ॒ಷ್ಟೇನ॑ ಪ॒ಕ್ವಮುಪ॑ [ಪ॒ಕ್ವಮುಪ॑, ತೇ॒ ಹು॒ವೇ॒ ಸ॒ವಾ॒-ಽಹಮ್ ।] 30
ತೇ ಹುವೇ ಸವಾ॒-ಽಹಮ್ । ಸ-ನ್ತೇ॑ ವೃಞ್ಜೇ ಸುಕೃ॒ತಗ್ಂ ಸ-ಮ್ಪ್ರ॒ಜಾ-ಮ್ಪ॒ಶೂನ್ ॥ ಪ್ರೈ॒ಷಾನ್-ಥ್ಸಾ॑ಮಿಧೇ॒ನೀ-ರಾ॑ಘಾ॒ರಾ-ವಾಜ್ಯ॑ಭಾಗಾ॒ವಾ-ಶ್ರು॑ತ-ಮ್ಪ್ರ॒ತ್ಯಾಶ್ರು॑ತ॒ಮಾ ಶೃ॑ಣಾಮಿ ತೇ । ಪ್ರ॒ಯಾ॒ಜಾ॒ನೂ॒ಯಾ॒ಜಾನ್-ಥ್ಸ್ವಿ॑ಷ್ಟ॒ಕೃತ॒-ಮಿಡಾ॑-ಮಾ॒ಶಿಷ॒ ಆ ವೃ॑ಞ್ಜೇ॒ ಸುವಃ॑ ॥ ಅ॒ಗ್ನಿನೇನ್ದ್ರೇ॑ಣ॒ ಸೋಮೇ॑ನ॒ ಸರ॑ಸ್ವತ್ಯಾ॒ ವಿಷ್ಣು॑ನಾ ದೇ॒ವತಾ॑ಭಿಃ । ಯಾ॒ಜ್ಯಾ॒ನು॒ವಾ॒ಕ್ಯಾ᳚ಭ್ಯಾ॒-ಮುಪ॑ ತೇ ಹುವೇ ಸವಾ॒ಹಂ-ಯಁ॒ಜ್ಞಮಾ ದ॑ದೇ ತೇ॒ ವಷ॑ಟ್ಕೃತಮ್ ॥ ಸ್ತು॒ತಗ್ಂ ಶ॒ಸ್ತ್ರ-ಮ್ಪ್ರ॑ತಿಗ॒ರ-ಙ್ಗ್ರಹ॒-ಮಿಡಾ॑-ಮಾ॒ಶಿಷ॒ [ಮಾ॒ಶಿಷಃ॑, ಆ ವೃ॑ಞ್ಜೇ॒ ಸುವಃ॑ ।] 31
ಆ ವೃ॑ಞ್ಜೇ॒ ಸುವಃ॑ । ಪ॒ತ್ನೀ॒ಸಂ॒ಯಾಁ॒ಜಾ-ನುಪ॑ ತೇ ಹುವೇ ಸವಾ॒ಹಗ್ಂ ಸ॑ಮಿಷ್ಟಯ॒ಜು-ರಾ ದ॑ದೇ॒ ತವ॑ ॥ ಪ॒ಶೂನ್-ಥ್ಸು॒ತ-ಮ್ಪು॑ರೋ॒ಡಾಶಾ॒ನ್-ಥ್ಸವ॑ನಾ॒ನ್ಯೋತ ಯ॒ಜ್ಞಮ್ । ದೇ॒ವಾನ್-ಥ್ಸೇನ್ದ್ರಾ॒ನುಪ॑ ತೇ ಹುವೇ ಸವಾ॒ಹ-ಮ॒ಗ್ನಿಮು॑ಖಾ॒ನ್-ಥ್ಸೋಮ॑ವತೋ॒ ಯೇ ಚ॒ ವಿಶ್ವೇ᳚ ॥ 32 ॥
(ಉಪ॒ – ಗ್ರಹ॒ಮಿಡಾ॑ಮಾ॒ಶಿಷೋ॒ – ದ್ವಾತ್ರಿಗ್ಂ॑ಶಚ್ಚ) (ಅ. 11)
ಭೂ॒ತ-ಮ್ಭವ್ಯ॑-ಮ್ಭವಿ॒ಷ್ಯದ್ವಷ॒ಟ್-ಥ್ಸ್ವಾಹಾ॒ ನಮ॒ ಋ-ಖ್ಸಾಮ॒ ಯಜು॒ರ್ವಷ॒ಟ್-ಥ್ಸ್ವಾಹಾ॒ ನಮೋ॑ ಗಾಯ॒ತ್ರೀ ತ್ರಿ॒ಷ್ಟು-ಬ್ಜಗ॑ತೀ॒ ವಷ॒ಟ್-ಥ್ಸ್ವಾಹಾ॒ ನಮಃ॑ ಪೃಥಿ॒ವ್ಯ॑ನ್ತರಿ॑ಖ್ಷ॒-ನ್ದ್ಯೌ ರ್ವಷ॒ಟ್-ಥ್ಸ್ವಾಹಾ॒ ನಮೋ॒ ಽಗ್ನಿರ್ವಾ॒ಯು-ಸ್ಸೂರ್ಯೋ॒ ವಷ॒ಟ್-ಥ್ಸ್ವಾಹಾ॒ ನಮಃ॑ ಪ್ರಾ॒ಣೋ-ವ್ಯಾ॒ನೋ॑-ಽಪಾ॒ನೋ ವಷ॒ಟ್-ಥ್ಸ್ವಾಹಾ॒ ನಮೋ ಽನ್ನ॑-ಙ್ಕೃ॒ಷಿ-ರ್ವೃಷ್ಟಿ॒-ರ್ವಷ॒ಟ್-ಥ್ಸ್ವಾಹಾ॒ ನಮಃ॑ ಪಿ॒ತಾಪು॒ತ್ರಃ ಪೌತ್ರೋ॒ ವಷ॒ಟ್-ಥ್ಸ್ವಾಹಾ॒ ನಮೋ॒ ಭೂರ್ಭುವ॒-ಸ್ಸುವ॒ ರ್ವಷ॒ಟ್-ಥ್ಸ್ವಾಹಾ॒ ನಮಃ॑ ॥ 33 ॥
(ಭುವ॑ – ಶ್ಚ॒ತ್ವಾರಿ॑ ಚ) (ಅ. 12)
ಆ ಮೇ॑ ಗೃ॒ಹಾ ಭ॑ವ॒ನ್ತ್ವಾ ಪ್ರ॒ಜಾ ಮ॒ ಆ ಮಾ॑ ಯ॒ಜ್ಞೋ ವಿ॑ಶತು ವೀ॒ರ್ಯಾ॑ವಾನ್ । ಆಪೋ॑ ದೇ॒ವೀರ್ಯ॒ಜ್ಞಿಯಾ॒ ಮಾ-ಽಽವಿ॑ಶನ್ತು ಸ॒ಹಸ್ರ॑ಸ್ಯ ಮಾ ಭೂ॒ಮಾ ಮಾ ಪ್ರ ಹಾ॑ಸೀತ್ ॥ ಆ ಮೇ॒ ಗ್ರಹೋ॑ ಭವ॒ತ್ವಾ ಪು॑ರೋ॒ರು-ಖ್ಸ್ತು॑ತಶ॒ಸ್ತ್ರೇ ಮಾ ಽಽ ವಿ॑ಶತಾಗ್ಂ ಸ॒ಮೀಚೀ᳚ । ಆ॒ದಿ॒ತ್ಯಾ ರು॒ದ್ರಾ ವಸ॑ವೋ ಮೇ ಸದ॒ಸ್ಯಾ᳚-ಸ್ಸ॒ಹಸ್ರ॑ಸ್ಯ ಮಾ ಭೂ॒ಮಾ ಮಾ ಪ್ರ ಹಾ॑ಸೀತ್ ॥ ಆ ಮಾ᳚-ಽಗ್ನಿಷ್ಟೋ॒ಮೋ ವಿ॑ಶತೂ॒ ಕ್ಥ್ಯ॑ಶ್ಚಾತಿರಾ॒ತ್ರೋ ಮಾ-ಽಽ ವಿ॑ಶತ್ವಾಪಿಶರ್ವ॒ರಃ । ತಿ॒ರೋಅ॑ಹ್ನಿಯಾ ಮಾ॒ ಸುಹು॑ತಾ॒ ಆ ವಿ॑ಶನ್ತು ಸ॒ಹಸ್ರ॑ಸ್ಯ ಮಾ ಭೂ॒ಮಾ ಮಾ ಪ್ರ ಹಾ॑ಸೀತ್ ॥ 34 ॥
(ಅ॒ಗ್ನಿ॒ಷ್ಟೋ॒ಮೋ ವಿ॑ಶತ್ವ॒ – ಷ್ಟಾದ॑ಶ ಚ) (ಅ. 13)
ಅ॒ಗ್ನಿನಾ॒ ತಪೋ-ಽನ್ವ॑ಭವ-ದ್ವಾ॒ಚಾ ಬ್ರಹ್ಮ॑ ಮ॒ಣಿನಾ॑ ರೂ॒ಪಾಣೀನ್ದ್ರೇ॑ಣ ದೇ॒ವಾನ್ ವಾತೇ॑ನ ಪ್ರಾ॒ಣಾನ್-ಥ್ಸೂರ್ಯೇ॑ಣ॒ ದ್ಯಾ-ಞ್ಚ॒ನ್ದ್ರಮ॑ಸಾ॒ ನಖ್ಷ॑ತ್ರಾಣಿ ಯ॒ಮೇನ॑ ಪಿ॒ತೄ-ನ್ರಾಜ್ಞಾ॑ ಮನು॒ಷ್ಯಾ᳚-ನ್ಫ॒ಲೇನ॑ ನಾದೇ॒ಯಾನ॑ಜಗ॒ರೇಣ॑ ಸ॒ರ್ಪಾನ್ ವ್ಯಾ॒ಘ್ರೇಣಾ॑-ಽಽರ॒ಣ್ಯಾ-ನ್ಪ॒ಶೂಞ್ಛ್ಯೇ॒ನೇನ॑ ಪತ॒ತ್ರಿಣೋ॒ ವೃಷ್ಣಾ-ಽಶ್ವಾ॑ನೃಷ॒ಭೇಣ॒ ಗಾ ಬ॒ಸ್ತೇನಾ॒ಜಾ ವೃ॒ಷ್ಣಿನಾ-ಽವೀ᳚ರ್ವ್ರೀ॒ಹಿಣಾ-ಽನ್ನಾ॑ನಿ॒ ಯವೇ॒ನೌಷ॑ಧೀರ್ನ್ಯ॒ಗ್ರೋಧೇ॑ನ॒ ವನ॒ಸ್ಪತೀ॑ನುದು॒ಬಂರೇ॒ಣೋರ್ಜ॑-ಙ್ಗಾಯತ್ರಿ॒ಯಾ ಛನ್ದಾಗ್ಂ॑ಸಿ ತ್ರಿ॒ವೃತಾ॒ ಸ್ತೋಮಾ᳚-ನ್ಬ್ರಾಹ್ಮ॒ಣೇನ॒ ವಾಚ᳚ಮ್ ॥ 35 ॥
(ಬ್ರಾ॒ಹ್ಮ॒ಣೇನೈ – ಕ॑-ಞ್ಚ) (ಅ. 14)
ಸ್ವಾಹಾ॒-ಽಽಧಿಮಾಧೀ॑ತಾಯ॒ ಸ್ವಾಹಾ॒ ಸ್ವಾಹಾ-ಽಽಧೀ॑ತ॒-ಮ್ಮನ॑ಸೇ॒ ಸ್ವಾಹಾ॒ ಸ್ವಾಹಾ॒ ಮನಃ॑ ಪ್ರ॒ಜಾಪ॑ತಯೇ॒ ಸ್ವಾಹಾ॒ ಕಾಯ॒ ಸ್ವಾಹಾ॒ ಕಸ್ಮೈ॒ ಸ್ವಾಹಾ॑ ಕತ॒ಮಸ್ಮೈ॒ ಸ್ವಾಹಾ ಽದಿ॑ತ್ಯೈ॒ ಸ್ವಾಹಾ ಽದಿ॑ತ್ಯೈ ಮ॒ಹ್ಯೈ᳚ ಸ್ವಾಹಾ-ಽದಿ॑ತ್ಯೈ ಸುಮೃಡೀ॒ಕಾಯೈ॒ ಸ್ವಾಹಾ॒ ಸರ॑ಸ್ವತ್ಯೈ॒ ಸ್ವಾಹಾ॒ ಸರ॑ಸ್ವತ್ಯೈ ಬೃಹ॒ತ್ಯೈ᳚ ಸ್ವಾಹಾ॒ ಸರ॑ಸ್ವತ್ಯೈ ಪಾವ॒ಕಾಯೈ॒ ಸ್ವಾಹಾ॑ ಪೂ॒ಷ್ಣೇ ಸ್ವಾಹಾ॑ ಪೂ॒ಷ್ಣೇ ಪ್ರ॑ಪ॒ಥ್ಯಾ॑ಯ॒ ಸ್ವಾಹಾ॑ ಪೂ॒ಷ್ಣೇ ನ॒ರನ್ಧಿ॑ಷಾಯ॒ ಸ್ವಾಹಾ॒ ತ್ವಷ್ಟ್ರೇ॒ ಸ್ವಾಹಾ॒ ತ್ವಷ್ಟ್ರೇ॑ ತು॒ರೀಪಾ॑ಯ॒ ಸ್ವಾಹಾ॒ ತ್ವಷ್ಟ್ರೇ॑ ಪುರು॒ರೂಪಾ॑ಯ॒ ಸ್ವಾಹಾ॒ ವಿಷ್ಣ॑ವೇ॒ ಸ್ವಾಹಾ॒ ವಿಷ್ಣ॑ವೇ ನಿಖುರ್ಯ॒ಪಾಯ॒ ಸ್ವಾಹಾ॒ ವಿಷ್ಣ॑ವೇ ನಿಭೂಯ॒ಪಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 36 ॥
(ಪು॒ರು॒ರೂಪಾ॑ಯ॒ ಸ್ವಾಹಾ॒ – ದಶ॑ ಚ) (ಅ. 15)
ದ॒ದ್ಭ್ಯ-ಸ್ಸ್ವಾಹಾ॒ ಹನೂ᳚ಭ್ಯಾ॒ಗ್॒ ಸ್ವಾಹೋಷ್ಠಾ᳚ಭ್ಯಾ॒ಗ್॒ ಸ್ವಾಹಾ॒ ಮುಖಾ॑ಯ॒ ಸ್ವಾಹಾ॒ ನಾಸಿ॑ಕಾಭ್ಯಾ॒ಗ್॒ ಸ್ವಾಹಾ॒ ಽಖ್ಷೀಭ್ಯಾ॒ಗ್॒ ಸ್ವಾಹಾ॒ ಕರ್ಣಾ᳚ಭ್ಯಾ॒ಗ್॒ ಸ್ವಾಹಾ॑ ಪಾ॒ರ ಇ॒ಖ್ಷವೋ॑-ಽವಾ॒ರ್ಯೇ᳚ಭ್ಯಃ॒ ಪಖ್ಷ್ಮ॑ಭ್ಯ॒-ಸ್ಸ್ವಾಹಾ॑ ಽವಾ॒ರ ಇ॒ಖ್ಷವಃ॑ ಪಾ॒ರ್ಯೇ᳚ಭ್ಯಃ॒ ಪಖ್ಷ್ಮ॑ಭ್ಯ॒-ಸ್ಸ್ವಾಹಾ॑ ಶೀ॒ರ್ಷ್ಣೇ ಸ್ವಾಹಾ᳚ ಭ್ರೂ॒ಭ್ಯಾಗ್ ಸ್ವಾಹಾ॑ ಲ॒ಲಾಟಾ॑ಯ॒ ಸ್ವಾಹಾ॑ ಮೂ॒ರ್ಧ್ನೇ ಸ್ವಾಹಾ॑ ಮ॒ಸ್ತಿಷ್ಕಾ॑ಯ॒ ಸ್ವಾಹಾ॒ ಕೇಶೇ᳚ಭ್ಯ॒-ಸ್ಸ್ವಾಹಾ॒ ವಹಾ॑ಯ॒ ಸ್ವಾಹಾ᳚ ಗ್ರೀ॒ವಾಭ್ಯ॒-ಸ್ಸ್ವಾಹಾ᳚ ಸ್ಕ॒ನ್ಧೇಭ್ಯ॒-ಸ್ಸ್ವಾಹಾ॒ ಕೀಕ॑ಸಾಭ್ಯ॒-ಸ್ಸ್ವಾಹಾ॑ ಪೃ॒ಷ್ಟೀಭ್ಯ॒-ಸ್ಸ್ವಾಹಾ॑ ಪಾಜ॒ಸ್ಯಾ॑ಯ॒ ಸ್ವಾಹಾ॑ ಪಾ॒ರ್ಶ್ವಾಭ್ಯಾ॒ಗ್॒ ಸ್ವಾಹಾ- [ ] 37
-ಽಗ್ಂಸಾ᳚ಭ್ಯಾ॒ಗ್॒ ಸ್ವಾಹಾ॑ ದೋ॒ಷಭ್ಯಾ॒ಗ್॒ ಸ್ವಾಹಾ॑ ಬಾ॒ಹುಭ್ಯಾ॒ಗ್॒ ಸ್ವಾಹಾ॒ ಜಙ್ಘಾ᳚ಭ್ಯಾ॒ಗ್॒ ಸ್ವಾಹಾ॒ ಶ್ರೋಣೀ᳚ಭ್ಯಾ॒ಗ್॒ ಸ್ವಾಹೋ॒ರುಭ್ಯಾ॒ಗ್॒ ಸ್ವಾಹಾ᳚ ಽಷ್ಠೀ॒ವದ್ಭ್ಯಾ॒ಗ್॒ ಸ್ವಾಹಾ॒ ಜಙ್ಘಾ᳚ಭ್ಯಾ॒ಗ್॒ ಸ್ವಾಹಾ॑ ಭ॒ಸದೇ॒ ಸ್ವಾಹಾ॑ ಶಿಖ॒ಣ್ಡೇಭ್ಯ॒-ಸ್ಸ್ವಾಹಾ॑ ವಾಲ॒ಧಾನಾ॑ಯ॒ ಸ್ವಾಹಾ॒ ಽಽಣ್ಡಾಭ್ಯಾ॒ಗ್॒ ಸ್ವಾಹಾ॒ ಶೇಪಾ॑ಯ॒ ಸ್ವಾಹಾ॒ ರೇತ॑ಸೇ॒ ಸ್ವಾಹಾ᳚ ಪ್ರ॒ಜಾಭ್ಯ॒-ಸ್ಸ್ವಾಹಾ᳚ ಪ್ರ॒ಜನ॑ನಾಯ॒ ಸ್ವಾಹಾ॑ ಪ॒ದ್ಭ್ಯ-ಸ್ಸ್ವಾಹಾ॑ ಶ॒ಫೇಭ್ಯ॒-ಸ್ಸ್ವಾಹಾ॒ ಲೋಮ॑ಭ್ಯ॒-ಸ್ಸ್ವಾಹಾ᳚ ತ್ವ॒ಚೇ ಸ್ವಾಹಾ॒ ಲೋಹಿ॑ತಾಯ॒ ಸ್ವಾಹಾ॑ ಮಾ॒ಗ್ಂ॒ಸಾಯ॒ ಸ್ವಾಹಾ॒ ಸ್ನಾವ॑ಭ್ಯ॒-ಸ್ಸ್ವಾಹಾ॒ ಽಸ್ಥಭ್ಯ॒-ಸ್ಸ್ವಾಹಾ॑ ಮ॒ಜ್ಜಭ್ಯ॒-ಸ್ಸ್ವಾಹಾ ಽಙ್ಗೇ᳚ಭ್ಯ॒-ಸ್ಸ್ವಾಹಾ॒ ಽಽತ್ಮನೇ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 38 ॥
(ಪಾ॒ರ್ಶ್ವಾಭ್ಯಾ॒ಗ್॒ ಸ್ವಾಹಾ॑ – ಮ॒ಜ್ಜಭ್ಯ॒-ಸ್ಸ್ವಾಹಾ॒ – ಷಟ್ ಚ॑) (ಅ. 16)
ಅ॒ಞ್ಜ್ಯೇ॒ತಾಯ॒ ಸ್ವಾಹಾ᳚ ಽಞ್ಜಿಸ॒ಕ್ಥಾಯ॒ ಸ್ವಾಹಾ॑ ಶಿತಿ॒ಪದೇ॒ ಸ್ವಾಹಾ॒ ಶಿತಿ॑ಕಕುದೇ॒ ಸ್ವಾಹಾ॑ ಶಿತಿ॒ರನ್ಧ್ರಾ॑ಯ॒ ಸ್ವಾಹಾ॑ ಶಿತಿಪೃ॒ಷ್ಠಾಯ॒ ಸ್ವಾಹಾ॑ ಶಿ॒ತ್ಯಗ್ಂಸಾ॑ಯ॒ ಸ್ವಾಹಾ॑ ಪುಷ್ಪ॒ಕರ್ಣಾ॑ಯ॒ ಸ್ವಾಹಾ॑ ಶಿ॒ತ್ಯೋಷ್ಠಾ॑ಯ॒ ಸ್ವಾಹಾ॑ ಶಿತಿ॒ಭ್ರವೇ॒ ಸ್ವಾಹಾ॒ ಶಿತಿ॑ಭಸದೇ॒ ಸ್ವಾಹಾ᳚ ಶ್ವೇ॒ತಾನೂ॑ಕಾಶಾಯ॒ ಸ್ವಾಹಾ॒ ಽಞ್ಜಯೇ॒ ಸ್ವಾಹಾ॑ ಲ॒ಲಾಮಾ॑ಯ॒ ಸ್ವಾಹಾ ಽಸಿ॑ತಜ್ಞವೇ॒ ಸ್ವಾಹಾ॑ ಕೃಷ್ಣೈ॒ತಾಯ॒ ಸ್ವಾಹಾ॑ ರೋಹಿತೈ॒ತಾಯ॒ ಸ್ವಾಹಾ॑ ಽರುಣೈ॒ತಾಯ॒ ಸ್ವಾಹೇ॒ದೃಶಾ॑ಯ॒ ಸ್ವಾಹಾ॑ ಕೀ॒ದೃಶಾ॑ಯ॒ ಸ್ವಾಹಾ॑ ತಾ॒ದೃಶಾ॑ಯ॒ ಸ್ವಾಹಾ॑ ಸ॒ದೃಶಾ॑ಯ॒ ಸ್ವಾಹಾ॒ ವಿಸ॑ದೃಶಾಯ॒ ಸ್ವಾಹಾ॒ ಸುಸ॑ದೃಶಾಯ॒ ಸ್ವಾಹಾ॑ ರೂ॒ಪಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 39 ॥
(ರೂ॒ಪಾಯ॒ ಸ್ವಾಹಾ॒ – ದ್ವೇ ಚ॑ ) (ಅ. 17)
ಕೃ॒ಷ್ಣಾಯ॒ ಸ್ವಾಹಾ᳚ ಶ್ವೇ॒ತಾಯ॒ ಸ್ವಾಹಾ॑ ಪಿ॒ಶಙ್ಗಾ॑ಯ॒ ಸ್ವಾಹಾ॑ ಸಾ॒ರಙ್ಗಾ॑ಯ॒ ಸ್ವಾಹಾ॑ ಽರು॒ಣಾಯ॒ ಸ್ವಾಹಾ॑ ಗೌ॒ರಾಯ॒ ಸ್ವಾಹಾ॑ ಬ॒ಭ್ರವೇ॒ ಸ್ವಾಹಾ॑ ನಕು॒ಲಾಯ॒ ಸ್ವಾಹಾ॒ ರೋಹಿ॑ತಾಯ॒ ಸ್ವಾಹಾ॒ ಶೋಣಾ॑ಯ॒ ಸ್ವಾಹಾ᳚ ಶ್ಯಾ॒ವಾಯ॒ ಸ್ವಾಹಾ᳚ ಶ್ಯಾ॒ಮಾಯ॒ ಸ್ವಾಹಾ॑ ಪಾಕ॒ಲಾಯ॒ ಸ್ವಾಹಾ॑ ಸುರೂ॒ಪಾಯ॒ ಸ್ವಾಹಾ ಽನು॑ರೂಪಾಯ॒ ಸ್ವಾಹಾ॒ ವಿರೂ॑ಪಾಯ॒ ಸ್ವಾಹಾ॒ ಸರೂ॑ಪಾಯ॒ ಸ್ವಾಹಾ॒ ಪ್ರತಿ॑ರೂಪಾಯ॒ ಸ್ವಾಹಾ॑ ಶ॒ಬಲಾ॑ಯ॒ ಸ್ವಾಹಾ॑ ಕಮ॒ಲಾಯ॒ ಸ್ವಾಹಾ॒ ಪೃಶ್ಞ॑ಯೇ॒ ಸ್ವಾಹಾ॑ ಪೃಶ್ಞಿಸ॒ಕ್ಥಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 40 ॥
(ಕೃ॒ಷ್ಣಾಯ॒ – ಷಟ್ಚ॑ತ್ವಾರಿಗ್ಂಶತ್) (ಅ. 18)
ಓಷ॑ಧೀಭ್ಯ॒-ಸ್ಸ್ವಾಹಾ॒ ಮೂಲೇ᳚ಭ್ಯ॒-ಸ್ಸ್ವಾಹಾ॒ ತೂಲೇ᳚ಭ್ಯ॒-ಸ್ಸ್ವಾಹಾ॒ ಕಾಣ್ಡೇ᳚ಭ್ಯ॒-ಸ್ಸ್ವಾಹಾ॒ ವಲ್ಶೇ᳚ಭ್ಯ॒-ಸ್ಸ್ವಾಹಾ॒ ಪುಷ್ಪೇ᳚ಭ್ಯ॒-ಸ್ಸ್ವಾಹಾ॒ ಫಲೇ᳚ಭ್ಯ॒-ಸ್ಸ್ವಾಹಾ॑ ಗೃಹೀ॒ತೇಭ್ಯ॒-ಸ್ಸ್ವಾಹಾ ಽಗೃ॑ಹೀತೇಭ್ಯ॒-ಸ್ಸ್ವಾಹಾ ಽವ॑ಪನ್ನೇಭ್ಯ॒-ಸ್ಸ್ವಾಹಾ॒ ಶಯಾ॑ನೇಭ್ಯ॒-ಸ್ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 41 ॥
(ಓಷ॑ಧೀಭ್ಯ॒ – ಶ್ಚತು॑ರ್ವಿಗ್ಂಶತಿಃ) (ಅ. 19)
ವನ॒ಸ್ಪತಿ॑ಭ್ಯ॒-ಸ್ಸ್ವಾಹಾ॒ ಮೂಲೇ᳚ಭ್ಯ॒-ಸ್ಸ್ವಾಹಾ॒ ತೂಲೇ᳚ಭ್ಯ॒-ಸ್ಸ್ವಾಹಾ॒ ಸ್ಕನ್ಧೋ᳚ಭ್ಯ॒-ಸ್ಸ್ವಾಹಾ॒ ಶಾಖಾ᳚ಭ್ಯ॒-ಸ್ಸ್ವಾಹಾ॑ ಪ॒ರ್ಣೇಭ್ಯ॒-ಸ್ಸ್ವಾಹಾ॒ ಪುಷ್ಪೇ᳚ಭ್ಯ॒-ಸ್ಸ್ವಾಹಾ॒ ಫಲೇ᳚ಭ್ಯ॒-ಸ್ಸ್ವಾಹಾ॑ ಗೃಹೀ॒ತೇಭ್ಯ॒-ಸ್ಸ್ವಾಹಾ ಽಗೃ॑ಹೀತೇಭ್ಯ॒-ಸ್ಸ್ವಾಹಾ ಽವ॑ಪನ್ನೇಭ್ಯ॒-ಸ್ಸ್ವಾಹಾ॒ ಶಯಾ॑ನೇಭ್ಯ॒-ಸ್ಸ್ವಾಹಾ॑ ಶಿ॒ಷ್ಟಾಯ॒ ಸ್ವಾಹಾ ಽತಿ॑ಶಿಷ್ಟಾಯ॒ ಸ್ವಾಹಾ॒ ಪರಿ॑ಶಿಷ್ಟಾಯ॒ ಸ್ವಾಹಾ॒ ಸಗ್ಂಶಿ॑ಷ್ಟಾಯ॒ ಸ್ವಾಹೋ-ಚ್ಛಿ॑ಷ್ಟಾಯ॒ ಸ್ವಾಹಾ॑ ರಿ॒ಕ್ತಾಯ॒ ಸ್ವಾಹಾ ಽರಿ॑ಕ್ತಾಯ॒ ಸ್ವಾಹಾ॒ ಪ್ರರಿ॑ಕ್ತಾಯ॒ ಸ್ವಾಹಾ॒ ಸಗ್ಂರಿ॑ಕ್ತಾಯ॒ ಸ್ವಾಹೋ -ದ್ರಿ॑ಕ್ತಾಯ॒ ಸ್ವಾಹಾ॒ ಸರ್ವ॑ಸ್ಮೈ॒ ಸ್ವಾಹಾ᳚ ॥ 42 ॥
(ವನ॒ಸ್ಪತಿ॑ಭ್ಯಃ॒ – ಷಟ್ ಚ॑ತ್ವಾರಿಗ್ಂಶತ್) (ಅ. 20)
(ಪ್ರ॒ಜವಂ॑ – ಬ್ರಹ್ಮವಾ॒ದಿನಃ॒ ಕಿ – ಮೇ॒ಷ ವಾ ಆ॒ಪ್ತ – ಆ॑ದಿ॒ತ್ಯಾ ಉ॒ಭಯೋಃ᳚ – ಪ್ರ॒ಜಾಪ॑ತಿ॒ರನ್ವಾ॑ಯ॒ -ನ್ನಿನ್ದ್ರೋ॒ ವೈ ಸ॒ದೃಂ – ಮಿನ್ದ್ರೋ॒ ವೈ ಶಿ॑ಥಿ॒ಲಃ – ಪ್ರ॒ಜಾಪ॑ತಿರಕಾಮಯತಾ ಽನ್ನಾ॒ದಃ – ಸಾ ವಿ॒ರಾಡ॒ – ಸಾವಾ॑ದಿ॒ತ್ಯೋ᳚ – ಽರ್ವಾಂ – ಭೂ॒ತ – ಮಾ ಮೇ॒ – ಽಗ್ನಿನಾ॒ -ಸ್ವಾಹಾ॒-ಽಽಧಿನ್ – ದ॒ದ್ಭ್ಯೋ᳚-ಽ – ಞ್ಜ್ಯೇ॒ತಾಯ॑ – ಕೃ॒ಷ್ಣಾ – ಯೌಷ॑ಧೀಭ್ಯೋ॒ – ವನ॒ಸ್ಪತಿ॑ಭ್ಯೋ – ವಿಗ್ಂಶ॒ತಿಃ)
(ಪ್ರ॒ಜವಂ॑ – ಪ್ರ॒ಜಾಪ॑ತಿ॒ – ರ್ಯದ॑ಛನ್ದೋ॒ಮಂ – ತೇ॑ ಹುವೇ ಸವಾ॒-ಽಹ – ಮೋಷ॑ಧೀಭ್ಯೋ॒ – ದ್ವಿಚ॑ತ್ವಾರಿಗ್ಂಶತ್)
(ಪ್ರ॒ಜವ॒ಗ್ಂ॒, ಸರ್ವ॑ಸ್ಮೈ॒ ಸ್ವಾಹಾ᳚)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಸಪ್ತಮಕಾಣ್ಡೇ ತೃತೀಯಃ ಪ್ರಶ್ನ-ಸ್ಸಮಾಪ್ತಃ ॥